السر القديم

26-32

خميسكم سعيد يا رب

#السر_القديم٢٦
شهد السلمان

من كعدت مستوعبت كل اللي صار وياية غيبوبتي الطويلة حملي وجود الكل حواليا وكأنه مصار شي ولا جانت اكو اي مشكلة
استحي اباوع بوجههم و باعتباري تعبانة ومحتاجة للراحة جنت كل ما يفوتون اغمض عيني او تاخذني الصفنة حتى ما اشوف نظراتهم
الي او احس باشمئزازهم مني ويمكن لوما حامل بطفل راجع الهم مجانو اليوم موجودين وياية او يمكن جنت اتحسس زيادة ...

اول ما عرفت انه راح اطلع اليوم من المستشفى حجيت ويا امي حتى تصر ابقى يمها ومن حجت ليث مقبل وكاللها هو يداريني فرجعت طلبت منة يوديني بيت اهلي ما اعترض ووداني
مكدرت اصعد جنت احس بتعب وكانو صاعدة جبل مو درج راحت امي وحضرت الغرفة الجوة حتى انام بيها وهي تنام يمي ع السرير الثاني
رجعو اهل ليث حتى يرتاحون و بقى ليث ميقبل يرجع وياهم ولا يروح بيتنا يوكلني ويهتم بية وينطيني الدوا على موعدة
و بقى عدنا لليل امي مخلتة يروح ونومتة يمي وهي راحت تصعد بغرفتي
وتنام
اتظاهرت بالنوم حتى لا يحجي شي وياية برغم اصلا ميخاطب لسانة لساني
بس جنت خايفة منة كلش ومن كلامة بعد اكثر الله اعلم شنو ببالة هسة وفاجئني صوتة بوسط ظلام الغرفة
- اعرف بيج منايمة وكاعدة وحتى دتفكرين بالسالفة
- انت مستعد تسمعني ؟
- حاليا لا لان اهم شي صحتج بس بعدين ما اعرف
- ليث دتشك بية ؟
- اجذب عليج اذا كتلج لا
- تتوقع اكدر اخونك او اجرحك ؟
- ما ادري تمارا الشي اللي واجهتة مو هين و محد يكدر يتقبلة وانت كذبتي او ضميتي ما اعرف ..
- حقك
- تمارا انت صدك تعرفي من قبل لا نتزوج ؟؟
- اي
- وهو جان يعرف بيج انه انت مرت اخو يقين ؟؟
- ع الاغلب لا حسب كلامة كالي اني مجنت اريدها بس من شفتج كرايبهم ومرت اخوها اصريت عليها
- ااااخ يا تمارا
- سلامتك
- اتمنى اغمض وافتح عيوني والكى اللي صار مجرد حلم او كابوس
- ليث اكدر اطلب منك شي
- شنو ؟
- احنا مراح نكدر نكمل بهذا الزواج ابد اريد ننفصل بالمعروف مثل ما ارتبطنا بالمعروف
- اذا انفصلنا ترجعيلة ؟
- انفصالنا مالة علاقة بعمر او غير عمر اللي صار بعلاقتنا شرخ جبير وصلنا لمرحلة بابها مسدودة والثقة اذا راحت مترجع بعد حتى لو اكو حب و ود بين الطرفين
- محبيتيني بسبب عمر جنتي بعدج تفكرين بي ؟
- جنت اكرهة
ما انكر..  افكر بي بس مو بدافع حب او حنين بالعكس تماما
- ليش ؟؟
- اريد انام كلش نعست
- تنهزمين من الجواب ؟

نامت بدون متجاوب تذكرت تاثير الدوة اللي اخذتة جان بي مهدئ واساسا تمارا اي علاج تاخذة تنعس ومتحس الا هي ونايمة ...

كلام تمارا صحيح حتى لو عرفت الحقيقة ما اتوقع راح ترجع علاقتنا مثل اول كل شي اختلف
خلال الاشهر اللي بقت لحملها بقيت اروح واجي عليها حتى اشوف احتياجاتها وطلباتها وطبعا هي متريد شي حتى لو رادت متحجي
اوديها للدكتور حسب جدول مراجعاتها وهكذا بس اللي بيناتنا صار كأنما واجب وانبنى بيناتنا حاجز جبير كلش ..