سعادة بطعم الأخلاق والدين

أولادكم امتداد لكم

ياريت نبطل نغرس في أولادنا تسول الرضا والتقدير والإحترام من نظرات أو كلمات وأحكام الآخرين وانهم يشوفوا نجاحهم بعين الآخر ورؤيته.

لماذا ننادي على أولادنا أمام أي ضيف في بيتنا أو في أي مكان آخر مهما كانت درجته!؟.. ونضع الطفل في موقف الإختبار والإمتحان.. سمع له سورة كذا وحديث كذا وكذا.. حدث عمك عن درجاتك وتفوقك.. لماذا نعرض أولادنا للحكم عليهم وتقييمهم من الآخر بل وربما حسدهم!؟

ليه قبل مايأتي ضيوف لبيوتنا.. البيت يقوم ينظم ويرتب حتى لاتقع عين الضيف على العادي الذي نعيش فيه ونفعله كل يوم .. وكأننا نرتب بيتنا ونجمله وننظمه من أجل اللقطة وارتياح وانشكاح الاخر!!.. ونغرس في أولادنا بطريق غير مباشر.. مراعاة المظهر ورفع شعار الناس تقول علينا إيه!؟

درجات إبنك واجتهاده ونبوغه لنفسه وليس ابتغاء مرضاة الناس وكلامهم وأقوالهم...

بيت نظيف ومرتب ومنظم من أجل إسعاد أهله وساكنيه في المقام الأول..

إحنا الحمدلله نجحنا في إنتاج جيل عايش عشان يرضي الناس.. شعاره الناس هتاكل وشنا.. حتى أفراحنا وتشطيب بيوتنا وتجهيزها، شعاره إحنا مش شويه.. الناس والمعازيم هيقولوا علينا ايه.. هي مش أقل من بنت خالتها...

ليه أصلا أختار شريك حياتي واراعي في شكله وهندامه وامكانياته.. أحكام المجتمع ورؤية الناس!؟؟ فيه بيوت بتهدم وزيجات بتفشل ونساء بتطلق بسبب مراعاة كلام الناس!!

إياك تقول لإبنك أدخل طب أو هندسه عشان الناس تحترمك وتقول الدكتور راح والمهندس رجع..

بطلوا تسجنوا أولادكم وتحبسوا اختياراتهم في نظرة الناس والمجتمع ليهم. ورثوهم قوة الشخصية والثقة في النفس واغرسوا فيهم مراعاة قناعاتهم ورضاهم عن أنفسهم وأن يلتمسوا رضا الله في كل أمور حياتهم.
منقول
أولادكم امتداد لكم فحافظوا عليهم بالشكل الذي يساعدهم  ولا يؤذيهم