الحلقة 17:
تعشينا وطلعنا لبيتنا و مليكة غسلت الماعن ... بدلت حوايجي و رحت حطيت حوايج مليكة في بيتها و رجعت حطيت حويجي في الخزانة و هزيت البيجاما تاع وليد
نجوى : وليد نوض قييس البيجاما حابة نشوفها كيفاه جاتك
وليد : و انا حاب نشوفك نتي
نجوى (مشوكية جامي هدر بهاذ الطريقة) : آآه
وليد : علابالي بلي راكي حاملة و صابرة معايا حتا لو ماقلتليش نقدر نفهم راكي مريضة و نتي لي تسوقي الطومبيل و تديني وين نحب نورمالمون انا لي نخدم لالا حتا في هاذي لازم تعاونيني و....
نجوى : وليييد وشي هاذ الهدرة هكا مانتفاهموش من وقتاه بيناتنا شروط كل حاجة نديرها بلا مزيتي و كل حاجة ديرها بلا مزيتك مارانش شركاء ولا صحاب رانا متزوجينين نحملك و تحملني
وليد :بصح انا حاب نشوفك كيما أي راجل يحب يشوف مرتو لوكان جيتي ماتشوفيش راكي فهمتيني
نجوى : وش راح يتبدل كي تشوفني
وليد : والو راح نزيد نحبك كثر
نجوى : و كي ماتشوفني راح يقل حبك ؟؟
وليد : لالا أبداا ماتصراش هاذي
نجوى : ملا كيفاه
وليد : صاي صاي قتلك ماتقدريش تفهميني
غاضني كيفاه حس روحو ناقص بلا عينيه رحت عندو حكمتلو يديه و فوتها في وجهي كامل
نجوى : هكا بلاك تقدر تتخايلني على الأقل
حضني و قعد يبكي و كانت أول مرة نشوفو يبكي كان انسان صبور بزاف و مستحيل يبكي ولا يبينلك بلي راهو ضعيف
نجوى ( و هي تمسحلو على شعرو ) : حاباتك تفهم حاجة شفت ولا ماشفتش إحساسي من جيهتك ماوش راح يتبدل يكون وش يكون كون هاني ...اليوم هدرنا في الحكاية هاذي بصح مانحبش نزيد نسمع هاذ الهدرة خرجت من فمك فهمت ؟
وليد : ايه صااي المهم عندي تبقاي تحبيني ومانكونش عبء عليك
نجوى : هاي والله هذا وين كنا نهدرو وش من عبء نتا ثاني ... وهييه كي مانحبكش نتا شكون نحب آه
تبسم شوي و بقا حاكمني زمان هكاك حتان رقدنا
::::::::::
راني ذرك في 8 شهر و ماتبدل والو غير الروتين الخدمة و الدار مرة على مرة نخرجو نمشيو باسكو هكا نصحني الطبيب و مليكة ولات وحدة من العايلة اهتمت بيا و عاونتني بزاف في حملي ماتخليني نقيس والو
واحد النهار
نجوى ( وهي تحل الفريجيدار ) : امم ماكان والو في الفريجيدار علاه ماقلتيليش
مليكة : راني قلت لوليد قالي نجيب في طريقي كي نجي جاي
نجوى : بصح ذرك باه طيبي الغدا
مليكة : نديرو حاجة خفيفة و خلاص ... نديرو بيتزا ؟
نجوى : ايي مام الفرماج ولا تون ماكانش
مليكة : مالا وش نديرو
نجوى : شوفي نعطيك تشري الحوايج لي تسحقيهم ذرك و مبعد وليد راهو يقضي الحاجة الكبيرة ...وش رايك
مليكة : ايه كيما تحبي
نجوى : ايا ماعليه .. أصبري دقيقة ( راحت جابت الدراهم و رجعتلها ) هاكي و بين ما تولي نكون أنا وجدت لابات مليكة : لالا خيلي برك كي نولي نديرها انا
نجوى : نورمال نربحو الوقت و راني قاعدة
مليكة : بصح .....
نجوى : ماكانش بصح .... هيا روحي جيبي الحوايج باه مانتعطلوش
هيا راحت و انا بديت نوجد في الحوايج فرينة و الحليب و الخميرة .........و في هاذ الوقت صونا تيليفوني رحت نشوف شكون
نجوى : ألو ؟
ماما: وش راكي بنتي صفا ؟
نجوى : الحمد الله ونتوما
ماما : لاباس ... راني جاية اليوم بلاك نقعد هاذ الشهر معاك
نجوى : ايه مرحبا بيك ... بصح اليوم درنا بيتزا هههه
ماما : ههه و مبعد هاذي مايش ماكلة ؟؟ اللقمة لي كاينة ناكلوها كيف كيف
نجوى : هههه علابالي غير نقسر ..هيا أرواحي راني نسنا فيك
ماما : راني في الطريق أصلا
غلقت و رحت لكوزينة نوجد في لابات و كان لازمني حاجة نخلط فيها درت كرسي و طلعت فوقو باه نجبد وش حابة من الخزانة لفوق و أوووب .............
كي طلعت فوق الكرسي زلقت و طحت منو و بقيت نوجع وحدي عييت حتى نوض نعيط لواحد في التيليفون و مسلاني حسيتو تكسر حتان حسيت بحاجة مبلولة في حوايجي ... كي شت صبتو دم خفت كشمل يصرا للبيبي و انا عاجزة حتى نعيط بقيت هكا حتان جات مليكة و كي شافتني في هاذيك الحالة خلعت و ماعرفتش وش دير كانت راح تعيط لوليد بصح ماحبيتهاش تعيطلو و هو يتقلق و يزيد يحس روحو عاجز كيعاد مايشوفش مايقدرش يهزني و لا يتصرف ... بصح الصطر قتلني حتان حسيت روحي راح ندوخ ... و في هاذ الدقيقة خلت ماما و كي شافتني تخلعت و بدات تعيط و مبعد عيطت لخويا باسكو هو وصلها (نسيت نقلكم بلي سامي يسوق ) داوني للسبيطار و نثم عيطو لبابا و لوليد انا دخلوني لبلوك و هوما بقاو يسناو برا و وليد رايح جاي مقلق
بعط طول انتضار خرجة الفرملية و قاتلهم بلي كانو مضطرين يولدوني ولادة قيصرية و الطفلة زادت ضعيفة على هاذي لازم تبقي يمات عندهم سقساها وليد عليا و قاتلو راهي لاباس عليها الحمد الله سلكت
بقيت يامات في السبيطار و خرجت الحمد الله انا و بنتي في زوج كنا بصحة مليحة
