Princess Of Darkness (On Going)

Part 14 "Sagupaan..Cain at Remuel vs Maria Luna"

"Cain at Remuel vs Maria Luna

Nagtagpo ang tatlong makapangyarihang nilalang sa unang pagkakataon. Umatras si Maria Luna at humanda sa pag atake nina Remuel at Cain.

"Cain sabi mo nasa kanya ang itim na aklat. Paano mo mababawi iyon kung mapapatay natin siya?"

"Hindi ko na kailangan ang hawak niyang itim na aklat Remuel. Higit na makapangyarihan ang bago kong isinulat kaya pwede na nating siyang patayin. Balakid siya sa ating dalawa."

"Kung mag-usap kayo ay parang papatay lang kayo ng aso. Simulan na natin." Gumalaw ang dalawang kamay ng dalaga. Nabunot ang isang matalas niya sa ulo ng isang patay na alagad ni Remuel. Lumipad ito patungo sa kamay niya. Umangat mula sa lupa ang isa pang matalas. Lumipad at sumakamay rin ng dalaga. Iniwasiwas na niya ang dalawang matalas at nanlaki kapwa ang mga mata nina Remuel at Cain.

"Kakaiba nga ang lakas mo. TIgnan natin kung hanggang saan ka tatagal sa aming dalawa ni Remuel. ULN* KEIF*UDLN*"

Nagbago ang anyo ni Cain. Namula lahat ang kanyang balat. Tumubo ang mahaba niyang buntot na matulis ang dulo. Umurong ang kanyang mga buhok at nakalbo. Ang pulang mga mata ay naging itim lahat. Walang makitang puti. Humaba ang kanyang dalawang pangil at mga kuko sa mga daliri na nagkulay itim. Lumabas ang kanyang dalawang malaking pakpak. Umuusok ng buo niyang pulang katawan na tanda ng nananalaytay sa kanya ang dugo ng Diyablo.

"Hark! Hark! Hark! Masdan mo akong mabuti Maria Luna. Malaki na ang aking pinagbago at lalong lumakas hindi kagaya noong una mo akong nilabanan. Ngayon ay kukunin ko ang kaluluwa mo at gagawin kitang alipin sa habang panahon. Papatayin ko ang katawan mong lupa!"

" Nagbago ka na nga Cain. Hindi ka na isang ordinaryong bampira. Isa ka ng demonyo. Hindi madali ang binabalak mong gawin akong alipin. Tignan natin Cain kung ano ang magagawa mo."

"Hindi ka rin mayabang pala Maria Luna. Nakalimutan mong kasama ako ni Cain."

Nagbago na rin ang anyo ni Remuel. Tumangkad siya at lalong lumaki ang katawan. Umumbok ang mga tadyang niya sa dibdib na tinubuan ng makapal na buhok. Humaba ang kanyang buhok sa ulo at tumulis ang mga tenga. Pumula ang mga mata at humaba ang tumulis na mga ngipin. Katulad ni Cain ay humaba ang kanyang mga daliri kasabay ng mga maiitim na mga kuko. Kumintab ang buo niyang katawan ng lumabas ang langis sa kanyang balat. Lumabas na rin ang dalawa niyang malaking pakpak na tulad ng sa paniki. May matutulis na butong naka-usli sa dulo. Ganap na siyang isang taong aswang.

Dalawang makapangyarihang kalaban ang kaharap ngayon ng dalagang aswang.

"ULN*KEIF*UDLN! MULA SA MAKAPANGYARIHANG LIWANAG IBIGAY MO SA AKIN ANG KAILANGAN KONG LAKAS UPANG SUGPUIN KO ANG MGA NILALANG NG KADILIMAN!" Sigaw ng dalaga.

Nagbago ang kanyang anyo. Pumula ang kanyang mga mata. Lumabas ang dalawang pangil. Katulad nila ay humaba ang kanyang mga kuko sa mga daliri. Wala nang nagbago pa sa kanya.

"AH! Taglay mo na nga ang kapangyarihan ng liwanag mula sa itim na aklat. Nabuksan mo ang lihim ng tatlong salita. Mahusay ka Maria Luna at hindi ka pangit na katulad ng aswang na si Remuel. Hark! Hark! Hark! Hindi lang kita gagawing alipin ko! Ang ganda mong iyan ay aangkinin ko at gagawin kitang ina ng aking mga magiging anak. Paghaharian namin ang buong mundo!"

Umangat si Cain mula sa lupa. Marahan ang pagkampay ng kanyang mga pakpak at naglalaro ang mahaba niyang buntot sa likod.

"Cain! Walang nangngarap na demonyo!"

"TAMA NA ANG MARAMING SATSAT!" Sigaw ni Remuel at bigla na siyang sumugod sa dalaga. Tumakbo siya ng mabilis at biglang lumipad na parang sibat na limang piye lang ang angat sa lupa.