#لما_جت_عيني_في_عينك
#الحلقة3
المهم مشيت بقلبي و مافكرت بدماغي و خليت أمي على جنب كأن رناد رابطتني بخيط معاها و نتبع فيها ما نشوف في حد الا هي و اي شيء تقولي عليه ندير فيه
مشيت للثانوية متغايضة قعمزت في الكرسي و نفسيتي صفر جت رناد طبطب عليا قتلي خيرك اليوم مش عاجبتني قتلها ما فيا شيء قتلي لا لا مش عاحبتني بالمرة قصدك متغايضة مني لأن أمك مش عاجبها لبسي و شكلي امس🤨 قتلها أي كيف هكي يا رناد ماهو عارفة ان امي ماتحبش الجو هذا قتلي عادي حبيبتي مادوريش توا تتفهم ماتعبريهاش تعالي معاي وسام يبيك شوية عدلي مزاجك و انتي تكدري في روحك على حاجات تافهه مشينا لي وسام و هدرزت معاه و هي تتفرج علينا لدرجة ان وسام اعترفلي بحبه و انا وافقت روحت فرحانه و تعدل جوي 😂😂 خشيت للحوش إستقبلتني امي بالعراك
شهذ قاعدة هذكاي لي ماتتسمى تصاحب فيك 🤨 ......أمي رناد ماليكش علاقة بيها فوتيها عاجبتني مش لازم تعجبك يعني😐....قصدك تكسري في كلامي هاذي ماتنفعش بتجرك معاها للحفرة لي هي فيها سلم بنتي أسمعي الكلام و اقطعي الحبل من الأول خير مايلف عليك و يخنقك 😢......يام انتي ماتعرفيهاش زي مانعرفها أني خلينا في حالنا 😭.... مش ح نخليك في حالك يا أني يا هي و سألت عليها طلع عندها سوابق و محشمه إماليها في كل مكان توا لي يشوفك يقولوا انتي زيها تربحي فكينا من الدوة الناس ماترحمش 💔💔
طبعا عطيتها بظهري و فتها و عايشة في احلامي الوردية معاش نطلع من داري و أمي لا تجي جيهتي لا نجي جيهتها كل الوقت على الفيس نكلم في رناد و وسام لين جي يوم كيف طالعة من الثانوية جاني بابا بيروح بيا عطلت عليه خش للثانوية يدور عليا لقاني انا و وسام مقعمزين جنب بعض في جيهة من الثانوية اني وقفت طول لما شفته و وسام انصدم حتى هو بابا رفعني شحني من يدي و ركبني في السيارة خش للمدير قاله كيف ماتراقبش في الطلبة متعك ولاد مع بنات بروحهم قالة بنتك نشوف فيها كدا مرة مع هذا الولد لكن مابيتش نقولك خفت عليها منك لديرلها شيء قعدت ننصح فيها بنتك ان معاش تجي جيهة الأولاد خير مانحرش بوك لكن هي لا حياة لمن تنادي
طبعا روحت كليت طريحة متكمه من بابا 😐😐
بابااااا اطلق يدي توجع فيا .....امشي قدامي لدارك لما نوريك نجوم الظهر المدير كلي وجهي بسببك الله ياخدك و يفكني منك ماحصلت منك غير البلاوي 💔 اها اها اها باش تتعلمي معاش تكلمي الاولاد يضحكوا عليك هاذم ياحمارة مش محبة فيك .....و راس بوك اطلقني ياسر 😭😭...... سعااااد يا سعااااد تعالي زودي لمي بنتك حشمتنا قدام الناس 😣.....قتلك اني يا شهد بطلي فكك من البلاء لي أسمها رناد مش كويسة ماتسمعيش في الكلام تستاهلي ما جاك ......اطلعوا اطلعووووووا خلوني بروحي 😢......سعاد سكري عليها الدار خليها زي الكلبة هكي و الولد هذاكا توا يشوف حسابة ...
مشي بابا جاب أسم الولد كلم بوه طبعا حتى هو حصل هزايب بعتلي رسالة على الفيس قالي سامحيني باي بوي ماخلى ما قالي اكيد ح تلقي حد خير مني سلامات 💔
YOU ARE READING
لما جت عيني في عينك
Teen Fiction- (الراوية مكتملة) كتابة:BOKYNAM✏ ____ لما جت عيني في عينك ____ ****قصة واقعية بأسماء مستعارة***** اني شهد عمري 18 نقرا سنة أولى جامعة بنحكيلكم قصتي صح درت أغلاط في حياتي لكن أني مش ملاك و مافيش حد مايغلطش كانت قصتي في الحب و مشاكل...
