رواية
(زواج صالونات)
••••••••••••••••
بقلم/
محمود زيدان
@mahmoud.zedan
---------------------
في أحد اﻷحياء الشعبية بالقاهرة الكبرى، وبالتحديد في حي هادئ نسبيا يبتعد كثيرا عن اﻷماكن العشوائية، ويكاد يقترب من اﻷحياء الراقية، يقطنه غالبا ميسوري الحال من الطبقة المتوسطة.
جلس أفراد اﻷسرة اﻷربعة في الشقة السكنية، التي تتوسط أدوار المبنى العتيق المكون من خمسة طوابق، يحتوي الواحد منها علي شقتين متقابلتين يفصل بينهما ممر عرضه مترين تقريبا وطوله خمسة أمتار.
حيث اعتزل الوالد في زاوية المنزل البعيدة يتصفح الجريدة في هدوء عقب عودته من عمله الشاق مديرا للمدرسة الحكومية.
بينما كانت اﻷم في الزاوية اﻷخرى تستطلع رأي ابنها اﻷكبر حول رغبته في الزواج من هذه الفتاة التي كان الاثنان في زيارة خاصة ﻷهلها منذ قليل.
نظر الابن إلى والدته متحيرا، ثم انتفض من مقعده فجأة وصاح قائلا: الله يسامحك يا أمي انتي السبب، انتي اللي دبستيني في الجوازة دي.. ثم أضاف في حزن وحسرة: ياريتني ما اتجوزت !
صاحت والدته في تعجب: اتجوزت إيه يابني هو احنا لسه عملنا حاجة..
احنا لا كتبنا كتاب، ولا حتى قرينا فاتحة مع أهل العروسة !
ثم واصلت حديثها في تهكم: وبعدين اللي يشوفك و انت لازق في البنت هناك، وقاعد ترغي وتضحك معاها طول اليوم يقول إنك بتعرفها من عشر سنين، وفضلت تكلمها عن بطولاتك كأنك أبو زيد الهلالي.. وفي الرايحة والجاية تقول لباباها ياعمي.. ومامتها ياحماتي جاي دلوقتي تقولي دبستيني ؟!
رد الابن في استسلام تام: أمال عايزاني أعمل إيه يا أمي بعد ما رحنا هناك وأكلنا وشربنا واتغدينا واتعشينا آجي في الآخر اقولهم بنتكم وحشة، ده أنا حتي ابقى قليل الذوق وما عنديش دم!
صاحت الوالدة في غضب: يامصبتي السودا.. يابني إنت هتفضل أهبل وعلى نياتك كده لحد إمتى؟
وبعدين مالها البنت فيها إيه يتعيب ؟ ماهي حلوة وبيضا ومؤدبة ودمها خفيف عايز ايه تاني..؟!
عقد الابن حاجبيه ثم أجاب كالمتحسر على حاله: ما انتي عارفة يا أمي مواصفات البنت اللي أنا عايزها، وخليتيني أسيب شغلي في السعودية وجيت عشان أشوفها، لكن للأسف لقيتها حاجه تانية.
رمقته اﻷم بطرف عينها وصاحت في غضب: حاجة تانية إزاي يافالح ؟
إيه اللي كدبت عليك فيه؟ قول كمل كلامك
عادل في محاولة منه لتدارك اﻷمر: آسف يا أمي
أنا ما قولتش إن انتي كدبتي عليا هي فعلا أحلى من ملكة جمال لبنان، وكمان دمها خفيف ومحترمة وبنت ناس بس انتي برضه ما قولتيليش إن البنت قصيرة ؟ يرضيكي اتجوز وحدة قصيرة ؟
