شفت يا رجب العيال علي الفيس و قلت ادبهم!
خير يا محفوظ ؟ ايه اللي حصل بس؟
العيال اللي مش متربيه نازلين شتيمه في الشيخ الشعراوي الله يرحمة و قال ايه بيقولك مينفعش نعمل اصنام من البشر و ان كل البشر قابلين للنقد!
يا نهار مش فايت! ليه كدة الله يخيبهم دة راجل وسطي و عظيم
بيقولك يا سيدي عشان ليه اراء - قال ايه - متطرفة! خد عندك عشان بيقولك ان الست مكانها البيت تربي العيال و مش المفلاوض تشتغل!
اه والله معاه حق.. النسوان لو قعدت في البيت البطاله هتقل و المسخرة هتقل.. و أصلا الستات دول ناقصات عقل و دين يا محفوظ
خليني افتحلك الفيس و اقرالك كاتبين ايه كمان
بدأ محفوظ يبحث في الفيسبوك عن المنشورات و المقاطع المتعلقة بالشعراوي.. و اثناء بحثة وقعت عيناه علي عنوان فيديو اثار انتباهه
"رئيسة وزراء نيوزيلاندا تعلن إنجازات حكومتها في السنتين الماضيين في دقيقتين"
مصمص محفوظ شفاه و هو يستمع لرئيسة الوزراء و هي تسرد بطلاقه إنجازات كلها تمس حياة المواطن اليومية ثم شارك الفيديو مع اصدقائه علي صفحتة
انت سرحت في التليفون يا محفوظ ولا ايه
معلش يا رجب اسف.. لقيت حاجة تانيه اهه.. بيقولك ان الشعراوي قال اللي ميصليش نموتة
استغفر الله.. هم كدة عاملينة ولا أبو بكر البغدادي.. العيال الملاحدة دي حرفوا كلام الشيخ اكيد
طيب يا رجب نخش و نشوف المقطع علي اليوتيوب
الله اكبر.. شفت ظالمين فضيلة الشيخ ازاي.. الراجل قال اللي ميصليش يستتاب ثم يقتل.. شفت بقي ازاي الدين يسر.. الأول نديلة فرصة تلات ايام.. يعني 72 ساعة و الصلاه أصلا بتاخد دقيقتين
اه والله يا رجب معاك حق.. عيال شكلهم ملحدين فعلا و بيفتروا علي الشعراوي الله يرحمه
اتسعت حدقتا رجب و هو ينظر في تليفونة المحمول
مالك يا رجب؟
جالي فيديو نار لبنتين بيبوسوا بعض
طيب ابعت يا اخي.. شير في الخير هاهاهاها
شوف يا محفوظ يا اخويا.. العيال دي مبقاش ليها كبير.. فين احترام السن؟ المكانه؟ او حتي حرمة الموت؟؟
اه و الله يا رجب الجيل دة مش متربي خالص
الشيخ الشعراوي كان عالم نادر تكرارة يا محفوظ مش زي المقبور محمد سيد طنطاوي اللي اباح للمسلمين يخلعوا الحجاب في فرنسا ولا اللي اسمه علي جمعه شيخ الانقلاب
اه والله ناس تستاهل الحرق.. لازم نوعي الناس بخطرهم و لازم الناس تبطل نغمة له ما له و عليه ما عليه دي!! دي أفكار خطر علي المجتمع
اه و الله يا محفوظ.. كفايه صناعة اصنام من البشر بقي!
