رواية المافيا

الحلقة 15 الاخيرة من الجزء الاول

رواية المافيا😈
للكاتبة: لولو حبيب❤ الحلقة:15 الحلقة الاخيرة في الجزء الاول
___________________________
خشينا للمقر القيت الولاد مكعمزين
اني: السلام عليكم
فارس& علاء& يزن& احمد: وعليكم السلام
اني: منورين
كلهم: بوجودك
علاء وجه متغير اني شبحتله وهوا فهم اعليا
يزن: لازم نحتفلو
اني: اي اكيد لكن غذوة نحتفلو
يزن ضرب بالبلجيكي فوق
يزن: اني احتفلت
احمد ضرب حتي هوا: حتي اني
فارس: واني حفلتي اكبر منكم وجبد كلاشن وابدي يرمي فوق
اني شبحت الي علاء: شني متبيش تحتفل انته
علاء كانه كان يستنى في حد ايقوله فرغ الي في قلبك وناض وقف وابدي يرمي فوق ويعيط
اني: علاء بسم الله خلاص خيرك
علاء جبد بيكا وابدي يرمي فوق
اني: علاء
فارس ابدي يجبد في السلاح
يزن: تي خلوه
علاء جبد مني سلاحي واقعد يرمي
اني: برو خلوني تو نتصرف
فارس: لا مرات ينوشك بالرصاص
اني بعياط: لاااا برو من جنبي كلكم
امشو كلهم واني اقعدت نجبد في علاء وانحي في السلاح
علاء بعياط: عاااااااااااااااااادل
اني اهني اقعدت واقفة ونشبحله بس
الذخيرة تمت علاء طاح لوطة ويبكي : عادل عادل 😭
اني طحت لوطة خلاص صوتي هرب اقعدت نشد في يد علاء
علاء: ياعادل وينك
علاء شبحلي القي دموعي زي المطر ومش قادرة نتكلم
علاء مسح دموعه ووقفني: متخافيش عادل مماتش
اني مسحت دموعي
علاء: عادل سافر الي تركيا واكيد حيرجع الي الحشيش ولاد الحرام هلبا
اني عيطت: ياعااااااااااادل
فارس جي يجري: خيره عادل خيره
علاء: سافر الي تركيا
فارس ضرب التراب برجله
اني اغمي اعليا
فارس: وداد
اني شاده في يد علاء بالقوة
فارس قامني وعلاء فتحله الباب دخلني حطني في السرير نحالي الكدار وللجاكيت وابدي يمروح اعليا وعلاء جاب اميه
اني: عادل محمد
علاء صب اعليا الميه فتحت عيوني
اني: خيرك
فارس حضني
اني: افتح البلكونة افتح
علاء فتح البلكونة وفارس يمروح اعليا
اني شديت يد علاء: برا الي حوش محمد وجيبه غصبا عنه وجيبلي عادل باللهي اعليك
علاء مسح دموعه وطلع فارس نحالي الوشاح
فارس: ارتاحي
اني: ااااااه امنين بتجي الراحة
فارس نحا سيبدروه واتكا جنبي :باذن الله بتجي الراحة غير ادعي الي ربي بس
اني: يااااااارب
غمضت عيوني ورقدت وفارس رقد
///////
علاء امشي الي محمد
ام محمد: اهلين وليدي
علاء: كيف حالك عمتي
ام محمد: الحمدالله
علاء: عمتي وين محمد
ام محمد: سافر اليوم
علاء بصدمه: وين
ام محمد: الي تركيا قال بيتلاقى هوا وعادل غادي وانتم بتلحقوهم
علاء: اه هي بالسلامة عمتي
ام محمد: بالسلامة
طلع علاء ركب سيارته وامشي للبحر وكعمز يفكر شني ايدير بالزبط خوته كل مرة يمشي واحد معاش عرف شني ايدير
///////
نضت اني مع المغرب
اني: فارس نوض
فارس: خليني نرقد
اني: خلاص فارس نوض
فارس: خليني ياهمي
اني: تي نوض يابلوة
فارس: وواك خليني
اني: هيا حبيبي
فارس كعمز ويحك في عيونه: شني قلتي
اني: قتلك هيا ياهمي
فارس: ياكذابة
اني: اي اي احلم ونوض قولي ياكذابة ونضت نزلت واني نضحك
فارس: تو زعما نحلم ولا هيا تتضحك اعليا
اني توضيت وصليت العصر والمغرب وشربت اميه وركبت
اني: خيرك مكعمز تي نوض
فارس: نفكر اني كنت نحلم ولا انتي تتضحكي اعليا
اني: نوض نوض
فارس: لالا اني نحلم
اني: هههه متحلمش غير نوض هيا
ناض توضا وصلى وطلع الي الاولاد واني حطيت العشاء علي النار وبدلت حوايجي لبست توتة ولبست جاكيت خفيفة ووشاح وطلعت كعمزت برا
علاء فتح الباب وخش وامشي جيهة حوشه
اني: ناديه ناديه
فارس: علاااء
علاء جي كعمز في الدروج
اني قدمت جيهته: شني ياعلاء وين محمد؟
علاء: سافر الي تركيا
اني شبحت فوق : اااااااه
علاء: نكملو المهمة متاعنا ونمشو انجيبوهم من تركيا
اني: به
فارس: يعني بنأجلو الخطوبة
اني: اي خلي انكلم علي
اني: الو
علي: اهلين دودي
اني: شنجو
علي: تمام وانتي
اني: الحمدالله
علي: اسمعي كل شي تمام مزال الحلويات انجيبوهم يوم الخطوبة وبس
اني: الخطوبة بتتأجل
علي: اعلاش
اني: عندي شوي خدمة بعد مانكملها ان شاء الله
علي: ووواك
اني: خيرك
علي: ماصدقت انه في خطوبة خلي انهيج وخطوبة اصغر بنت في الشلة تي فرحت قريب طرت
اني: هههه اني قاعدة والخطوبة تو تهيج فيها
علي: هي تشاو توا بنطلع اني والولاد
اني: خزي خيانات ابديتو تتطلعو بروحكم
علي: لا طالعين معانا ياسمين ونرجس
اني: امالا وين مودة
علي: في حوشها راجلها قاللها خلاص معاش فيه طلوع مدامك حامل
اني: شوره علي سبلة
علي: من قبل ويزيد توا ههههه
اني: حي انقرمو في الراجل هيا اطلع مع الشلة وسلملي اعليهم وقوللهم هيا خفو روحكم واتزوجو كلكم بعدين بش نتزوج واني مرتاحة هههههه
علي: بالنسبة الي نرجس وفؤاد تعرفيهم ايحبو بعض لكن مزال ياسمين واني ويزن بس وايمن خاطب
اني: هههه انته ويزن دور بروحك وياسمين باذن الله نصيبها ايجيها
اني قلت ياسمين وعلاء شبحلي طول اني شبحتله
اني: ولا انقولك ياسمين القيتلها واحد يعشقها
علي: منهوا
اني: غير صقر تو يوم تاني نحكو
علي: ووواك بتقتليني بالفضول
اني: هههه كل شي في وقته حلو
علي: طيري ياكلبة
اني: مفيش كلب وانته عايش
علي صقر اعليا
اني: خزي كلب
فارس: مني العريس
اني شبحت الي علاء: شني مني
علاء: اي نبيها هادي الي بنقولك اخطبيها
اني: راهو مواليد 98
علاء: اي عادي واني 94
فارس: كويس 4 سنين
علاء: هي ماتبو شي
فارس: وين
علاء: تعبان بنرقد
اني ناكل في شكلاطة: كذاب
علاء شبحلي
اني ناكل: بتمشي وتقعد تبكي علي عادل ومحمد وبالك تحسابني منندريش امنين امشيت للبحر واقعدت اتعيط وتنادي عادل ومحمد علاء بنعطيك نصيحة الي باعك تبرع بيه وزي ماقالو ناس قبل الي باعك بالفول بدله بقشوره
علاء وقف: الكلام في الهواء ساهل اعلاش تعطي في النصايح وانتي ماتدريش فيها اني متعودش اعليك هكي من يوم يومي نعرف وداد متقولش الا الكلام الي هيا مدايرته اعلاش بالذات النصيحة هادي لا
اني شبحتله وكملت ناكل ولا علي بالي
علاء: اني نعرف اعلاش لانه هادم محمد وعادل _ وجبد يدي واقعد يحط في يده علي العروق_ هادا عادل وهادا محمد وهادا فارس وهادا اني انتي قلتي هكي في المستشفي صح
اني جبدت يدي واخديت الكاشيك وكملت ناكل
علاء: اني نعرفك امنين اديري هكي اديري في روحك مش مهتمه بكلامي وتاكلي لكن كلامي واصل الي وسط قلبك مدامك درتي هكي اعلاش تكذبي علي روحك واتقولي الي باعك بالفول بدله بقشوره والي باعك تبرع بيه متكذبيش علي روحك وخليك في الواقع وهوا الحق تكذبي اعلينا احني متبيناش نتعذبو علي بعد خوتنا اتقولي هكي بش تبينا ننسو ومانتعذبوش اعلاش ديما تبي تتعذبي بروحك اعلاش تخففي اعلينا في الوجع وانتي تبي مني يخفف اعليك اعلاش احني نشاركو فيك في همومنا وانتي لا ادسي في قلبك وداد خليك زينا وداد انتي اختنا انتي عرق من عروقنا انتي قلبنا ياوداد خليك اختنا حق انتي هكي زي بنت امس بس عرفناها كل يوم نكتشفو اعليك سر ونقعدو مصدومين احكيلنا اسرارك ولا احني خوتك بالاسم بس
اني حطيت فازو الشكلاطة والكاشيك ووقفت شبحت الي علاء وجيت بنخش
علاء: وداد
اني امشيت نجري حضنته ونبكي
كعمزنا لوطة وناض فارس حضنا الزوز ويبكي اقعدنا كلنا نبكو
كانه كنا نستنو في حد يكلمنا كلام زي هادا بش انطلعو الي في قلوبنا
اسامة فتح الكاميرا وابدي يصور فينا والحراس كلهم يتفرجو
اني: اسفة ياخوتي مكنتش نعرف انه نعامل فيكم كانه مش اختكم اسفة
علاء: عادي لكن صلحي من روحك اختي
اني: ان شاء الله
فارس: امسحو دموعكم كيف بتقامو وبتدورو علي محمد وعادل وانتم دموعكم علي الحافة
اني: تو مكانش يبكي معانا
علاء: 😂😂
اني نضت واخديت الفازو وابديت ناكل
فارس: تو مش كنتي نبكي
اني: كانه بكيت نقتل روحي معاش ناكل
علاء: وزيدها شكلاطة انها العشق
فارس: هههه جبتلك كندر معاي
اني: تكذب
ياسين جي يجري: وينه الكندر خلي انبرد قلبي
فارس: لا مش كندر كذابي احني عندنا كندر حقاني
ياسين: وينه
فارس: تي طير ترا شكلاطة كندر
ياسين: خزي امشي ورجع
ياسين: شني اتجيب الي وداد بس واحني شني
فارس: كانك تبي برا للمحل هوني في راس الشارع
ياسين امشي يجري: ياولاد كل واحد يدفع 5 جنيه ونمشو نشرو صناديق كندر
الي ياكل في الكندر حط 5 جنيه والي مياكلش فيها امشي اخدي حاجة تانية
اني: ااااه ياريته يحسبوني معاهم
فارس: متخافيش جايبلك صندوق
اني: ☺️☺️☺️☺️😍
علاء: اشبح الدلع
فارس: وانته جبتلك صندوق بونتي
علاء: وين
فارس: في الكوجينة الداخل
علاء خش يجري
احني: 😂😂😂
اني: علاء جيبلي صندوق الكندر
علاء طالع وجيوبه معبيات بونتي وفاتح وحدة ياكل فيها
اني: والكندر
علاء: مني هادي بنت جيرانكم
اني: هادي اخت علاء خوي
علاء: طيري ترا وكعمز ياكل
^ فرحنا بالشكلاطة اتقول صغار كله لانه عشنا طفولتنا في الهم والحزن بس^
نضت القيت العشاء طاب وتيت السفر ورفعو الولاد واتعشو كلهم وساعدوني في غسل الماعين كلهم حتي من الحراس وطلعت كعمزت برا
اني: كساد
علاء: شني تبي اديري مثلا
اني: نلعبو بلايستيشن
فارس: هي امشي جاب التلفزيون والبلايستيشن
علاء: دير كورة
اني: ليبية
فارس ركب الدسكة
اسامة: اما الخيانات عندكم زي الدم الي يمشي في عروقكم
علاء: فلفسة زايدة
اسامة: تلعبو من غيرنا
فارس: هما 4 ايدين نلعبو بالدور
اسامة: به ياولاد
جو ياسين وسامر ويزن واحمد كعمزنا كلنا
اني: مني يشجع في الاتحاد
فارس: سامحيني ياحبي مانيش لاعب معاك
اني: به به ياشقاقة
فارس: تو انوريك يامشتاقة
علاء: هيي احترم روحك الا الاتحاد
اني: هي اني وعلاء
احمد: اني مع فارس
فارس شبحله وشبحلي
اني: انتم مفروض ضد بعضكم لكن عادي هي
ابدينا نلعبو والولاد ياكلو في شكلاطة ويشجعو فينا
اني بحماس: ياعلاء شوطها شوطها
علاء: تي مني انتي
اني: اني الزوي هوني القدام تي هات هيا
علاء شاطها واني شطتها وسجلت قول
اني بعياط: قوووووووووووول
علاء نحا تيشرته وابدي يلف فيه فوق اني اقعدت اندير في رقصة الزوي
علاء: تيحا تيحا
اني: والكرة المليحة❤❤
فارس: به ياسر مزال مكملناش المباراة
كلهم : 😂😂
كملنا لعب واني وعلاء انغنو في اغاني الاتحاد
اني: معشقناش الكورة
علاء: عشقنا التحيا وجمهوره♥️😍
واستمر اللعب وفزنا احني وبعدين لعبو سامر واسامة وياسين ويزن وفازو سامر واسامة وفي المباراتين فازو الاتحاد 😍
_____________________
نضت الصبح فتحت البلكونة لقيت فارس وعلاء راقدين في الجنان
اني: حي اعليا ونزلت نجري فقت علي روحي من غير وشاح اخديت برنوص التوتة لبسته وطلعت
اني: فارس علاء نوضو
فارس فتح عيونه: ااااه انحس في عظامي متكسرات
اني: راقد علي الزليز نوض نوض علاء
فارس وقف وهوا يحرك في ايديه ورقبته
علاء فتح عيونه: اااه راسي
اني: خيركم ارقدتو اهني
علاء: قعدنا انهدرزو خدانا النوم
اني: وتقدرو اتهدرزو في داركم ولا الداخل
علاء: خلاص عادي
فارس امشي
اني: فارس شني جنابك
فارس: يوجعو فيا
اني: واك منكم وخلاص
علاء: الدنيا نو ارقدنا علي الزليز عادي مافيها شي
اني: به به
وخشيت الداخل توضيت وصليت وبدلت حوايجي لبست سروال جينز ازرق هافت وبلوزة سوداء وجاكيت قصيرة جينز ووشاح اسود وسبيدرو اسود
درت الفطور واخديت شيشتين ماء الشعير( اكيد تعرفوها) و طلعت برا وتيت الطاولة ورفعو الحراس فطورهم جو الولاد وكعمزنا نفطرو
اني: فارس وعلاء هاكم
فارس: اعلاش هادي
اني: مش جنابك بوجعو فيك
فارس: اي عادي
اني: هاك اشرب ومرة تانية معاش ترقدو علي الزليز
احمد: حي اعليكم مش كويس راهو
فارس: نعرفو مش لازم تعطينا نصايح دكتور احمد😒
احمد كمل فطوره وهوا ساكت
علاء فتح الشيشة وشربها كلها كملها
اسامة: ياسين ريت امس كيف رقدنا ولا🙂
سامر: اي رقدنا علي الزليز حي اعلينا 🙂
ياسين: اااااااه جنابي🙂
اني: 😂😂 ونضت جبتلهم شيشة كل واحد
كملنا فطور ووتينا روحنا وطلعنا متجهين الي تجار الهجرة الغير شرعية
جايين الي بحر زوارة ومدايرين سباق في الطريق
اسامة: بنرجع
سامر: اشهد ان لا اله الا الله
ياسين: اشهد ان محمد رسول الله
اني: 😂😂 قولوها كاملة شني كل واحد ايقول وحدة
سامر: خلاص باللهي اعليك نقصي سرعة
اني زدتها
سامر: ووووووووووووواك ياامي
اسامة: بنرجع والله بنرجع
اني: الا سيارتي يافرخ انته
اسامة حط يده علي فمه ويده التانية علي بطنه
اني طول خففت السرعة ودرست وهوا نزل يرجع
اني اخديت اميه ومناديل ونزلت
سامر اتكا علي الكرسي: ووه واخيرا انحس في معدتي توا وين عرفت مكانها امبكري مصاريني قريب يطلعو من بطني
ياسين: هههههههههههه
اسامة كمل ترجيع وشاد بطنه: اااه
اني مديتله الميه والمناديل نظم اموره واني مشيت ركبت
اني: هي
اسامة: لالا كملي بروحك اني بنركب مع علاء
اني: علاء يجري اكثر مني
اسامة: فارس
اني: هرب من الغول طاح في سلال العقول
اسامة: بنركب مع الحراس بري زينة
اني: صقر الباب
اسامة صقر الباب واني سطربت اعليه وطلعت طلقة
اسامة: كح كح به به ياوداد كح كح
وركب مع واحد من الحراس وكملنا طريقنا وصلنا
والقينا القارب بيطلع
اني ضربت طلقة من البلجيكي فيه نقبته وابدي الهواء يطلع منه
فارس ابدي يرمي علي الولد متع القارب لانه هرب يجري وامشي يجري وراه هوا واحمد
فارس شد الولد
احمد: هات تو نرفعه اني
فارس: لا
احمد: واعلاش
فارس: لانك بتمشي الي وداد واتقول شديته اني انته تشغل في دماغك علي الفاضي تحساب وداد بتسامحك وبيرجع قلبها ايحبك زي قبل لا يابابا وداد تتمنى انك اتموت قدمها زي ماقال محمد المصراتي في وجع الفراق هداكا كله تتمناه ليك انته
احمد: خيره تفكيرك هكي
فارس: تفكيري صح تحسابني مسمعتكش شني قلتلها يوم نتعشو واسمع بنقولك اليوم اخر مهمة معاش نبي نشبح وجك انته ويزن متحملكم بالسيف
احمد: وكان قعدنا
فارس: نفجر روسكم وانتم تفهمو
وجاب الولد وجي ولحقه احمد
________________
اني: ياولاد نزلو الناس الي في القارب ومنبيش ولا واحد يهرب
الحراس ابدو ينزلو فيهم واني شبحت زوز من التجار يشبحو جيهتنا درت روحي نشبح للناس
اني شبحت الي علاء واخديت القناصة
اني: برا لف من تالي وشدهم
علاء: تم
اني درت القناصة جيهة البحر واقعدت نلعب بيها جيهة البحر لين شبحت علاء جي وارهم واني درت القناصة اعليهم
علاء: شديتك ياكلب انته وياه
اني درتلهم بيدي تعالو
جابهم ركبوهم السيارات
اني: تو ايجي ضرار يرفعهم
جي ضرار
ضرار دار التحية: وداد كيف حالك
اني درت التحية: الحمدالله كيف حالك ياافندي
ضرار: الحمدالله والله الا منورة
اني: بوجودك طمني شني صار
ضرار: كل شي تمام وبي هكي ليبيا ابدت امن وامان كل شي تم
اني بصوت واطي: واضح مفيش مجرمين غير الدولة اصلا
ضرار: شني قلتي
اني: لا قلت الحمدالله
ضرار: شكرا وداد امتي تبي اتسلمي المقر
الولاد والحراس كلهم عيطو: شنوووووو
اني همست الي ضرار: بنبيعه والفلوس الي عندي كلها بنتبرع بيها
ضرار: تم ركب السيارة واخدي معاه التاجر والجماعة كلها وامشي
اني تلفتت القيت الحراس والولاد راقيتلهم
اني: خيركم
كلهم: شني المقر بتسلميه احني وين بنقعدو
اني: المقر بنبيعه والفلوس بنتبرع بيهم وولا واحد بياخد حاجة لانه مال حرام وكل واحد يرجع لحوشه ويرجع الي اماليه
فارس وعلاء شبحولي
اني قمت يدي فوق وحطيت يدي علي العروق: الا عروقي وين مانمشي يمشو معاي ورجلي علي رجلهم حتي لو هما اختارو يفارقوني
فارس وعلاء جو حضنوني
اني: شني ياولاد
الحراس ابدو يرمو فوق
فاتح(رئيس الحراس) جي وقف قدامي: نشهد بالله انك احسن بنت ريتها في حياتي واشجع بنت بنت بمليون راجل وتمنيت المشوار متمش وتمنيت نقعدو معاك طول العمر وانتي تأمري واحني انفذو عادي اصلا انتي ماعمرك حسستينا بالذل ولا االاهانة طول عمرك تعاملي فينا كانه خوتك واكثر بارك الله فيك وربي يعوضك علي كل شخص خسرتيه وربي يعيطيك علي قيس نيتك ومستحيل ننسوك ولا ننسو الشجاعة متاعك وطول عمرنا حنقعدو نضربو بيك في مثل الشجاعة وطول عمرنا مش حننسو الدروس الي علمتيهانه واهم درس العمل الجماعي والتعاون وفعل الخير انتي غيرتي فينا هلبا حاجات وساعدينا في هلبا حاجات مستيحل ننسوك وحتقعدي ذكرة حلوة في حياتنا وحنقعدو طول العمر نحمدو في ربي انه تلاقينا معاك في حياتنا وتعلمنا منك ياسيدتي وداد_ ودار التحية _
اني: 😭😭 شكرا علي كلامك يافاتح واني مستيحل ننسا وقفتكم معاي ومستحيل ننسا احلي حراس واحلي جيش مستحيل ننسا التحية الجماعية متاعكم الي عندي احلي منظر في الدنيا مستحيل ننسا تعاونكم والعمل الجماعي الي بيناتكم مستحيل ننسا طيابكم الحلو وضحكتكم الحلوة مستحيل ننسا كيف نبكو مع بعض ونضحكو مع بعض مستيحل ننسا ثانية وحدة من حياتي معاكم ومدامني قاعدة نتنفس وعايشة علي الدينا هادي مستحيل ننساكم يااحلي جيش انتم نصي التاني وانتم تعرفو حوشي كل ماتبو تتلاقو معاي تلقوني وانقوللكم كل خميس نتلاقو شني رايكم
كلهم : موافقين
فاتح: بما انك اتحبي التحية متاعنا بنديروها توا وانتي صوريها فيديو
اني فتحت فيديو والبحر اتعبا ناس وكلهم يتفرجو
كلهم وفقو
فاتح بصوت عالي: وداد
كلهم دارو التحية وبصوت عالي: امممممممرك سيدتي
اني ابديت نبكي اكثر
علاء وفارس وقفو قدامهم ودارو التحية مرة تانية كلهم مع بعض
علاء: اختتتتتتتتتي انحبك
فارس: مرتتتتتتي انحبك
اني اذكرت محمد وعادل تمنيت كانو معاي
علاء وفارس قعدو واقفين وهما يضحكو
.........&.........: انحبوك يااختنا
اني تلفتت القيتهم محمد وعادل طول امشيت حضنتهم وانبي نبكي
اني: اعلاش درتو هكي اعلاش
محمد: ااااه رقبتي ياقردة
عادل: كله بش نحموك بس
اني: من شنو
عادل: هددونا بيك لكن توا خلاص بما انك شديتيهم كلهم
اني: الحمدالله معاش تبعدو اعليا باللهي اعليكم
عادل& محمد: مستحيل
خطمت مراة
اني: لو سمحتي عمتو
المراة: تفضلي بنتي
اني: عادي اتصورينا فيديو
المراة: عادي
وقفو الحراس ورانا وقفو قدامهم يزن واحمد واسامة وسامر وياسين وقدامهم وقفت اني في النص وجنبي فارس ومحمد ومن الجيهة التانية علاء وعادل
كلنا درنا التحية وبصوت عالي بالقوة: الماااااااااااااااااافيا
والناس كلها عجبها المنظر وصورونا
اقعدنا علي البحر عامو الولاد وهيجنا وضحكنا وبعدين فتحنا اغاني
اني واقفة فوق السيارة وكلهم تحتي
اني: انا مافيا
كلهم يرقصو ويغنو: انا مافيا مافيا مافيا
وبعدين فتحتلهم زكرة ليبية وابدو يرقصو والناس تتفرج والشباب الي في البحر خشو يرقصو معاهم واني فرحانة بنطير الدنيا مش سايعة فرحتي الحمدالله حقتت حلم بوي مزال الثأر بس
شرين تلفوني
اني: ايوا
وائل: وداد زغرطي ربي اخدي ثأرنا الحمدالله
اني: فهمني شنو في
وائل: مرت بوك ماتت
اني: روروروروروروروري
وائل: الحمدالله ياربي اي حقا شني صار فيك
اني: اموري كلها لوز والحمدالله
وائل: الحمدالله صبرتي ونلتي ياوخيتي
اني: انحبك ياخوي
وائل: هي سلام كملي احتفالك
اني: سلام صقرت ونزلت لوطة وسجدت وحمدت ربي
هيجنا وروحنا واحني مروحين ركبو معاي فارس ومحمد وعادل وعلاء نسطربو بالسيارات ومدايرين سباق وصلنا وخشينا رقدنا طول
نضت الصبح ابدينا نفضو في الحاجات والاثاث خلينا الفيلات زليز بس ونضمت امور المقر كله وبنعرضه للبيع هوا نضامه 2 فيلات وزي العمارة يعني يقدرو يسكنو فيه عيلة كاملة
اني طلعت من الحوش لقيت الحراس كلهم واقفين قدامي
اني: خيركم
كلهم: المقر ينباع علي جثتنا بس
اني: شني
كلهم: هادا اخر كلام
اني: تعرفو مش هايين اعليا نبيعه يعني بيقعد
كلهم عيطو
اني: ردو البضاعة انتم هي
ردو كل شي في مكانه امشيت اني وعادل وعلاء ومحمد وفارس رفعنا السلاح كله الي ضرار واعطيت المخازن كلها الي ضرار واخديت الفلوس الي عندي كلها طبعا هيا فلوس حرام وحسب ماسمعت انه عادي نتبرع بيهم لاي حاجة لكن نصرفهم علي روحي حرام
امشيت الي مهندس
اني: السلام عليكم
المهندس: وعليكم السلام وداد اهلين اهلين تفضلي
اني: يزيد فضلك
المهندس: شني الجو وشني الامور
اني: تمام الحمدالله جيتك في خدمة وان شاء الله متردنيش
المهندس: مستحيل انردك تفضلي
اني: نبي رسم بناء الي ميتم ومستشفي متع علاج المدمنين وجامع ومستشفي عادية
المهندس: امتي تبيهم
اني: اي وقت عادي لكن ميفوتش شهرين
المهندس: تم نبدا فيهم توا باذن الله
اني: تمام بارك الله فيك
وطلعت
علاء: قداش الفلوس الي خدمنا فيهم سنة كاملة
اني: الافضل منقولكش
محمد: قولي الفضول بيقتلني
اني: مليار كامل
محمد: مليار كاش قصدك
اني: اي
محمد: بندوخ تي تعرفو كانه مش حرام لما نصرفهم كلهم اعليا
اني: به الي جو حرام مش حلال كنهادا معاش نلحقو اعليك يامحمد
محمد ضربني علي كتفي: خزي اني مستيحل ننساك يااختي
روحنا الي حوشنا خلينا البلجيكات متاعنا بس
طلع علاء واويس وخوتي قعدو مع وائل واني مع سجود وامي وتفاهمنا علي الخطوبة وروحنا للمقر
____________________
تاني يوم يوم الخطوبة نضت الصبح وامشيت للمزين
دراتلي شعري ودرت روج ومسكارا وبودرة بس
طلعت وبنركب في السيارة شبحت سيارة اتبع فيا وفجأة درست قدامي بالعرض
اني: ...........................
_______________________________
هادي اخر حلقة في الجزء الاول شني رايكم في الحلقة وشني رايكم في الجزء الاول كله وهل الرواية كانت في المستوى المطلوب وعجبتكم ولا لا ومني احلي شخصية عجبتكم
ان شاء الله روايتي وصلت الي قلبكم
واستنوني في الجزء الثاني الي بينزل بإذن الله بعد مانكمل امتحانات وقراية واستنو معاه برنامج حتي هوا
تفاعلو كويس علي الرواية ونبي تعليقات ورايكم فيها وتصويتات لانه بالحق الرواية هادي اكثر وحدة تعبت فيها واكثر وحدة كانت قريبة علي قلبي
واني روايتي هادي مدايرتها للمتعة واكيد للعبرة قولولي شني اخديتو منها عبرة ومزال الجزء التاني حيكونو فيه عبر هلبا
اعطوني رايكم في الجزء الاول؟
مع السلامة 💖💖
للكاتبة: لولو حبيب♥️♥️♥️♥️
مع تحياتي لولو حبيب💞
وزي مانقول اني الاء حبيب السائح( اختار طريقك وخلي شعارك فيها لا للاستسلام )
استنوني في الجزء الثاني😍