العِدوان الثنائي

الفصل الاول

" العِدوان الثنائي "

_ صباح الخير يا سالم
_ صباح النور يا جيهان .. اومال فين لؤي

ابتلعت ريقها في توتر

_ ل.. لؤي اا .. تلاقيه لسه نايم و ..
_ لسه مجاش من المبارح مش كدا
_ سالم أرجوك انت عارف انه لسه راجع مالسفر و محتاج يقعد مع صحابه و...
_ صحابه ! صحابه مين يا جيهان ! علاء الي مجوز و مخلف اتنين و لا محمد الي عنده عيادة باسمه و يكونش إسلام الي خاطب و دعوة فرحه اهي!
_ اديله فرصة يا سالم مهو بردو مش واخد على الجو دا
_ فرصة ايه ! ابنك داخل عالتلاتين يا هانم ! تلاتين سنة مفيش في حياته انجاز واحد الواحد يقول مرتكز عليه
_ طيب هو مفيش في حياته انجاز هتسيبه كدا مش هتساعده يقف على رجليه !
_ هو مدي لحد فرصة ! دا انا مبلحقش اشوفه يا جيهان
_ معلش يا سالم استحمله دا الوحيد
_ الكلمة دي و الدلع الي هو فيه دا هو الي وصلنا للنقطة دي معاه

*****************
- بعيداً بمسافة -

_ خدي بالك ان دي المرة التانية الي اعديهالك فيها ضحى! 
_ بقولك ايه يا ماما كفاية اوي اني رايحة اقابله و بعدين ابن طنط سهام مين دا الي جيباهولي هو انا طايقة امه عشان اطيقه هو !
_ هو انتِ هتجوزيه هو و لا هتجوزي امه
_ ايه هتجوزيه دا بعد الشر، هي قاعدة وديه كدا و هتروح لحالها
_ صبرني يا رب

_ صباح الخير

وقف رامز ماداً كفه نحو ضحى مبتسماً

_ رامز : ضحى ازيك عاملة ايه
_ ضحى : ضحى حاف كدا ! دا ايه يا اخويا العشم الزايد دا !

تنحنح بحرج بينما هي ابتسمت بسماجة

_ ضحى : ازيك يا طنط سهام مشفتكيش من اخر مرة عملتي فيها بوتكوس والله !

زجرتها امها بنظرتها و الاخيرة تكمل

_ ضحى : بس تصدقي جاب نتيجة دنا معرفتكيش مش كدا يا ماما

نظرت سهام نحوها بامتعاض لتهمس في اذن رامز

_ سهام : هي دي ملاك الرحمة الي عاوز تجوزها ؟!
_ رامز : بحبها يا ماما
_ سهام : يا اهي اتوكس عليك و على امك

امسكت ضحى العصير امامها و شربته بعفوية

_ ضحى : ها بقا ؟ ايه الحوار الخطير جداً الي انتوا قلقتوا نومي عليه !

امسكتها امها من زراعها وهمست

_ اكلمي عدّل !
_ ضحى : و الله يا طنط سهام انا امبارح كنت في المطبخ
_ سهام : اممم
_ ضحى : و كنت بعمل بطاطس محمرة اصلي بحبها اوي و سيبت الزيت عالنار و نسيت اطفيه البيت كان هيولع، صح يا ماما ؟
_ أماني : لا مش صح
_ ضحى : اقولك على موقف تاني يا طنط .. مرة كنت بعمل بامية فجاية احط الملح حطيت السكر، صح يا ماما ؟
_ أماني : الله يخربيت امك
_ ضحى : موقف تاني يا طنط ...
_ سهام : لا لا كفاية كدا .. قوم يا رامز يا حبيبي عليك بإيه كل دا
_ رامز : يا ماما استني بس
_ سهام : استني ايه ! اما تاكل طبيخك بالسكر ! قدامي اجوزك بنت خالتك
_ رامز : يووووه