لا تحسب الي جرالي بالهوى كسر الغصن؛ عايش ولو طارت عصافيره

الجزء الثاني👏

البارت الثاني ..
واتمن تفااااعلكم ..

...................

الجزء الثاني
وفي امريكا وفي شقه في ولاية فلوريدا ..
ضاري توه جالس من النوم ... بعد مالجوال فضت بطريته .. وهو يرن للمنبـه .. وضاري يحطه على (غفوه)...

قام طلع الصاله ... شعره صاير حوسه .. ويطالع بنص عيون ..:
غيوث وش مسوي لنا فطور الليوم ..
غيث يصب في كاسات الأندومي مويه : اندومي ..!! بالدجاج ..
ضاري بوجه واحد بيستفرغ : الله يحوم كبدك .. والله بيستوي دود في بطني من كثر ماآكل أندومي .... عـــــاد على الصبح ..!!!
غيث: لايكون انا حرمتك وانا ماأدري ... وش رايك تبيني اسوي لك شكشوكه ولا أومليت .. ولا وش رايك احط لك شنقليش ومش ..
ضاري : تطنز ياحلايا البطه .. امس يوم الفطور علي .. ماكني مسوي لك بيض مسلوق .. لا ولافهم لك في سندويش ..وحاط لك شطه ...
غيث: طس بس هنـاك ... البيض خلص والجود من الموجود ...تبي ولاذبه في زباله ..
ضاري ومعدته تطلع اصوات : لاحرام تبينا ننمحق .. ارمي النعمه في زباله ..
وراح تغسل وجا ياكل .. وهو يحوس ويجهز كتب الجامعه ..
غيث كان مشغل التلفزيون .. وماسك الرموت : ضروي الله يعافيك .. ببسي ولاكولا من الثلاجه ...
جاب ضاري علبتين وجلس ..: تصدق غيوث .. لازم اذا رجعنا للسعوديه نسوي غسيل معده .. ياخي اشتقت للحنيني والمرقوق .. والعصيد والهريس ...
غيث باتستهزاء : الأخ نفاس وانا ماأدري ..
ضاري : والله اذا اني بصير نفاس .. وبيجيبون لي ذا الأكلات .. ياحييييه ..!!!!
غيث :والله انا ودي بمندي ابو مشاري في الأستراحه ...
ضاري : ياويل حالي .. والله من زمان عن الشله ..
غيث : مابقى الا القليل .. ونرجع وانشالله بشهادات ترفع الراس ..
ضاري : ايه وتتزوج انت بنت العم ..ونفرح فيك ...
غيث مستاء : الله يغثك على ذا الطاري من صباح الله خير ..
ضاري وهو يضحك : انا ماأدري وش هولا انت تتضايق كذا .. المفروض تفرح بيعرسونك ..طقطقه ووناسه .. ويصير عندك حرمه .. شريكة الحياه .. والمنزل .. والفراش ...
غيث : ورى ماتتزوجها انت أجل ..
ضاري : اقول لايكثر بس البنيه مسمينها لك .. من يوم كانت نونو ...تبيني اجي اللحين أخطبها ..
غيث : عادي انا متنازل عنها لك ...
ضاري : هي انت ياقليل الخاتمه ..لايسمعك عمي .. والله يذبحك زي خروف العيد ...
غيث : تصدق ضروي ..انا ودي اكمل دكتوراه .. بس عشان اطول المده .. ماتدري وش يصير .. الوكاد تتفركش ذا الزواجه ..
ضاري : الله يكافينا الشر .. لاتفاول بالشينه ..وش قصدك .. حد يموت مثلا ً منكم ..لأن دامكم على وجه الأرض مافي فكه ..
غيث : ابي افهم القلب ذا .. مـاحد عليه منه ..يختار مايختار .. هم اللي يختارون ..
ضاري : عاد ا نت الله يهداك .. اختيارك مثل وجهك ... رايح تحب لي وحده من النت ..ملتقي بها في منتدى ... لاعمرك شفتها ولاسمعت صوتها ..
غيث : ماله داعي اشوفها او اسمع صوتها ..هذا ان دل على اخلاقها .. وان حبنا شريف وعفيف ..
ضاري : يابوي حتى لو... انت وشلون بتوصل لها .. وش بتقول لأهلك ,, واهلها .. لاتستبعد اذا اهلها ذبحوها ... تبي انت تجني على البنت ...
غيث : انا لوعندي مجال اخطبها ... ولا اهلك ذا المعقدين عطوني الفرصه .. انا باللقى حل .. بس الأبواب مسكره في وجهي ..
ضاري : ماتدري وش الخيره فيه غيوث .. واللحين قم لانتأخر .. ترى اول محاضره عند الدكتور ابوكرشه ..
غيث يضحك : لايسمعك والله يسقطك في الماده ..
ضاري قام للغرفه عشان يبدل : ماختقيت الا به .. حلايا الفقمـه ...
غيث يضحك ويحمد ربه ان ضاري معه ويخفف عنه ..