Nirvana in Fire (မီးလျှံကြားမှနိဗ္ဗာန်ဘုံ)[Myanmar Translation]

၁၄။ Modified Version

Unicode

၁၄။
______________________

လူရွယ်လေးက လူတိုင်းရဲ့မျက်စိရှေ့ကနေ ဖျတ်ကနဲပျောက်သွားသည်။ အိမ်ရှေ့စံမင်းသားကတော့ ကြောင်အကာရပ်နေပြီး သူ့မျက်နှာကမည်းမှောင်လို့လာသည်။ တစ်ဖက်မှာတော့ မင်းသားယွီခမျာ ရယ်ချင်စိတ်ကိုချိုးနှိမ်နေရသဖြင့် ဗိုက်များပင်အောင့်လာရ၏။

ကျောက်စိမ်းတံဆိပ်ပြားမှာ မင်းကြီးရဲ့တော်ဝင်တံဆိပ်ခတ်နှိပ်ထားသည်။ ထိုတံဆိပ်ပြားကို အိမ်ရှေ့စံမင်းသားမှလွဲပြီး အခြားမင်းသားများကိုမပေးချေ။ ထိုအရာသည်ကား ရာထူးအဆင့်အတန်းတစ်ခု၏ပြယုဂ်ပင်ဖြစ်သည်။ တံဆိပ်ပြားကိုကိုင်ဆောင်ထားသူက ဘယ်ကိုပဲသွားသည်ဖြစ်စေ အရာရှိအားလုံး၏ရိုကျိုးစွာဆက်ဆံခြင်းကိုခံရသည်။ သို့တိုင် မိန်ချန်စုကတော့ ထိုကဲ့သို့တန်ဖိုးကြီးလှသောလက်ဆောင်ကို သူ့သက်တော်စောင့်ကစားဖို့ပေးလိုက်ချေသည်။ သူက အဲ့ဒါရဲ့တန်ဖိုးကို မမြင်နိုင်တာလား ဒါမှမဟုတ် ရိုင်းပျတာလား?

"တကယ်တော့ ရှုခင်းတွေကြည့်တာက ခန္ဓာကိုယ်ကို ပင်ပန်းစေတယ်။"

မင်းသားယွီက သူ့သိက္ခာကိုဆယ်ဖို့ စလာပြန်၏။

"ဆရာစုက သူ့ကျန်းမာရေးကို အရင်ဂရုစိုက်သင့်တယ်။ တိုက်တိုက်ဆိုင်ဆိုင်ပဲ ကိုယ်တော် နှစ်ထောင်ချီသက်တမ်းရှိတဲ့ ရှားပါးမဟာကာကြံဆစ်ပင်တစ်ပင်ကို ရထားတယ်။ အဲ့ဒါက အရမ်းကောင်းတဲ့ဖြည့်စွက်ဆေးပင်ပဲ။ ပြီးတော့ လင်းတောင်မှာရှိတဲ့နန်းဆောင်မှာ ဆေးရေပူစမ်းတစ်ခုရှိတယ်။ အဲ့ရေပူစမ်းမှာရေချိုးရင် အားအင်ပြည့်ဝပြီးလန်းဆန်းစေတယ်။ ခမည်းတော်တောင် ခဏခဏချီးကျူးတာ။ ကိုယ်တော်က ဆရာစုကို ဘာလို့ အဲ့ဒီမှာခဏလောက်နေဖို့မဖိတ်ရမှာလဲ? ကိုယ်တော်လည်း ဆရာစုနဲ့အတူ ကဗျာစာပေတွေအကြောင်း ဆွေးနွေးလို့ရတာပေါ့။ ထိပ်ဆုံးအဆင့်ပညာရှိရဲ့ အတွေးအကြံတွေနဲ့ နေထိုင်ပုံတွေကို ကိုယ်တော် နည်းနည်းလောက်သင်ယူခွင့်ရချင်ပါတယ်။"

ရှောင်ကျင်းရွေ့သည်ပင် မင်းသားယွီရဲ့အကြံပြုစကားကြောင့် စိတ်လှုပ်ရှားသွားရသည်။ သူတို့လာခဲ့ရတဲ့ခရီးကိုပြန်တွေးကြည့်ရလျှင် မိန်ချန်စုရဲ့အသားအရေက ဖျော့တော့နေတတ်ကာ နည်းနည်းလေးလှုပ်ရှားလိုက်တာနဲ့ အသက်ရှူနှုန်းတွေမြန်လာတတ်သည်။ ညပိုင်းဆိုရင်လည်း ညသန်းခေါင်ယံလောက်အထိ ချောင်းဆိုးနေတတ်ပြန်သေး၏။ နှစ်ထောင်ချီသက်တမ်းရှိတဲ့မဟာကာကြံဆစ်ဆေးပင်နဲ့ ဆေးရေပူစမ်းက ငြင်းပယ်ဖို့ခက်ခဲလွန်းလှသည်မှာ သံသယဖြစ်ဖွယ်မရှိပေ။