خطوات نحو الجحيم

البارت 38+39+40 والاخيررررررررر

مخلد:-لحظه اكفيلي دقيقه شنو يعني مو واعيه.. شمسويلج هذا الغيره سز.. مشربج عرك لو مكبسلج..

-صفنت بوجهه و بقيت حايره شلون اداري الجواب....

-شو صفنتي.

-مخلد تعبانه والله.. يعني شوقعني جنت مريضه والكلب استغل مرضي ووقعني على الاوراق..

شعرفني يطلع هيج نذل ..

-هسه عرفتي نذل لجين..

-اخذت نفس ودرت وجهي.. ما رديت..

-زين وشسويتي..

-رفعت عليه قضيه ان هو وقعني على الاوراق بالخدعه.. وهو منهزم وديلاحقو..

-الشرطه لا تحمي المغفلين ما اعرف .. احس الشغله مو مفهومه..

حجت عمتي.. خاف القوانين هناك بلبنان تختلف عن هنا..

مخلد:- ما اعرف والله .. هناك شلونها القوانين

-ما رديت عليه.. مددت على رجل امي.. باس ابنه وكاله حمودي سلمت على عمه لو لا..

روح بوسها.. اجه باسني بخدي.. ابتسمتله.. ومسحت على خده فدوه حبيبي الله يحفظك..

زمن مرت مخلد جانت واكفه بالباب.. كتلها مو سمعت صار عندج بعد ولد لاخ..

كالت اي.. محمد.. عمره 6 اشهر..

حاجتها امي.. صدك هسه انتي حامل..

زمن:- اي عليه 3 اشهر..

الام:- يا داده ابنج بعده صغير شلج بي حبلتي

زمن:- اني.. غير مخلد.. مذممني ما استخدم شي

هو مغلس ع الحجي مسوي نفسه يلعب ويه ابنه ويحجي وياه.. من سمع مرته حجت هيج..

مخلد:- هو مو صوجكم.. صوج الكاعد يمكم الا اليكعد يم النسوان شيحصل غير السوالف البايخه.

صاحت عمتي.. يا بايخه ولك انطي للبنيه فنتك.. شلها بالجهال.. هز ايده وطلع ما رد..

ردت عليها عمتي شلج بي بره.. شنو تجيبين وتكومين..

زمن:- عمه ما يقبل يكول احنه المن متزوجين غير نخلف هي هاي الحياة الزوجيه..

كرجيه:- شبيج يا صبيحه رجال متمكن وعنده خير ليش ما يخلف.. عسى ما يجيب 10.. هو الاحسن..

امي:- يا كرجيه هي بس خلفه.. دتخلف بشر مو حيوانات.. يحتاجلهم تربيه اعتناء مو بس جيب وخلي بحلكهم.. محد مات جوع.. والعراق وضعه للاسوء..

صار شي لا سامح الله.. يبقون يجرجرون..

گرجيه:- هي هاي بعد سنة الحياة الخلقهم هو يحميهم.

الام:- يا شنو سنة الحياة.. بشر احنه لو بزازين.. خاله نصيحه خلفي هذا وروحي دكتوره شي تمنع حملج

اذا تبقى ع الرياجيل ما عليهم شي.. اسمه مبروك جالك طفل.. و الوكعه براسج..

كرجيه:- يا شنو تكطع خلفة وليدي شحدها .. المن ماخذها يباوعلها ..

شو لا مقصر عليها ولا على وليداتها شيردون يدللون يجيب ويحط بحلوكهم.. شتريد بعد..

الغيرها تتحصر على مخلد.. فدوه الطوله كمره بين الرياجيل.. العافنه تحسرن عليه..

حجت عمتي ها كرجيه خيرج. شوصينا..

كرجيه:- هسه اني حاجيه بس واحد يحجي بخته لجين ما تحسرت على مخلد من عافته.. لو ما خذها هذا حالها

بس هي تعافت ... تستاهل من وكاحتها وعرامتها انتحرت وتصيح ما ريده تالي حوبة وليدي طلعت بيها..

عمتي:- يا كرجيه شنو هلحجي الماصخ.. دسكتي..

امي دنكت راسها منها ما حجت ولا ردت عليها..

كرجيه:- شحجينه يا صبيحه.. كلمة الحك ما تنراد.. تكبرت عليه تالي الله كاللها اصبري .. وهسه هي تتمنى مخلد بداخلها ومتندمه جي ما خذته..

اني اذا الحايط رد.. اني رديت.. شحجي.. حيل وياي استاهل الشماته.. الزامطت بيه باعني شريد احجي بقيت بس مدنكه راسي..

بس عزة الدمعه بعيوني.. ما نزلتها بس اختنكت بالعبره... من كلامها..

حجت وياها بنتها.. يمه شجاج مرته منا كافي قبل يومين اجت هم ترديلهم مشكله..

زمن:- لا عوفيها تعودت على حجي عمتي بعد.. من جانت لجين مو هنا تقارني بيها واطلعني اني والقرده سوه..

وهسه تكلها هاي حوبتها.. والله لو ما عندي جهال وحق الله بكبره اشرد مثل ما شردت لجين واخلص من مخلد وهلعيشه السوده..

حجت وبجت.. ردوها ياااا شجاج انتي الثانيه.. تهدو بالرحمن..

زمن:- هو مخلد بشر ينعاش وياه.. ما لزميني غير هلجهال ذوله والله يا خاله روحي طلعت..

يكعد هيج هيج من اهلج وينام وهو يسب بيهم.. ومن احجي اكله لا تسبهم يصيح تردين بوجهي ويكتلني

من ادافع عن نفسي وارفع ايدي لو ادفعه مني اذا يضربني يكول اتعدت عليه ورفعت ايدها بوجهي ويكلب الدنيا فوك راسي..

لا خلصانه من السان مخلد ولا من السان عمتي والله واحرك روحي واموت..

كرجيه:- ترحيله فدوه بنت الفكر.. لو ما يباوع لحلكج.. شكيتيله مره خليتي ينزل يتخبل علينا شلون نحجي عليج

وراح بيومها عزلج فوك وسوالج مطبخ وهول.. من سواهن الج الخلفج ...

زمن:- لا اريد بيت ولا اريد افلوس ولا اريد اي شي.. متت اريده بس يحترمني.. يغلط ويسب 24 ساعه

ممخليلي اي رأي اعيش واني ساكته شيكول لازم اكول اي حتى لووما يعجبني واذا حجيت تصير مشكله الها اول ما الها تالي..

ولو راد شغله يحسبلي ل3 اذا ما نفذت يكتلني.. يا فلوس يا ملابس اعصابه نار ما تنحمل عيشتيش هاي..

انهدت تحجي وتبجي ويهدون بيها وما تسكت مثل واحد وانفجر.. اني منتجيه ع الحايط ولامه رجليه لصدري واستمع للوضعيه..

كامتلها امي وعمتي يهدون بيها.. امي مسحت دموعها وكالتلها محد يستاهل دموعج والله. صيري قويه اشكال شفنا وتحملنا.. تصير سوالف..

خطيه كسرت خاطري.. تمسح بدموعها وتجري وابنها حمودي وكف كبالها يباوعلها لان تبجي ودموعه يجرن..

مديت نفسي وسحبت ايده وكعدته بحظني.. ليش حمودي الحلو يبجي.. ما يحجي بس يباوع لامه.. ويمسح بدموعه

كاعده يمي طيبه.. كالت خطي والله شايفه الضيم وياه.. اشافت ينطيها فلوس وطلعه ماكو وبس للجهال عيشتها تسكت بهذا و تنوم بهذا ولو راضي

-اخذت نفس.. هو هذا مخلد ما استغرب من الكلام ضرب وغلط وسب رغم طيبة گلبه بس هلصافت عامه عليه.

طيبه:- لج قبل فاتحة عمي بيومين جابوها من اهلها رادت الطلاك.. بس كلها وكفت ضدها.. ما قبلو على مود الجهال

ليش.. دا اسئل بطيبه.. انتبهت على زمن لما جابت اسمي وهي تكول..

والله اباوع اللجين بالتلفزيون شلون حلوه تخبل وعايشه حياتها ومستمتعه اكول حقها من شردت من مخلد هي وين ومخلد وين..

امي:- لا خاله مخلد صدك يضرب ويغلط بس ريت الناس كلها مثل كلبه..

زمن:- خاله امنت بالله.. الشهاده لله لا يقصر بمصرفي لا بمصرف جهال لا بأكلنا لا بملبسنا.. بس خاله ما يحترم..

واحد يكوم يكعد يسب اهلج ع الصغيره والجبيره وتبتلي لو طلعت احجايه.. اقل شي ذاك اليوم..

اجه الضهر تعبان.. محمد مريض يبجي.. صاح طلعي بره اريد انام.. كتله الدنيا بارده وين اخذه هنا مدفيته بالغرفه.

شلون تكولين هيج وتردين بوجهي كتلج كلمه تكولين اي صلفه.... شالني اني وجهالي وشمرني بره الغرفه ويصيح بنت الكلب ما تكول تعبان يريد يرتاح

واني والله خاله ايام ما شايفه النوم من هلطفل وتحملت ونزلت للمغرب يله نزل مبدل وطلع..

اخذت الجهال وصعدتهم.. للعشره اجه.. شلون ممنومه الجهال.. وسب وغلط وصياح .. اكله محمد مريض يبجي واحمد يكعد على صياحه...

ما يفهم. لازم اسكتهم وانومهم.. حتى ينام وراه دوام.. نومت احمد كوه ونزلت جوه منه انوم محمد ل3 كوه يله غفه..

صعدت اول ما خليته بكاروكه فز.. من التعب صرخت بوجه الطفل .. شلون تصرخين بوجهه لزمني من شعري والله ما خله عظم صاحي..

كتلهم اريد اطلك ما اريده.. كلها وكفت ضدي وتصيح عندج جهال.. ما ينحمل والله خاله مينحمل..

هي تحجي وتبجي وامي وعمتي يهدن بيها وكرجيه كوموها منها بناتها كاللها عوفيها مابينا حيل مشكله.. هسه يجي ويتخبل ويسويها هوسه ستري علينا..

لحد.ما كامت زمن اخذت جهالها وصعدت.. دارتلي امي..تهز براسها.. وتكلي شفتي..

- هزيت راسي مو غريبه ماما.. هذا مخلد.. منعرفه قابل اني بس بنت عمه مو مرته جان ايده والضرب وياي والغلط مشهودله.. بنت الكلب ما توكع من حلكه..

-والله يا دادا ما ادري كسرة خاطري.. بس خوش انطتها بوجه كرجيه وردتها العوبه جايه تتشمت بيج على حور ابنها قحط رياجيل وتتمنين مخلد

-ماما اتركي هسوالف.. على كد عقلها.. مو بحالها.. بس مصاب بابا شال راسي.. ما بيه حيل افكر بيها..

دنحجي طبو نسوان .. كعدو بجو بقيت ابجي وياهم.. شويه واجتي مرت مازن كالت كومي

كمت من يمهم رحت للمطبخ.. صابين اكل.. كالت كعدي اكلي.. كتلها ما اريد مشكوره..

-دكعدي يمعوده حتى لو بس سوب اشربي يفتح صوتج.. جبرتني اكعد اكل.. الصينيه بيها صحن ثريد وعليه لحم..

وتمن عليه حشو وشعريه ولحم.. وكاسة سوب وزلاطه.. ابتسمت شكد مشتاقه لهيج كعده عراقيه وصينيه وبالكاع..

وريحة الاكل العراقي والتشريب تموت رغم ما احب اللحوم.. وما الي نفس بالاكل.. لزمت الخاشوكه وكمت اشرب بالسوب مال اللحم.

حار يريح بلاعيمي.. دا اشرب.. انعصرت امتوني صحت ااااخ.. كعد مازن يمي.. اي شلونج..

-الحمدلله.

-اكلج شو بالقناة اطلعين جنج نانسي عجرم هنا مدري شلونج شو متغيره..

-يا خيي من الخير.. يكله المرض بيك لو بالحايط.

-السلامه ان شاءالله.. وهذا الولد.. شنو علاقتج بيه..

-صديق خطيه وكف ويايه وكفة اخ.. من تركني الكلب وحدي حايره..

-مبين خوش ولد.. بس عفيه شكد مرتب.. شكله ارتب من حياتي..

-ابتسمت.. كعد مخلد.. ولك غير يلمع.. يمكن امه مخلفته بكلنس مثل حالنا بجيس زباله لفونا.. بس ولا حبيته احسه ملعب ويدور نسوان

-شلقضيه.. بالعكس خوش ولد

-هو شيشتغل

-عارض ازياء

مازن:-من هااااااااي مرتب حيل

مخلد:- مو كتلكم ملعب هلطلع عارض ازياء رب اللعب..

-مخلدددد شبيك بطل نظرتك السيئه اتجاه الناس ان بعض اضن اثم

-وانتي ضلي بثولج وابقي صدكي بالعالم وخل يطيح حظج..

-ما رديت عليه.. نزلت راسي منه... مد ايده ياكل هو ومازن وطيبه ياكلون .. واجو جهال مازن.. صاح مخلد كومو منا خلي يصبولكم.. كوووومو

-هاي شبيك.. قابل هم منين.. كعدو حبايبي خل ياكلون..

-ولج يبقون يلوطون بالاكل ..

-خل ياكلون بالعافيه.. دا اكل وابن مازن صفن بوجهي.. ابتسمتله.. جان يكول انتي حلوه.. صحت يحبيبي مو بحلاتك.

ضربه مخلد على علباته.. كوم ابن المطي من هسه يدور حلوه ومو حلوه..

مازن:- شرايد منه.. انعجبت بيها بابا تره تحل عليك وبلايا رجل هسه تريدها كدامك..

لجين:-لك لا مازن لتزرع بعقله هيج سوالف.. هو يا صف..

علي- اني صف اول ابتدائي..

-يفدوه.. شتصير من تكبر

-اصير معلم

-يحياااتي فدوه شلون يحجي.. دا احجي هيج جان ينطينياها بوجهي والله انتي حلوه اني احبج..

مازن وطيبه خربو ضحك.. طيبه اشرتله وهي تضحك.. وتكله لمازن حب من الطفوله بيمن يذكرك.

مازن:- ههههههههههه يذكرني باللي انضرب بوري..

مخلد:- هز راسه وابتسم..

-اني منطيت اي تعبير غلست.. بقيت اشرب..

مازن:- خرب يومج طيبه خجلتيهم..

مخلد:- خرب بأعراضكم اذا عدكم شرف جاي ناكل ليش تخلوني اهينكم..

طيبه:- ها مخلد شبيك منو يمك دنقصد على علاوي ولجين هو مو يحبها..

-لزمت خشمه لعلاوي وكتله فديته للي يحبني.

مخلد:- طاح حظك عمو.. الله يكون بعونك..

حجاها وكام.. وهم يضحكون.. دك جهازي.. حجه مازن شنو عندج خط عراقي..

-اي من يم المطار اشترى جياد.. كمت من يمه.. ورحت للترك.. كعدت على قنينة الغاز وجاوبت جياد..

جياد:- شو كيفك..

-الحمدلله زينه..

-صار المغرب بدي روح بس ما فيني اتركك ضل بالي يمك.. اخذتي علاجك..

- هسه راح اخذ..ليش تروح..

-خطي قالولي الليله بتضل عنا.. بس مبعرف مبحس بالراحه..

-اهاا .. شكد اجازتنا

-لبعد بكرا..

-ما بيها تمديد..

-ما فينا القضيه بتحكمك لازم تكوني شاهده فيا.. ودلي باقوالك.. ومتنسي بنتك..

-اخذت نفس.. ان شاءالله..

-لجين متعبي حالك كرمالي.. ارتاحي اد ما بدك..

-تسلملي.. ما اعرف شلون اشكرك.. يعجز الساني صدكني.

-ما بيناتنا شكر ولو.. اخدي راحتك ومتنسي علاجك.. لما بدي روح انا بخبرك..

-ان شاءالله... قفلت منا.. وبقيت اباوع بالموبايل.. اجه عمي عثمان.. حظني.. ها بنتي شلون صرتي..

-هزيت راسي..

-لا تزعلين ولا تهتمين من الصبح باجر اخذج لكبره..

-عمو جنت اتمنى اشوفه واحظنه والله مشتاقتله.. بجيت

-حظني لصدره وباس راسي .. بنيتي حبيبتي ترحميله كلنا على هلطريق.. لا تبجين .. بس عمو ليش هيج ضعفانه شبيج..

عضماتج طالعات..

-من المرض عمو..

-شبيج خير..

-التهاب الكبد والكلى عندي متأذايه..

-متستاهلين عاد انتي ورده..

-تسلملي عمو..

-ترحين وياي لبيتي..

- وين متبقى ماما ابقى وياها..

-امج هنا تبقى علمود سبعة ابوج باجر.. تعاي انتي ارتاحي حللي ..

-عساك سالم عمو الله يحفظك ويخليك..

-حبيبتي والله يا عمو شكثر وصاني بيج المرحوم بالمستشفى واخر كلماته يصيح بنيتي دير بالك عليها بنيتي..

دنكت راسي ونزلت دموعي.. طلعت امي.. اخذتني بحظنها.. لا تبجين حبيبة قلبي.. والله دموعج ييمه مثل النار احسها على كلبي..

حظنتها حيل وزدت بالبجي.. ما اكدر اكلها لو تشوفين حالي هناك بالغربه شلونه.. دموعي والمطر يجرون سوه

بقيت حااظنتها وابجي.. اجت عمتي باستني وعمي عمران هم كال.. هاهيه عمو كولي الحمدلله.. وارضي بقدره.. الله يصبرج..

حجه هيج.. انفجرت بالبجي وحجيت والله عمو راضيه بقدره بس تعبت.. اريد بنتي.. والله مشتاقه لبنتي..

ماما بس اريد اخذها بحظني واشمها وارتاح.. صار شهر وفوك كلبي نار عليها .. ما اعرف وينها اريدها ماما اريد بنتي

دمعت عيونهم عمامي وكامو يغلطون ويدعون على مالك.. وامي دموعها وي دموعي وتمسح بوجهي
وعمتي تمسح على راسي وهم تبجي وياي..

بهلموقف وصاحو من برا.. اجو رياجيل ونسوان.. كلهم مشو.. اخذتني امي غسلتلي وجهي .. ونشفته وعدلت شعري والشال وكالت تعاي نطب .

كعدت ويه النسوان بجي ونعي وادور صبو عشا.. بقينا لل10 بليل.. ناس طشت وناس نامت بايته عدنا..

طب مازن.. كتله جياد راح... كال لا فرشناله بالغرفه راح ينام..

-هااا.. تانيت هدء البيت.. ورحت لجياد.. لكيته وحده كاعد بالغرفه وحده.. ويباوع بموبايله.. هااا

-اهلين واخيرا شفناكي..

-التهيت وياهم.. ناس هواي تعرف..

-بعرف بعرف.. ما تركوني روح.. بئيت هون.. شكلك صاير حلو بالحجاب والثوب الطويل..

-ابتسمتله.. هاي عاداتنا بالعزاء لازم ثوب وحجاب..

-عادات حلوه.. بس خبريني.. ما حكو معك..

-حجه مخلد.. وكتله المختصر وخلص بعد ما سئلوني يمكن مخلد شرحلهم..

-مخلد ابدا ما حبيتو بعتذر بس ما بعرف.. ما حبيت اسلوبو...

-شلون يعني..

-بيغلط كتير.. وكلامو بلا زوء لك بينادي لابن خيو ابن الكلب..

- ابتسمت لا خوش ولد بس هو السانه متبري منه. بس من تعاشره تحبه.. دا احجي طب مخلد..

-انتي شعندج كاعده هنا..

-صارت صرخته وطبته بنفس اللحظه. بقينا اثنينا نباوع عليه.. جيت احجي شوي وي جياد قبل لا انام..

-اكلج تره هنا العراق بويه مو تكساس..

-اي كايمه شبيك

- فيك ما تصرخ لو سمحت.. وانا وياها رفئات عم بطمن عليها مش مستاهله كل هلعجئا

مخلد:- الحجي مو وياك لا تدخل وهاي رفئات نكعها واشرب ميها ما تمشي يمي

-مخلد شبيك.. عيب.. حجيت.. دفعني بثنين اديه للباب وكال امشي لج تعلميني العيب انتي. طبي جوه.. كاعده بتالي الليل ويه رجال غريب

كام جياد بسرعه واجه وكف كدامه
-ما بسمحلك تأزيها بهيدا الشكل.. بئى ياريت تحترم حالك..

-لك انته منو وما تسمحلي هااااا احترم نفسك واكعد وخليني محترمك تره كوه متجرعك

-عن جد بلا زوء.. ما فيني ابئى ..

-راد يطلع صحت جياد.. اعتذر جدا عن تصرفه.. ياريت متزعل..

مخلد:- ولج شنو انتي وتصيحين وره الرجال شو طالعه عينج شالني من ايدي حيل.. ويريد يمشي.. دارله جياد ودفعه عني

مخلد.. اندارله وتلازم وياه من ياخته ويصيح ابن الكلب تدفعنييي.. جياد.. اضربله رجل ووكعه للكاه. وخله ركبة رجله على صدر مخلد وحجه

-مش انا يلي بينئالي ابن الكلب بئى ياريت تحترم حالك.. البنت فاهمه وواعيه مبيحتاج لحدا متلك بيعلمها كيف بيكون العيب والزوء.. ومخلد.يتلاوه وياه

دفعه من صدره ويريد يهد عليه.. وكفت كباله مخلد والله عيب شبيك تخبلت دوخر.. خلي يروح خجلتني كدامه..

براشدي ووخرني من كدامه.. طب مازن بسرعه. لزم مخلد وطب عمي عثمان وراه... ويصيحون عليه.. لان اتعدى على ضيفه..

يكلهم من اول ما شفته والله ما ارتاحيتله حاط عينه عليها والله .. اكبر نسونجي ويريد يستغلها شافها بليه رجاله والثوله مصدكه هذا صديق..

هو يصيح ويسكتون بي.. جياد طلع فورا بمجرد دخول مازن.. تبعوه كاللهم بعتزر كتير صدقوني مكنت حابب اعمل مشِكله بس البنت مريضه وهو عم يأزيها..

اعتذرو منه وسلمو عليه للباب بعد ما رفض رفض تام ان يبقى.. اخذتني امي ورادت اطببني جوه.. اني دموعي تجري كعدت بالهول ابجي..

حتى لو صديق.. بس عيب يشوف اهلي بهيج وضع.. طب عمو عمران وصاح كله صوجج انتي... شعندج كاعده يم الرجال ما احترمتي

كتله عمو اوك اني غلطت وتناسيت الوضع هنا. اعترف بس مو بهلطريقه يدخل يرزلني كدامه..

اكو شي اسمه اسلوب يطب يصيح لجين تعاي اريدج. وعلى انفراد يعاتبني ويعرفني غلطي مو يصيح عليه كدامه..

الرجال اله فضل عليه ورفض اجي للعراق وحدي لان حالتي تعبانه ورافقني ... يروح يسوي بيه هيج

طب صاح اسمعي لج.. طلعه منا ماكو.. مو عبالج اعوفج ترحين البنان وتلعبين على حل شعرج.. رجلج اكسرها والله.

-ما اكدر اجازتي يومين وراجعه ع بيروت.. وما ابقى هنا لو خلصت قضيتي اطلع للسويد ما ارجع لهنا.

-اكسر رجلج والله .. لا اب لا رجل شنو ما عدنا شوارب مطلكه وتفترين دول براحتج..

-مخلد مو بكيفك بنتي هناك لازم اروح اجيبها

-انعل ابو بنتج.. خلها تروح لابوها .. شنو اول مطلكه تنطي جهالها.. ترحين تربين خلفت مالك الزفره لا نريده ولا نريد بنته.

تطلع مثله كح...... بنت الكو..... اكسر رجلج والله اذا اطلعين منا

-انته من شنو مخلوق تره مو ناقصتك والله بنتي هاي مو بنت مالك.. وما اعوفها واروح لو مدري شيصير..

-دجربي طلعي اذا ما رجلج اكسرها.. ولج عبالج طرن. مكربس دين براسج وفالت وعايفج للكوا......يد تتملعب على راسج..

يحجي واني احجي وعمامي يسكتون بي ويجرون بيه حتى دشداشته من الجر انشكت.. يريد ياكلني النار تكب من عيونه..

كتلها ماما.. كومي امش خل نروح لبيت عمي عثمان دخت هنا والله مو ناقصه بس همي البراسي كافي..

عماتي كامو يصيحون ومازن وعمي كالوله يتيمه ومصاب ابوها احترم.. يكلهم سوتلها زعله حتى تفلت. اعرف سوالفها ما تطلع والله..

-درتله.. اكلك شنو مات ابويه حتى انته تتحكم بيه.. لا تحلم والله نجوم السما اقربلك افتهمت اذا انفصلت مو معناها فرصتك..

والله لو تبقى اخر رجل بالعالم ما ادورك ولا اريدك فك مني تعبت والقران تعبت فك ملييييييت منين الكاها كلولي منين..

من رجلي العار لو من غياب بنتي لو مصاب ابويه لو امراضي

وين ما اروح المصايب كبالي شمسويه بحياتي وهلكد متعوسه.. عوفوني والله تعبت مكافي عليه فراك ابويه وبنتي.. عوفووووني

لا تحلم تحكمني ما اريدك افتهمت ما اقبل تدخل بيه... افتهمتتتتتتتت .. من بينهم مد روحه وضربني راشدي..

ويكلي اعلمج عليمن تعلين صوتج بنت الكلب.. هو نطقها واني كمت عليه صياح انته شنو وتسب ابويه بكبره ..

اصيح عليه وابجي وعمامي وهوسه ويصيحون عليه شلون سب ابويه .. متحملت الموقف والهوسه نهد حيلي بسرعه تخربطت.. يضربون يصحون يكعدون اني والميت سوه..

امي كامت تلطم وتصيح راحت بنتي الله لا ينطيكم راحت بنتيييييي.. وتشيل بيه وما اكعد...

نقلني عمي عمران بسيارته للمستشفى.. صاير عندي انهيار عصبي وارتفاع بالضغط ومن التعب واكعه..

انطوني مغذي. وعلاج وطلعوني امي رفضت تدخل بيت عمي كالتله اخذنا لبيت عثمان بقى يحجي عمي وما قبل..

اخذنا لبيته.. رفضت امي وحلفت والله ما تدخل وخابرت عمي عثمان كالتله .. ما اريد مصيبتين بأن واحد راح رجلي بنتي اريدها تجي تشوف ابن اخوك لو اخذها واهج والله

كاللها جاي فورا.. ثواني واجه.. اني بالسياره نايمه. طب متعارك وي مخلد وشايليني لسيارة عمو عثمان وماخذيني لبيته.

الليل كله امي تبجي على راسي.. وتصيح شاكر اطلع شوف بنتك شحالها.. شاكر بتنا راح تموت.

اني ضغطي موتني كوه اجر ايدها واحاجيها واكولها اني زينه .. بقيت نايمه بحظنها لل9 الصبح كعدنا زينه صبولي ريوك جبرني عمي عثمان اتريك..

وكال معليج بمخلد.. روحي خلصي قضيتج .. تحتاجين واحد.منا يجي وياج كولي.. دوري بنتج وتعاي..

كالتله امي ما تجي لهنا اروح وياها .. تخلص قضيتها واخذها للسويد تعيش وياي.. كاللها بعد احسن اهناك احسنلها..

كملنا ريوك طلعنا عمو لكبر بابا بعده تراب.. شمرت روحي على ترابه وكمت اصرخ ولك بابااا ليش عفتني باااابا..

صرخت وصيحت وبجيت لحد ما اختفى صوتي وهلكت.. للضهر يله اخذنا من كبره.

رجعنا لبيت عمي عمران.. رادت ترفض امي.. كاللها وداد انتو يومين ورايحين صفو الكلوب.. معليكم بخبال مخلد..

دخلنا للبيت.. كعدنا بالهول وي النسوان.. للعصر واحنه كاعدين لحد ما دك موبايلي شفته جياد..

كمت للممر.. رديت الو صاح لجين بدي البشاره.. صحت شكو.. صاح انمسك ميشيل والله انمسك..

صحت يا الله.. اوووف ربي الحمدلله.. صدك والله جياد..

-لك والله بكرا راجعين انا وياكي ع بيروت لتثبتي اقوالك.. عليه وعلى يلي اسمو جوزك..

الحمدلله يااارب الف الحمدلله... دا احجي نزل مخلد صدت عيني بعينه غلس ما كأن شافتي بس عاقد حواجبه..

يارب الحمدلله من انمسك الكلب.. اني بخير دام انمسك.. يارب بقت بس بنتي..

-بنلائيها متعتلي هم خلصنا من اكبر هم بقى القليل

-الحمدلله يارب

قفلت الخط ورحت كعدت يم امي.. لحد.ما صبو العشا اني كمت رحت للمطبخ.. العبايه لافتها على خصري ومشمرتها على اديه..

وحجابي على راسي.. ردت اساعدهم ما قبلو.. بقيت ابحث بالموبايل على خدمات الانترنت.

فعلت خدمة نت لان بالعراق ما متواجده الشبكات المفتوحه بكثره...قله.. وبيت عمي ما عدهم..

اول ما تفعل نت.. اجت رسائل ع الواتساب.. باوعتهم مالك انهبط كلبي.. عفتهم وطلعت الطرمه.. كااتبلي اريد احجي وياج.

اتصلت بيه ممتصل نت.. دزيتله رساله انطيني بنتي يا كلب الله ينتقم منك.. يا حقير.. اريد بنتي..

بقيت اراسله ماكو.. كعدت على نار يصيحون ما ارد عليهم عقلي انشغل بمراسلته.. اتصلت بجياد.كتله هيج وهيج راسل مالك..

كال ثعلب راسلك من الواتساب كرمال ما ينمسك ع الشريحه لان شريحتو مراقبه.. بس تنفتح نعرف مكانو

كتله وهسه.. كال راسلي واعرفي شو بدو منك..

بقيت بالساعه واكفه بالطرمه بعيد عن استقبال الخطار.. طلعت امي كتلها مالك راسل .. كالت يا الله بلكي الكلب كلبه حن وينطيها الج

ان شاءالله واطلو اعرفه كلب عنده مصلحه...كلبي احسه ينبض ما هدا غير كون اهدئ و وادخل يم النسوان ابد لساعتين يلا رد مالك..

اتصل بيه.. اول مكلت الو.. كال اسمعي اخر حجي الي وياج.. بنتج ابعثلجياها بشرط.. تتنازلين عن القضيه واطلعيني منها وما تصفيني ويه جماعة ميشيل..

غير هلحجي.. تحلمين تشوفين بنتج اهربها واخليج بحسرتها وتعرفين اني كد كلمتي .......يتبع

☆☆☆☆☆☆☆

#خطوات_نحو_الجحيم

////بقلم الكاتبه زينب ماجد////

الحلقه_40 و الأخيرة

لجين-انت كلب وحقير ومستحيل اتنازل لواحد مثلك افتهمت وبنتي غصبا على راسك تنطينياها .

مالك-فرصه كدامج يومين واسمع جوابج.. اتركج تفكرين بس تأكدي لو كتلج ما راح تشوفيها يعني تحلمين توصليها .. ولا تنسي اني منو

-انت الخنيث العار الساقط الله يهدك يا كلب.. قفل الخط بوجهي.. رجعت راسلته.. مالك بنتي ما الها ذنب رجلياها..

قطع النت الحقير.. ما وصلت الرساله.. ابتعدت ورحت للحديقه.. خابرت جياد.. كتله كذا وكذا كال..

-اتركي بدو يهرب من القانون والحجه بنتو.. بنمسكو متخافي.. متل ما مسكنا ميشيل وبنخلي يعترف.. وبنتك بجيبا لعندك .. بدك متعبي حالك مش منيح كرمال صحتك..

-جياد خايفه على بنتي هواااايه شلوون

-متعتلي هم قلتلك بجيبا صدئيني..

-ان شاءالله.. انته وين..

-انا بمنطقه اسمها الكراده عم لف شوي ببغداد..

-اهاا زين تندل..

-تكسي بياخدني وبيدلني ع الاماكن .. مبضيع.. تسدئي بغداد.كتير بتشبهك..

-ليش

-رغم كل يلي عم تمر في والبا عم ينزف.. كتير حلوي وبتحس بطيبتها لما بتطلع فيا.. برغم كل الالم متفكر تنكسر بدها تقوم وتقوم لتعيش وتحمي حالا واولادا..

متلك تماما..

-ابتسمت.. هيج تشوفني.. ؟! اني احس ماكو احد بضعفي لان من داخلي مكسوره

-ابدا منك ضعيفه.. انتي مجروحه وبس ولما بيطيب جرحك رح تبرقي وتصيري احلى واقوى..

-كل مره تبعث الطمئنينه بقلبي لما احير او اتعب.. احسك طاقه ايجابيه.

-قلتلك من ئبل فيكي تسرئي من طاقتي اد ما بدك

-يسلمو..

-ولو تكرمي

-اروح

-لجين

-نعم..

-بكرا ع 8 بدياكي.. طيارتنا ع 12 الضهر .. ما بدنا نتأخر زحمة طريق وعجئا بمطار بغداد بدنا نحسب لهلشي

-اوك .. سديته منا.. ودخلت جوا.. لكيت الناس دتروح وجبه وجبه.. سلمو عليه وطلعو..

بالتسعه بقينا بس احنا العمام.. عمي عثمان كال تمشون.. عمو عمران كال ازعل والله .. ماكو روحه هنا تبقون..

سئلتني ماما اذا عندي اشكال.. كتلها اصلا نعسانه ما بيه اروح اريد انام.. فكالتلهم منروح.. عدلت رجلها ونمت عليها وهي تلعب بشعري..

غفيت.. كعدت على زمن وهي تندهني. اكوم انام بفراشي.. كتلها لا اكوم اغسل وجهي واسناني..

دزلي مازن على فرشة اسنان.. غسلت ولميت شعري ورحت نمت.. لل6 الصبح كعدت على تنبيه موبايلي..

اريد اكوم الدنيا تجرش بااااااارده فد مره.. كمت كوه واديه جوه اجناحاتي.. واكول هششششش...

دخلت للحمام شغلت مي حار ودفيت الحمام وسبحت وبدلت ملابسي.. طلعت الرجفه لزمت عظامي..

سمعت طكطكه بالمطبخ.. رحت هناك والخاولي على راسي.. لكيت زمن دتشغل صوبه يسموها فوجيكا حمره..

كرفصت يم الصوبه.. وكتلها صباح الخير..

زمن:- صباح النور شعندج سابحه من الصبح بارده..

-وراي سفر وصار 3 ايام مسابحه.. بس شنوو جرشت يماااي اطرافي كلها ترجف.. شنو البرد هنا يكتل

-ليش لبنان مو ابرد منا..

-اي ابرد بس تدفئه مركزيه ومتطفى الكهرباء دوم حرارة الشقه معتدله لا حار ولا بارد امشي مصيفه..
هنا جرشت..

بس شعندج كاعده انتي الساعه ال6 ونص..

زمن-دوام مخلد ب7 ونص نزلت اشغله الصوبه حتى يدفه المطبخ واسويله ريوك ..

-هااا .. ع فكره تعارفنا صار بمصاب بابا.. بس سعيده جدا بمعرفتج..

-هلا بيج حبيبتي اني اعرفج من التلفزيون نتابعج..

-ابتسمتلها.. طبعا صدقا قهرتيني البارحه من شكيتي .. بس اسمعيها مني وخليها ابالج.

لتتوقعين اكو زواج بيه راحه لابد اكو طرف بيه غلط.. ماكو انسان معصوم.. مخلد طيب وخوش ولد بس عيبه عصبيته..

حاولي تكسبي اذا مو لخاطره لخاطر اطفاله .. هو يضرب ويأذي بس يعتذر ومدام عندج اطفال متكدرين تكونين انانيه وتفرطين بيهم..

ربما الطلاق يشتتهم او لو تزوجتي مره ثانيه يجي الاتعس منه.. صح متقبلته اني لان ما يربطني بيه لا طفل ولا مشاعر فما شفت نفسي مجبره على العيش وياه..

وشغله لخ.. لا تشكين همج كدام بشر.. تره العالم مترحم.. وناسنه تنطي الف عذر للرجال واطلع الف عيب بالمره حتى لو كان ما بيها صوج..

اشكي همج لربنا يستجيب.. الناس ما منها فايده.. وكلامج لابد فد يوم يستخدم ضدج.. او يتشمت بيج

ادعي الله يعقله ويهدي.. وربج شفت ايام.. لو احجيلج تكولين الف الحمدلله والشكر على العايشته..

وما الي اي احد مره وبغربه وبس الله وياي.. صح ضعفت مرات وتعبت واحيانا احاول الاستسلام.. لكن ما نسيت ادعي.. لو ردت انفجر.. انفجر وياه ابقى اعاتبه واحجي والوم.. وادعي وابجي

بس والله طلعني بشكل عجيب شلون ما اعرف.. لو احجيلج تصفنين.. بس الله قدير .. بلحظه يبليج وبدعاء يرحم وينقذ..

-ان شاءالله حبيبتي مشكوره.. والله ما عندي شي وياه واحبه واتمنى الله يهدي بس بعد هذا طبعه.. يتعب بس اكول يهون لخاطر جهالي..

-الله يسعدكم حبيبتي.. كومي انطيني مشط.. خل امشط كدام الصوبه.

-راحت جابتلي مشط.. طبت طيبه صبحت وكعدت كرفصت يم الصوبه.. زمن صعدت تكعد مخلد...

وكفت امشط.. طيبه سألتني ولج انتي مو مخلفه شو ما عندج كرش.. شعجب.. من جبتي بيلسان ما ترهل جسمج..

-بلي صار عندي ترهل بس رياضه ونظام غذائي شديت جسمي.

-باعي جسمج بالبنطرون والبلوز شلون حلو .. اني من البس البلوز.. الترهلات ما اعرف منين تطلع خو الكرش فلم بوحده رغم وزني 65..

-دا اريد احجي.. طب مخلد.. ما صبح.. وكف على الصوبه يتحمى.. كملت كلامي مهتميتله..

حبي رياضه مشي وركض وحكم شغلي لازم اكون بهلرشاقه.. اتركي اللحوم والدهون والاكلات السريعه وكلما تجوعين عوضي جسمج بمي..

هم ينشد وهم يضعف..

مخلد:- ويييييينج ملابسي بسرعه..

-طرش اذاني.. وخرت منه.. دا امشي.. صاح انتي وين مبدله وطاكه البنطرون من الصبح حتى وفاة ابوج ما تحترميها...

-درتله.. باوعت.. اخذت نفس ومشيت..

-احجي ويااااج.

طيبه:- شجاك مخلد الناس نايمه..

-عفته ما رديت عليه.. رحت رتبت جنطتي.. ووكفت ع المرايه البس الكب الصوف واللفاف الفه على ركبتي..

بعدني دا اعدل باللفاف.. دفعني وكال وخررري..

وكف كدام المرايه يغسل راسه ووجهه.. ردت امشي صاح الخاولي. ما انطيته عفته ومشيت..

كعدت ماما كتلها يوم راح اروح.. كعدت كالت مو اروح وياج ابقي فد اسبوع.. شنو القصه

-ما اكدر.. اذا كملتي الناس هنا لحكيني اللبنان هناك حتى مناك ونطلع للسويد.. ما اكدر ابقى القضيه لازم احظرها.

- براحتج.. كامت وياي.. دا اطلع.. مخلد مدنك يلبس حذاءه.. بوست ماما.. دار وجه شاف الجنطه بيدي..

مخلد:- انتي وين رايحه

-ما رديت عليه.. رتبت ملابسي والكب ومعرتله اهتمام.. امي خزرتني وبحركه عود لا تعوفي هيج يسويلج مشكله..

- ولج مو احجي وياج ليش تفورين دمي وين موليه..

-يوم ياريت تفهمي الانسان اللي سب ابويه وهو بكبره ما اتشرف بالكلام وياه... وياريت يفتهم وميبقى يلح

-اشو تعاي هنا يمي هذا منو اللي يلح وميفتهم.

-لزمني من زندي وجرني اله حيل..

-اسمعني مخلد.. واللي خلقك.. متهزلي شعره افتهمت.. لا تحلم تحكمني. ما احتاج رجل حتى يعلمني الصح من الغلط

كدرت اتحمل المستحيل.. فلا تتوقعني ما اكدر اتخطاك.. ف احترم ونزل ايدك..

-شنو هلصلافه.. براشدي اخرب معاني وجهج والله..

-دوووووخر..

-احجي ويااااج وين..

- ع لبنان عندك اعتراض.. كعدو عماتي وامه صاحو يابه من الصبح كولو يا الله..

صحت.. الله ما يشوفكم شر.. مع الف سلامه.. تقربو همه باوسوني وسلمو عليه.. هو طلع كدامي

سحبت جنطتي قبل لا اطلع.. اختنكت.. رجعت حظنت امي وبجيت.. ابغداد اشم ريحة بابا راح اشتاقله حيل..

حظنتني وكامت تبجي.. بقيت 5 دقايق ابجي بحظنها وهن يواسني ويمسحن على راسي.. مسحت دموعي وكتلهم مع السلامه.

عفتهم وطلعت.. لكيته مخلد واكف بالباب.. صاح صعدي..

-شكرا اكدر اخذ تكسي..

-ولج لا تخبليني دصعدي.. دفع مشاني وصعدني للسياره وشمر الجنطه وره واجه صعد..

-ع فكره عيب هلتصرفات انت رجال متزوج متخجل..

-اكلي خ..... والصمي ..

-مقرف..

-شعندج راجعه اللبنان...

-اجيب بنتي..

-وين تلكيها.. ابن الكلب تلكينه شارد بيها بره البلد

-ميكدر.. داخل لبنان بعده..

-لجين ما مرتاحلج والقران.. تسولفين الصاير لو لا..

-الصار كتلك بي عاد تصدك متصدك اخر همي.. كل همي اجيب بنتي.. وما الك حق تمنعني لا اخويه انته ولا ابويه ولا عمي

خلك ابن عم فاحترم نفسك واستر على عائلتك وكفيني شرك.... راد يحجي ويصيح

. دك جهازي... باوعتله.. وهو بكل فضول ترك صياحه وباوع وياي.. Jeaad

مخلد:- ايييي هسه كملت..

-رديت.. اهلا جياد..

-اهلين لجين صباح الخير..

-صباح النور

-طلعتي

-بلي جايه بالطريق... دا احجي مخلد لزم الموبايل وطفاه. وشمره يم رجليه..

-مخلد شرايد مني...

-ولج تسافرين وي رجال غريييييب

-هذا الغريب كان الي عون وسند بالغربه ..اكبر انسان مسوى اللي سواه..

-ايووووووووا.. طار مالك اجه صخام. حظرتج تردي مووو

-تراك زودتها والله.. لك الولد صديييق افتهم صديق.. ما عندي شي وياه ورحمة ابويه..

-وهو

-هو شبيه

-باوعيلي لجين.. تزوجتي مالك غصب عنا وسكت.. بس والله هذا اذا صار بينج وبينه زواج اكصبج وانطيج للكلاب واما اخلي لبناني ياخذج..

-اول شي هو عراقي عايش بلبنان.. ثانيا اني من مالك ومنك تعقدت من شي اسمه رجال لعبت نفسي والله كل همي اخذ بنتي واهرب اعيش

يا زواج يا بطيخ لو سلطان هسه.. هم ما اريده.. افتهمت.. لا تفكر كطنه وشيلها من اذنك..

اخلص بنتي واطلع للسويد وجهي متشوفه.. وحتى بلوك اسويلك من كل المواقع حتى لا اصادفك افتهمت..

وكف هسه.. لازم اروح.. جريت كير.. اختضت السياره ووكف بسرعه.. نزلت والتفيت للجنطه نزلتها..

-نزل هو.. لزمني من ايدي.. اجيت اوخر ايده.. هو مخنز ويكلي مترحين وياه اصعدي.. اخذت نفس.. واتقربت حظنته.. ما احب ازعلك ولا احب اروح وانته زعلان احبك واعرف عقليتك واسلوبك واعتبرك اخ ما جابتلياه امي

سامحني..

ضربني راشدي.. ودفعني ومشى.. ويصيح ادب سز.. اخذت نفس.. جرت دموعي..

شفت سيارات تباوع علينا .. سحبت جنطتي ومديت ايدي وكفت تكسي وصعدت بسرعه.. وكتله اطلع بساع..

نزل هو من سيارته بساع يصيح ويييين تعاااي.. تخطيته بالسياره.. وما شفته بعد.. فتحت الموبايل خابرت جياد..

دلاني ع المكان الهوه بي.. انطيت العنوان للسايق اخذني.. رحت لجياد.. استقبلني بابتسامه عريضه لدرجة رصعاته مبينه من بعيد..

اتقربت.. وهو على نفس الابتسامه..

-اهلين صباح الخير

-صباح النور

-شو في .. كأنك مش على بعضك..

-شوي تعبانه..

-مخلد ما

-لا ما اهتمله.. بس راح اشتاق البابا هوايه.. حجيتها وبجيت..

-ووو لجييين.. متعملي هيك بحالك.. وانا يلي بدي اجي بقلك تعلمت احكي عراقي.. هلاء نسيتيني كل الحكيات يلي تعلمتهون.. احسن هيك

-مسحت دموعي.. شتعلمت..

-باشه

-شنو هاي باشه

-لك مو باشه.. باش باچ باچه اه صح .. زبطت

-هزيت راسي يا الله.. بس باجه

-لا ..ما ئلتلك لما بكيتي نسيتهون.. فيكي تذكريني .. اااه انتي خوش بنيه..و اني عد عيناش .. عين عيناچ

-هههههههه جياد امشي رحمه لاهلك

-ما زبطت ما..

-لك يخبل بس ديتعبوك نصيحه اترك العراقي خليك باللبناني احلى..

-ههههه اوك اوك ما عاد جرب .. بتعرفي لجين.. صح هيدي اول مره بدخل فيها العراق..

بس بمجرد ما دخلت حسيت بالانتماء لهلبلد.. صح بعشق لبنان وكل حبي ووفائي لالها..

بس الزوجه متعلى على الام... اديش متكون الزوجه حلوه ومريحه ومحتويتك يبقى حنينك لامك.

العراق بحبو كتير وكنت بتمنى لو عايش هون وتعلم شوي لهجتو..

بيي بيعرف يحكي عراقي بس ولا مره جرب يحكي ادامنا حكياتو لبناني.. كنت اتمنى ارتبط ببنت عراقيه..

بس لما تجوزت منى بطلت فكر..

-طيب ليش تريد عراقيه..

-انا رجل واعي وبفهم بالتطور وبهيدي الشغلات بس ضد التعري الزياده عن اللزوم والانفتاح البلا حدود

بشوف المرا العراقيه محافظه اكتر .. حتى لما لقيتك بالبار.. وكنتي تبكي اعطيتك منديل ومهتميت لائلك..

لما وئعتي وانجرحت اجرك بالكزاز... شكيت انك عراقيه.. من حكياتك.. بس متأكدت..

صرت تابعك وراقبك ع طول.. لما تقربت وعرفت انك عراقيه وبنص البار ومتسكري ولا مره دخلتي وفستانك فوق ركبتك

او ضحكتي بصوت عالي او مشيتي مع رجال حتى مكنتي تخوني زوجك لتلاقي يلي بينقذك.. كل هيدا خلاني اتقرب منك اكتر

وخليكي ارفيئا مش فقط مهمه وتنتهي.. كنت لما ساعدك بساعدك من البي ولا مره خلطت شغلي بحياتي الخاصه

او جبت حدن غريب ع بيتي.. او انشغل بالي على شي حدا في الشغل.. بس انتي شغلتيلي بالي

وصرت ما اطمن الا لما تكوني ادام عيوني

-ابتسامتله.. اجمل صديق..

-اجمل بنت ...

-اخذ ايدي وطلعنا وكفنا اخذنا لفات بيض وجاي تريكنا وطلعنا للمطار.. بعد اجراءات طويله طلعنا الطياره. ورجعنا ع لبنان..

نزلت ببيروت.. سألته وين حنروح

-ع بيتي

-اني اكول لو اروح وحدي احسن خلص الخطر وميشيل انمسك.. اروح وحدي احسن..

-شو هيدا الحكي .. بدك تروحي معي

-لا والله ما اكدر ابقى وياك ابيت واحد.. كنت مريضه والحمدلله صرت زينه ما انسالك موقفك هذا ويايه

جد والله وقفتلي وقفه الاخ ما يوكفها لاخته.. اشكرك من كل قلبي

-عيب هلحكي شكر شو يبنت وبلا كلام فاضي بدك تروحي معي

-لا ارجع للشقه .. صرت زينه والله ميصير .. ارجوك..

-ع راحتك.. ما بدي احرجك.. بس بتمنى تبقي معي..

-تسلم.. اخذني وداني للشقه مالتي.. دخل هو اول مره ويايه.. رحت سويتله فنجان قهوه شربها وطلع وكال

-بمرئ لعندك بليل ازا بدك شي قوليلي متخجلي..

-كتله تسلملي يا ابو اطيب قلب متقصر.. سلم وطلع. اني بقيت بالشقه نظمت ملابسي ورجعت مسحت الشقه كانت كلها تراب لان مهجوره..

غيرت الفراشات.. ويع من اتذكر مالك نايم عليهم بدي اتقيء.. طلعت تسوقت من الماركت خضروات وفواكه..

لما خلصت شغل وتنضيف واكل وصار الليل.. حسيت بوحشه.. اوكف بالشقه هاااااادئه كل صوت ما بيها

غمضت عيوني وصرت اتخيل بيلا وهي تركض بأرجاء الشقه.. وصوت ضحكها وخطواتها ... ابتسمت واتذكرتها وبعز بسمتي نزلت دموعي

فتحت الشقه فارغه محد بيها.. كعدت على ركبي بالممر ابجي .. بنتي وينج ماما والله دا افتقدج..

انتي هم تصيحي باسمي هم اطلبيني ومتلكيني.. اللهي دخيلك رجعلي بنتي والله ربي تعبت اخذت مني بابا كافي..

اريد بنتي .. يا راد يوسف لحظن يعقوب رجع بنتي لحظني والله ربي تعبت.. اتذكرت مالك..

كمت من مكاني.. راسلة واتساب.. بعثتله مالك.. دقايق وجاوبني .. نعم

-سمعني صوت بنتي حرام عليك.

-ادللي هسه اسمعج.. خابر عليه رفعت خط .. صاح تره مشتاق..

-اريد بنتي .. سمعني صوتها..صاح بابا بيلا .. ريتا بيلا كاعده..

-ردته عم نوما

-لا جيبيها خل تحجي وي امها ..

-ثواني وجابتها وهو يكلها بابا باعي ماما ماما تحجين وياها. اخذت التلفون وتصبح ماما وينا ماما

-اريد اتنفس من العبره اختنكت بالبجي مالتي بس كلتلها يروح امج حبيبتي شلونج

-ماما تعي .. حجتها وبجت.. انجنيت من سمعتها بجت كمت اصرخ.. مالك الله يخليك انطينياها ابوس ايدك حرام عليك تحرمني منها اريد بنتي

-القرار الج ترديها باجر هي بحظنج بس تتنازلين عن القضيه.. وخلي يكون بعلمج اني ما انمسك ودا احاول اطلع تهريب بس ما اريد تبقى عليه قضيه وابقى مطلوب

فاذا تردين بنتج تتنازلين باجر.. مترديها اسفرها واهرب من بعدها وتحلمين تشوفيها بعمرج..

-واذا تنازلت و كذبت ومنطيتني بنتي ..

-راح انطيجياها

-احلف بروح اختك

-انضبي

-ما اصدكك تجذب عليه مالك ارجوك انطينياها تعبت حرام عليك شنو ذنبي مكافي الحملتنياه ..

-فكي القضيه وترجعلج

-احلف

-وروح اختي بعد..

-باجر اقدم افادتي واتنازل عنك وانفي مساعدتك لميشيل بس تنطينياه

-تأمريني.. لج متعرفين شكد مشتاقلج.. قفلت الخط بوجهه.. مقرف كلب حقير.. حرام اسجنك واخفف عنك عذاب الله

اخذ بنتي واخليك انته والله تتجازون ميضيع حقي منك.. شلون اذا كذب عليه ومنطانياهة.. شسوي بهلحاله.

واصلا لو ما اتنازل راح يسفرها ويهرب بيها واعرف مالك رغم قذارته كد كلمته يكدر يدبر امره ويطلع واني اللي اخسر

يربي لا تحيرني ودلني للصح... اخابر جياد واكوله ... بس لا اكيد راح يرفض بحكم شغله

شلون يربي شلون .. بقيت الليل كله منايمه.. افكر وافكر.. لحد ما اتخذت قرار اتنازل وافضها شسوي..

كعدت ثاني يوم من الصبح.. لبست ورتبت نفسي.. وطلعت للمخفر.. خابرني جياد.. كتله بالمخفر دا انطي افادتي.

-منيح انا عندي شغل .. بكملو بمرئ لعندك..

-ماشي.. انطيت افادتي واقوالي ضد ميشيل.. اول شي اختبرو مدى صحة عقلي اذا كنت مدمنه قدمتلهم تقارير تثبت شفائي

وبعدين اتنازلت عن مالك ونفيت علاقته بميشيل وان ميشيل كان يهددنا اني وياه كدرت اسقط القضيه عنه يبقى حكم المحكمه بالبراءه..

طلعت من المكان اتصل جياد.. كتله الكاك بالبيت.. كال ماشي.. وره شويه اتصل يصيح لجين شو عملتي..

كتله شنو

-تنازلتي عن قضية مالك من كل عقلك..

-جياد.

-بلاوجياد بلا بطيخ جاي لعندك فورا وبدك تقدميلي عذر للعمل الغبي يلي عملتي جايي فورا..

-اخذت نفس.. وراسلة مالك كتله تنازلت عن القضيه وفيك تسأل اريد بنتي اليوم.. ما كان اكو نت

-لحظات واجه جياد يضرب ع الباب حيل.. فتحتا عاط بوجهي

-لك شو عملتي اديشك غبيه انتي

-جياد اريد بنتي

-لك يبنت هيدا مجرم وباعك وتاجر فيكي كيف بتسمحي لحالك بتبرئي .. لك العمى ما اغباكي

-جياد كتلك اريد بنتي ومالك مستحيل ينمسك اني وبنتي الخسرانين الوحيدين

-يخرب بيت عقلك شو ما بيفكر قلتلك انا راح جيبا لعندك

-جياد صار شهرين ما كدرتو تجيبولي بنتي لا توعدوني بشي ما تكدرون توفوه ..

طلبتو ميشيل جبتا الكم.. بس مجبتولي بنتي .. لا تلومني

-لك مثل ما مسكنا ميشيل بنمسكو لمالك

-انته تعتقد مالك ما يكدر يطلع تهريب

-لك ميشيل مسكنا وقت لما طلع تهريب وقدرنا نحاكمو .. مبنقدر ع مالك.. العمى بعينك يا الله شو عملتي

-مالك ثعلب ما اكدر اراهن على سمك بالماي واكول تمسكو من يهرب لو لا.. ممكن تمسكوه وممكن ووارد جدا ان لا.. يكدر يطلع.

ميشيل تاجر اعضاء والاستخبارات نفذت جهدها حتى تمسكه بس مالك مو تاجر ولا شي مجرد انسان عليه قضيه محد راح يتعب بالبحث عنه

ومحد يخسر غيري اني وبنتي يبيعها.. جياد ارحمني اريد بنتي

-لك يا غبيه وينا بنتك.. شو جابا لعندك لك عم بيكزب عليكي..

-لا حلف راح يجيب

-هههههههههههه بتحلفي حدن ملحد .. مبسدئ كيف عم تفكري يا الله يا الله منك..

-ما حلفته بالله اعرف الرب ميهمه حلفته باخته

-لك زلمه مثلو عندو غيره لحتى تحلفي بأختو

-مو غيره يحبها .. وعندي امل يجيب بنتي جياد صير ويايه لا تصير ضدي..

-مبعرف شو بقلك عن جد.. كعد ودنك راسه واديه لشعره يفكر..

-كعدت يمه كول ان شاءالله يجيبها

-باوعلي بساع.. هه لهيدا الحد ضعفتي وما بأيدك غير تدعي الله عسى يحنن البو ويجيبى.. لك العمى بالبك شو انك بلا عقل

-طيب شسوي كولي اني اعرف مالك عنده قدره يهرب

-لك لو عندو كان هرب .. مبيبقى لليوم بلبنان

-للان ما لكى الطريقه.. بس مو مستحيل يكدر يطلع خلال اشهر.. ولو سفر بنتي اني شحصل

ينسجن هو وبنتي تنباع .. شستفاد.. اخذ بنتي واتركه لله هو ينتقم منه

-لك ما بتمنى غير الله بينظر لحالك وبيعطيكي على قد البك.. يارب ميخونك.. تصرفتي بغباء بس ان شاءالله يكون غبائك ينفعك بشي يااارب

-دنكت منه..راح ترجع بنتي مو

- لزم ايدي.. متعتلي هم.. بنئول ان شاءالله ... هلاء صار لازم روح عندي كتير بروفات مشان الشغل ..

-عندك عرض..

-اي ..

-اخذ راحتك..

-متنسي تتصلي فيني كل شوي كرمال طمن ازا يرجع بنتك او لا وانا بمرئ لعندك بليل كرمال شوفك.

-ان شاءالله.. موفق..

طلع بقيت الوقت كله اروح منا واجي منا .. اراسله يشوف الرسايل وميجاوب

اتصل بي ميرد.. يا الله حسبته صدك لعب عليه لك الله ينتقم منك.. امشي وابجي .. اجه جياد بليل كعد ساعه يواسي بيه وماكو مالك

راح جياد.. وبقيت بنار متت اتصل بيه وميجاوب يا الله تلفت اعصابي. بقيت سهرانه ما نمت انتظره

ما اجه عرفته جذب عليه الكلب.. الله ينتقم منه. اتصلت عليه ماما اكثر من مره واكلها لسه مجاب بنتي.

الى ان الفجر ايست ونمت..

نايمه على ضهري ومن التعب فاتحه اديه.. ما احس الا ثقل على صدري.. فتحت عيوني والكه مالك يخلي بيلا على صدري

فزيت من مكاني اخذتها باثنين اديه اباوعلها نايمه. جريتها لكلبي حيل واتنفس سريع .. وارجع اباوعلها واغمض عيوني وافتحهم..

بس ميكون حلم.. لا حقيقه بنتي بايدي حبيبتي.. ابوس بيها واشمها مثل المخبله هي كعدت على حظناتي الها..

شافتني وحظنتني ماما حبش.. يروح امج حيااااتي شكرا الك ياااارب .. نزلت دموعي وخرتها اباوعلها..

متقبل تريد تحظني. رجعت حظنتها.. باوعت مالك واكف يباوع.. تكدر تطلع يلا برا..

مالك:- جنت اكدر اخون واخلف بوعدي بس لجين اني رايدج خل نرجع عائله مع بعض..

-اخذت نفس.. وتركته. رجعت بيلا للسرير نومتها وهديت عليها نامت. مد ايده لخصري راد يكعد..

ضربته بنص وجهه واني دا انومها .. غفت.. هو كاعد عاقد حواجبه.. لزمته من قميصه باشمئزاز كوم نحجي برا..

وخر ايدي وراح كدامي للصاله.. اسمعني لك.. كل عيشه الك ويانا ماكو.. لا تحلم ارجعلك افتهمت.

ويلا اطلع برا

-لجين اسمعي .. اني عمري ما كرهتج انتي مرتي وحبيبتي وشده بحياتنا ومرت.. انسي الصار وخل نرجع لخاطر بنتنا

-لك شنسى خنوثتك وعارك من عفتني انباع وانهزمت.. شنسى متاجرتك بيه .. انسى المخدرات الدمرت جسمي بيها

كلي شنسى. ما تنجب وتاكل طن تبن.. بحلكك وبحلك كل واحد مثلك زفر و عار ديوث ما عنده غيره

-اعرف هسه انتي متضايقه وحقج بس فكري بمصلحة بنتنا ..

-لو اريد افكر بمصلحتها فاول شي ابعدها عنك.. لانك عار ومستحيل تعيش وياك.. برا يلا ..

-لجين

-دا اكولك برااااا .. طلعته وقفلت الباب.. ورجعت فتحت الباب. لحظه تعال قفل الشقه الثاني عندك انطينياه

-الشقه من حقي

-دروح ابن العار يدورلي حق.. انطيني

-ما انطي وراح اتركج اتفكرين بمصلحة بنتنا عدل.. ولا تنسين احبج

-ضربت الباب بوجهه يارب شكد قذر..قفلت الباب بسركي مو بقفل. حتى ليطب .. ورحت لبنتي اشم بيها وابوسها.

صورتها.. وبعثت الصوره الجياد. باوعت الساعه 6 ونص.. نايمه هسه خطيه عود من يكعد يشوفها

بقيت اشتم بيها وابوس واحظن لحد ما غفيت يمها.. كعدت على صوت الباب وهو يندك..

ركضت باوعت للعدسه .. جياد.. فتحت الباب.. ودخل وينا عن جد جابا ..

-اي ههههههه تعال . ركض كدامي للغرفه ..

-حبيبة البي اديشا حلوي. الف مبروك برجعتا يارب ميفرقكون. وبيخليا لائلك

-تسلملي

-بستغرب كيف رجعا .. معقول البو حن

-لا بس يريد يرجعني ونرجع عائله مثل قبل

-لا عن جد لو هلمره بطاوعي بدي اقتلك واشرب من دمك

-ههههههههه لا طبعا لو اموت ما عونت اخلص ارجع ادور.

-هلاء صار الوقت يلي بدك تخلعي ما بطلقي يلي مثلو حرام هو بيطلق انتي اخلعي

-هههههههه وهو هم هيج..

بقيت فرحانه بيها .. طايره فرح ..حتى هي فرحانه بس تذكر ابوها وتبجي خاصه الليل كله تفز وتبجي عليه تريده..

بس كدرت شوي تتأقلم بعد فتره... قدمت دعوة طلاق عليه بالمحكمه... وشرحت للقاضي شنو اللي سواه بيه وشلون جبرني اتنازل على مود بنتي جدا تعاطف ويايه..

وافق على الخلع حتى بدون اجراءات السفاره من كد متعاطف بقضيتي وجياد مساندني وهواي توسطلي وشرحلهم.. وكدرت اطلق مالك بمساندة جياد اللي ما تركني لا اني ولا بنتي ولا لحظه..

كان جياد حتى ينسي بيلا مالك.. ياخذها ويلعب وياها حتى تنسى وبالفعل حيل تعلقت بجياد

وتصيحله ججو .. لان اني مرات بحكم الصداقه اصيحله جيدو .. فهي اخذتها ججو..

كان كل يوم ياخذها العصر بعد الشغل ويلعبها..

فد مره لعبو هوايه فتعبت ونامت شالها هو للسياره وصلنا للبيت.

هم شالها وصعد بيها للشقه نومها للسرير وبقى يهودلها.. نامت على ايده.. كام من عدها..

طلع دا اوصله للباب..باوعلي .. ابتسمتله تقرب لزمني من راسي بثنين اديه.. استغربت حركته.. كتله شو..

-في حكي كتير بألبي بدي قلك علي بس ما عم اتجرئ كيف اشرحلك

-لا ولو احجي انت تعرف غلاتك عندي ماكو داعي تخجل احنا اصدقاء كول

-انا مش صديئك.

-شلون يعني..

-انا بدي اتجوزك.. بتقبلي فيني

-صفنت بوجهه هذا صدك يحجي.. شنو يحبني معقول. . طولت الصفنه بوجهه ما عرفت اجاوبه مصدومه بكلامه.

كنت اتوقعه صديق بس ما احمل اله اي مشاعر. اصلا بعد مالك ما افكر اخطي خطوة زواج لو اثق باحد..

هو فكر سكوتي رضا.. فما حجه اي كلمه تقرب وباسني .. بعدته بسرعه.. انته شلون تتتجرء..

-اااا انا بعتزر ازا ضايقتك بهلتصرف بس انا حابب اعرف جوابك بتقبلي فيني..

-جياد مصدومه بيك ... اني مفكرتك صديق وانته تكلي اريد اتزوجج يعني انته مو صديق وعينك عليه من البدايه

-بعترف انا حبيتك من البدايه.. بس انتي ما كنتي تفهمي مشاعري .. كم مره قعدت اشرحلك كرمال بينلك حبي وانتي تجاهلتي

التلك بنفسي اتجوز بنت عراقيه وانتي محسيتي انا شو عم حس.. انا بحبك صدئيني

-اي حب هذا التحجي عنه جياد.. اني ماممكن احب او ارجع ادخل علاقه مره ثانيه لك بطلت اصدق كل رجال ما اكدر..

-لجين انا ما بدي كون صديق لئلك.. انا بدي اتجوزك.. لك بحبك والله بموت فيكي نفسي اتجوزك وتصيري لألي..

-اذا متريدني صديقه يكون الافضل تتركني لان اني ما اكدر اتزوج لتزعل بس هذا قراري

-فكري

-مفكره وما اريد اتزوج.. مصار ايام من اطلقنا اني ومالك اروح ارجع اعيد نفس الكره. لا طبعا ما اريد شي اسمه زواج.

-لجين بترجاكي عم قلك انا بحبك كرمالي فكري اكتر.. مبقدر اتركك لك انا بعشئك..

-جياد اعتذر والله دتصدمني بمشاعرك كنت مفكرتك صديق.. تضايقت من مشاعرك هيج مراح اكون مرتاحه بصداقتي وياك

ارجوك اترك هذا الموضوع..

-هز راسه.. انا بعتزر ضايقتك.. رح روح وصدئي بعمرك مرح ازعجك لا بصداقتي ولا بحبي لائلك.. باي

-تركني وطلع.. اخذت نفس يا الله شلون بلوه .. هسه منين طلعت سالفة الحب هاي..

دا افكر اتصلت ماما كالت باجر اني يمج ابيروت رجعت للسويد صار اسبوعين وباجر اجي لعندج لحتى نسافر سوا.

كتلها هلا بيج.. سديته منها. صح نفسي اروح لامي واعيش وياها بس جياد راح اشتاقله ما اكدر على زعله ولا اكدر احبه حب غرام ..

ما املكله غير الصداقه.. واني بالحب نحسه.. اذا ما تقبلت الشخص ما اكدر افكر بي ابد..

ثاني يوم اجت ماما ... ورحت اني وبيلا استقبلتها من المطار.. خطيه حيل ضعفانه ومتغيره ع فراك بابا

اخذتها ورجعت للشقه .. فرحانه بيه وابنتي.. شافتني مهمومه.. سألتني.. اول بدايه نكرت بس اصرت..

صارحتها وكعدت شرحت بيها شصار وياي وشسوى مالك لطمت على خدها وهلكد بجت لما كنت اشرح حالتي وسوالفتلها وقفت جياد وياي

لاخر شي عرض الزواج مالته وزعله... كالت يستاهل توافقين.. كتلها ماما من كل عقلج اني اتعقدت من مالك ارجع اعيد نفسي وي جياد..

-باعي ماما صح اني وياج وبجانبج.. بس شغله خليها ابالج اني وانتي نساء.. اهلي باوكرانيا

واحنا بالسويد وعمامج بالعراق وعمج اللاخ بغير ولايه مو ويانه.. يعني وحدنا. وصعب عيشة المرأه بوحدها بهذا العالم..

ومن ثم يا بنتي انتي بعدج صغيره .. وهو لا تكدرين تقارني بمالك .. يكعدله تاج ولا تقارني بمخلد لانه انسان واعي ومثقف

والاهم من هذا كدر يحبج رغم كل معرفته باللي مريتي بي وهو اكثر انسان يعرف حجم معاناتج وكان الج سند وقت اللي محد كان وياج..

هيج انسان ماما انتي تخسري.. ولا تنسين مالك رجل قذر وكلب ممكن لما بعد وقت تفكرين تتزوجين ينتقم منج على خلعج اله

ويفضحج كدام اللي تردين تتزوجي.. لان صراحه مستحيل احد ممكن يتقبل انسانه كانت تدخل بارات واشتغلت وي مافيا ومارست الادمان والمخدرات..

حتى لو انتي مظلومه محد راح يفهم العشتي غير جياد.. الانسان اللي كدر يحتويج وانتي غريبه .. هذا انسان يستحق الاحترام..

حتى لو ما تملكين اله مشاعر ..بعد الزواج وبسبب معاملته راح يلين كلبج وتحبي اني اكول توافقين عليه افضل..

-بقيت افكر بكلامها بي وجهة نظر صحيحه.. شخص مثل جياد ممكن اني اخسره ... ويمكن هو هدية ربي الي

بعثه لما كنت بأمس الحاجه لانسان يساعدني وكان خير عون اليه لولاه ما كنت اعرف هسه اني بيا مستنقع.

ومن ثم هو اكثر انسان يناسب عقليتي ما عنده تعقيد اجتماعي محافظ بقيمه على الحد المطلوب ..

بقيت افكر بلأمر.. كلت انطي لنفسي فرصه. وبعدين اقرر...

الشقه كانت لمالك.. فكعدت اصفي الغراض اللي بيها للبيع.. حتى نصفي كلشي..

وطبعا مالك على طول هذه الفتره يتوسل ارجعله ونعيش مع بعض ما رديت عليه ولا قبلته

بعد يومين.. اجاني ابلاغ للبيت.. تسلمته.. كان قضية رفع دعوه للمطالبه بالحظانه مال بيلا من قبل مالك..

ايا كلب.. شكد ناقص.. رحت لحتى اشوف الدعوه.. الحقير كان مقدم الهم اوراق تثبت ان اني كنت اتعاطى المخدرات واني كنت ارتاد البارات وامارس الدعاره..

يمه صدك انجنيت.. بقيت الطم.. رحت لامي ابجي واشكي واصيح بالله كليلي شسوي الكلب مقدم كل هذا راح ياخذها مني

تهسترت بقيت بس مكابله بنتي و ابجي.. كتلها اهرب .. ردتني.. وين تهربين السويد هناك اضبط من القانون هنا

هم يكدر يبلغ وياخذها ومستحيل ينطيجياها. بقيت حايره لا ليلي ليل ولا نهاري نهار..

تالي بجلسه وحده قرر القاضي الحظانه المالك واني حرمني منها لان يعتبروني مو كفو لتربية البنت ..

تخربطت بنص المحكمه ونقلوني مستشفى

كعدت وشفته ماخذها .. كمت اصرخ اريد بنتي .. جيبولياها.. وادور على مالك ماكو حاولت اتواصل بيه ما يرد عليه

اسبوع اني نايمه بالمستشفى تعبت حالتي فد مره على بنتي انحرمت منها من صدك..

مالك من ذاك اليوم اختفى لا حاول يتواصل وياي ولا حتى يساومني ... جنيت بعدها..

طلعت من المستشفى ... لكيته حتى الشقه بايعها مالك واني ما ادري .. اخذت غرفة فندق وكعدنا اني وماما..

كان هذا اخر يوم الي بلبنان.. حالتي تعبت فد مره ليل نهار ابجي على بنتي ماكو ولا امل ترجعلي ادمرت..

بليل حظرت ماما كل ملابسنا لحتى نسافر للسويد.. اندكت الباب كان جياد..

اول ما شفته حظنته وكمت ابجي.. كتله خسرت كلشي بسبب غبائي ان كان هارب وماخذها فاليوم هو بريئ وجردني من بنتي..

بقيت اصرخ اني غبيه ضيعن نفسي وبنتي .. خطيه اخذني ونزلني وبقى يهدي بيه ويصبرني علة فراكها..

اخر شي فتح وياي الموضوع..

-لجين بعرف هلاء مو وقتا بس ما عندي فرصه غيرا .. بكرا طيارتك وممكن مراح شوفك ابدا

انا لهلاء ما قدرت انساكي .. عن جد بحبك مفيني اتركك ابدا.. بس بحترم قرارك لو رفضتي ومتقبلتيني

برضى بحبي يلي من طرف واحد وبحمل حالي وبعد عنك ومخليكي تنأزي بمشاعري ولا ازعجك فيون.

-جياد ما اعرف شنو اكولك صراحه.. محابه اخسرك ابدا انته انسان رائع ولو تركتك اني اللي اخسر

بس في شغله..

-شو هي ؟!

-امك تعتبرني بنت فلتانه ومستحيل اعيش مع عائله مستحقرتني او متشوفني مناسبه لابنهم

فلازم تقنع اهلك وبعدها نتكلم..

والشغله اللخ هي خطبتك الي.. اذا فعلا تحبني تروح تخطبني من عمامي من العراق على سنة الله ورسوله

اتزوجت مره بدون رضى اهلي ما اكدر اعيد الكره مرتين..

-موافق بكل يلي حكيتي.. انا بيي بيعرف قصتي معك وبيعرف اديش بحبك ومتأكد راح يقنع امي بخطبتي لائلك..

وبتكرمي من حقك اخطبك من اهلك ادام الناس وبفرض احترامك هيدا واجبي وانا بالاساس بمرضى اتجوزك بنت بدون موافقة اهلا

ما بقبل قلل من احترام البنت يلي بحبا..وعن جند انا بحبك ومتمني اللحظه يلي تجمعني فيكي

بعرفك وبعرف اديش انظلمتي واديش عانيتي وشو واجهتي وكيف كنتي قويه وما حدا قدر يهزمك..

صح عاطفتك وطيبة البك خسرتك كتير بس انتي بالنسبه الالي اروع ما خلق ربي ...

-ابتسمتله .. مد اديه .. حطيت اديه بين اديه.

-بدي اسمع جوابك قبل جواب اهلك وعمامك ... لجين انا بحبك وبدي اتجوزك انتي موافقه تتجوزيني

-ههههه اي موافقه..

جياد- ههههههههههه لك بحبك والله بحبك كتير لك تعي لاخدك ع البي ههههههه

لجين-ههههههههههه

انتهى الجحيم.. وطلعت الشمس ع حياتي.. ما اعرف اذا بعد هذه الشمس اكو ليل .. لكن جياد كان شخص رائع بحياتي

اكذب لو قلت حبيته.. لكن جدا احترمه واقدر حبه .. كدرت اطلع الجحيم بقوه واراده لكن عمري ما كدرت اتخطاه..

اثار الجحيم بقت مرافقتني لليوم.. سبب حزني بهذه الحياة هي بنتي اللي ليوم تكاد تكون بالصف الثالث ابتدائي

بس ما اعرف هي وين وباي بلد ساكنه .. اتمنى لو بس اشوفها حتى لو من بعيد.. بس هلشي بقى حسره بگلبي

مستحيل انساها وميمر ليل اذا ما ابجي عليها ... بس مو قسمتي .. ما حظيت بيها .. خسرت بسبب عاطفتي هوايه اتمنى ابطل افكر بقلبي بس هذا طبعي

اتمنى تدعون ان ترجعلي بنتي حتى لو بس اشوفها وتقر عيني بيها بعد كل هذه السنين.........النهاية

☆☆☆☆☆☆☆