👭🏢يوميات بنات الميتم🏢👭
للكاتبات✒️:Ackerman Chan و مينة أبوليل
الحلقة18: #العائلة
💜📖الجزء 1📖💜
بعد شهر من الاحداث لي فرقات زوج خواتات لطالما عاشو على امل يتلاقاو شي نهار...
مينة لي خدمات فالمقهى الشعبي عند المدني لي مترأس المقهى بالنيابة عن مول الشي لي مسافر لكازا و مزال ماجا..
سوكا لي دوزات شهر من الإصلاح من حيث طريقة اللبس و المظهر و التعامل...المنظمة حاولات ما امكن تدير ل سوكا هوية جديدة و حياة جديدة غتبداها بعيدا عن ماضيها لي حاولو يمسحوه و من ماضيها لي ميمكنش تنسا اختها توام روحها و ميمكنش تنسا الوحوش الآدمية اللي لاحوها هي و ختها فعلبة عرضة للبرد و الكلاب...
سوكا لابسة بيجامة فالگري بالكمام بسروالها و معرية من الكرش تتشوف من البالكون د شقة راقية حدا لبحر حتى لي طا ليها الحنش كهدية..بقات تتأمل فهدوء حتى سمعات الصونيت د الشيفور تحت العمارة...
سوكا لبسات كسوة قصيرة فالقهوي مفتوح مربوطة من الخصر و معرية من واحد الكتف هزات صاك كحل صغير و نضيضرات د الشمس و الأكسيسوارات و جمعات شعرها كودشوفال و هبطات لعندو...
سوكا بابتسامة:صباح الخير نجيب
نجيب رد الإبتسامة:صباح الخير مادموزيل سوكا
سوكا:ديني لبلاصة المعلومة
نجيب:واخا مادموزيل
نجيب ديمارا ماوقف حتى وصل شانطي كبيرة قدامها بزاف د القهاوي و الزناقي...
الشيفور حل لباب لسوكا لي غير حطات رجليها فلارض طلعات راسها تتقلب بعينيها...خلاتو واقف قدام الطونوبيل و بقات تتمشا حتى دخلات مع الحي لي فيه التهامي و عينيها تيدورو هادي عادتها طول هاد المدة لي دازت ديما كل صباح تتزور تما و عندها أمل انها تلقا مينة تتسناها...
سوكا وقفات قدام الدار لي سكناتها هي و ختها و عينيها تيلمعو بالحزن و شافت فالشراجم لي معلقين بالحوايج و تتدور على راسها حتى سمعات اصوات لكلاب تينبحو و تخلعات تلفتات جراو حداها و وقفو حدا واحد الشجرة د الزيتون تينبحو... سوكا طلعات راسها تصدمات ملي شافت مش كحل كولو موسخ بالغيس و التراب و قزيبتو كلها مشعككة و جالس فووق الشجرة شاد فالغصن تيشوف فلكلاب...
سوكا عقدات حجبانها و مشات قاصداهوم:بعدوو من هنا يااالاه
لكلاب تينبحو على سوكا و على الشجرة و مشاو تيجريو و المش بقا لفوق خايف تيحاول يشد فالاغصان...
سوكا تتشيير بييديها:غير هبط هبط راه مشاو
لمش نقز بين يدين سوكا للي ساستو و هي تفاجأ...
سوكا عينييهاا تيرمشو بالدهشة و الفرحة:س س سنببل هداااا نتااااا(عنقااتو)فييين كنتي مخبيي فيييين
سنبل تيلحس كسوتها و تيمسح براسو..
سوكا:يتصحابلي مشيتي مع مينة فين كنتي اممم فييين ا لموسخ(تتلعب ليه فنيفو) توسختي مبقيتيش نقي بحال لول
سوكا دات معاها سنبل للطوموبيل..
نجيب: لقيتي ختك شفتك تتضحكي؟
سوكا معنقة سنبل:لا لقيت المش تاعنا كان مجلي مادام لقيتو هو تنظن قربت نلقا ختي ههه
نجيب حل ليها لباب: و فين غاتمشي من بعد تنضن الكسوة لي طلبتيها غتكون وجدات
سوكا:غنمشي لدار خصني نحمم سنبل و نقادو ياك ا سنبل (تتلعب فشعرو)هههه
نجيب: اوكي ههه طلعي
سوكا طلعات لطوموبيل مبتسمة معنقة سنبل فأمل تلقا ختها فلقريب...
YOU ARE READING
🪓السفاحة الصهباء🪓(بنات الميتم)|مكتملة✨️ (باللهجة المغربية)
Action🏢👭بنات الميتم👭🏢 🪓السفاحة الصهباء🪓 🔪😈لا تنخدع بها فخلف قناع البراءة وحش متعطش للدماء...😈🔪 للكاتبات: Victoria kaelin و Mina Ab ميتم حماية الطفولة مركز sos كيما هو معروف مركز مدعم من الدولة و من ابرز الجمعيات بحيث ان المستفيدات تيستفيدو من...
