انتي سبابي

الحلقة 87

#انتى_سبابي #كرونيكات #كرونيك
الحلقة 87

وصلو قدام ريستو محلاااه عالبحر موزيكا رومونتيك و هدوء و جو يعشق صوت الموج و النسمة الباردة تزيد تنسيك في الدنيا و مافيها.. قعدو في طاولة قريبة للشط الماء دوبة يوصلهم.. هي عينيها باش تخرج مالمنظر لي راتو عمرها لا عفست بلاصة كيما
-عزيزي...كبسلها على يدها .. عجباتك لبلاصة ؟؟
- يااااسر محلاها..تشبه للبلاصة لي جيناها في عيد ميلادك ... و محلاك انت زادة
- ههه نعرف...نعرف زادة الي مرتي المزيانة الخندودة راهي احلى وحدة و احلى مرا في حياتي و في البلاصة هذي الكل..
- امممم انت ثبتت فيهم؟؟
- لا اما واضحة خاطرك تبقص و تجهر كالبلارة الضواية ..نحس العينين الكل عليك و دامي بدا يغلي ...يحكي و كابس على سنيه... قتلك لمو شعرك علاه هكا
-هههههه مغياار راك و حزارتك ساعات تكون موش في بلاصتها يزي اماان خليني نتفرهدو .. هاني معاك شنيا لي فيها ..تبسمتلو جاباتو على راسو طوول
- جاء باش يرجع عليها..ياخي صوت مرا قاطعو...
-مرحبا بيكم ههه لوزامورري هههه .. عرايس جدد ؟
تبسمتلها ايمان و وليد جاوبها...هههه جدد مالباكو ..غمز لايمان و تلفتلها ..جديد الريستو ؟؟ اول مرة نشوفو في السيتي هذي
- اي جديد موسييي.. مرحبا بيكم.. امس الافتتاح اما اكيد نفرحو بيكم..خزرت لايمان محلاه شعرك عزيزتي و اكيد هديتنا ليك باش تزيد تزينو .. حطتلها تاج بالنوار لبيض محلاه على شعرها.. زاد فيه الشطر..يااا تبارك الله عليك
- عيشك مرسي هههه..وليد ؟؟ شفتو محلاه
- شفتو محلاه و محلاك انت و محلاني انا لي مصبر روحي عالناس لي تخزرلنا و صبر روحي عليك
-ههههههههههههه ..جبدت تلفونها تغزل فيه تشوف في روحها و تستوي في شعرها
- امممم مازعمها هي عاااد... ايا نحي الوز من يدك يزيي ؟؟
- تبسمتلو... وليد انت تعرف باارشا بلايص ..
- امم نعرف
- منى قاتلي الي مافماش ريستو و الا بلاصة فتحت جديدة كان مامشيتولها ايام الفاك و بعدها.. صحة ليكم
- ههههههه عادي مالا حاجة كبيرة... انت زادة تو تمشي و تشوف و تفد منهم
- بالحق؟؟ باش نخرجو ديما
- هههههه لاعاد موش ديما مالا ماخذ مرا باش ناكل في الشارع و المطاعم ماو يدياتك تقضيلي يا روحي ... اما وين تحب نخرجك انا ليك في كل وقت
-ههه تقليش هذا الكل في خاطر اولادك..
-في خاطر اولادي و ام اولادي ..رمالها بوسة في الهواء
- هههه ربي يخليك
- ديما تذكر الي راك معايا باش تعيش اميرة تعيش لي عمرك ماعشتو.. نفرحك نعزك نحبك نحترمك و نعطيك عينيا و شويا فيك يا روحي .. تستهل اكثر و راس حبك يا حبي..اما نحبك تكون مرا في غيابي .. تصون وليد و تحترمو و تكون ليه قبل الناس الكل مانحبكش تتذل لحد و لانحب يتعدى عليك حد و تتعدى انت على حد نحب كي يشوفوك يقولو اهيا مرت وليد اهيا المرا لي ختارها المرا الباهية الطيبة لحنينة ...نحبك تعيش معايا الحب و الفرحة لي تحرمت منو الكل انا نعوضهولك اولهم امك انا نكون امك كان تحب ههههههه
- هههههههه ضحكتها مليانة بالدموع ماعاش عارفة ماتقولو اصلا اش ياش تقولو و هو كمل لكلام الكل...تعرف وليد عمري مانسامح روحي خاطر كنت مفرطة فيك و في حبك.. ساعات نقول علاه ربي ماعاقبنيش علاش خلاني نكون ليك و مفرحني في الوقت لي لازمني نكون بعيدة نعاني وحدي و نتحمل اخطائي و بهامتي
- وين بعيدة ؟؟ بعيدة عليا ؟؟ يعني ماشي في بالك كان تبعد انا انجم بلاش بيك ؟؟؟ انا لي لازمني نحمد ربي ليل و نهار و شويا لي طعمني بالنعمة هذي الكل راك درة.. نوارتي و صغرونتي محلاك محلى دين وليدك يا فرخة...
كملو تعشاو و سهرو كيما حبو...روحو لدارهم عشهم لي شهد على ايام تعداو ببكاهم و ضحكهم و عركهم و نبزهم و حبهم ... حبهم لي عينيهم تحكي عليه حبهم لي منسيهم في الناس و الدنيا..
تعدات ليام فيسع حبهم غارق في العسل حبهم لي شهدتو لياليهم و هبالهم لي حتى من دارهم شالقين بيه...غيرتو ماتبدلتش ياخي عمالها و تزيد هي موسعة بالها معاه لاقصى حد اما ساعات تتطرشق عليه و تتطرشق بالبكاء بعدها خاطرو يغلب عليها مع لوحم لي مكرها في روحها و فيه ساعات.. ضربة ضربتين توليلو على دبشو تقطعو بالمقص مالغزول و ساعات تخليه للشر و تولي هي لي تتشهى.. تعديلو ليالي تبكي و ليالي ماتغمضش فيهم عين و كان يرقد و يخليها تحكي وادها نهارو من غدوة يشوام .. يعاني منها و متحمل هبالها عليه و متحمل وحمها لي خرجو عقلو ساعات كان مش لطيفة تهدي فيه و تقلو النساء الكل هكاكة ,, وائل يفرك فيهم في الطالعة و النازلة قال شنوا هذي هي عواقب الدراش عند النساء كانك نازل عليها بالكف و الضرب راهي مستقيمة هههه اما انت وين نحطك يا طبق الورد ,, كاهاو صاحبي خلص الضريبة ...
توا ثلاثة شهور تعداو... هه تعداو على وليد كيما جاو مسكين اش قاسى في جرتها.
الكل لاهي في حياتو و مشاغلو.. ننعيمة تقرا و تمحرث مازالت في اول المشوار سنة اولى طب .. هدى كالعادة خدمة و دار و عرك مع امها لي ماصاب كان تلصقها في راجل و ترتاح منها .. بوها الحاج عمار مسكين على نفس الحالة ماحبش يعرس قالهم فارعوني بللي تقدرو عليه انا بعد خديجة ماتدخليش مرا داري ياخي كملو في سيستامهم لول كل نهارين تجيه وحدة ... تهاني مازالت تعاني كرشها قدامها توا في الخامس... وائل غاطس في الخدمة مازال مارجعش لفرانسا عندو ستاج هوني يعمل فيه .. لطيفة مسكينة تحربط بيه باش مايرجعش اما مصبرة روحها و مصبرها الحاج علي ... اصلا وليد موش مقصر معاهم لي يعديه عندهم اكثر من لي يعديه في الخدمة.. زيد ايمان مرتو و روحو تحبهم و تموت عليهم.. فرحتو بيها و كيفاش لاهيتلو بدارو و بامو و بوه عندو بالدنيا... في وقتنا هذا مرا بالخصال هذي صعيب كان نلقاوها اما هي بنت اصل و كلام بوها عمرها مانسات منو كلمة و لتوا يتعاود في وذنيها كي قلها كون مرا و ماتغركش المظاهر و الفلوس و ديما رافعتلي راسي بين ناسك و ماليك...
... كانت في الدوش وقت تلفونها نوقز...وليد ؟؟ يا وليد شوف شكون يطلب عزيزي
- امممم
- وليييييد؟؟
- بفففف الصبر... هز التلفون لقاها منى... هذي من
- هز عليها انا لاهية
- فك عليا انا ميت بالنوم
- شبيك هكا انت ؟؟؟ امان جيبهولي انا مانجمش نخرج لاهية
- ياعمبو الوقت..دز الباب و دخل يلقاها تعمل في طرف سكر ههههه...هذا لي لاهية بيه و ماتنجمش تخرج ؟؟
- هات جاي و اخرج.. اهلا منى.. سافا عزيزتي ؟؟ هو واقف يثاوب..
- امونة يا روحي توحشتك
- و الله كان ترا انا .. وينك عندك مديدة ماكلمتيش ؟؟ لباس ؟؟
- ههههههههههه غبت مديدة و جيت و جبتلكم الاخبار ... هههههه فرحاااانة... ايمان خزرت لوليد لي متكي عالباب و بعدت التلفون من فمها... ياخي شبيك تبلحق برا ارقد موش تو فضحتني على تلفون
- دبر فيا انت توا في داري في دوشي و مرتي رزقي قدامي ...
- قربت قرصاتو من فخذو...اه منى شنيا قتلي وين كنت ؟؟؟
- هههه قتلت كنت لبرا خرجنا انا و سليم لفرانسا ههه مشينا زوز رجعنا ثلاثة
- هههه شنيا ثلاثة هذي شكون معاكم ؟؟ انت و ..... لحظة لحظة ماتقليش لي في بالي صار ؟؟ اععععععععععع منى انت حبلة ... و هزت راسها لوليد لي مصدوم يخزرلها و عاض على شفايفو
- هههههه اي اي اي حبلة و الله حبلة هههههه
- واااااااك مبروك عزيزتي مبروك الف مبروك ريت ربي سبحانو ريت الحمد لله يا ربي
- امونة انا فرحتي ماعاطيتها لحد راني ههه تي سليم داخ كي سمع هه
- ياااا على وخي مسكين ربي فرحكم والله ... هههه هاو وليد معاك من قبيلة معربش فيا...
- اهلا منى شحوالك ؟؟
- لباس عيشك
-ههههه شنيا هالحكاية مبرووك لاختي
- ههههه الله يبارك فيك و ان شاء الله ربي يوصل ايمان بالسالم يا ربي
- ان شاء الله على قريب هاني نستناو تقول باش نجيبو الباك...غمز لايمان...وينو راجلك اكيد راهو دايخ
- ههههههه و الله كاينك حاظر ااااااه يا وليد يا وخي و الله ربي ماكرمو و الله ستة سنين ستة
- الحمد لله الله يمهل و لا يهمل ... ههههه سلم عليه و قلو لازمنا قعيدة و المرة هذي موش شطر شهريتك برك باش تحط ههه شهرية كاملة يا فقري
- ههههههه ان شاء الله احنا روحنا بكري الصباح غدوة انتوما تجونا للدار و لا نقاش
- علاه الزربة يا بنتي لاحقين قال المصري
- انت سيب روحك و عديلي مرتك هي لي تفهم عليا
- هههههههه مرتي ماعندهاش كلمة معايا راهو معناها مضمض... طبس يبوس فيها و هي داخت من بوستو
- هههههههه عديهالي برك انت و تو ترا ... كملت تلفونها مع منى و كملت حوستها لي فتحتها في روحها بعد ماراصاتلها تعاود في السكر خاطر لول ساحلها و وليد يفرك فيهم عليها...
بعد ماركحت امورها هبطت طيبت عشاها... و هو عمل طلة على علي عندو مديدة ماططلش عليه كان بالتلفون