توأمي

4

الحلقة 3
جازو 2 سمانات حاجة ما تبدلت امين و حسام كملو المحاضرات ديالهم، خرجو و راحو للباركينغ.
حسام: هيا نفطرو راني ميت بالجوع.
امين: شوفور تاع باباك انا واقيل، وين راهي طوموبيلتك.
حسام: عند لميكانيسيا.
حل امين باب الطونوبيل و ركبو: علاش واش بيها.
حسام: والو، تقاس الباربريز برك.
امين: يا صاحبي نخرج فالهدرة بالكلاب، علاش تقاس؟
حسام: دخلت فطونوبيل البارح.
امين كان يسوڨ فرينا ساك و دار ليه عينيه راح يخرجو من بلاستهم: كيفاش؟ وقتاش؟ راك مليح؟
حسام: وي سافا، ما كان ولو صاحبي تقاست الطوموبيل برك
امين: حمار، هادا وين تقولي، راك سور ما بيك والو
حسام: كاين حاجة
امين: واش؟
حسام: و نجوزو لسبيطار تاني
امين: علاش؟
حسام: والو، تفعصت رجلي شوية لازم نبدل البونداج.
امين رفد حاجبو: ماشي قلت ماكان والو
حسام: فعص برك شبيك، رجال و لا بطلنا.
امين: ريح ما تكذب رجلك خير من رجلي.
حسام: ساغتيفيكا ميديكال باش نسلك من خطبة بابا كي يسمع.
امين ضحك: جامي تتبدل.
_______________________
دخلو لبنات لدار و استقبلتهم لالة وردة بفائض من السبان.
وردة : يا وجوه البق هادا وين تدخلو لدار ياك.
تنهدت شوشو: ايه و رانا خارجين.
وردة : علاش شقيتي روحك و جيتي هيمال يا لالة، لوكان رحتي من تما و خلاص
شوشو: دوزاني راهم هنا جيت نديهم.
وردة : الحمد لله لي جابوك دوزان، اييه وين هاملة يا لالة.
شوشو: عندي بغاتيك ماني.
ميمي: و انا تاني.
وردة : وين؟
شوشو: فسبيطار كيما مداري.
ميمي: و انا ف ليسي.
وردة : مكاش بغاتيك فالسنة الاولى عمبالكم حمارة واقيل.
شوشو: يا ماني ياك قتلك صاحب بابا دخلني نخدم عندو، مي ماشي خدمة باش نتعلم برك، و ميمي تاني.
وردة : ايه صح، هيا هيمال نحطلكم تفطرو باش تروحو، درت سكالوب باني كيما وحبوها.
ميمي: اااممممم يعيشك ماني، هيا شوشا.
شوشو: نو ميغسي، مانيش جيعانة، نبدل و نهرب.
وردة حت يدها على جبين شوشو: سافا بنتي لا تكوني مريضة و لا كاش حاجة.
شوشو: لالا ماني سافا، و علاش سقسيتي؟
وردة : باسكو جامي تقولي للماكلة لالا نتي.
شوشو: ميغسي ماني، صبتي لوكازيو و رميتي عليا الهدرة.
حضنتها وردة : انا يا بنتي، ياك ما عندي غير نتوما.
حضنوها لزوج: و حنا ما عندنا غير نتي ماني
____________
ربيعة مانهم يماة باباهم، رباتهم ملي ماتت يماهم و هوما في عمرهم 3 سنين، رباتهم كي بناتها و كثر و هوما تاني يموتو عليها .
____________
خرجو لبنات كيفكيف،
شوشو: ميميش وصليني مانيش حابة نسوڨ.
ميمي: تركبي فالموطو؟
شوشو: وي.
طلعت ميمي حواجبها مستغربة: نتيا فالموطو؟
تنارفات شوشو: ايه علاش وشبيا؟
ضحكت ميمي: والو، خوافة برك.
شوشو: اااف الغلطة تاع لي دارك بنادم و هدر معاك، رايحة وحدي.
ضحكت ميمي و حكمتها من يدها: هيا هيا بلا فشوشك، اطلعي و احكمي مليح بالاكي.
شوشو: ادا قتلتيني تدي ذنوبي.
ميمي: كلش غير ذنوبك، راكي معمرة يا بنتي.
شوشو: هيا اكسيليري قبل ما يجيبني برا موسيو حواس.
ميمي: كنتي تخمي كي قعدت ساعة فسال دو باان.
شوشو: كنت نحي فستراس
ميمي: نسيت بلي نتي سبيسيال، هيا شدي شدي.
لبسو لي كاسك و ديماراو ديراكسيو السبيطار.
______________
لحق امين و حبس قدام باب سبيطار، خزر فالساعة: ربع ساعة.
حسام: واشن؟
امين: ربع ساعة و نروح و نخليك لوكان ماجيش.
حسام: الله لا يطيح واحد في يدك يا صاحبي.
خرج حسام دخل لسبيطار و امين بقا يستنا، جازت ربع ساعة و حسام ما ولاش، امين: نص حياتي راحت خسارة مع الهم هذاك، واش كنت نخمم كي درتو صاحبي.
دخل لسبيطار حتى شاف حسام يڨصر مع فرملية و يضحك، حك امين لحيتو: الناس يصاحبو لمسڨمين و انا الوخدة تاع الدنيا بعتهولي ربي.
راح و خبطو على ظهرو: صاحبي واقيل عمبالك صاح شوفور تاع باباك انايا؟
ضحك حسام: اااه امين، شوف هادي عليا، تخدم هنا.( غمزلو )
شاف فيها امين ملفوق للتحت و شاور للبسة ديالها: باينة.
عليا مدت يدها لامين و عينيها ولاو قلوب: امين وسمك هيمال؟
ضحك معاها امين ضحكة صفرا و دارلها براسو ايه، حسام شمها قارصة مد يدو و خمس معاها: عندو كومبلاكس الله غالب
عليا: اااممم تحب نعاونك و نحيهولك ماشي بروبلام، نسمعك وقت ما حبيت.
ضحك امين: لوكان حليتي بيرو ديال بسيكو هيمال و خليتي الفرملية للي تستاهلها.
حبطت راسها و حسام خزر فيه تاع واش راك دير، امين ما عبروش: كملت شغلك؟
حسام: مسيو حواس عندو رييونيو( اجتماع) قالولي يكمل على الثلاثة.
خزر امين فالساعة: مزال ربع ساعة.
حسام: ادا راك حاب نلصق فيك مام في داركم مجيبليش سارتفيكا.
نسف امين: اكتيفي يا خو جابلي الغمة سبيطار، ما نحبوش.