لاتترك يدي

الفصل الخامس

اقسم بالله النت كان مش عادي ونحمل بيه حتى في فيدوات وتو فصل نقعد انتعانى نا وياه بالساعات بيش ينزل

#لاتترك_يدي

الفصل الخامس

ووصلت للمكان اللي قاصدته هو مش بعيد على منطقتنا غير هذي المدينة كبيرة وواسعة ولو بيدورو عليا حيتعبو وما يلقوني
وخذيت تاكسي  ويعلم الله كيف قدرت نركب فيه وحاوالت على قد مانقدر ان رعشة جسمي ما تبانش ووصلني لوجهتي ودقيت الباب

ماسة .. السلام عليكم
نجاة .. وعليكم السلام
ماسة .. معليش يا عمتي زهرة قاعدة
نجاة .. اه من نقولولها
ماسة .. ماسة قوليلها
نجاة .. جوا تفضلي

وبعد السلام مع زهرة طلبت منها نقعد يومين عندها وما مانعتش وبالذات ان باتها مسافر وماعندهاش خوت كبار كلهم اصغر منها

وحكيت ليها كل شئ صار معاي بالذات لانها من المدينة ماكنتش تعلم بقصة اغتصابي كنت مفهمتها ان باتي غصبني على الزيجة منه بالذات اني هي اللي كلمتها جابتلي حبوب منع الحمل ومع اني انحرجت منها لاني كذبت عليها لكن تفهمت موقفي

زهرة بعد ما مسحت دموعها .. وشنو بديري تو
ماسة .. بندور على شغل بيش نقدر نكمل قرايتي ونعيش
زهرة .. به والسكن كيف بديري
ماسة .. نلقى الشغل وبعدين ساهل
زهرة .. انتي تقعدي هنا على الاقل نين باتي يروح وبعدها ساهل
ماسة .. ان شاءالله

مشكلتي مع هل زهرة انهم ناس ماديين واجد ونا مش قدهم بمعنى انهم اللي يقعد عندهم لازم يصرف او حتى اللي يجيهم زيارة لازم يجيب حاجة وكويسة لدرجة مروة مرة قالتلي انها مشتلهم بباكو عصير قالت وجه ام زهرة مقلوب طول الوقت وما خلتش زهرة ترتاح في القعدة معاها وهي كل شوي تصبي فيها من احذاها رغم ان علاقة زهرة ومروة قوية مش زيي نا وياها
و القرشين اللي عندي يا دوب نسند بيهن روحي لعند ما نلقى شغل لو حتى هما لزوني ومع اني مش لايمة على حد لزني لان هلي يخوفو بلاد ويبو حد قوي يصبيلهم ونا ماعنديش الحد هذا حتى عمي الوحيد لانه اصغر من باتي وضعيف الشخصية تسير في مراته كيف مايبي حتى اسماعيل اللي كنت نستنى فيه هيا سبب سفرته واضني هيا ماتبيني ليه 

وجاء ثاني يوم عديت فكيت فيه الجبس وسحبت اوراقي من الجامعة  لان بمجرد ماتبدا الجامعة حيدوروني فيها
واصلا معاش مازال واجد عليها وتبدا وقدمت في معهد عالي والحمدلله لقيت عندهم تخصصي وحتى معادلة المواد طلعت بنقرا سمستر بس ومشروع واهو اول خطوة درتها صح وشريت شوية بضاعة ومشيت لحوش هل زهرة وطبعا لاقتني بود احسن من امس 

ماسة .. عمتي نجاة انتي معارفك واجد بالك تلقي حد يبي ان شاءالله حتى شغالة المهم يكون عنده مبيت ليا ونا نعرف انطيب كويس راه 
نجاة .. والله ماني عارفة لكن يا بنتي اللي بتشتغلي عنده وبالذات انك ليبية لازم يبي يعرف قصتك
ماسة .. احكي بس مش بالتفصيل يا عمتي ولازم تذكري اني مطلقة
نجاة .. يصير خير يا بنتي