جَمَعتْنا الصِدْفَة

البارت -١٢-

......

مريم : وخر عني انت شجاي تسوي ، درت وجهي وطلعت من الغرفة بسرعة
علي : باوعتلهة بصدمة ما چنت متوقع راح تكون هذي ردة الفعل ليش هي مو رادت تنتحر علمودي ليش هسة ما تريدني اتقربلهة
مريم : طلعت من الغرفة واني مستغربة من الي سواه و من عندي اني شلون سمحتلة يتقربلي ورة كل هلمذلة والاحتقار والاهانة ليش نسه هو شنو سوة بية ليش نسة راواني الويل بهل مدة نسه انو هو شگ راسي باول يوم لاگاني نسه شلون كسرلي گلبي وحرگ روحي حطم امالي واحلامي برجوعنة سوة وهسة صار يحبني هذا اكيد جاي يلعب عليه اكيد نسى انو احنة جاي نمثل
نرمين : مريم شبيج ؟؟!!!
مريم : ها لا ما بية شي
نرمين : يا باعي حمرتج خربانة
مريم : ها اي خربتهة ردت امسحهة لان غامقة و ما اعرف اطلع بهجي الوان ، رايحة للحمام امسحهة ، دخلت للحمام و مسحت الحمرة الملطخة غسلت وطلعت
حسن : مريم ! شبي لون وجهج مخطوف
مريم : هاا لا ما بية شي
حسن : اذا خلصتي تعاي نزلي علمود نروح
مريم : تمام بس اجيب جنطتي ، رحت دخلت للغرفة لگيته ما موجود الحمدلله اخذت جنطتي وموبالي ونزلت لگيت نرمين تحجي وية حسن انتبهتلهة تحجي وياه بلهفة ذكرتني بايامي الحلوة وية علي حسيتهة تشبهني كلش هادئة ثگيلة عكس اختهة الصغيرة خفيفة رغم بعدهة صغيرة بس ما اعرف ما ارتاحيتلهة مدري ليش حسيتهة مو خوش بنية احساسي هيج يگول بس ان شاء الله خايب هذا الاحساس لان حرام تكسر امهة خطية اهووو سويتلي سالفة واني ما شفت من البنية شي ، صعدت بسارة علي ورة باوعلي بخزرة
علي : سايق الخلفج صاعدة ورة ؟ وبعدين لا يشكون بينة تعاي هنا كدام
مريم : باوعت علي بقلة اهتمام نزلت وصعدت يمة وصلنة للمول فترينة  اشترينة اشياء و تعشينة و اكو شي لاحاضته هبة عيونهة على كل ولد يعبر تفصله تفصال وتحط عينهة بعين كل ولد و حركاتهة شوي غريبة عكس اختهة بالضبط ، وعلي كل ولد يعبر بصفنة يخزرة من فوگ ليجوة حسيت بالاحراج من الناس من ورة عيونه😂،خلصنة ورجعنة للبيت اني گبل صعدت للغرفة بدلت و سويت روحي نايمة من دخل علي
علي : چنة كاعدين وسوالف و نرگيلة وية الشباب تاخر الوقت ترخصت وگمت دخلت للغرفة شفتهة غمضت عيونهة عرفتهة ما نايمة ، مريم ادري بيج گاعدة شفتج ، فتحت عيونهة ، اريد احجي وياج بشي مهم
مريم : گمت من الفراش وگعدت على القنفة اجة وگعد يمي
علي : انه اليوم بالغلط سمعت حچيج وية نرمين انه جنت مصدگ ابوج من گالي مريم ما تريدك لانك فقير لهذا انزرع الحقد بگلبي انه بعده اسمج يمشي بدمي ان.....
مريم : وانت صدّگت واحد حقير مثل ابوي؟ واحد يدور بس فلوس اهم شي الفلوس عنده تدري شگد اكرهة ( چنت احجي والدموع تصب من عيوني من حرگت گلبي) انت نسيت عادي ما اشوفه اشهر اجت فترة دخلت بحالة نفسية ورما خسرتك وفقدتك للابد چان جاب احسن دكتور علمود يعالجني فرحت شوي بهلاهتمام بس طلع يخاف على سمعته انو يكولون بنته مخبلة من ورة واحد رفضة ابوهة ورة كل هلعذاب العشته تلاگت عيني بعينك بصدفة جمعتني الصدفة وياك من شفتك حسيت بغير عالم حسيت روحي گامت تزهر بالورد حسيت راح اطير من شوگي الك بس كانت ردة الفعل غير ما توقعت هنتني واحتقرتي و شگيتلي راسي فوگ كل هذا فوگ كل هلمذلة العيشتني اياهة  كل الحقد كل الكره الي يشعل نار بگلبي تريدني ارجع وياك والاقيك بالاحضان وانسى كلشي لا لااا لهنا وبس ترة تحملت هواي اكثر من ما تتوقع ما حجيت و ضليت احاربكم بصمت بس ترة عندي كرامة كرامتي اهم شي تمام ؟ ، عفته وطلعت للحديقة