نعمة شافت فساعة:ماحدهم ملاهين انمشي دابة عند داك الحقير ندير معاه شي حل صافي
مريم شدات ليها فيديها:نتي ماملزوماش ديري هدشي اختي
نعمة:صافي حنا ما انبقاوش نعاودو نفس الهضرة..انلبس عليا ونغطي وجهي مابغيتوش يشوفني..نهضر معاه ونرجع دغيا
مريم:اه حسن
نعمة خرجات من لبيت هبطات تفقدات الاحوال ..مشغولين ومراد ماكاينش وهو وعمها..طلعات بالخف لبسات عليها وهزات لتام فيديها خرجات من دار شدات طاكسي نيشان للعنوان لي عطاتها مريم قبل توصل دارت لتام وتأكدات من لفلوس لي فساكها ..شافت فمول طاكسي وقف:هو هدا لكباري
مول طاكسي مخنزر فيها:هو هدا
نعمة مارضاتش يشوف فيها بدوك الشوفات عرفاتو فهم غلاط :عفاك تسناني شوية انخرج
مول طاكسي:واخة
نزلات وهي تسمع صوتو كيتمتم:قالك لحجاب .بهدلتو بينا😡
تنهدات مافيها لي يشرح ليه دخلات و هي كترجف قلبها كيضرب فلمية ماحاملاش تدخل جات فبالها صورة دمراد لا عرفها داخلة لبحال هاد لبلايص ايقتلها وتفكرات حياة مريم لي غدمر تشجعات ودخلات سمعات صوت الموسيقى بالجهد هدشي قبل تا ما توصل لداخل شافت قدامها جوج دليكارد حنات راسها وبغات تدخل وهوما يحبسوها:فين غادة بسلامة.
نعمة كتشوف فالارض من غير هاد الموقف .عندها واحد الطبع ماكاتهزش عنيها فرجال :بغيت ندخل
سمعات صوت ضحكتتهم
واحد فيهم:ههههه باغة تحفضيهم القرآن..اجي ياك ما تغالطو عليك لبلايص يحسابلك هاد لبلاصة هي دارك القرآن ههههه سمعي ازين هاد لبلاصة لما كنتيش لابسة نص سانتيم ممنوع دخول هههه
لبيدور لاخور:الا اصاحبي هادي راها من هادوك لي تا كيوصلو للكباري عاد كيتعرااو
نعمة ماهتاماتش لكلامهم عندها غراض جاية على قبلو اتقضيه وتمشي وماتوليش ترجع:بغيت نشوف كمال قولو مريم المغنية بغات تشوفك
بقاو واحد كيشوف فلاخور:ختي مريم هدي نتي
نعمة:ماشي سوقك قولو هاد الهضرة
البيدور:اجي معايا راه فالمكتب
تبعاتو دخلو وسط الضجة دنيا مقلوبة بشطيح والموسيقى ولكيسان دشراب كيدورو شمأزات من هاد المكان وصلو للمكتب دخل هو لول بقة شحال عاد خرج:دخلي
دخلات وهو خرج وشد لباب موراه ..بان ليها واقف وعاطيها بالضهر عريض وطويل لابس تيشير مبين عضلاتو وعاد دراعو كلها وشام واصل تا لعنقو ..دار لعندها وهي تحني راسها حسات بيه جاي فتجاها تا وقف اونفاص معاها بلعات ريقها سمعات صوتو:شكون نتي.
نعمة:كيفاش
كمال :كيفاش وعلاش ولو لو بلا بلا بلا هدشي ماشي وقتو يا اما تجي هي ولا راها عارفة
دخلات وهو خرج وشد لباب موراه ..بان ليها واقف وعاطيها بالضهر عريض وطويل لابس تيشير مبين عضلاتو وعاد دراعو كلها وشام واصل تا لعنقو ..دار لعندها وهي تحني راسها حسات بيه جاي فتجاها تا وقف اونفاص معاها بلعات ريقها سمعات صوتو:شكون نتي
نعمة بقات ساكتة شحال عاد دوات:انا بنت عم مريم
بتاسم مد يديه باش يحيد ليها لتام:حيدي هدشي بعدا.
رجعات اللور:لااا
كمال خشا يديه فجيابو:اه ولاش جاية وعلاش ماجاتش مريم كتلعبو معايا ولا شنو
نعمة:مريم عندها ليوم لاكط ماتقدرش تجي وعمرها اتجي لهنا هي بغات تعيش حياتها بعيد على هدشي واصلا قالتهالك ونت لي مابغيتيش تفهم هي كتبغي راجلها وباغة تنسة لماضي
وسكتات حلات ساكها جبدات لفلوس :هادو باش تبعد منها وتخليها عليك
كمال خدا لفلوس حسبها هزات عنيها فيه بغات تشوف ملاميحو كيف دايرين لقاتو كيشوف فلفلوس وكيحسبها.وقلبها كيضرب فلمية..كمال بتاسم وشاف فيها جات عنيه فعنيها دغية نزلات راسها لتحت بتاسم وقرب لعندها:ربعة دلمليون هههه تبارك الله عليكم فكرتو وخيطتو وفصلتو غا بحدكم واش فخبارك انه فاش كتغني هي كنجمع ربعة دلمليون غير فطبلة وحدة دسواعدة..حسبي معايا ربعة طبالي دسواعة بربعة دلمليون..هدا نهار لعيان ..حسبي 10 طبالي بربعة دلمليون..وزيدي عليها لغرامة لي كيلوحو عليها كااع من 5000 درهم لفوق وعاد شي لاخور كل واحد وشحال كيحط عليها راه لملاين فليلة وحدة .ههههه
خدا ليها ساك وخشا ليها لفلوس فيه:هدا ماشي حل.
YOU ARE READING
😥أتہٰعبٰٰنيٰ قدريٰ😣
Adventureقصة بقلم إكرام بانشولي وندى علامي،كل واحد فهاد الدنيا عندو قصة وحكاية وقيتات زوينين او وقيتات خايبين ناس مشاو و ناس جاو ولا بد تعلم من كل قصة واحد الدرس ،الدرس لي كاتوحي عليه هاد القصة هو الصبر بلاما ندوي بزاف ونحرق الاحداث.
