" كن كونى فأنا لا أكون سوى بكيانك .♥ "
كيان:ي نرميين ، وين أنتى لى ساعه بنادى فيكي
نرمين:قاعده بعمل الشاى لأبوك
كيان:طيب أنجزى عشان ح نتأخر
نرمين:انت عارف ..
كيان:(قاطعنى ..)غصبا عن عينك ح تمشي الجامعه .. كل يوم ح تجيبي لى عذر عشان م تمشي صح!..انا عارف حركاتك دى .. خمسه دقايق و تطلعى لى بره ..(و طلع ..)
نرمين:ي الله ..(طلعتا الشاى لأبو كيان ال هو عمى و كان قاعد مع أبوى ..)انا ح ألبس و ح امشي الجامعه
محمد:(ده أبوى .. ) كيان ح يوصلك صح
نرمين:اى
محمد:تمام يلا ربنا يوفقك
أحمد:(عمى ..)أنتبهى ع نفسك
نرمين:ان شاء لله ..(و طلعتا غرفتى و كالعاده كانت جايطه شديد .. طلعتا لى بنطلون اسود و تيشيرت فيهو كلام بالأنجليزي كده لونو أبيض و اسبورت اسود بأبيض و جدعتا طرحه ف رقبتى و شعرى اصلا قصير خليتو مفكوك و جيت نازله ..)
كيان:(عاين لى من فوق لمن تحححت ..)لبسك ده م ح تغيريهو ..
نرمين:لا و الله ..(و ركبتا العربيه ..)
كيان:(كان سايق و ساكت و انا كنتا بعاين ف الشارع ، كنت مركزه ف كل التفاصيل الصغيره ال م كان ف زول ممكن يلاحظ ليها ..
مثلا الشافع الصغير الراقد ف الأرض و بعاين للناس عشان زول يديهو جنيه بس ماف زول ملاحظ ليهو و كأنو م أنسان ، أو البت الواقفه للمواصلات بس كانت سرحانه و بتفكر ف حاجه و شكلها نست هيا وين و ع الغالب المواصلات ح تكون فاتت و هيا م منتبهه ..
ف شاب شايل شنطتو و ماشي سريع شكلو عايز يلحق محاضرتو او شغلو بس أمكن السبب الأتأخر عشانو كان أهم ..
كيف ممكن كل يوم نشوف ملايين القصص من غير حتى نكون عارفين و لا قصه فيهم !..
كيف أحنا عايشين ف نفس الأرض بس ف كل ثانيه ف قصص بتتولد و قصص بتنتهى و أحنا م عارفين محتوى و لا قصه منهم !..
كيف بنقدر نتعايش سوى بالرغم من أنو كل واحد فينا عندو سر مخبيهو و ماف زول عارف بيهو !.."
كيان:نرمييين .. ي بت
نرمين:اى
كيان:وصلنا الجامعه .. يلا اتخارجى وراى شغل انا
نرمين:طييب ..(و نزلتا ..)
كيان:نرمييين(و جا لاحقنى ..)
نرمين:مالك
كيان:ح تقدرى تنجحى بس ركزى شويه و أنسى كل حاجه تانيه ..💜
نرمين:(أبتسمتا ليهو ..)حاضر💜(و دخلتا الجامعه لقيت بنات و اولاد دفعتي م سلمتا ع زول فيهم و كلهم بعاينو لي من فوق لمن تحت ..)
_شايفه نفسها
_ع الفاضي و الله ماف زول شغال بيها
_سلام م سلمت نفسي أعرف البت دي مالا
_نفسيه ساي م تشتغلي بيها!.
دخلتا القاعه و قعدتا ف أول بنش و بقيت مستنيه الدكتور لمن لقيتو اتأخر طوالى شغلتا الأغاني و بأعلى صوت بقيت بسمع فيها ..
جا مقطع بقول :
" و الحياه من يومها لعبه ، بين يوم و ليله قدرنا بتغير .."
باك فلاش :
*نسرين:نرمين بطلى تلبسي كده ياخ .. خليكي زي باقي البنات و أتضبطي و بتاع😂
نرمين:انتى كل يوم ح تفتحي لي الشريط ده
نسرين:اي طبعا حسي اليشوفنا م بقول أحنا توائم .. أتخيلي يجي يوم و أختفى من حياتك
نرمين:كان أختفيتي زمان!بس قاعده لي ف قلبي انتى
نسرين:😂😂ع فكره الحياه دي قصيره م تشوفيها كده
نرمين:(شلتا كتابي ف يدي ..)طالعه سايبه ليك الغرفه زاتو
نسرين:انننن .. *
