Jannat Ke Pattey Fanfiction

SIX

Kaise mutmaeen hota Haya ka dil? Aakhir thi toh wo ek maa hi. Par ek mazboot maa.
Maa hone ka matlab ye toh nahi ke hum kamzor hojaye? Beshak maayein bohot strong hote hai, par ye bhi zaruri hai ke wo har tarah se mazboot mehsoos karein.
Haya ne bhi thaan liya tha ke jaane se pehle wo apni beti ko kuch baatey sikha kar jaayegi. Usne kafi jagah ye dekh rakha tha ke Maa Baap ke bacche ko chor ke jaane ki wajah se baccho ko takleef hojati hai. Kyuki bacche toh hassaas hote hain.

Fajr ki namaz ke baad Haya Khadija ko ek ghante ke liye utha diya karti thi. Woh usey Qur'an shareef parhke uski baatey batati phir khadija ke saath bees minutes warzish kiya karti thi.

Tulu e Aaftaab ka waqt tha. Sard taza hawa chehre ko lagti toh jese rooh tak sukoon taari hojata ho. Haya ko esa lagta jese iss waqt Qur'an ki baatey fiza ko aur pursukoon bana deti thi.

Khadija apne nanhe hatho se Haya ke sath wudhu karti aur bohot hi josh o kharosh se Qur'an shareef sunne beth jati thi.

Haya ne sawal kiya "Har kaam se pehle kya karna chahiye Madame?"

"Allah tala se ijazat leni chahiye uss kaam ko shuru karne ki" Khadija ne fakhr o masoomiyat se kaha.

"Aur wo kese liya jata hai?" Haya ne achumbe se pucha.

"Bismillahi ar-Rahman ar-Raheem parhkar Haya!" Uski beti ne naaz se kaha. Madame sunn kar toh usey itni khushi milti thi jiski koi inteha na ho.
Uske Baba sirf Haya ko Madame bulaya karte the, shayad isliye!

"Khadija aaj mai aapko ek bohot zaruri baat bataugi. Isey kabhi naa bhulna." Haya ne sanjeedgi se kaha. Khadija usey utni hi sanjeedgi se sunn rahi thi.

"Humari zindagi me kayi exams aate hai. Par sabse ehem imtehan ki tayyari humari zindagi khud hai"

Khadija bohot gaur se sunn rahi thi. Uske tawajjaw se sunne ki wajah se Haya ab kaafi mutmaeen mehsus kar rahi thi.

"Humari zindagi ka maqsad uss bade imtehaan ki achi tayyari karna hona chahiye. Ye tayyaari utni bhi mushkil nahi par yaha, iss dunya iblees ki wajah se ye tayyari hume behad mushkil nazar aane lagti hai. Hum bohot si kotahi aur galtiya kardete hai aur ghabra kar peeche hatt jate hai. Yaad rakhna beta, humare Allah bohot rehem karne wale hain. Kabhi unki rehmat se mayoos mat hona."

Khadija ne muskura kar "Ji" kaha. Uski awaaz ki pukhtagi me alag si narmi thi. Jese ye sari baat sachmuch iss 4 saal ki bacchi me jasb horahi ho. "Alhumdulillah!" Haya ke dil ne kaha.

"Par iss tayaari ke dauraan bhi bohot si aazmaish ya chote chote tests aayege Gudiya. Inn me aapko pass hona hoga meri jaan. Koshish kabhi mat chorna paas hone ki" Haya ne arz e iltija ki.

"Magar kaise?" Khadija pareshan ho kar boli. Ab usey thoda khof araha tha par najaane kesa sukoon lagraha tha usey Haya ki baato me.

Haya ne uske maathe par bosa liya aur kaha "Sabr aur Shukr se. Har paper ka answer yahi hai. Sabr aur Shukr. Patience and gratefulness."

"Ye baat kya Allah paak ne batai tumhe Haya?" Khadija ne masoomyat se pucha.

Haya ne asbat me jawab diya aur Khadija ko Mus'haf khol kar usme se kuch waqyat sunaye jinka jawab Sabr aur Shukr tha.  
Aur bataya "ye tumhare liye sample test papers hai. Inn me kuch log pass hue aur kuch bohot badiya hastiyan hone ke bawajood fail hogaye."

Haya ne apni beti ki hosla afzahi karte hue kaha, "Kabhi bhi fail ho kar ghabrana ya mayoos mat hona Madame. Phir se uth kar bade imtihaan ki tayyari karna"

Ek pursukoon muskurahat josh o kharosh aur mutmaeen si masoomyat Khadija ke chehre pe chhaa gayi. Ab usey zindagi ka ek naya maqsad milgaya tha. Aur usey ab har imtehaan ka jawab bhi pata chal gaya tha. Sabr aur Shukr.

Khadija ne sargoshi se Allah se kaha "Alhumdulillah Allah pak, Thankyou!"