(صغيرة ال حمدان)
للكاتبة روشان
مساء الخير حبايبي وراح نبلش وياكم بالقصة وهمتكم وياي بالدعم والتفاعل عالمنشورات ورأيكم جداً يهمني واحب اشوف تعليقاتكم حتى لو جانت انتقاد اني اتقبل كلشي منكم 😍
البارت الاول
اظل غالي رغم مااملك الجاه
ومااسمح رخيص ايقيم الغالي
شگدعالي الگمر ينشاف بالليل
بس ذله الصبح من ينزل حذالي
مانوشن عنب يم وادم اغزام
متواظع ولكن عاشك اسلالي
هيبة شيخ شايل هيج مهيوب
الگمگم يرتعش من طارف إذيالي
زغير وگلبي شايل هوا السبعين
وفرزنهه الحديثه التدخل ابالي
ومادگيت باب ابيوم محتاز
اذا رب العرش ماقسمه خلالي
عزة نفس شايل وكره الدين
وكرهنه إلذي بالشين يسعالي
اليحجي بظهري خله يجوز محتاج
الجمره شما تحومر صيتهه إدلالي
صح أسمر شكل وصويحبي الليل
بس أبيض كلب للصاحب ايلالي
.
.
.
انا خالد ابن حمدان مدلل ابوي وصديقه وعزه وفخره ورفعة راسه
انا صمام گلبه مثل ما هو يكول
حمدان : اولادي كلهم بالگلب وانت صمام لهالگلب ،والگلب بلايا صمام شنهي فايدته،
-جيت للدنيا بعد ٣ اخوان واخت وحده
وكبرت وفتحت عيني على ابوي مثل الجبل وامي مثل نسمة الهوى الطيبة
دللوني مثل كل اخوتي بس انا طلعت غير ،ولهالشي ابويه تعلق بيه اكثر لان طلعت الشي الي هو
متمني بكل ولده
حنين وكلبي على گلبه رفيجه من صغري الوحيد بيهم القريب اله وفاهمه من عينه ،وحققتله حلمه من كملت علامي ،
احنا بالتسلسل عباس اخويه الجبير مواليد٥٩ ،وراها اجوي سلام وبرهان وجنات واحد ورا الاخ بينهم سنة سنة كل واحد
وبعدهم بقت امي ب١٠ سنوات مخلفت وعبالهم بعد متخلف او بيها شي لان المده مو قليلة
ورا ال١٠ سنين حملت بيه وجابتني ب ٧٢ ولهالشي جنت عزيز على گلب ابوي كلش لان جان كاطع الامل من الخلفه بعد ،واهل قبل روحهم بكثر الخلفه فجان يسميني فرحتي ،ورايه بكم سنه الله رزقهم باختي فردوس وجانت بزر الكعدة واخر وحده بينا
ابوي مكطوع من شجرة مو لان ماعنده اهل
جان عنده اخ واحد بس
بس جدي ابو حمدان جان رجال ريفي وابن عرب ،عايش بين اهله وناسه بكياعينهم هو واخوانه ،يروح ويرد لكاعهم ولشغله ما مأذي احد والكل تحلف براسه ،
اتزوج بنيه فقيرة من اهل الله وحبلت بسرعه وجابت ابوي حمدان وراه بسنه جابت عمي شامل
ورا شهرين جانو متجمعين بالكاع جدي واخوانه وولد عمه و ولد من معارفهم وبين سوالف وحجي صار جدال بينهم واتحول لعركه جبيرة وواحد من ولد عم جدي جر الخنجر وضرب الولد الي من غير عشيره وكتله خلاص
والناس اتخبلت وكامت عليهم الدنيا وما كعدت،وصارت شغله ثارات بين العائلتين واول ضحية طلعت كبالهم هو جدي
كتلو وجان عمر عمي شامل شهرين بس ،وبقى سلسال الدم بينهم ناس تكتل ناس ،عمام ابوي الثنين تكتلو بعد كم سنه
والسالفه حتى لو مرت عليها سنين وسنين مراح تطفى نار احد منهم ولا يبرد كلبهم والثار يبقى يجر ،
وام حمدان خافت عالشي الوحيد الباقيلها ،ولدها
اخذت حمدان وشامل وانهزمت بليله كشره من المكان كله
وذبت حمولها على الله كالت هو يدبر عيشتنا
جان بوقتها عمر ابوي ٥ سنين وعمي ٤ ،
لما وصلت لمنطقة ودورت على مكان تكعد بي على كد فلوسها ،والعدها بدى يخلص والناس الخيره لكولها شغل بمزرعه ويا النسوان جان يملكها رجال جبير وخير
وكامت تشتغل ومعيشه روحها وولدها ،
وجانت تاخذهم وياها للشغل
وكبرو ابوي وعمي وكام ابوي يساعدها وهو عمره ٧ سنين
ومن صار عمره ١٠ سنين هو اخذ مكانها بالشغل وما رضى امه تطلع تشتغل بعد ،وصار الحمل كله عليه وعمي شامل يساعده بشي بسيط لان مجان صاحب حموله مثل ابوي
أنت تقرأ
صغيرة ال حمدان
General Fictionيُهزم المرء بأشيائه التي يحبها يُهزم بالاشياء التي التفت روحه حولها بما كان يظن انه باقي ،لكنه رحل بما كان يضن انه مصدر قوته ،لكنه اصبح نقطة ضغف رواية عراقية حقيقية (تتراوح احداثها بين الجنوب وبغداد)عن عائلة كاملة واكثر من جيل عائلة قوية ومترابط...
