ما لم يكن بالقلب عليم

بارت٣

بعد ما رديت خبر لخالي طلعت من البيت واني بالي مشوش ما ادري ليش سويت هيج وشلون الي جنت اعرفه بس نه اني مشيت ورا الصوت الداخلي إلي قادني لهيج قرار،جنت مقرر امشي ويا قرار خالي وسنة وشهرين بس ..
محمد : طبيت للبيت واني فرحان صار عندي بصيص امل اكدر انقذ بنيتي من دمار حياتها رحت لأُمي وكلتلها على موافقة سيف
شلون قبل سيف بهالشكل ؟ نور المسألة الاكبر عدها احنا شلون نفاجأها ونكوللها تعالي حيعقد عليج سيف !! خاصةً وفاة اهلها مصارلهم فترة بعيدة شلون اذا رفضت !!
يمة هسة قابل شحيصير اذا حاولنا ! اصعدي عليها وحاجيها بلكت الله وتقبل علمودها هي بالدرجة الاولى وبعدين هذا الزواج مو زواج اساسًا ..هاي تمثيلية راح تنتهي بس تبلغ السن القانوني
هسة صاعدة عليها أني وأنت خابر عُمر وجيب الأكل من المطعم وصت عليه سلمى كَبل شوية وخابر سيف خلي يرجع هم صار شكد ما مجموعين سوا
نور:جنت كاعدة احضر بهدومي بالي مرتاح بسالفة الدوام بعد ما خالي قبل ورحنا اشترينا هدوم وحضرت نفسي،اندك الباب وطبت بيبتي رحت حضنتها وشكرتها هواي هي مثل امي لوما هي وياي وبصفي بأزمتي مجان عرفت شصار بيا ..
شفتها ما حجت سألتها:شكو بيبي ؟ تعبانة شي ؟
بيبي:ماكو شي بنتي بس اسمعيني زين جاية احجي وياج حجي كلش مهم واني واثقة منج راح تفهميني وتستوعبيني،من انتِ جنتي طفلة جنا اني وأمج زينة نحرص عليج ونسندج باول خطواتج،جنا وبعدنه واكفين بظهرج ونحاميج وإلى اليوم اني مستعدة افديج بحياتي لاجل اشوفج سعيدة وفرحانة،اني ادري الشي الي راح احجيه راح يكون صعب هواي عليج بس صدكيني ماعندي اي خيار ثاني
نور تغيرت ملامحي وصارت عبارة عن خوف وقلق بعد ما شفت بيبتي بهيج وضع وتردد :شكو بيبي قلقتيني ؟
بيبتي: بنتي انتِ لازم تعقدين ..
نور:شنو ؟ بيبي شتقصدين ؟
ببيبتي:نور لازم تعقدين خلال هاليومين والإ صدكيني راح تخسرين كل شي ونخسرج
نور:بيبي صدك تحجين ؟ بيببي انت دا تتشاقين وياي صحيح ؟
بيبي: بس اسمعيني نور عمامج حياخذوج بحجة هما اهلج وانت تدرين بيهم وبيئتهم وتدرين شسوا بامج وشكد عذبوها وشافت الويل والمصايب من عدهم
يابنتي اذا رحتي حتى دوامج حيكطعوج منه ويخلونج للشغل وللخدمة ولا تستبعدين ينطونج لإي واحد من اولاد عمج وكتها شنو مصيرج وشبيدج تسويه !!!
نور: بيبي شنو هالحجي هذا اهلي مصارلهم سنة واقل متوفين تردين اعقد ! بيبي هاي حياة شلون تقبلين عليه اجازف بيها هيج !! اني شنو شفت من حياتي تردون تكبعوني !!
كمت ابجي بهستيرية بدون وعي،جنت ابجي من قهري وحزني على كل شي صار بحياتي وهالمرة كلام بيبتي !! تريدني اتزوج كمت الطم وابجي اول مرة بحياتي ابجي كدام احد ..حتى بيبتي جنت ابجي بعيد عنها الا إذا هي شافتني صدفة بعمري ما حبيت ابين ضُعفي وإنكساري بس اليوم !! اليوم إنهار كل شي،لو اهلي جانوا موجودين جنت هيج راح يكون مصيري ؟
بيبي:نور مو هيج الحجي اهدئي بس نتفاهم وافهمج الموضوع كله صدكيني هذا مو زواج هاي لعبة راح تنتهي بفترة قليلة اهدئي حتى افهمج
نور : جنت ابجي واحجي بألم وشهاكت مكبوتة :بيبي شتفهميني بيبي ! تردين اتزوج واني حتى ما اعرف المن ولا شنو مستقبلي !
بيبي:الي راح يعقد عليج هو ابن خالج سيف
نور:كافي بيبي الله يخليج كافي بس خليني ارتاح
بيبي:نور جانت تبجي بطريقة بحياتي كلها مشفت مثلها عرفت وضعها ما يسمح ابقى الح عليها وانتظر منها جواب هسة كمت تركتها تعيد ترتيب اولوياتها وتفكر زين
وين امي سلمى ؟
هسة تجي راحت لنور انت أُكل وانت سيف أكل هاي ادري بيك متحب اللحم
جانوا دا يحجون ونزلت بيبي جان الهم واضح بشكل عليها
سيف : شونج بيبي اشتاقيتلج
بيبي:هلا شلونك حبيبي سيوفي مختفي كاضيها بس بالشغل شوكت نشوفك احنه النا حق نشوف وجهك الحلو
بيبي اعذريني بس تدرين ما اثق بشغل غيري ومااكدر اعوف شغلي ولهذا السبب كلش مشغول ودايخ هالايام ..
محمد:يمة وينها نور ؟
بيبي:فوك متكدر تنزل انطيها مجال
محمد:شكالت يمة على الجواب ؟
بيبي:محمد كتلك انطيها مجال البنية طالعة من ضغوطات نفسية وحمل جبير متكدر تتحمل ازيد انطيها مجال تفكر
محمد:ورا الغدا اطلع ألها واشوفها
سيف:جانوا دا يحجون إعتيادي وجابوا سيرتها ما ادري ليش هالمرة شد إنتباهي أسمها يمكن لان موضوعها وموضوعي هالأيام دا يلحون عليه
وبيبي كالت منزلت عرفت بسبب هذا الموضوع
وعلى شنو اني دايخ ؟ كون لا تقبل اني الممنون تشيل حمل جبير عني ..دا افكر وكاطعني صوت موبايلي احمد دا يتصل
هلا أحمد اي زين كول لست نادية تنطيك الملف من المجرة على اليمين بالميز بغرفتي واني جاي هسة ..الله وياك
ها سيف وين رايح ؟ هستوك اجيت ملحكنا نشوفك
خالو اجاني شغل مهم ولازم اروح اني اشتغله الموظفين ميعرفون هلكد بيه ودا احاول اتجنب اي اخطاء بالشغل اكو لجنتين تدقيق جايين على الشركة
اني رايح ..
عُمَر: اوكف حجي وياك ذبني براس الشارع
يلا استعجل دا انتظرك
محمد: بعد ما راحوا سيف وعمر قررت اطلع احجي ويه نور واشوف وضعها بلكت الله يسهلها وترضى تسمعني صعدت فوك دكيت الباب فتحته جانت بحالة يُرثى لها وجهها اصفر كُلش ومبينة باجية هواي
طبيت عليها صحتها تكعد يمي
محمد:نور باعي ادري بيج شي صعب عليج تتقبليه وتستوعبيه بس صدكيني هذا مو زواج ابدا وانت رتح تبقين مثل ما انتِ هسة على وضعج وحالج ودوامج تباشرين بيه وماكو اي مشكلة
خالو الموضوع ما اكدر عليه والله
يا بنتي ليش تنطين الموضوع اكبر من حجمه هو ماراح يكون زوجج فعلياً وحتى بالهوية الشخصية ماراح يتغير وضعج بس عند شيخ وبيناتنا احنا حتى محد يدري ابداً بس عمامج يكونون موجودين
وشنو الفائدة لعد اذا محد راح يدري
نور بس كدام عمامج وبس تبلغين السن القانون بعد سنة وشهرين تطلكين بحجة عدم التفاهُم من البداية تدرين بعمامج وطبعهم طماعيين يردون ورثج مال والدج لا تنطيهم هيج فرصة يا بنتي واذا اخذوج فصدكيني مو بس الورث تخسريه لا تخسرين روحج انتِ هم وسيف راح يبقى مثل أخوج ..وافقي على هذا الشي لخاطري أني
انطيني وكت خالو مو بهالسهولة
بنتي المهلة راح تخلص مال عمامج لا تتأخرين باجر اذا تكدرين ردي الجواب
طلع خالي واني عقلي مخربط ومشوش وقررت اخابر ريام ..صح ريام بنت عمي ومنهم وبيهم لعمامي بس أبدا مو مثل طبعهم هي نص تربيتها جانت عدنا امي جانت تحبها حيل لان ريام اكبر مني وامي باول الزواج ما اجالها اطفال فربت ريام وجانت ريام هوواي ايام تكضيها عدنا ولهذا اثق بيها اكثر من نفسي ما ترردت واني اخابرها واحجيلها
ريام : عاا لج حتتزوجيين شوكت كبرتي يولي وحتصيرين عروس ممصدكة دزيلي الصور يلا يلا
نور: اسكتي ريام !! يا عرس يا عروس ! جنج ممصدكة تخلصين مني ! حجيتلها كُلّ الفيلم جانت بحالة صدمة مصدكت كلامي
لج صدك تحجين اخاف تشاقين ؟ بس تدرين هيج احسلج عمامي اني وانتِ ندري بيهم وندري باطباعهم صدكيني مشوفين رنا واخواتها نجوم النهار ديري بالج ترجعين..كلام خالج صحيح وافقي
يعني شتكولين انت ؟
اي برأيي توافقين احسنلج وهو مو زواج وسنة وشهرين تغمضين عين وتخلص لا تترددين ومسحي دموعج ولمي شعرج وكومي ردي الجواب لبيبتج وخالج
زين شمدريج عيوني مدمعة ؟
لج تعلميني بيج نور ؟ حافظتج هواي يلا لازم اروح سوسو دا تصيحني "امها سندس"
انت متكبرين ابد يلا روحي وسلميلي على خالة ..
سديت المكالمة من ريام واني كَلبي خايف ومُتردد صرت بين نارين وما ادري شنو اسوي قررت اصلي إستخارة عسى ولعل اكدر انقاد لقرار ..
نزلت جوا ويه شفت خالي وعمة سلمى لساتهم يتغدون اجيت كعدت بصف عمة سلمى
محمد:هاج نور أُكلي
خالو والله نفسي مسدودة ما مشتهية
سلمى:مايصير بنتي يلا أُكلي وراج دوام وتعب ولازم عندج طاقة يلا
عمة بعد شوي أكل مااكدر هسة
سلمى:براحتج حبيبتي،تجين وياي اليوم ؟
وين عمة ؟
محمد راح يوصلني للسوك تعالي وياي اتونس وياج وهم أنت تغيرين جو
بيبي:اي اخذيها ليش لا
بيبي ما اريد مالي خُلك خليها عمة غير مرة اجي وياج
بيبي:لا روحي وياها واشتري كم فستان وتراك سلمى شوفي شتريد هي اشتريلها صارلها شكد مطالعة
نور:بيبي والله ..
بيبي:لا تكملين كلامج ازعل عليج والله كومي يلا بدلي وتجهزي حتى لا تتأخرون وتأخرون خالج
نور:كُمت بضجر وهم اني ضايجة بنفس الوكت ونفسيتي جداً تعبانة فتحت كنتوري اختاريت تنورة
لونها أحمر على قميص اسود رداناته ثلث أرباع وتحت بدي خفيف ينلبس وشال على نفس لون الملابس طلع كُلش مُناسب ومستور وحلو،حطيت شي بسيط مكياج وطلعت شفت عمة سلمى كاعدة تنتظرني خطية ما حبت تخليني أستعجل رحنا للسوك وويانة خالو وصلنا وراح عمة سلمى اشترت هوااي شغلات هدوم واكل ومواد مطبخ خالي اليوم اعتقد ينتحر هههه،باوعتلي عمة سلمى كالت ذبيهن هنا ذني الشغلات بهذا المحل حنفوت هسة نكله لخالد يصير ابن أختي يخلي الغراض يمه واحنا نروح نشتريلج
عمة ما يحتاج والله ما محتاجة شي
اسكتي نور يلا امشي
طبينا للمحل جان جبير سلمت عمة سلمى على الولد اني مشفته اساسًا مجرد لمحة بسيطة لمحته وما همني أركز بيه ذبينا الغراض يمه وطلعنا وعمة كل شوية مطببتني بمحل وتنطيني هدوم واروح اجربهن شي اني اختاره وشي هي بس للأمانة ذوقها تحفة دائماً يذكرني بذوق أُمي الله يرحمها
عمة كافي تعبت والله اشترينا هواي خلي نرجع
نور تعالي شفت فستان يجنن كَبل شوية من مريزا من يم ذاك المحل تعاي نشوفه
عمة كافي والله ما يحتاج بعدين المن الفستان
لج تعاي تعبتيني بالحجي امشي
رحنا للمحل جان الفستان أسود وإلى تحت الركبة رداناته ثلث أرباع فصال بسيط ونازوك بمعنى الكلمة
عمة هذا الج ؟
باوعتلي عمة بوجه ضاحك ...لا احنا كبرنا اجا دوركم
هذا الج
بس عمة هذا مال مناسبات احنا وين عدنا مناسبة حتى ناخذه
دطبي طبي شكد صايرة تحجين طلبنا القياس وطببت اقيسه باوعت لنفسي بالمراية هاي اني ؟ الفستان كان مُفصل حاله حال أي فستان مناسبات واني ممتعودة على هيج لبس ابداً لبسي مو مفصل
زين شلون عمة تريد اخذه
عمة:ها نور وينج طلعي شوفينياه
فتحت الباب لعمة وطبت :اللهم صلي على محمد
لج جنه مخيط الج تخصيصًا
عمة مستحيل اخذه شنو هذا،ويه نفسي أستحي ألبسه
اخذيه حبيبتي يجوز يوم من الايام تصير عندنا مناسبة تلبسيه
عمة !!!
اخذيه لخاطري حيل حبيته عليج .. اعتبريه هدية مني
عمة دا تحرجيني
اني مثل أمج ماكو إحراج وهالسوالف وهسة يلا خالد راح يعزل والغراض تبقى بالمحل
رحنا اخذنا الغراض وركبنا تكسي ورجعنا عمة
عدها عادة تخاف من التكسيات عاد توكف تكسي بعيد عن باب البيت
نزلنا وبيدنا الغراص وحيل تعبانين
تقريبا وصلنا الباب ومحسيت على نفسي الا واكعة بالشارع وصوت هورن السيارة..Ryam_Alzubiadiحساب الكاتبةة