عشق في بلاد حروبها لا تنتهي 3 (جبار)

البـــ{الـــواحد والــعشرين}ـــارت

_
_
عشـَق فـي بِـلاد حُـروُبِـها لا تنتهــي 3
{ #جبــــار }
.
.
في الحلقة السابقة 💛
وقفت علي لمرايا وهيا تشبح لـ روحها والدموع مليانات عيونها ، دموع القهر ، دموع العدم حيله لمستقبل ماقدرتش تغيره ، نزلو دموعها مع عيونها لنزلتهم لوطه وهيا تحاول تمسح دمعتها بـ روس صوابعها ، ورجعت رفعت راسها وشبحت لـ فيلوها لـ تسريحتها لـ زينتها ، لـ اجمل مره تطلع فيها باش تكون عروس لـ الانسان لدمر حياتها وشوه سمعتها .
خدت نفس وهيا تتلفت لـ امها لـ خشت عليها غرفة لعرايس وقالت بـ بتسامه :مريم

قراءة ممتعة💛
البـــ{الـــواحد والــعشرين}ـــارت
.
.
سعيت بك للإنتقام ، وسعيتِ بي للنور 💛
.
.
شد المنيليه بـ يده وهوا ياخد في نفس كبير ودقات قلبه اسرع من اي وقت مضي ، والقلب اللي طول عمره ضانه ميت ومايحس ، كتشفه معاها كتشف حب ، وعشق ، ماظن في يوم يلقا طريقهم .
فتح الباب بشويه وخش وهوا يرفع في عيونه وشبحها واقفه قدام الزيانه ، ولما شافاته تلفتت بـ دموع سالو علي خدودها .
ضيق السيفاو عيونه ونزل راسه لوطه وقرب منها بـ خطوات بطيئه لين وقف قدامها ، وقرب بـ بوسها من جبهتها دفاته مريم بعيد عليها وقالت من بين دموعها لزادو نزلو :ماتقربش مني
مسح السيفاو جبهته بـ قفا يده وقال :انسي وخلينا نبدو من اول وجديد
مريم : وتقول فيها بـ بساطه هكي تحسابها ساهله
السيفاو :شن تبيني ندير باهي ، حاولت نصلح الغلط لدرته وانتي مصره اتبتيه عليا
مريم هزت براسها :عمره لتكسر مايتصلح
ورفعت الفيلو فوق وتخطاته وقربت من الحمام لقبل ماتفتحه وقفها صوت السيفاو لتلفتلها ، وقال :يتصلح ، واني صابر لين نصلحه
ضيقت مريم عيونها من بين دموعها لـ ينزلو وهيا تشبحله لـي لحظات وبعدها تلفتت وخشت الحمام وخلاته يتنهد وهوا يمسح علي وجهه بـ يديه الزوز .
.
.
كُــلمـا استطيــع أقنـاع نفســي بـ كُـرهـي لكــ ، تثبتــلي المواقف عكــس ذالكــ ✨
.
.
ضيقت نور عيونها :قصدك بيقعد في طرابلس
رفعت آيه كتافها :مش عارف قال بابا حسه انه بخلوه غادي مابين هدي الجو هني لانه عمار قالب عليه الدنيا ورافع عليه محضر
نور ضحكت :علي اساس تو كان انحبس بيتحاكم ، تي نبصم بـ العشره عمامي وجبـار لما يطلعوه من تاني يوم
اكرام :هوا صح
نور تنهدت وهيا تتلفت لـ الاء لخشت عليهم ورجعت تلفتت لـ اكرام وقالت :اخي لما يكون مافيش قانون يبداء الشعب يحكم ويطلق ويقتل ويخنب من غير قانون يحاكمه زي ماصايرنا توا
آيه:وعندنا بـ الزايد هني
اكرام تلفتت لـ الاء:شن جو هنيده
الاء:ماشيه مكسده قالت تعالولي
آيه :اطيب الكيكه ونمشو
نور وقفت:غر نمشي نبدل بسرعه ونجيكم
وتلفتت طلعت وهيا تركب بسرعه واول ماوصلت قدام الباب ، تلفتت لـ صوت رجاء لنادتها :نور
نور تلفتت نزلت درجتين :نعم خيرك
رجاء:ماما تبيك
هزت نور راسها ونزلت وهيا تبي تمشي لدار مرت بوها بس وقفها صوت الاء لواقفه قدام باب المظبخ :برو عاودولها كان تبو بس وحده زيها ماتستاهل جبـار واصلا سيوره حـ يطلقها وحـ يخدني اني وقولو الاء ماقالتها
رفعت نور حاجبها وتلفتت قربت وقفت وراها :شكلي سكتلك هلبا وله
تلفتت الاء طول ورفعت حاجبها وهيا تحس بـ يد اكرام لجبدتها وقالت لـنور :مش عليك نحكو علــ...
قطعتها الاء وقالت بـ غيظ:لا عليك ، ومش خايفه منك ونعاوده لكلام قدامك عادي
نور رفعت حاجبها :والله وعندك مزال وجه تدوي ، محقرك 
الاء صيحت :احترمي نفسك حبيبتي واعرفي شن تدوي والا نعرف لـ من نقول وهوا يتصرف معاك بـ يده
آيه:غر بشويه يابنات فكونا تو تطلع مرت جدي
نور دفت الاء :لالا خليها خليها ، من هوا ان شاءالله اللي بيعرف كيف يتصرف معاي جبـار امالا
الاء ضحكت بـ ستفزاز :هههههه تو نشوفو المالا هدي تقدري تقوليها قدامه ولا لا
نور :نقدر وعلاش مانقدرش ، وخيرك انتي مصدقه روحك هلبا علي اساس وصلتيله جبـار ولا تقدري حتي تتكلمي معاه نص كلمه
ضيقت الاء عيونها بـ غل :ايه نقدر وانتي عارفه كويس شن فيه بيني وبينه
اكرام شبحت لـ الاء:شن تخرفي انتي
نور ضحكت :ههههه بري قوليله هي بري في شن تستني
سكتت الاء وقعدت تشبح لنور لزادت قربت منها وهيا تبعد في يد آيه لمره تندب ومره تشد في نور لقالت :نعطيك معلومه جبـار مش معبرك ولا قايمك من ارضك ولا هوا شايفك اصلا ، فيقي من اوهامك وستوعبي انه هوا راجلي اني اوك ، راجلي وليا اني وملكي اني
الاء تعلت انفاسها وهيا حاسه بـ نار :تتوهمي انتي هلبا راك مجرد يتيمه وهوا سخف عليك ولمك عنده لا غير
عيطت اكرام علي الاء :الاء اعرفي شن تدوي
قعدت نور ساكته لدقيقه وهيا تشبحلها وحاسه بـ غضب بـ نار بـ شي يوجع من كلامها ومن غير اي مقدمات او تفكير قربت وشدتها من شعرها بالقوه وقعدت تريش فيها وتضرب بـ عمي عيون من غلها وبدي لعياط لـ طلع اسماء وفوزيه من ديارهم وهما يجرو يجبدو في نور من علي الاء ، لخلتها تحتها وهيا مقعمزه فوقها وتجبدلها في شعرها وتسب وتشتم ، وقد ماجبدوها لبنات ماقدروها من غلها اللي قواها ، وهيا في نص ضربها وعياط الاء اللي وصل لشارع ، حست نور بـ يدين قاموها من خصرها وبعدوها علي الاء .
عيطت نور وهيا تعافر في جبـار لـ لفتها ليه وعيط:هااا هاااا
دفاته نور بـ القوه وهيا تبي ترجع تتلفت لـ الاء لقعده علي الارض وضربتها بـ رجلها وهيا تبي تولي تهجم بس جبـار شدها من خصرها وقامها علي كتفه وتلفت ركب علي الدروج وخلا نور تصيح :حول حول
ورفعت راسها وهيا تبعد في شعرها وتشبح لـ الاء لتبكي :وربي لما نربيك ياكلبة لكلاب وربي كان ماخليتك تندمي علي كلامك الزفت زيك يازفته ادفلي علي وجهي
وضربة جبـار علي ضهره بالقوه وصيحت :حول حول خليني نربيها
خش جبـار الدار ولوحها علي السرير وقال بغضب واضح علي صوته العالي :شن تبيني ندير معاك هاااا نضرب ولا شن ندير
وقفت نور علي السرير بـ ركابها وهيا تبعد في شعرها وتقرب من جبـار وتبي تنزل من السرير :اضرب اضرب بس بعد ماناخد حقي من الكلبه هديكا
شدها جبـار من يدها بالقوه لين وجعتها ورجع دفها علي السرير لين نور عيطت بوجع وهيا تشد في يدها وتشبح لـ جبـار لصيح :إبسي في مكانك هنا هاااا هنا وقولي شن فيه
هدت نور وقعمزت في مكانها وهيا اطبس راسها تخفي في دموعها لملو عيونها وتشبح لـ يدها وقالت بـ صوت ملاته العبره :اطلع اطلــع وبرالها اصلا طنجره ولقت غطاها انت وياها
تنهد جبـار وهوا يمسح علي لحيته بـ عدم فهم خلاه يقعمز علي السرير ويجبدها من يدها جنبه لين عيطت نور وهيا تبعد في يده من علي يدها بـ وجع :اااااه حول حول يدي
ضيق جبـار عيونه وبعد يده وهوا يشبح لدموعها لنزلو :خيرك ها خيرك
بعدت نور من عليه ومسحت دموعها :ماخصكش فيا برا لـ حبيبتك اونا ودويلها جروحها
جبـار غمظ عيونه ورجع فتحهم وهوا يحاول مايعصب اكتر وقال :ها ادوي زين
نور عيطت :علي فكره اني مرتك اوك مرتك راهو مش هيا ، كيف تدوي عليك هكي انت راجلي اني مش راجلها
وخبطت بـ يداها علي السرير وهيا تهز في راسها بحركه بعدت شعرها من علي وجها ، ورفعت راسها لـ جبـار لـ رفع حاجبه وقال :راجلك ؟!
نور :اكيد راجلي وليا اني بروحي واي وحده تدوي عليك وبدات الكلبه اللي مش متربيه هدي نقطعها بسنوني
بتسم جبـار :يارسول الله هدا كله
نور :واكتر
قرب جبـار منها اكتر وضيق عيونه بـ بتسامه تابته علي مبسمه :وعلاش هدا كله ها علاش
هدت نور طول وهيا تستوعب علي روحها وعلي كلامها ، وقعدت تشبح لجبـار لقريب منها لـ لحظات وكل غضبها وغيضها تحول لـ خجل وتوثر ، بعدت ونزلت من السرير وهيا تمسح علي خدها :لانه مستفز كلامها ووحده حقيره وتافها وكلامها يجرح
وتنهدت وتلفتت قربت من قزاز البلكونه وتقعمز لوطه قدامه وشدت يدها بوجع وقالت بـ ضيق حاوط قلبها :خليني في حالي وبرا اطلع
مسح جبـار علي لحيته وهوا فاهم انها تهربت بـ كلامها وقال :ها شن لصار لوطه
نفخت نور وهيا تدكر في جملة الاء الاخيره (...:تتوهمي انتي هلبا راك مجرد يتيمه وهوا سخف عليك ولمك عنده لا غير)
ملو دموعها عيونها وقالت :كلكم مش حاسيين بيا ولا فاهميني كل واحد يدوي في كلام ومايعرف معناه
جبـار ضيق عيونه ، ونور كملت وهيا تمسح في دموعها لـ خانوها ونزلو :اني مش محتاجة شفقت حد ولا حد يسخف عليا ، بس نبي حد يفهمني حد نتصرف معاه بـ راحتي من غير مانحسب شن نقول او نفكر شن نتصرف قبلها
غمظ جبـار عيونه وهوا ياخد في نفسه ورجع فتحهم وقال من بين سنونه بـ عصبيه :ادوي كلام ينفهم ها ادوي شن دارولك
نور :كلكم درتولي كلكم جرحتوني ، حبس وضيق نفس ، ودم وحرب وجرم عندكم زي السلام عليكم ، وكل شي لا ، قرايا لا ، طلوع لا ، حتي جنانات لا ماتطلعوش ، في كل مكان في الحوش فيه قانون وقيود
وخدت نفسها من بين دموعها :حتي في الدار هدي مش واخده راحتي كل شي عكس مانبي كل شي هني كل شي الحياة والناس كلهم عكس مانبي اني
مسح جبـار جبهته بـ قفا يده ووقف قرب وقعمز جنبها بـ هدوء وشبحلها كيف تحاول تبطل بكي وهيا تمسح في دموعها بـ عبت وكملت :تقول مش عيله وحده كل واحد فيكم يجرح ويطعن في التاني وعنده عادي ، تعايرو في بعض وتحاولو تقتلو بعض وشي عادي جدا عندكم
وتلفتت لـ جبـار :علاش انتم هكي ، اني مانقدرش نعيش بينكم اني مش زيكم اني عندي قلب ، وضمير مش زيكم ، اني ، اني مانقدرش نعيش بينكم من غير سند ولا ام واب يحموني منكم
رخي جبـار من عقدت حواجبه وقال :اني سندك ها واني لنحميك
هزت نور راسها ومسحت دموعها :لالا
جبـار تلفت قبالها وتكي علي قزاز البلكونه وهيا قباله تشبح للقزاز وقال وعيونه في دموعها لضايقوه :مش اني راجلك ها وليك بروحك
رفعت نور عيونها فيه وهيا ترشف في دموعها بتضيقت عيون خلت جبـار يضيق عيونه زيها وكمل :كيف مانحميكش ها كيف
رجعت نور هزت راسها :لالا اصلا انت لتأذي فيا
سكت جبـار وقعد يشبحلها كيف تمسح في دموعها لـ ماعاش يبو يوقفو ، وقال :خلاص ها ياسر بكي
نور :ماعاش يبو يوقفو
جبـار تنهد وشاف للغرفه بنظره سريعه ورجع شبحلها :نوضي مش تبي تغيري الدار ها نوضي ديري فيها لتبيه
ضيقت نور عيونها وقالت من بين دموعها:بالحقا
هز جبـار راسه بـ معني ايه ، وميل راسه وشبح لشنطة حوايجها:وها ستفي دبشك في الدولاب ، كان تبي نحول حوايجي كلهم تمام هكي ها
بتسمت نور من بين دموعها لتمسح فيهم بـ يداها بـ عبت وتحك في عيونها :مش مصدقه اني ههههه
بتسم جبـار :علاش
نور حولت يداها من عيونها وشبحتله :نغير كل شي كل شي علي كيفي عادي
هز جبـار راسه بـ معني ايه :ها كل شي تبي جديد ها ناخدلك حتي جديد عادي
ضحكت نور لين خلت جبـار يرفع حواجبه بـ بتسامه :الفرحه هدي كلها علي خاطر تغير الدار
نور هزت راسها :لا
ضيق جبـار عيونه وقعد يشبحلها كيف خفت من ضحكتها لـ تحولت لـ ملامح مضايقه وهيا تشبحله وقالت:ستاحشت ماما وبابا هلبااا
مد جبـار يده :تعالي هنا
قعدت نور تشبحله لـ ثواني ، وبعدها نزلت عيونها لـ يده ، ورفعت يدها وشدتها وهيا توقف علي ركابها وتقرب منه .
قعمزها جبـار في حضنه ورفع يده وبعدلها شعرها من علي وجها وقال:انا جنبك ها وسندك وانا لـ بيحميك ومافيش غير هكي ها مافيش
بتسمت نور :عادي نطلب طلب
جبـار قرب وباسها من بين عيونها وبعد :ها قولي
نور قربت وحطت راسها علي كتفه وهيا تلف في يداها علي خصره وقالت :اقرالي قرءان
خدي جبـار نفسه وهوا يمسح علي لحيته وحس بيها وهيا تزيد من ضغط يديها علي خصره لـ خلاه يرفع يده ويحطها علي شعرها والتانيه لفها علي خصرها وقال بـ دقات قلب تتسارع بشويه بشويه : {أعــذو بـالله من الشيطـان الرجيم .
بِسْمِ اللَّهِ الرَّحْمَنِ الرَّحِيمِ
الْحَمْدُ لِلَّهِ الَّذِي أَنْزَلَ عَلَى عَبْدِهِ الْكِتَابَ وَلَمْ يَجْعَلْ لَهُ عِوَجًا (1) قَيِّمًا لِيُنْذِرَ بَأْسًا شَدِيدًا مِنْ لَدُنْهُ وَيُبَشِّرَ الْمُؤْمِنِينَ الَّذِينَ يَعْمَلُونَ الصَّالِحَاتِ أَنَّ لَهُمْ أَجْرًا حَسَنًا (2) مَاكِثِينَ فِيهِ أَبَدًا (3) وَيُنْذِرَ الَّذِينَ قَالُوا اتَّخَذَ اللَّهُ وَلَدًا (4) مَا لَهُمْ بِهِ مِنْ عِلْمٍ وَلَا لِآبَائِهِمْ كَبُرَتْ كَلِمَةً تَخْرُجُ مِنْ أَفْوَاهِهِمْ إِنْ يَقُولُونَ إِلَّا كَذِبًا (5) فَلَعَلَّكَ بَاخِعٌ نَفْسَكَ عَلَى آثَارِهِمْ إِنْ لَمْ يُؤْمِنُوا بِهَذَا الْحَدِيثِ أَسَفًا (6)}
.
.
لا أعلــم مــا ينتظره قلبي ، فقـد سأمت مـن أحســاسه العــاشق 💔
.
.
صيح القاسي لسرع خطواته :تي نكلم فيك ياراجل انطرشت ولا شن
وقف عمر وهوا يتنهد وتلفت لـ القاسي وهوا يعيط بـ عصبيه مبينه من عيونه :شن تبي ياراجل شن تبي
ضيق القاسي عيونه اللي وخر بـ فزع من صوت عمر العالي وقال :بشويه خيرك شن فيه
عمر :مافيه شي وياريت تخلي ام امي في حالي
وتلفت عمر وخلا القاسي مستغرب وهوا واقف ويشبحله ومش فاهم شي .
خش عمر لجنان وهوا يقربع في الباب لقربعه بـ رجله بـ غضب لين بوه كبه عليه من روشن الدار وقال :خيرك ياولد
تلفتله عمر ومسح علي شعره وهوا يطبس :مافي شي
وتحرك لاد علي الحوش وهوا يمشي لـ دار لخزين لفتحها وخش بـ غيظ وغضب وقربع الباب عليه وتلفت ضرب يده في الحيط بـ القوه اكتر من مره وهوا شاد علي سنونه لين يده نجرحت ودمدمت ، وماوقف ضرب الا لما حس بـ وجع مألم وهوا ينفظ في يده بعيد عليه ويقعمز علي الارض وتكه علي الحيط وهوا ياخد في نفسه ويطلعه بـ غضب بـ وجع في قلبه بـ جرح يوجع هلباااا في نص قلبه .
مسح وجهه بـ يديه الزوز وقرب من الرف وهوا يجبد في سالة لقطاطيس من تحته وهوا يلقا فيه فاضي ومافيشي الا وحده وكانت ميته لين ريحتها طلعت اول ماحركها ، بعد عمر وهوا مشمأز من الريحه ورجع اتكي علي الحيط ويشبح للقطوسه بـ سرحان ، ومانتبه علي الباب المردود لنفتح بـ شويه وهيا تبيت واول ماشبحاته وقفت في مكانها وقعدت تشبحله للحظات قبل ماتحول نظرها لساله لـ اول ماشافت القطوسه الهامده فيها ومبينه انها ميته ، شهقت هنيده بالقوه لين عمر تلفت للباب طول وهوا يضيق في عيونه ويساوي في تقعميزته ويشبحلها كيف خشت وهيا حاطه يداها علي فمها ودموعها نزلو بـ عبره شدتها وهيا تقرب من السلة لقعمزت قدامها وعيونها في القطوسه الميته .
حولت هنيده يداها من علي فمها وسمحت لشهقاتها انهم يطلعو مع صوتها لطلع بـ العبره وهيا تقرب تمس في القطوسه :ماتت
عمر :زي قلبي
قلبت هنيده شفايفها وغمطت عيونها وقعدت تبكي بالصوت لين خلت عمر يزيد من ضيق قلبه اللي ينزف دم ، وصيح :يـــاسر
نخلعت هنيده من بين بكاها وهيا تحط في يداها علي فمها وتكتم في بكاها للحظات وبعدها تلفتت بتنوض وبـ لمحه شافت يده اللي تنزف ، وخلتها ترجع تشهق وهيا تحول في يداها من علي فمها وتقرب من عمر وقعمزت قدامه وهيا تشد في يده و تقول بـ صوت يرعش من لبكي :شـ شـ ـن هـ ـدا ايـ ـدك
فك عمر منها يده وقال بـ عياط :مافيا شي قداش مره بنقولكم مافيا شي
ودفها من عليه وناض وقف وطلع وخلاها في مكانها تبكي بـ عبره ، بـ الصوت العالي ، بـ هستيرية وجع ، وألم ، بـ وجع قلب ، بـ وجع خاطر ، انه مافي حد فاهمها ، مافي حد حاس بـ نارها ، بـ حيرتها ، بين اهم شي في حياتها ، بين بر والديها ، وبين شخص حسسها بـ انها اميره ، حسسها لـ اول مره انها موجوده ، وليها قيمه ، وحسسها بـ حريتها ،و بـ أنوثتها .
نزلت يداها من علي وجها وهيا ترفع في راسها وتتلفت للباب وتشبح في عمر لواقف قدامه ويشبحلها ، قلبت شفايفها بـ مسكت عبره ودموع وقالت برجفه:عـ ـمر
قرب عمر وقعمز قدامها بـ ضيقت عيون وقبل ماينطق اي حرف ، وقفت هنيده علي ركابها وقربت لفت يداها علي رقبته وحضناته بـ عبرة .
زمط عمر ريقه ولف يديه عليها وحضنها ليه وهوا يقعمز زين وخلاها في حضنه ، قعدو لـ دقايق طوال وهما حاضنين بعض بـ صمت ممزوج بـ شهقات هنيده ، ونفس عمر العالي المضايق ، لنطق من بعد صمته وقال :هنيده
زادت هنيده حضناته اكتر ولفتت راسها في رقبته وهيا ادس في وجها فيها وهمست بـ صوت متقطع بسبب شهقاتها : خلـ ـيك جـ ـنبـ ـي ديـ ما عمر
عمر ضيق عيونه وبعدها شوي وخلا وجها قبال وجهه اللي نزلاته لوطه .
رفع عمر يده وقملها وجها وهوا يشبح لأثر الجروح اللي في منها مشي واللي فيه قعد اثره وقال :علاش كلامك متناقض
قلبت هنيده شفايفها ورفعت يدها شدت يده لـ علي وجها :اني مضايقه هلبا
تنهد عمر :علاش تبي توجعيلي قلبي
هنيده :لا مانبيش
عمر قرب منها اكتر وتكه جبهته علي جبهتها :باهي علاش اديري فيا هكي عارفتيني نبيك ، ومانتحملش فراقك
غمظت هنيده عيونها مع دموعها لنزلو وقالت :حتي اني نبيك
عمر قعد يشبح لوجها ولـ عيونها لمغمظه :تبيني وتبي البعد ماتجيش ياهنيده ماتجيش يابنت عمي
هنيده :مضايقه اني
عمر :حتي اني مضايق ، مضايق منك انتي
هنيده :واني مضايقه من روحي
عمر :هنيده
فتحت هنيده عيونها وشبحتله ، وعمر كمل :انتي ذليتيني
هنيده بعدت راسها منه وشبحت لوطه :اني اسفه
عمر :اني مانبيش اسفك ، اني نبي قلبك
هنيده شبحتله :اصله قلبي عندك
وتعبو عيونها بالدموع :مش انت بس لتحبني ، حتي اني نحبك هلبا نحبك واكتر منك
و وقفت وهيا تتلفت بـ تطلع بس عمر شد يدها وهوا يوقف ويقرب منها :وراس غلاتك علي قلبي ماتكوني غير حلالي لو كان يصير فيها الرقابي
هنيده :بس بابا
عمر طبس علي طولها وباسها من خدها :مايكون الا راضي
وبعد من عليها وطلق يدها :بري توا قبل مايجي حد
هزت هنيده راسها وتلفتت طلعت .
.
.
عـلي يــداك تَعلمة قوانين العشــق ، وعـلي يــدي تـعلمتي قوانيـن الحيــاة .
.
.
بتسمت نور:صهيب
جبـار :ها
وخرت نور راسها وهيا قعده متكيه علي كتفه وشبحتله :حلو صوتك هلبا
بتسم جبـار بـ خفه وطبس باسها علي خشمها بخفه وبعد :ها حلو زيك
زمطت نور ريقها وهيا تاخد في نفسها وقامت راسها وهيا تشبح لوطه بـ توثر من حركته ، واول مارجعت شبحتله لقاته قعد يشبحلها .
رفع جبـار يده وشدها من دقنها وزاد قرب ، وقبل مايقرب يبوسها لفتت نور راسها لـ الجيها التانيه بـ صد ليه ، لين جبـار ضيق عيونه ورخي دقنها وقال بـ هزوه :العقل قعد عنده ها قعد
وشد علي سنونه بـ عصبيه مع نفسه لوضح عليهم الغضب ، وقبل مايبعد نور شدتله يديه لي علي خصرها قبل مايحولهم وقربت منه هيا .
.
.
.
فــي الليل ...
تلفت القاسي لـ عمر لـ فتح الباب عليه وقعمز في الكرسي لـ جنبه .
ضيق القاسي عيونه ونفخ الدخان في وجه عمر لشبحله وقال :مروح اليوم طرابلس
هز القاسي راسه بـ معني ايه ، وقال:شني مني قعد متكنطي
عمر اتكه علي الكرسي بـ ظهره وشبح قدامه :قعد
القاسي :ادوي ادوي ياصحيبي بالك ياودي عندي الخل والحل هههه
عمر تلفت وشبحله :عندك ايه
القاسي رجع ضيق عيونه وضحك :هههه تي تكلم ياراجل شن فيه
عمر سكت شوي ، وبعدها تنهد وقال :بنت ، بنت عمي جلال
القاسي ضحك :خطيبتي هههههه
عمر خبط بـ يده علي يد الباب وتلفت لـ القاسي وهوا بـ يضربه ، بس بـ حركه سريعه من القاسي لف يد عمر ورا ضهره وهمس في ودنه :بشويه ياصحيبي بشويه و بـ التفاهم وماتخليش شياطين الانس تطلع قدامي وتنقلب فوق روسكم
فك عمر يده بلويت يد القاسي لـ عيط وشد يده وهوا يسب :...... خيرك امك انت
عمر رفع يده في وجه القاسي وقال بعصبيه :لا خطيبتك لا نمي فوت من علي طريقها البنت ليا
هديي القاسي طول وفك من عقدت حواجبه وهوا يبتسم :اووو فيه قصة حب هوا ههههههه
عمر مسح علي وجهه:قاسي ندوي بـ جديات اني
القاسي حرك يده بـ وجع وقال :غر كان جيت بشويه وانت عيونك معميات عليها جاي بتضرب طول
وتلفتله وبتسم :تحب يا راجل وصار من قلبك القاسي زيني هههههه ، تي وربي ماتكتبها عليا ...... ناخد بنتها من ولادها
تلفتله عمر بـ ضحكه :راجل
القاسي غمزله :عندك شك
.
.
.
قرب جبـار وباسها من رقبتها بـ خفه ، وحول يده من تحت رقبتها بـ شويه باش ما تنوضش ، وتلفت جبـد تيشرته لـ لبسه وقعمز وهوا يمد يده لـ الكمادينو وهوا ياخد في التليفون لـ يهز معلن عن مكالمه .
رد جبـار :اها
عمر :وينك
جبـار :شن تبي ها
عمر :كانك في الحوش تعالي نبيك اني لوطه
جبـار :تم
سكـر عمـر من جبـار ، وقرب من بـاب الجنان وهوا يفتح فيه شوي ويشبح في عمه جلال لـ واقف علي القاسي وملامح وجهه متعصبه بس يحاول يخلي روحه عادي بـ بتسامه مزيفه ، خلت بتسامه من القلب تطلع علي مبسم عمر لـ تلفت وقرب من حوشهم وهوا يفتح فيه وخش وهوا يتلفت يخش للمظبخ لي فيه امه قال :امي
تلفتتله كريمه :نعم
عمر :ناديلي علي بوي
كريمه سكرت الشيشمه ورجعت شبحتله :شن فيه ان شاءالله خير
عمر :خير خير غر ناديه
كريمه هزت راسها :باهي تو اناديه
عمـر :قوليله يطلع لـ جنان
.
.
.
طلع جبـار من الحوش وهوا يشبح لـ عمر لـ واقف في نص الجنان وحاط يديه في جيوبه .
سكر الباب وشبح لـ بوه لخش من باب الجنان و لـ حوش عمه سليمان لـ طلع حتي هوا ويشبح لـ عمر بـ تضيقيت عيون وقرب منه :شن فيه امك قتلي تبيني
المهدي رفع حاجبه :ان شاءالله خير
قرب جبـار بـ صمت وهوا يشبح لـ عمر لشبح لـ عمه المهدي و بوه ، ولـ جبـار ، وتلفت شبح لـ باب الجنان لـ نفتح وخش عمه جلال لضيق عيونه اول ماشافهم .
قرب جلال منهم بـ خطوات بطيئه وقال :خير شن فيه واقفين هني
وقبل ما سليمان يتكلم قال عمر :المره لـ فاتت جيتك بروحي ، لكن المره هدي جيتك وجبتهم كلهم شهود ومانبيكش تردني ياعمي
فهم جلال علي كلام عمر وقال :سيره وفضيناها
سليمان :سيرة شن
عمر شبح لـ بوه :اني طلبت بنت عمي جلال ، وعمي رافضني
تلفت سليمان لـ جلال ، هوا والمهدي لقال :علاش ياجلال من احسن ولد خوك ولا البراني
جلال :بالله ماحد يدخل بنتي واني حر فيها
سليمان :تدخل شن حني جايين علي سنة الله ورسوله وطلبنا بنتك ، ومن زيك بنتك وحيدتك تقعد معاك بدل ماتعطيها للبراني وماتعرف ملته من وين
جلال خدي نفس وكيف بيتكلم ، سبقه جبـار لتكلم بعد صمت طويل :ها كان جدي الله يرحمه حي ، اكيد كانت بنتك من نصيب عمر
سكت جلال وتنهد وهوا يشبحلهم وطبس راسه لوطه بـ صمت .
.
.
بـ دهــــابك ، تركت بـي جرح لا يُشفــي 🍂
.
.
نزلت دمعت مؤيد لرفع عيونه لـ الميدان لكان في احلا طله ليه ، بـ حمامه لـ مالي ساحته ، وبياعين الورد في كل مكان ، والسرايا الحمره محاوطه بـ اطفال يتجارو بـ برائه خاليين من الهم وجروح الحياة وهما فرحانيين ، وبـ ناس ، علي بسمها بتسامه صادقه ، وناس شايله الهم لين عاكس علي وجوها البائس.
رفع مؤيد راسه وهوا يشبح لـ سماء طرابلس الصافيه ، وفي داخله وجع ، كبير ، وحتي فات عليه ايام ، لـ تحولت لـ شهور طوال ، قعد هـ الجرح يكبر كل يوم عن يوم بدل مايصغر ويتلاشه
نزل راسه وهوا يطلع في التليفون من جيبه ويفتح في الاستوديو لـ معبي بـ صورها ، فتح وحده من الصور وقرب وهوا يتأمل في وجها ، في عيونها وخشمها وفمها ، في بتسامتها لـ نحرم منها ، حتي بعد 7 شهور لفاتو ، 7 شهور عدو علي موتها ، قعد دكراها في قلبه وعقله ، 7 شهور عدو ، لكن كل يوم ينوض كأنه اول يوم تموت فيه ، 7 شهور عدو ، مافيش يوم نساها فيه ولا هون عليه طول المده .
7 شهور مرو عليه بـ ضيق وهم وجراح ، وهوا يحاول يتناسا ويعيش ، يعيش في حياة بلا معني ، بلا هدف ، او يد يستمسك بيها ، باش يطلع من هـ الحزن لغرق في اعماقه اللي لا نهايه ليه .
.
.
عـلي يــداك تَعلمت قوانين العشــق ، وعـلي يــداي تـعلمتي قوانيـن الحيــاة 💛🍃
.
.
رفع عمر يده :جبـار
جبـار رفعله يده :شوي هااا
وتلفت فتح باب الخلفي للحوش وخش وهوا يشبح فيها واقف وهيا تنقز وتلف علي روحها وتنفخ بـ ملل طفولي ، خلاه يبتسم وهوا يقرب منها :ها
واول ماتلفتت نور جبدها جبـار علي الجنب ولصقها علي الحيط وطبس علي طولها وباسها علي خدها :ها شن هيا الحاجه لـ ماتستناش لغدوه
ضيقت نور عيونها :علاش ماشي لطرابلس
جبـار :خدمه
نور رفعت حاجبها :خدمة شن
جبـار رفع حاجبه زيها وزاد قرب بوجهه منها :بنمشي نتزوج وحده ماعندهاش السان زيك
فتحت نور فمها وهيا اضيق في عيونها بكل :والله انتفك انت وياها ونمرمد اياماتكم
ضحك جبار وشدها من دقنها وهوا يخبط في راسه بـ راسها بشويه :انتي ناويه تخليني نهبل عليك هنا ها نهبل
غمظت نور عيونها وهيا تضحك :لالالالا هههههه
جبـار رجع باسها من خدها :خلاص ها خشي انا لازم نمشي
وقرب باسها من بين عيونها وبعد وكان بـ يتلفت بس نور شداته من يده وقالت :قبل ماتمشي بنقولك علي حاجه
ضيق جبـار عيونه :ها
خدت نور نفسها ، وطلعاته وطبست راسها وهيا تفك في يده وقالت بـ خجل :اني حامل
ورفعت راسها وشبحتله كيف قعد يشبحلها من غير اي ملامح او تعبير ، وهوا يتلفت لـ صوت عمر لـ ينادي ، ورجع شبحلها بنظره مش مفهومه وتلفت مشي من غير كلمه او ردت فعل ....
.
.
.
#(للبــ 22ــارت)ـــع
#اليـَاقُــوت
________________________________
بداء كتابة الرواية في تاريخ 20 / فبــــ2ٰــــراير / 2020
تم انهاء كتابة الرواية في تاريخ 31 / مــــ5ـــايو / 2020
اسم السورة / سورة الكهف 💛