جرس باب شقة ناس مختار ضرب ،، وكانو منتظرين دكتور أمجد ،، سامي فتح الباب وقال ليه خلينا ننزل نتكلم تحت بس هو رفع صوتو عالي ،، لشنو نتكلم تحت ولا انتو ما بتحبو تستقبلو ضيوفكم كويس ،، نادين قالت لي خالتو نادية في شنو سامي مالو ما عايز يخلي الزول يدخل ،،
سامي مسك الباب واتلفت عليهم وقال لي امو سوقي نادين جوه ،،
بس انتي يا نادين من جواها بقت ما مطمنة وحاسة انو في شي ما تمام ،، جات علي سامي وقالت ليه ما تخليه يدخل في شنو ،، من شافت دكتور أمجد قالت مش انت الجيت امس وكنت بتتكلم مع سمر [اخت سامي] ،،
سامي قاطعها شنو هو جا امس البيت؟
في اللحظة دي امجد خلاص فقد صبرو ودفر الباب عشان يدخل لكن سامي مسكو وقال ليه يا زول انت مجنون قلت ليك ما مرغوب فيك جوه البيت خلينا نتفاهم بره المشكلة خاصة بينا،، وبقو يتدافرو ،،
امجد رفع صوتو قال ليه المشكلة بقت اكبر من كدا وبتخصكم كلكم احسن تزح تخليني ادخل ولا اختك دي الليلة بتلقي فيديوهاتها في اي مكان حايمة،،
الجملة دي زي ما بقولو كانت القشة القصمت ظهر البعير،، سكتت سامي
وخلت مختار يتكلم خليه يدخل يا سامي،،
بكل سهولة زح ليه وفتح الباب وكدا الدفة بقت في يد امجد بكل ثقة...
نرجع لي جيلا الجات المستشفي تلاقي امجد بس ما لقتو وبقت منتظراه سالت الفراشة وكم ممرضة قالو ليها لسه ما جا بس ما من عوايدو يتأخر كدا الليلة ،، تمام قعدت في المكتب وبقت منتظراه ...
سامي اتلفت علي نادين واختو قال ليهم ادخلو جوه ،، بس نادين عنيدة وكانت اصلا عايزة تعرف الشمار شنو بالذات من اخر كلمة قالا امجد ،،
ردت ل سامي وندخل لشنو ؟
عصب عليها وكورك فيها قلت ليكم طيرو جوه ادخلو،،، لكن سبقو صوت دكتور أمجد لما قال ليه ياخ خليها كمان تعرف قصتك زيادة الخير خيرين برضو ،،
سامي اتلفت عليه وقال ليه امجد احسن تحترم نفسك انت في بيتي ما عايز اتلوم معاك احتراما لي امي وابوي ..
قعد يضحك قال ليه امك وابوك ديل لو كنت بتحترمهم ما كان بتلعب بي بنات الناس وتفكهم عكس الهوي ولا شنو يا خالتي انتي عارفة ولدك اكتر وانتي السند ليه كنتي من زمان بشوفك وانتي بتدافعي ليه وبتقولي ليه انو اي بت تنزل من كرامتها هي الجنت علي روحها وتستاهل البحصل ليها،
لشنو ما حصل حاولتي تقولي ليه ياولدي ما تعمل في بنات الناس كدا لانك عندك اخت فكر فيها ،،
ما وريتيه كما تدين تدان ،،
دي ما عارفا يا سامي وطلع فلاش من جيبو وجدعو ليه ،، سامي صباه في يدو وسكت عرف الشي العملو امجد،،
قال لي تتزكر ملاك ولا نسيتا،،
سامي دا نطط عيونو والشريط رجع ليه قدامو زنننن صوت واحدة بتبكي وبتصرخ انا اعمل شنو ناس البيت لو عرفو بقتلوني حرام عليك يا سامي انا حبيتك ووثقت فيك وانت قلت لي كدا ،،
انا اعمل شنو اعمل شنو وجررررر بعدها سمع صوت صرخة شديدة ورو رو دا الوقت العملت فيه ملاك الحادث وهي بتتكلم مع سامي في التلفون،،
سامي بقي ساكت لسانو اتشل نهائي من الكلام خصوصا وجود نادين قدامو ،،
امجد ما سكت لحدي هنا وقال ليه ملاك الانت لعبت بيها وعشمتها انك بتحبها وحا تعرسها ملاك دي اختي بت يادوب عمرها كان 17 سنة ياخ اخجل من نفسك وانت بتلاحق بنات مراهقات تغشهم بي كلام حلو عشان ما عندهم تجربة وخبرة انت واحد حقير تستاهل الضبح الليلة وطاخ ضرب ليك سامي والشكلة بدت بينهم بقو يتضاربو وقال ليه انا كنت كتلتك من وقت الدكتورة النفسية كلمتني لما ملاك حكت ليها بالحصل معاها بقيت بفتش فيك وقدرت اعرفك بس صحة اختي الادهورت وصدمة امي ال لي يوم الليلة بسبب بتها والوجعة الدخلتها فينا خلتني عايز اوجعك انت كمان في اختك لكن عارف انت طلعت محظوظ وقدرت تطلق اختك مني لكن صدقني ما نسيت ووصلت لي جيلا وعرسنا قريب وبناتك ديل انساهم تاني ما تقول انك ما شغال بيهم ،، نحن رجال زي بعض واي راجل بموت مية مرة لما يشوف المرا الكان معرسها مع واحد بعرفو وكمان كان راجل اختو ،، وبناتو في حضن زول تاني يقولو ليه بابا،،
سامي دفر ليك امجد وبقي هايج يا حيوان يا..... لما فيه نبز والشكلة زادت زيادة ...
نادية و نادين وسمر قعدو يصرخو ويكوركو ويمسكو فيهم ،،
يالله مختار قدر يزحهم من بعض ،،
وكلهم بقو مصدومين من الحاصل والسمعوه،،
امجد قال ليهم مشكلتكم انو هو ولدكم تتحملو بلاويه الفلاش دا فيه فيديوهات منسوخة لي بتكم لو اتنشر شوفو حا يصل لي كم في الفيس والفضيحة البتجيها وبتمسكم قبلها ،، اختي بسبب ولدكم عملت حادث ولي يوم الليلة عيانة واتشلت دا غير انها فقدت شرفا ،، سامي يعمل العايزو حا يعرسها ويطلقها طوالي انا دا البهمني،، وتاني في ستين...
سمر من وجعها من امجد قالت ليه مش عامل روحك دكتور تقدر تخليها زي البت من اول قالتها بي استهزاء ليه وكانت قاصدة توجعو...
عاين لي سمر بحرقة هو كمان الكانت ما متوقعة دا كلو يحصل من امجد هي زنبها شنو بس ،،
قال ليها انا ما حقير ولا وسخ بس الظروف هي الجبرتني اعمل فيك كدا غصبا عني من كذبة عرسنا،، وانتي هسي حسيتي بالوجع وعرفتيه كويس،،
وطلع منهم،،
نادين انهارت في لحظتها وجرت جوه بقت تلملم في هدومها جوه الشنطة ،، سامي لحقها بس اتجننت علي الاخر وقعدت تصرخ فيه ابعد مني اطلع بره قلت ليك ما عايزة اشوف خلقتك دي قدامي ،، مختار ونادية جوهم جوه وقعدو يهدو فيها وطلعو سامي بس ياريتهم ما طلعو ،، فجاة سمعو صوت صرخة سمر وجو جاريين كلهم لانو سامي لما فيها ضرب بالقاش وكفيت ،، وقعد يقول ليها دا كلو من ابوي الاداك حرية اكتر من اللازم تطلعي وتدخلي علي كيفك في النهاية انتي بت واي شي غلط تعمليه محسوب علينا ودا اخر العملتيه خليتي الما يسوي يلوي يدنا ،، انتي عارفة كسرتي ضهرنا النص يا.... من الليلة طلعة ماف وتلفون ماف واقرب زول يقول عايزك حا تعرسيه انتي فاهمة ،، سمر بقت تبكي بهستريا وتترعش وترجف كلها،، ونادية غلبها البتعملو قعدت في الكرسي وبقت تبكي،،
ابوه خلاص وصل الحد منو وجراه اداه ليك كفيين اي واحد اكعب من التاني وقال ليه دا كلو مني انا الما عرفت اربيك من الاول اديتك الثقة وخليتك تتصرف في كل حاجة ما قصرت منك هسي جاي تتفرعن علي اختك بس ،، انا قروش بديك العايزو ،، العربية كل مرة تبدلها بالموديل ،، سفرتك بره وشغلتك ،، افتكرتك انك بقيت راجل مسؤل ،، لكن دي غلطتي لما خليت امك تدلعك اكتر من اللازم وتبيح ليك اي شي بحجة انك راجل تعمل العايزو ،، هي الرجولة قالو كدا تغش بنات الناس وتدخل وتطلع معاهم بمزاجك وفي الاخر تزوغ ،، عرسنا ليك قلنا بتعقل بس انت كل يوم بتبين انك واحد مراهق لسه عايز العين الحمرا ،،
سامي رد علي ابوه دي زواجة دي اول انتو عرستو لي جنات وانا ما عايزها كنت ،،
ابوه كورك فيه يا قليل الادب اسكت كلو من عمايلك ،، ما اي بت اهلا بسكتو ويقتلو بتهم ويحاولو يضارو العملتو بي تصرف تاني ،، طالما انت بتعمل الغلط يبقي تتحمل نتايجو ما كل مرة نحن نستر في غلطك،،
لبتين تعقل يا سامي وتتعدل عديل ،، بناتك كبرو وانت لسه ما عارف عنهم حاجة ،،
نادين كانت واقفة وسمعت كل الكلام وقالت ليهم يعني البت الامس برضو كانت مرتك مش ،،
رد عليها ياخ ما مرتي قلنا ليك،،
ماف زول رده عليها الا سمر لما هاجت وقالت لي نادين جيلا طليقتو برضو وعندو منها بتين انت لشننو لي هسي مصر تكذب،، تحب احكي ليهم كل العملتو برضو ،،
سامي عاين ليها بعين حمرا واتدخل مختار وقال لي نادين يابتي الحياة دي بتحصل فيها المشاكل لكن الناس بتلمها وبتعيش حياتها وسامي اظن كدا عرف غلطو يلا ادخلو غرفتكم وهو بفهمك كل حاجة،، سامي مسكها من يدها والله يا نادين البنات هم البجرو وراي وشكلهم بكتبوني ولا بعملو لي حاجة لاني ما بكون واعي لي روحي،،
مختار وسامي حاولو يلينو راس نادين عشان تلم الموضوع والكلام ما يصل لي اهلا ،، لانو مصالحهم اكبر من كدا وممكن تتهده في ثانية بس ،،
بس نادين ما قدرت تتقبل الحاصل وجرت يدها من سامي ولزتو جرت شنطتها وطلعت من الباب بدون تتفاهم مع زول ،،
ابوه جاط فيه وقال ليه اطلع بره انت واحد ما نافع وما اشوف وشك قدامي ،، نادية قامت وبقت تهرج ولدي ما عمل شي عشان تنهزرو قدام نادين انت الصغرت منو وخربت بيتو قدام مرتو ،،
اوووف مختار عمل كدا ودخل جوه وسامي مشي طلع زعلان ومعصب للاخر من الحصل ...
ركب عربيتو وبقي شغال يتصل في نادين الابت ترد عليه ،، كان عايز يلحقها قبل تصل بيتهم ويستخدم موهبتو زي ما بقولو كلمة كلمتين معسولات يرجعها بيهم ،، دي نقطة ضعف معظم البنات شوية هدايا وكلام حلو قلبهم ابيض وبنسو اصعب حاجة وقتها،،
داس بنزيين ورفع السرعة وطيران اتحرك بي عربيتو كان همو بس يلحق نادين ...
بقي سايق بسرعة وتيييت تيييت يضرب في البوري يتخطي في العربات وكل دوسة بنزين كان بتوتر معاها اكتر وتفكيرو ماشي لو اهل نادين عرفو يبقي تعبهم في الشركة كلو ضاع لانهم دخلو راس مالهم كلو فيها ،، يعني من الصفر يبدا تاني مستحيل طبعا ،،
سامي ما حس بي روحو انو اتعدي السرعة القانونية والعربات دي تييت تييت بجوطو وواحدين يطلعو راسهم يكوركو ليه يا زول انت قنعان من روحك خفف السرعة دي ،، بس العواقب دايما بتكون وخيمة ،،
واحد من الشفع الببيعو المناديل في الاستوبات ديل جا جاري يقطع الزلط وسامي جا داخل زي القدر قدامو غلبو يضغط فرامل بسرعة تيييييت طااااااخ شاتو طيرو هنااااك ......
نجي لي جيلا خلاص زهجت من الانتظار وقامت تمشي مع مسكت الباب امجد جا داخل ،، قال ليها جيلا انتي جيتي بتين،، ما جاوبت عليه ،،
قالت ليه لما انت طليق سمر عملت نفسك رايح لشنو ؟
اتخلع انو جيلا عرفت من وين وبقي يتمتم م هو لكن ما ،،
قالت ليه امجد انا عرفت الحاصل وجيت اوجهك عديل لاني بقيت بكره اللف والدوران من الاخر كنت عايز تستغلني مش؟ بس لشنو وليي دا العايزة اعرفو؟
لالا والله يا جيلا ما كدا وجات صدفة ساي بس ما اكتر حاول يزوغ من الموضوع،،
بس جيلا عصبت وجاطتت فيه وحلفت عليه يمين الله يا امجد مش انا مسكينة الما عملتو في سامي اسويه فيك هسي وانا مجنونة وممكن اصرخ هسي واقول انت اتحرشت بي الم فيك المستشفي دي كلها،،
اتخلع من تصرف جيلا القالتو ليه وقال ليها جيلا انا اسف والله معليش خلاص كدي اقعدي وانا بحكي ليك اي حاجة....
حكي لي قصة اختو مع سامي وسبب زواجو من سمر ولما هي جات بي امها وعرف انها زوجة سامي كان فعلا عايز يستغل الفرصة دي ويحرق قلبو لما يخليه يشك انو في علاقة بينهم ،، بس وقت عرف انها اتطلقت منو اي شي فشل تاني ،، قال ليها لكن الفرصة جاتني مرة تانية لما انتي طلبتي شغل وانا قدرت اتوسط ليك عند مختار عشان اقدر اعرف الاخبار وكمان اخلي مختار يعرف انك زوجة سامي ويعرف بناتو ،، بعد عرفت من جنات عنك كل كبيرة وصغيرة وانو اهلو كانو رافضين زواجكم وماشافوكم ،،
قلت ليه جنات؟
اتطانشني في الموضوع وقال لي يا جيلا انا بعد اتعرفت عليك سحبته كل البفكر فيه انا مستحيل اضرك بسبب سامي حتي لغيت الكنت بخطط ليه عشان اخليك وسيلة احقق بيها هدفي ،،
جيلا انا لقيت روحي بحبك وعايز اتزوجك قلتي شنو ومستعد افرش ليك الارض ورد واعوضك عن كل حاجة كعبة مرت بيك صدقيني يا جيلا انا والله ما كعب لكن مرات طبيعة النفس البشرية بتبقيك كعب كدا بتعمل اي حاجة عشان تاخد حقك بس وانا حكيت ليك الحصل ووريتك نيتي،،
قلتي شنو يا جيلا؟
الساعة ديك انا صدمني دكتور امجد الفعلا بديت احس بي شي اتجاهو بس بكلامو دا هدم كل الثقة الختيتها فيه اتمنيتو لو نفي لي كان يكون احسن،، ،، ما عرفت ارد عليه بس لقيت نفسي شلت شنطتي وطلعت دموعي في عيني ما اتخيلت دا كلو يطلع من دكتور زي أمجد....
يتبع
