"Pa naman e! Magdo-dorm na lang ako. Kasama ko naman sina Pier at Arjhel. Kilala niyo naman ang mga kaibigan kong 'yon 'di ba? Isa pa't napag-usapan na namin iyon." Tungayaw ko kina Papa at Mama.
Ayaw nila akong payagan na mag-dorm. Ang gusto nilang mangyari ay doon ako makitira kay Tito Gregory habang nag-aaral sa kolehiyo.
Si Tito Gregory ay isa sa mga kaibigan ni Papa. Maliban dito, katrabaho niya ito. Pareho silang engineer sa isang construction company sa General Santos City. Ang bahay nito ay walking distance lang sa kung saang unibersidad ako papasok.
Ang nakakatanda kong kapatid na si Kevin ay doon nakitira noong nag-aaral ito at gumradweyt with flying colors despite of being a trouble maker in his high school years. Napatino daw ito ni Tito Gregory. Strikto kasi ito at takot si kuya rito. Kaya gusto ni Papa at Mama na do'n din ako tumira. Alam nilang hindi ako katulad ng kapatid ko pero mas mainam nang makasigurado raw sila. Mas madali nila akong mamomonitor.
"Huwag ka ng magpumilit, napag-usapan na natin 'to." Mahinahong sagot ni Papa pero bakas na sa mukha niya ang pagkainis. Kaharap pa niya ang isang blue print at pinag-aaralan ito.
"At mamaya mo na ako kausapin. Nakikita mo naman sigurong busy ako 'di ba?"
"Hindi ko naman sisirain ang tiwala niyo, Papa e. As if gagawa ako ng ikakagalit niyo. Promise kong makakapagtapos ako with flying rainbow colors." Nagtaas pa ako ng kanang kamay.
Tinaasan lang ako ng kilay ni Papa. Napasimangot ako.
"Payagan niyo na kasi akong mag-dorm. Wala ba kayong tiwala sa 'kin?!" Giit ko pa.
Pursigido talaga akong mag-dorm dahil nakapangako na ako sa mga kaibigan ko. Gusto ko rin maging independent na isang kembot lang ay 18 na ako.
Nakakaintimidate kaya si Tito Gregory. Nakadagdag pa ang buhok nitong mahaba, makapal na bigote at balbas sarado pa.
Sabi ni Kuya, napakaistrikto daw niyon at hindi pwedeng labagin lahat ng sinasabi. Pero mabait naman daw ito pagdating sa ibang bagay. Sa katunayan, tinutulungan pa siya nito sa mga assignments at projects niya. Engineering din kasi ang kinuha niya at ngayon na nakapasa na rin sa board exam, nagtratrabaho na siya sa parehong kompanya na pinagtratrabahuan nito at ni Papa.
"Sayo may tiwala ako pero sa ibang tao at sa magiging paligid mo, wala. Ano ba kasing pinag-aarte mo? Mabait ang Tito Gregory mo at maganda pa ang bahay. Libre na lahat. Kuryente, tubig at pagkain. Saan ka pa hahanap ng ganoon sa panahon ngayon? Mag isip-isip ka nga. Atsaka isipin mo kami ng Mama mo. Marami tayong gastusin sa bahay lalo pa't malaki ang nabawas sa savings namin na sa iyo rin napunta dahil pabalik-balik ka ng ospital dahil sa pagkakadengue mo."
Napasimangot ako. Nangungunsensya pa itong si Papa e. Kasalanan ko bang sakitin ako?
"Mababa lang naman 'yong bayad sa dorm Pa e. Atsaka 'yong pagkain at mga utility bills ay paghahatian naman naming magkakaibigan." Hirit ko pa.
"Makakasama mo rin 'yang mga kaibigan mo sa eskwelahan. Maging praktikal ka naman kahit minsan!"
Napapiksi ako ng bahagya sa pagtaas ng boses ni Papa. Alam kong galit na siya. Kilala kasi siyang kalmado at mahinahon sa lahat ng bagay. Mukhang naubos ko ang pasensya niya.
Biglang sumulpot sa kung saan si Mama at tinanong kung ano ang komosyon. Si Papa ang nagsiwalat. Nang marinig ang pinagsisintir ko, nakapamaywang na hinarap ako ni Mama.
"Gusto mo bang mag-aral o hindi?" Tanong ni Mama sa kontroladong boses. Kabaligtaran naman siya ni Papa. Talakera at makabasag pinggan. Ihahanda mo talaga ang kalasag kapag siya na ang ngumangawa. Kaya nagulat talaga ako ngayon dahil himalang kalmado si Mama. Pero mas nakakatakot kapag ganito siya.
