السلام عليكم ورحمة الله وبركاته
الفاتحةعلى أرواح الشهداء ....
والصلاة على محمد وال محمد
لشفاء الجرحى و لكشف الغمة عن هذي الأمة
((اللهم صل على محمد وعلى أل بيت محمد))
#بنت_المؤمن
شيخ الشباب²
من كتابات زهراء العراقية
من غير تصحيح او مراجعة
اباوع لحياطين غرفتي البيضة صافنة من غير دارية .... لفت نظري الذبان الي بدأ يدخل للغرفة من الشباك ، اريد هوى منه ما اريد حشرات شگومني اسدة
البعض منه اجه على الكيك الي على الميز المراية
دخلت شهد ببتسامة مرسومة مشرقة وجها الباهت
-اجيت
ضحكت على امتعاض وجهي و اجت بوست خدي
-هلا شهودة مو كلت لا تجين انت مخطورة
- هي منا لهنا صرتي مثل ياسر يكلي اصعدي بالسيارة اوصلج اذا ردتي اتروحين ههههههه
-الله يحفظة الج
-اي اشلونج اليوم
-حيل كارهه روحي ..
احس نفسي تعبت اهلي وياي ولا بعد تعبتكم وياي والله
دخلت كوثر سلمت و طلعت مطلعة علي وياها من الغرفة....
- ميخالف حبي
-ما متعودة هيج انام والناس تساعدني
متعودة اكوم بنفسي
-ميخالف فترة وتخلص
-تعبت رقية عايفة بيتها و مستقرة اهنا
وزيادة كوثر خطية كل صبحية
تجي......حبابة لا تخليها تجي حيل استحي منها
- ميخالف حبي كوثر هي والله من كيفها تجي لأن تعرف برقية ما تكدر وحدها
-صحيح رقية بس تشوف طلبات امي
ما تكدر للبيت
خلف الله على اختج
- هي تكول اكسب ثواب ما عليج هي صايرة تحب تغير جو اصلا تضايق من كعدة البيت تحب الطلعة تجي اهنا يم امج دك سوالف كوثر واعرفها
حاولت ابتسم الها
غمضت اعيوني متألمة
-ها اشبيج
-ما بيه
ياريت لو يطلع بيه شي دوخت ابوية ومرتضى.......كل يوم طبيب شكل واختصاص شكل
محد دا يعرف علتي !
- والله ما ادري
-بديت اصدك بكلام كوثر
لو مريضة كان انعرف مرضي او حتى لو ما انعرف لو كل طبيب يكول شكل
كان كلنا مريضة وسوء تشخيص بس كلهم وكل الاشعة والفحوصات تكول مابيه شي
شغله تحير
ظلت بيومها شهد يمنا للغدة بس كوثر كملت طبخ وراحت ماخذه اطفالها وياها ..
رقية وشهد تغدن وراحت شهد العصرية .
اما اني ما جاي يريحني وجود احد احس بضيق معنوي من داخل وما بيه حيل حتى اكوم من مكاني خاوية
