كرونيك: 💞لعبة العشاق💞 💓خلود&هشام💓

18

.#الحلقة_18:
راحت خلود للدار ومن داخل تغلي حاساتو غير يتمسخر ..وهي امناتو وجيست لقا وحدة زلة بقا يحكي معاها ..
لحقت للدار دخلت لبيتهم هي وابتسام وقعدت تبكي وبااشهقة بقات صورتو مع هذيك الطفلة بين عينيها ..يعني هي بقات شحال وهي تستنى فيه ومحموقة باش شوفو ويشوفها...فلخر لقا وحدة شابة زلة نسا روحو ونسا خلود وقاعد يحكي معاها ..
ابتسام بقات شوف فيها  تبكي وبااشهقة تنهدت قعدت شوف فيها حارت واش تقوللها
ابتسام: بلاك فهمتيه غلاط.
خلود : نن منحتاجوش معلاباليش بيه
ابتسام: مزال معيطلكش ؟
خلود : طفيت التليفون منحتاجوش ميزيدش يعيطلي يروح يخطيني كرهتو..
...
نرجعو لهشام .
هشام كي نزل مالتران ..شاف الطفلة لي تلاقاها ديك الخطرة فالتران وقعد جارهم يشوف معاها .
هشام : يعني هذي ممكن تقرا هنا .
تفكر فريال وكامل واش قاتلو وواش صار مع يماها وباباها .
قلق زير على يديه مالغش ...حلف يجيب حق فريال .
هبط مالتران وهي تمشي بلعقل وتتمايل ...لحق عندها قطعلها الطريق وتبسم.
هشام : بونصواغ ..سافا !؟
صونيا : كوا ؟؟
هشام : معليش نحكي معاك.
صونيا مشات وخلاتو.....زاد لحقها .
هشام : دقيقة من وقتك .
صونيا حبست وعوجت فمها : وي تفظل .
هشام : خليني نكمل هدرتي كامل اوك !!
صونيا : داكوغ .
هشام : علاه متستريش روحك ؟؟
صونيا حلت فمها مخلوعة: نعم ؟؟؟ واش دخلك فيا ؟!
هشام : راني نحكي معاك بلعقل وراكي كيما ختي...علابالك هكا راكي دايرة فتنة والرجال لي جوزي عليهم مينحوش عينيهم منك
صونيا : مش مشكلتي  ..انا حرة نلبس واش نحب ..هذي حرية شخصية نورمالمو كون جا مربي ميشوفش في بنات الناس .
هشام : صحا نهدرو شوي ونفهمو بزاف .. ربي امرك بالحجاب ..عارف واش يحس الراجل كي يشوفك ونتي متبرجة...الرجل عند و غريزة تاعو اقوى من تاع المراة باربع مرات . محال يقاوم غير اذا كانو ايمانو قاوي .حرام عليك ديري الفتنة..
صونيا : هذا شغلي وحريتي نلبس واش نحب فهمت !!
ومشات كملت طريقها وتتعوج.
هشام قلق تفكر دموع فريال وهي تقولو نكرهو بابا نكرهو...
مشا وشدها من يدها بغش ودورلها ليها حتى عيطت .
صونيا: اطلقني وشبيك ؟؟ علاه تجبد فيا هبلت ؟!!!
ناس تتفرج وهو عينيه مالغش رجعو حمر.
هشام : شو في يا بنت الناس راني ولد فاميليا وفهمتك بلعقل محبيتيش تفهمي ..
البسي امشي عريانة ميهمنيش فيك...انا وحدة كيفك شعرة متحركهاش فيا ..خاطر نتي  والسلعة المتوشية كيف كيف...وهدرت معاك ماشي علا جالي انا مي على جال طفلة صغيرة بكيتيها وقهرتيها.
صونيا مخلوعة: انا بكيت طفلة ؟؟ شكون هذي واش راك تهدر ؟؟
هشام : ايه شافك باباها وهو مرتو صابها ربي مريضة وهو صابر عليها ..وكي شافك السيد مقدرش الله غالب غواتو غريزتو وحس بلي هو معندوش مرا في دارو ..وراح ليها سبها وعايرها وهي مريضة ربي بلاها..
رجع ميشوفش فيها الشيطان عماه ونتي هي الشيطان ..مرتو مريضة بكاها وهي في حالة
الطفلة بنتو خافت وبكات ونقهرت..
تعرفي واش قاتلي ....قاتلي نكرهووووو بابا ..
رجعتي طفلة تكره باباها بسبتك وبسبة لي كيفك..
حرام عليك ظيعي طفلة صغيرة...حراام عليك حسبي الله ونعم الوكيل فيك..وكون كشما يصير للطفلة منسامحكش طول حياتي
تفووو عليك وعلى لي كيفك. ..
ومشا وخلاها واقفة مخلوعة والدموع في عينيها  والناس كامل تتفرج..
هبطت راسها وراحت تجري