كانت قاعده بالصاله تتابع المسلسل بهدوء الوقت يمر ببطئ شديد انفتح باب الجناح و امها تدخل وهي تحط العبايه و تقول : السلام عليكم
ردت : وعليكم السلام
جلست امها وهي تأخذ صحن الفستق من على الطاوله و تأكل منه: خالتس نوره تسلم عليتس و تقول مره ثانيه تجون معي و بعدين وين اختتس هاذي؟!
قالت وهي تقوم لغرفتها: بدورها المره ثانيه و اختي نايمه
دخلت غرفتها الهادئة و جلست على السرير رن جوالها اللي على الكوميدينا و أخذته وهي تدخل الانستا اللي معظم وقتها عليه و تشوف رسالة بنت عمها
جود :( قمر بنت وينتس )
قمر ردت بـ :( هلا )
جود :( سمعتي بأخر الأخبار؟ )
قمر:( لا وش اي خبر بالتحديد )
جود :( تخيلي جوانا انخطبت! )
قمر:( وعععععع لااا ما اصدقك كييفف اذا عن الشكل بنقول ماش لكن الأخلاق مافيهه)
جود:(ههههههههه و هذا اللي مستغربه منه بس سمعت انه اخو وحده من صديقاتها)
قمر:(حُكم عليه بالسجن المؤبد تحت رحمة الغوريلا جوانا)
جود:(ههههههههه من جد اخته جرته للموت بيدها)
قمر:( المهم معليك منها..)
(اقول تخيلي امس وش صار!)
جود:(وش ؟)
قمر :(امس نزلت انا عند بيت خالي و كانت خالتي هند جالسه قعدت معها نسولف و جاء سعود و قال جهزوا بيجون اخوياي)
جود :(ايوه)
قمر:( انا قمت و طقيت الصدر و قلت لمرة خالي ترتاح و انا أجهز الضيافه رحت و جهزت القهوه و الأغراض و ودتها الشغاله و أعطيت الشغاله البخور تبخر بس الدلخه جت و نست المبخر و خالتي بيجونها الجيران و ارسلت الشغاله تروح للمستودع...)
جود :(اخلصي تحمست ايوه)
قمر : ( تخيلي دخلت المجلس بثقه و يوم اطالع الا و فجأه لقيت رجال قاعدين قدامي أخوياء سعود الاثنين لحالهم انخرشت و خذيت المبخر و حطيت رجلي )
جود :(ههههههههههههههههههه بمووت كان انحشتي ماله داعي تأخذين المبخر)
قمر:(لا لازم اطلع من المواجهة باقل الخساير يوم اني رحت عشان المبخر و ما باطلع بدونه)
جود :(ههههههههههههه خبله)
فجأه سمعت صرخت اختي ربى طلعت من الغرفه و انا اشوفها طالعه من غرفتها تتحلطم وهي غرقانه مويه طلعت امي من غرفة ربى وهي تقول بلهجتها اللي اكتسبتها من طول العشره مع اهل ابوي
:كم صار لي اقومتس تدرين انتس ما صليتي الظهر مواصله من امس ذبحتس السهر صارت الساعه اثنين الظهر !!
قالت ربى بقهر: طيب خلاص بأصلي
دخلت للحمام توضي قلت لامي : يمه بنتغدى تحت ولا هنا؟
قالت امي : لا تحت خالتتس حسبت حسابنا
ردت و هي تدخل الغرفه: طيب
دخلت بدلت ملابسها بجينز و تيشيرت بس فجأه حست كأن حاجه هوت على صدرها انكتمت مره مسكت مسكة الدولاب بقوه و دموعها تعانق جفنيها بضيق و كتمه حست انه انعدم هواء الغرفه بس زحفت للسرير و تمددت فوقه بكتمه و هي تطلع جهاز الربو من الكومدينه و دموعها تنزل حبست شهقاتها و انحرقت خدودها بدموع ساخنة
اخذت نفس عميق من الجهاز و زفرت بعد دقايق تحسنت هي نوعًا ما و غصبت نفسي و قمت و طلعت و لقيت امي واقفه وهي تقول بصوت عالي كالعاده : ربـــى و صــمخ اخــلــصــي
طلعت ربى من الغرفه مبرطمه وهي تقول: طيب خلاص خلصت
