#ولد_عمي ( الجزء الثالث من سلسلة اقرباء ولكن )
الفصل الخامس
*عدى الصافي لحوش خاله رواد بيش يحكي مع وتين بعد مابلغتهم كيان انها موافقة واستغرب الصافي موافقتها وبعد السلام والترحيب مع وتين وهلها والصافي عليهم وقدمو الضيافة خلى رواد وكيان الصافي مع وتين برواحهم يحكو مع بعض*
وتين .. كيف تبيني يا الصافي وانت عارف نا لمن كنت
الصافي .. اولا نا والله مانعلم ان امي كلمت خالتي كيان هذا اولا وماعطتنيش علم الا بعد ماحكت معاها واما ثانيا كيف انتي وافقتي تنخطبي ليا وانت عارفة انك مستحيل تنسي بسرعة
وتين بتنهيدة .. طبعا مستحيل نكذب عليك لكن بنقولك ان عبدو مازل الهواء اللي نتنفسه لكن خلاص هو معاش يبيني ونا بنشوف روحي ومش حنلقى احسن منك انسان اشتغل على روحه وتحمل المسوؤلية بدري ورغم انك منتسب جبتها بترتيب الثاني على جامعتك
الصافي .. يعني تبي تنسي بيا عبدو
وتين .. ليش فهمتها هكي مش ننسى بيك عبدو لكن ليش انت ماتكونش السبب اللي يخليني ننساه
الصافي .. تعرفي قديش نحب انك صريحة ونا مش حنكون اقل منك صراحة حتى نا فرحت ان امي طلبت ايدك ليا لان انتي نفس وضعي حتى نا نبي ننسى عندي حب عذب قلبي فياريت نقدر ننساه
وتين .. خلاص امنا نحاولو انسو بعض ولو ماقدرناش كل واحد يسيب الثاني بكل رحابة صدر
الصافي .. متفقين وحنخلوها خطوبة بس عشان لو ماقدرناش مافيش ضرر
وتين .. تمام بس سؤال نقدر نعرف من تحب
الصافي .. يجي وقت وتعرفيها
وتين .. ان شاءالله
الصافي .. شنو رايك انديرو خطوبتنا مع زين ورحيق الخميس الجاي
وتين .. قصدك بعد ثلاثة ايام
الصافي .. لو تحبي
وتين .. مع ان السبت بيكون اول امتحان ليا لكن تعرف خليني نشوف هلي وجدو وحنينة ونبلغك
الصافي .. بالتوفيق ان شاءالله في امتحاناتك تمام معناها تو نطلع عشان نكلم امي وباتي يجو بكرة يخطبوك رسمي
وطلع الصافي من عندهم وهو متمني فعلا ان وتين تقدر تنسيه حبه وطلع لرفيقه ناصر زي العادة بعد ما اتصل بامه وبلغها بموافقة وتين
*روحت رحيق للحوش وهيا متأثرة بجد من حلقة البرنامج*
ماما .. كنك رورو
رحيق .. مافي شئ ماما
على خشت زين .. طالما عارفة روحك انك بتتأثري هكي ليش طرحتي موضوع زي هضا
رحيق .. لاني نبي نعطي للناس فرصة تسامح
زين .. وانتي رورو
رحيق .. انا شنو
زين .. تقدري تسامحي
رحيق .. مانيش قايلة حاجة مش حاسة بيها لكن نا نقول مافيش حاجة تستاهل انك تعبي قلبك بالزعل من اشخاص غلطو في حقك لان مرات في اسباب للغلط هضا
زين بنظرة ونبرة صوت مافهمتش رحيق شنو وراها .. يعني لما تقتنعي بالسبب ترضي وتسامحي
رحيق .. لا يا زين حتى شخص غلط فيا مهما كان الغلط نسامحه حتى بدون مانقتنع بالسبب لان مافيش حاجة مستاهلة نعبي قلبي بحقد وكراهية
زين ومسك ايدها .. تعرفي يا رورو قلبك هضا ياريت منه واجد كنهدا رانا في الف نعمة
رحيق بغرور مصطنع وحولت ايدها من ايدين زين خايفة يخش الصافي يسمعهم محاضرة عن الحلال والحرام هما حافظينها كويس .. ربي خلقني نا بس وكسر القالب
خلود بضحكة .. تواضعي يا بنتي
زين بحب .. الغرور انخلق ليها هيا وبس
رحيق ومستغربة غزل زين .. اووووه اليوم زين راضي عليا
زين بضحكة كبيرة .. ماهو نهون في اللي جاي
رحيق بخوف .. شنو في زين رد بالك تقولي الصافي بيعاقبني على حلقتي اليوم بالذات ان المتصلين كلهم رجالة
*زين ضحك نين عيونه دمعو*
CZYTASZ
( سلسلة اقرباء ولكن) الجزء الثالث بعنوان ولد عمي
Short Storyسلسلة اقرباء ولكن سلسلة متصلة ببعض وعشان تفهم الجزء الثالث لازم تكون قاري الاول والثاني التنزيل يومي باذن الله كالعادة
