في شريعة العشق

الحلقة 41

#شريعة_العشق
بارت ٤١ ..
نورا ناصر ..

مريم: بعد اسبوعين طلعت عبير من المستشفى
بعدها وجهه مورم بشكل مخيف والصدمه القوية عيونها جانت شاديها لحتى اي ضوء ميأثر عليها ..
الغاز المستنشقته أثر ع عيونها بشكل سلبي..

ماما جانت تخلص النهار تبجي وتدعي اما بابا جان ديبحث عن دكتور عيون لعبير ..

دائما عبير من دونا توكع المصايب ع راسها وتتأذى
هي هالمرة جانت
هادئة عكس اصابتها الاولى كلمتها الوحيدة جانت
(قل لن يصيبنا الا ماكتب الله لنا)....

لمن طلعوها للبيت ماما كابلتها وظلت تبجي ..
حست عليهل عبير وحاجتها ؛ ماما انتي فوك متشجعيني لويش البجي ياامي هياتني كدامج ترى ممتت الله يساعد الامهات الي فقدوا ولدهم واذا مااشوف بس ترى احس عفيه لتأذين نفسج علمودي والله تهون بدال متبجين ادعيلي اني بحاجة لدعائج ست الحبايب..

امي زادت بجي رحت لزمتها من اكتفها اباوع بوجهه بنظرات مطمئنة وارجع اباوع لعبير الي متشوف بسبب الشاش الي على عيونها ويمنع عنها الرؤية
ظليت امسح بدموع امي.
جتي زهراء همست يم إذنها ؛ ماما حياتي هيج دتأذينها انتي ..

غمضت عيونها وجرت نفس ومسحت دموعها ..
حاولت تسيطر على نبرة صوتها وهي تحاجي عبير ..
_ اليوم بنيتي منورة البيت ولج والله البيت بلياج ميسوى  والله وهسه شون مسويتلج دولمة من هاي الي تحبيها .

عبير اكتفت بس بالابتسامة واخذناهه اني وزهراء ودنصعدها ، وامي ورانه توصي بينا ندير بالنا عليها لحتى لاتوكع .

صعدناهه لغرفتها غسلنالها وغيرنا ملابسها .
ومددناهه على سريرها لحتى ترتاح .

للعصر نزلناهه جوة لان يجون خطار يشوفوهه وهيه كلساع صاعدة نازلة ..

للمغرب اجه قسور كابلها وكعد ، ماما كالتله اكلها قليل وممشتهية تاكل كعد يقنعها ع الاكل عصبت منه ..
: قسور لا تلح كتلك ماااااريد .

جاوبها: ميخالف عبيري صيحي عليه اعرف نفسيتج تعبانه ومتكدرين تطلعين البداخلج كدام
اهلج اني اتحملج واني الممنون ليش كم عبير عندي .

جان يحجي بغصة وكوة مسيطر على نفسه ..
اخذته ماما تحجي ويا على صفحة بين الها انو مو زعلان ولايمكن يزعل منها بكل الاحوال .

يريد يروح فاتوا كرار ومها والظاهر قسور لمن شافهم غير رأيه وماطلع راح كعد بصف عبير .

كرار ومها سلموا وكعدوا .. كرار على فطرته
كاللها هاا مبروك عميتي بعد ماتشووفين مووو ؟

على كلام كرار ابتسمت هيه بعد ساعات من العبوس ..

تأفأفت قسور وباوعله مخنزر ؛ انته لو تحجي حجي بي خير لو لتحجي مو بحال شقاك التافه هسه .