عودة إلياس

الجزء الحادي عشر

عودة إلياس( الجزء الحادي عشر)
"آنسة لمى انا بنصحك لاعاد تفتشي كتير بماضي الشركة و لاعاد تتعبي عقلك بالتفكير بهيك مواضيع وإلا رح تحترقي بنار حدا غيرك شعلها" ....
#المرسل مجهول الهوية
.... بهالوقت قرت لمى الرسالة و هيي متفاجئة
إم لمى بإستفسار : بنتي عن شو هاد عم يحكي
لمى : ماما انا ماعملت شي غلط كل الي عملتو اني عم اجمع معلومات عن شركتي
إم لمى : طيب مين هاد و مين الي خبرو
لمى : مابعرف
إم لمى بخوف : خلص بنتي الله يوفقك بتتركي الشغل و مابدنا خوف و قلق
لمى : لا امي خاصة بعد هلق انا مستحيل اترك شغلي لان الشي الي بديت فيه لازم انهيه
إم لمى : الله يوفقك يا بنتي اسمعي كلمتي و بلا يصير فيكي متل بنت خالتك
لمى : ماما بنت خالتي هيي الي ودت حالها عالسجن بإيدها أما أنا ما عم اعمل شي غلط
إم لمى وهيي عم تبكي : ياربي صبرني عهاليوم لسا أول وحدة بتجيني اليوم هربانة و عم تبكي و التاني ما عم تسمع كلمتي😭
لمى : شو ...شو قصدك بهالحكي
إم لمى و هون حست ع حالها إنها زلقت بالحكي : سماح اجت اليوم لعندي ودعتني وراحت
لمى : شو ودعتك طيب كيف وشلون و ايمت
إم لمى : قبل هلق بساعتين اجت وكانت بحالة هستيرية ودعتني و طلبت الرضا مني بعدين راحت
لمى : لوين راحت
إم لمى : ما خبرتني بس حرقتلي قلبي قبل ما تطلع😔
لمى : ليش
إم لمى : هاي أول مرة بشوف بعيونها نظرة الندم و اتطلعت فيني و قالتلي سامحيني بعدين راحت بسرعة😔
لمى : يا الله دخيلك ع هاد اليوم شو عم يصير معنا
إم لمى : بنتي هلق ارتاحي بعدين رح نرجع نحكي بأمر الشركة
لمى : حاضر ماما
وبعدها طلعت الإم و ارتمت لمى ع سريرها و هيي مشوشة بعدين اتصلت ب عاصم
لمى : المستندات الي طلبتن منك مين بيعرف بأمرهن غيرنا
عاصم : محدا
لمى : انت متأكد
عاصم : اي اكيد ليش في شي?
لمى : آا لاا ابدا بس حبيت استفسر
عاصم : طيب اوك
لمى : يا الله سلام
عاصم : سلام
بعد انتهاء المكالمة
عاصم وهوي عم يحكي مع حالو : هالمرة اكتفيت بنصيحتك انك ما تدخلي هالحرب بس المرة الجاية رح استخدم العنف
.
.
تاني يوم الضهر
بالشركة عند لمى كان راكان داخل ب اسم يمان و كان قاعد وفي عدة أشخاص عند عاصم عم يستنو ليعملوا مقابلة مشان وظيفة محاسب
___: شو مطولة المديرة ل تجي
عاصم : مابعرف و حتى اذا اتأخرت وين المشكلة معكن
___: بس هاد مو ذنبنا صرلنا اكتر من ساعة قاعدين عم نستنى حضرتها
عاصم ببرودة اعصاب و غرور : اذا ما عجبك الوضع فيك تطلع
لمى : لا محدا بيطلع
وفجأة الكل اتطلع لعندها و شافوها و عاصم انصدم لما عرف إنو سمعت حكيو
___: أنا بعتذر يا آنسة بس لأن اتأخرت ع مقابلة تانية و اذا ما مشي حال المقابلة هلق اكيد كمان رح اخسر فرصتي هنيك
لمى بإبتسامة : انا بعتذر كتير لأن أخرتك عن عملك
بعدين التفتت لمى تجاه عاصم و قالت: خلي العم فواز يجبلي فنجان قهوة و بعد خمس دقايق رح نبلش أول مقابلة
عاصم : اوك
.
.
طول هالوقت كان راكان مراقب كل شي و عم يتأمل الشركة و الموظفين بس أكتر شي استفزوا ل راكان هيي نظرات عاصم المليانة كبرياء و غرور ...بعد انتظار نص ساعة دخل راكان ليعمل المقابلة
راكان : مرحبا
لمى : اهلا اتفضل استريح
قعد راكان عالكرسي و حط الملف قدامها عالطاولة
لمى : حضرتك يم...
و فجأة إجاها اتصال و بلش جوالها يرن
لمى : عن اذنك شوي
راكان : عادي خدي راحتك
.
فتحت لمى المكالمة و كان راكان عم يسمع حكيها
لمى : اهلا ماما
الام : 😭😭مصيبة يا بنتي مصيبة و صارت
لمى بخوف : خير شو صار
الام : جدك اتوفى
بهالوقت وقفت لمى من مكانها و هيي عم تحكي و كانت مو مصدقة لسا : نعم جدو مات كيف و شلون
الام : 😭😭سماح قتلتو و بعدا هيي كمان انقتلت
لمى و هي عم ترجف و مصدومة : شو سماح .... طيب ماما استهدي بالرحمن و انا هلق جاي
...سكرت لمى الخط و بعدا اتطلعت حواليها و الدمعة بعيونها
راكان : خير يا آنسة بدك مساعدة بشي
لمى و هيي ع وشك انو الدمعة تنزل ع خدها : لا شكرا و بعتذر مافينا نعمل المقابلة لازم روح
و طلعت بعدها لمى و هيي ما عم تشوف قدامها و براسها الفسؤال و سؤال "كيف جدو مات و شلون سماح قتلتو و الاهم ليش قتلتو ومين الي قتل سماح??????"
.
وبعدها طلع راكان من الشركة و هوي عم يفكر ب يلي صار و بنظرة لمى الحزينة و اتمنى للحظة لو إنو ما إجى عهالشركة و لا شاف هالموقف
يمكن هالشي أثر براكان لأنو ما بحب الفراق و يمكن لأنو شاف بملامح لمى البنت البريئة بس رغم مشاعرو هلق المتخربطة بس ماترك هالشي يأثر عليه و فورا اتصل ب روبر
راكان : وين انت
روبر : بالبيت ليش عم تسأل?
راكان : ابقى عندك جاي و معي أخبار جديدة
روبر : ماشي عم استناك
.
.
بالبيت
راكان : الخال انقتل
روبر : بجد?
راكان : والله متوا عند كنت بشركة لمى دريت و بعد ما طلعت عملت مكالمة اتأكدت من الخبر
روبر بسعادة : حلووو و مين الي قتلو
راكان : حفيدتو سماح
روبر : يا سيدي هالخبر بيستاهل اليوم عزيمة ع حسابي
راكان : ان شاء الله
روبر بإستغراب : اشبك مو ع بعضك بالعلم بعرفك بتفرح بهيك أخبار اكتر مني
راكان وهوي عم يفك أزرار قميصو : مابعرف حاسس حالي مخنوق
روبر : من ايش?
راكان : بتعرف هاي اول مرة بحس اني أنا الي عم احترق بنار الانتقام
روبر قام فورا و قعد مقابيل راكان و هوي عم يلمس جبينو : يا زلمة شو صايرلك حرارتك نظامية ما معك حمى خبرني شو صاير معك?
راكان : خلص انسى مافيني شي
روبر : لا احكي شو صاير معك
راكان : دايق خلقي شوي و بدي قلك ماعاد بدي قرب ع هديك الشركة
روبر : لاا هيك كتير اكيد صاير معك شي و بالنسبة للشركة لازم تكمل الي بدينا فيه
راكان بغضب : اشو بدي كمل بدك اياني ادخل و اشتغل و بعدا اضحك ع البنت وآخد المعلومات الي بدي اياها هاد هوي شغلنا نحنا
روبر: اكيد في شي صاير لعقلك و اشو ماكان عم يصير معك مالازم تخليه يأثر ع شغلنا و خاصة هلق بعد موت الخال
راكان و هوي قايم من مكانو : خلص انا أخدت قراري مستعد اعمل اي شي إلا اللعب بمشاعر التانيين
و بعد ما حكى راكان مشي وراح ع غرفتو
روبر وهوي عم يحكي مع حالو: لك هالغبي شو صابو الي بشوفو بفكرو متجوز و خايف ع مشاعر المدام
.
.
العقرب وهوي بقمة الغضب: لك هالحقيرة كيف قدرت تعمل هيك
خالد : معلم هاي جنت و ماعادت تميز و بالاخر أخدت عقابها
العقرب وهوي عم يكسر كل شي حواليه : لك لجهنم الحمرة تنيناتهن بس مصالحنا مين بدو يمشيلنا اياها
خالد بخبث : طول بالك معلم هلق الساحة فضيتلك وحدك انت بس الوريث هون
العقرب بعد ما هديت اعصابو شوي : كلامك صح بس هيك مسؤولياتنا صارت اكبر
خالد : بس بالنهاية الكبير ما بيكبر عليه شي
قعد العقرب عالكرسي وهوي عم يحرك المسدس الي ب إيدو و يقول : جهز الطيارة رح ننزل ع سوريا
خالد وهوي عم يبتسم بخبث : أمرك معلم
.
.
فلاش باك ****
قدام قصر جعفر الديرياني الملقب ب الخال
سماح : بعد عن طريقي بدي ادخل
الحارس : لو سمحتي يا آنسة المعلم طلب مني ما دخل حدا
سماح بصوت عالي من ورا الباب الحديد : جدووو جدوووو
الحارس : رجاء يا آنسة لا تعملي ضجة هاي وقت استراحة المعلم
سماح بغضب : ماني متحركة من هون و روح قلو حفيدتك بدا تشوفك ضروري
الحارس : بس يا آنسة ياريت تفهميني هلق المعلم بكون مرتاح و ممنوع اي حدا يزعجو بهالوقت و إلا انتي بتعرفي مصير الي بخالف الأوامر هون
سماح بإستهزاء : بعرف الموت هوي مصير الي بخالف الأوامر بس كمان الي بخالف أوامري رح يندم
الحارس بقلق : بترجاكي تتفهميني
سماح بخبث اتظاهرت انها وقعت عالأرض و بلشت تعيط :لااا يا حقير عم تضربني هاي مكافئة حفيدتك يا جدو
.
طلع جدها ع صوت صريخها و عند شافها بهالحالة بنظرة وحدة منو للحرس الباقين خلاهن يسحبوه لهداك الحارس وهوي عم يصرخ : لاا بترجاك يا معلم سامحني و الله مو قصدي معلم معللللم
بعدين اختفى صوت الحارس
و قامت سماح و ركضت لعند جدها و عانقتو وهيي عم تبكي : جدو حبيبي شفت شو صار مع نجيب و كيف قتلولي اياه😭😭
الجد وهوي عم يلمس ع شعرها : لا تبكي يا حبيبتي رح انتقم لكل دمعة نزلت من عيونك
بهالوقت ابتعدت سماح عنو شوي شوي و بعدين بلشت تمسح دمعاتها و هيي عم تقول : لا انت لا تنتقم انا الي رح انتقم ل نجيب و ل عمو كمال و رح انتقم لحالي من هالمستنقع الي حطيتني فيه
الجد بإستغراب : سماح حبيبتي شو عم تحكي ما فهمت عليكي
سماح وهيي عم تضحك بصوت عالي: ههههه بس هلق رح تفهم
و فجأة مسكت المسدس و قوصتو بنص راسو و وقع ميت و ماشافت فجأة الا هيي كمان اجتها رصاصة من واحد من الحراس و كمان وقعت ميتة
باك***
.
.
.

بالعزا
كانت امها ل لمى عم تبكي كتير ع ابوها وسماح و عهالحالة الي وصلولا و كانت لمى و حلا حالتهن ما بتقل عنها أما الوحيدة الي قاعدة متجمدة المشاعر هيي إمها ل حلا و كأنها كانت ناطرة سماع هالخبر من زمان ....
(ياترى ليش امها ل حلا هيك مشاعرها و مين بكون كمال الي حكت عنو سماح هاد الي رح نعرفو بالاجزاء القادمة ان شاء الله)😊😉