#العشق_المتمرد "عندما يزهر الليمون"
#جمان_فريد
الجزء137 القسم الثالث...
⏳...
سرت 💓
"كوكب انزلي لتليفونك "
كوكب وهي تنفض فمخاد الصالون ردت بصوت عالي:خييره؟
امها:يرن يابنت يرن..
كوكب بإستغراب:يرن!
حطت المخاد في مكانهم..بعدين مشت للدروج..
وصلت فيهم ونزلت وهي تجري..
لين وصلت لوطا ومشت لوسط الحوش تحديدا لطاولة مرش تليفونها كان محطوط عليها..
وين وصلت فيه فصل الاتصال..
خداته وشافت المكالمه من مني قالت..
كوكب وهي رافعه حواجبها:حيي خالة عثمان!..زعمه شنو تبي؟!
قعدت تشبح للرقم وهي تفكر..بعدين قررت تعاودلها وكيف جايه بتتصل رن مرة تانيه..
عضت ع شاربها..وفتحت الخط وردت..
كوكب:آيوه السلام عليكم..
اصاله:كوكب حبيبتي شنو حالك..
كوكب ابتسمت وقالت:الحمد لله..اسفه مارديت طول الهاتف ماكانش حداي
اصاله بإبتسامه:مش مشكله حبيبتي عادي...ايه كوكب اسمعيني خطيبك يبي رقمك يبي يكلمك وتتعارفوا..
قعدت ساكته كوكب وهي تفكر
اصاله:حني تمينا فيك رسمي بحضور التريس وحددنا موعد العرس شهر تلاته الجاي..يعني ماعندك من شنو تخافي
كوكب:امم..باهي مش مشكله
اصاله ابتسمت وقالت:راهو عثمان ولد اختي راجل ومتربي كويس ماتخافي منه بكل..
كوكب ابتسمت وقالت:باهي..
اصاله:اوكي حبيبتي مانعطلك زياده..سلمي ع امك وخواتك..
كوكب:يوصل..وحتى انتي سلميلي ع عمتي امينه والعيله..
اصاله بضحكه؛يوصل..هي بالسلامه عسوله..
كوكب بإبتسامه:بالسلامه..
حولت التليفون من ع وذنها وقعدت تضحك بخجل..
"من ياكوكب"
التفتت كوكب ومشت للكوجينه وهي تقول:اخت عزوزي ماما خالتي اصاله..
🍁🍁🍁🍁
كان مقعمز ع الكرسي متاع بار المطبخ وهو يشرب في النسكافيه ويشوف فخدمته ع اللاب توب.
رن تليفونه حط مق النسكافيه وخدي الهاتف شاف المتصل ابتسم وفتح الخط ورد..
اصيل بإبتسامه:حبوبتي..
مريم بضحكه صدمه:شن هيا؟
اصيل:ههههههه..خلاص توا تمينا كل شي..خل نفرج ع مشاعري شوي جتني كآبه من كبتهن..
مريم:هههههه..باهي ماقلنا شي افرج عليهم لكن ماتطلقهمش ع حل شعرهم..
قعد يضحك اصيل من قلبه ومريم تسمع في ضحكته وهي مبتسمه وقلبها يرفرف بشعوره..
وهالضحكه سمعتها امه بعد ماطلعت الحمام ابتسمت من قلبها براحه لأنها اطمنت ع ولادها التلاته..
وتوا عاد لازم تفكر فروحها..
وين تجي تفكر فروحها عقلها مايستوعبش انها بعد كل هالسنين حتولي لطليقها وتفكر اكثر في شكل الحياة معاه بعد هالعمر وبعد كل اللي صار بيناتهم
🍁وحال خوها الصغير يشبه حالها..
خوها اللي قعد سنين طويله من عمره بعيد عن كل شي ليه علاقه بيهم..بعد ماولالهم..قعد كل لحظه يسأل في نفسه كيف قدرت نعيش بعيد عنهم الوقت هدا كله!!؟
يتسائل وهو مصدوم في نفسه..
يتسائل بصدمه لأنه توا مش قادر يتحمل فراقهم لو ماكانش قريب منهم..لازم يحوم حواليهم..
💓💓💓💓
شمس..
بحر..
وشط..
وبعيد عن الشط بمسافه بسيطه..
حصيرة كبيرة مفرشه وهما مقعمزات عليها ومظله كبيرة فوقهم مظلله..
وهما يفطروا تحتها ويهدرزوا..
رانيا:تسلميلي يانوارة ع الترتيبات الحلوة هادي..
ابتسمت نور وقالت:ماتقدروش تعيشوا من غيري انتم..
دلال:حيلك حيلك..
ضحكوا..
اسيا:ماما نمشوا نحطوا رجلينا فالميه..
دلال:تمشي عينك افطري فطورك واسكتي..
عقدت حواجبها وقالت:كانا بابا راهو قالي باهي..
رفعت دلال حواجبها وقالت:اشييي!!
كلهم:ههههههههه..
روان وهي تشوف لجهة ما قالت :حي سنودي..
كلهم التفتوا وشبحوا وين ماتشبح..
نور بضحكه؛عنده رانديفو..
رانيا ضحكت..
آسيا:مش حلوة بكل كلهم بنات مش حلوات صاحباته..
رفعت رزان حاجبها اليسار وقالت:نشم فريحة غيره..
دلال بضحكه؛ليها مدة زعلانه منه قالت معاش يعدل عليا..
رانيا بإبتسامه؛ ماهو يااسو توا خلاص انتي جاك بابا سنودي قال معاش تعدل عليا..
اسيا وهي رافعه حواجبها؛وعلاش!!؟هو صاحبي وبابا بابا..
ضحكوا البنات..
بعدين رزان قالت؛اني نتنبئله بمستقبل كيف مستقبل ولد خالته..
دلال بضحكه:ايه سيوره يطيح في بنت امها اللي تجيبه للطريق زي مادارت بنت عمته..
ضحكت رزان وقالت:وتقعد مكرهاته في عمره من غيرتها..
دلال؛هو سند ينغار عليه من غير شي..راجل مقوم ع صغر سنه وقنين ودمه خفيف..
رانيا وهي تشبحله فنصت وقالت:حيي هدا شن يدير!؟
شبحوله لقوه شاد يد البنت بإيديه الزوز..
دلال:خل نوقفوه عند حده قبل يتعدا الخطوط الحمر..
رانيا بضحكه:شن بديري..
دلال غمزتلها بضحكه وقالت:راجي..
قامت تليفوتها..دورت رقمه..لقاته واتصلت بيه..
وهما كلهم يشوفوله ماعدا رانيا اللي كانت حاطه راسها لوطا ومبتسمه بإحراج..
شافوه كيف شاف لتليفونه..وفتح الخط ورد..
سند؛ايوه بنت خالتي..
دلال:السلام عليكم سند..
سند:وعليكم السلام..
دلال:وينك توا؟
سند:فالخدمه علاش؟
دلال ضحكت وقالت:لا غير جيتك في مكان الخدمه وشفتك..
نزل التليفون وقعد يدور والبنات يضحكوا
لعند ماجو عيونه عليهم ضحك بصدمه وقال:حي ع امها!؟
البنت:قريباتك؟
شبحلها وقال بإبتسامه؛ايه..
البنت ابتسمت وقالت:تعرفني عليهم؟!..
سند ابتسم بإرتباك وقال:مرة تانيه ان شاء الله..هي تعالي معاي..خداها من يدها ومشي هو وياها..
اسيا:حي مشي معاها وخلانا!
ضحكوا ع اسيا..
بعدين قالت رانيا:حي عليك حشمه مسكين تو بيقعد هارب مني..
نور بضحكه:اني نعرف اغلب صاحباته كلهم من الطبيات..
دلال ابتسمت وقالت:معليشي سن طياشه اغلب الشباب مروا بيها..نقولوا ربي يهديه وخلاص..
ابتسموا لكلام دلال وكملوا ماكلتهم وهما يتفرجوا ع البحر وحركة امواجه الخفيفه..
قعد مسموع صوته هو بس..
لعند ماخش صوت اسيا الملهوف ع صوته وهي تقول..
"بابا!"
قلب دلال نبض بقوة..
شبحت زي ماشبحوا هما وين ماتشوف آسيا..
شافوا عمار ماشي مع سند اللي كان شاد كرسي فيده..
غيروا البنات عيونهم لدلال..
لقوها معلقه عيونها فيه..
كيف يمشي بالقيلا وهو لابس سروال جينز ازرق غامق..وتيشرت ابيض نص كم وطاقيه لونها بيج ع راسه ونظارات لونهم اسود..
حط سند الكرسي وهو قعد واقف ماقعمزش عليه..
قعدوا يتكلموا مع بعض..
اسيا بتوسل:بالله عليك ماما نمشيله ماما..
دلال شبحتلها وقالت:بري حبيبتي..
اسيا ابتسمت بفرح وناضت بسرعه لبست كندرتها وطارت لبوها زي الفراشه من فرحتها..
رانيا بإبتسامه؛قداش تعلقت بيه
نور وهي تشوف لآسيا:عيونها بوها ديما تحكي عنه..
رانيا شبحت لدلال لقتها تشوف جيهتهم وعيونها مليانات دموع..ابتسمت بحزن
🍀"بابا"..
عمار:روح بابا..
طبسلها وضمها بيد وحده واليد التانيه مد بيها القيلا لسند..
خداها وهو مبتسم ويشوفلهم..
ضم عمار بنته ليه ورفعها فوق وقال:توحشتها عسل باتها السمحه..وباسها من خدها..
اسيا:حتى اني بابا حتى اني استاحشتك..
بعد وقال بضحكه:وين خوتك؟
اسيا:في حوش خالو حميد مع رمضان وباسم..
عمار بإبتسامه:اها..
سند:سلمي علينا حني باهي؟!
اسيا شبحتله وقالت:وينها البنيه الشينه؟
سند وجهه ولى الوان الوان...
عمار شد ضحكته وقال:محلاه شعرك كيف دايرتيه..
اسيا شبحتله وحطت يدها ع ضفرة شعرها وقالت:ماما داراته
ابتسم عمار وقرب منها باس راسها..
وسند طول ماهو يشوفلهم ابتسامته مافارقتش وجهه..
🍁🍁🍁🍁
ويامبروك ع بنيتنا اللي دارت عرس ولمتنا
هادي نعيمه تغني وهي تقرض في عجينة الرشده
ويرددوا وراها خواتها وخوات لطيفه كانوا حداها مقعمزين كلهم ع حصيرة كبيرة فالجنان تحت المظله واللي هادي ادير في حاجه
اهل البلاد كانوا كيف واصلين يدوب سلموا وخشوا معاهم العواله..
ع بعد مسافه بسيطه تحديدا في الكوجينه
كانت لطيفه واقفه ع غاليه وعزوزتها
لطيفه:اني كلمتها بش نعزمها كيف ماقلتيلي ياغاليه هي قالتلي اني فطرابلس في حوش اهلي وامي حداي تسلم عليك وتباركلك..الحق تحشمت وقلتها تفضلي انتي والعويله..
فاطمه:عادي عادي مافيها شي
لطيفه:اني نبي نوضحلكم اللي صار بش ماتاخدوش مني موقف..
فاطمه:لا لاناخدوا موكف ولاسو يابنيتي
غاليه:هي احرجاتك لو كنت مكانك درت زيك ماعليك لوم..
لطيفه هزت راسها وهي ساكته..
فاطمه؛خلاص هي اطلعن..
لطيفه:اني بنمشي نشوف الصغار..
غاليه:حداهم اريج وفضيله..
لطيفه:نزيد نشوفهم وبعدين نطلع..
فاطمه:ع كيفك يابنتي..
مشت فاطمه وغاليه لحقتها..
ولطيفه خشت داخل..
🍁🍁🍁🍁
ع شط البحر..
البنات كانوا لاهيات بتليفون رزان يشوفوا الفيديو اللي مصوراته للصاله اللي حجزت فيها رفقه..
ماعدا دلال..
اللي كانت مقعمزة ع تركينه بروحها بعيونها تراقب فيه..
وهو كان مقعمز ع كرسي وفي حجره اسيا وجنبه سند مقعمز ومظله فوقهم مظلله عليهم..
شويه وشافت اسيا مشت قعمزت في حجر سند وهو يوريلها في تليفونه وبوها يشوفلهم..
بعدين غير عيونه وشبح للشط...
وفجاه شبح جيهتها...
هي تكهربت..طول شبحت للبحر..
هو ابتسم..وقعد يشبحلها..
هي حركت عيونها جيهته لقاته مازال يشوفلها رجعت عيونها طول للبحر..
هو ضحك..بعدين قام تليفونه وشبحله..
هي رجعت شبحت جيهته لقاته لاهي بتليفونه..
غيرت عيونها عنه وشبحت لتليفونها..
جتها رساله..
طول فتحتها..وهو عيونه عليها..
(حتى هنى تبيتي! )
هي شدت ضحكتها..بعدين رفعت عيونها للبحر..
شويه وجتها رساله تانيه طول شافتها..
(ع العموم طلعتك هدي ماهضمتها يكون فعلمك)
هي فكرت شويه بعدين ردت عليه..
(حتى انت تبيت)
شويه وجاها الرد
(لازم..مانخليك تطلعي من غير راجل من هنى لين ربي يهديك بعدها معاد في طلوع بكل)
قامت عيونها وشبحتله..
لقاته شاد تليفونه ويشبح للبحر..
هي رجعت شافت لتليفونها وبعتت.
(لا لازم تعرف من توا اني معاش نرضى تتقيد حريتي بالذات الخدمه)
طول شويه وماردش.
شبحتله لقاته يشوفلها ويبان من ملامح وجهه ان الكلام ماعجباش..
قعدوا يشوفوا لبعض لحظات..
بعدين هو شاف للتليفون وبدي يكتب..
هي ماغيرتش عيونها عنه الا بعد سمعت صوت نغمة الرساله..
شافت للرساله..
(بعد اللي عرفته حكاية الخدمه هدي بنفكر فيها واجد..حتى لو جبرتك تقعدي فالحوش ليا عذري)
شبحتله..لقاته يشبحلها...
غيرت عيونها عنه..وناضت من مكانها قربت للبنات وقعمزت حداهم وهي تقول:وروني ترا..
هو ابتسم بعدين شبح لبنته وسند وقال:مدللها واجد راك..
سند باس راسها بعدين قال:راهي بنتي حتي اني..
اسيا:اني بنت بابا بس..انت صاحبي..
ضحكوا عليها هما الزوز...بعدين قال سند..
سند:ربي يحفظهالكم..
عمار بإبتسامه:ويحفظك..
🍁🍁🍁🍁
مع الساعه اتنين ونص مشوا البنات وعمار فسيارة سند وراهم لمركز التجميل اللي فيه رفقه..
نزلوا البنات وخشولها..
لقوا رباب كيف كملت تلبيس البدله البودريه لرفقه..
رزان لما شافت رفقه بالبودري عيونها دمعوا وطول زغردت..
رفقه شبحتلها وابتسمت..
وهما زغردوا معاها...
صاحبه المركز بإبتسامه قالت:ماشاء الله ماشاء الله..
بعدين صفقت رزان وهي تغني..
وعروستنا تقول حمامه لبست بو خطين توامه..
والبنات قعدوا يردوا وراها وهما يصفقوا ماعدا نور اللي كانت توثق في فهاللحظات بكاميرا الفيديو..
بعدها جو لرفقه يسلموا عليها ويباركوا..
برا..
سند بضجر:مطول سريبهم..
ضحك عمار وقال:معليش هما هكي..
سند شبحله؛وحني هكي..
عمار:حني مفروض نسايروهن كيف ماهن يسايرن فينا فحاجات واجده..
شبح سند القدام وهز راسه بإيجاب وهو يقول:صح..
عمار:هاه..اهن طلعن..
شبح سند للباب لقاهم طالعات..
غير عيونه عنهم..
اما عمار قعدت عينه ع دلال اللي كانت تضحك وتهدرز مع البنات..
نظره معاها ولما تضحك تكبر ابتسامة العشق المرسومه ع وجهه..
وصلوا للسيارات..
ركبوا رفقه فسيارة دلال ركبوا معاها رزان ورباب..
اما نور ركبوا معاها رانيا والبنات الصغار..
وتحرك دلال وهي تكلكس..ووراها نور دارت نفس الشي..
ووراهم سند وطبعا يده لصقت فالكلاكس..
داروا دروه فشوارع العاصمه.
والبنات قالبات الدنيا...
تصفيق وغني وزغاريد..
خلوا رفقه فرحانه فرحة لاتوصف..💓
بعد كملوا دورتهم..توجهوا للحوش...
لما وصلوا للحوش..
سند مشي بيوصل عمار للحوش..
اما البنات..
لما خشوا بالسيارات داخل..
لقوا نساوين العيله في استقبالهم...
اول ماشافوا رفقه نازله...زغردوا...
وبدت اريج ادربك وتغني..
قولوا ياالله عليها...ياماشاء الله عليها..
وكلهم يردوا وراها وهما يصفقوا..
قدمتلهم رفقه..
وامها قدمتلها وهي مبتسمه بفرح ودموعها فعيونها..
وصلوا في بعض وحضنوا بعض..
لطيفه:مبروك عليك ماما..
رفقه:الله يبارك حبيبتي..
اريج وهي تشوفلهم غنت..
الزينه سلم امها...وين تلاقيها اضمها..
وهما يردوا وراها..
فهالوقت رزان وهي تمرر فنظرها ع النساوين جت عينها ع وحده انصدمت لما شافتها..
نور جتها وقالت؛شن صحة الوجه هادي!!؟
رزان ضحكت بتهكم وقالت:مشهورين بيها..
☘☘
دلال:هادي شن دير هني!!؟
غاليه قربت لودنها وقالت:كلنا منين ريناها انصدمنا..
دلال:عليك ناس!
"واللبس البودري محلاه..كل بنيه تتمناه.."
🍁🍁🍁🍁
ابتهاج وراس بوجه بري شوفي الشاهي..
ابتهاج بإستعجال:شاهي شني!بنطلع ناخد من مطيع صناديق الحلويات..
ومشت طلعت جري..
غفران؛وااااك..
ولفت ولت للكوجينه تجري..
🍀برا..
ابتهاج وهي طالعه برا لقت خوها واقف مع مجدي..
وصلت فيهم وقالت:هيا مطيع..
مجدي:السلام لله ..
ابتهاج وهي مستعجله؛السلام..
وخدت من خوها زوز باكوات ولفت ومشت للحوش..
مطيع بضحكه:تدوشن في المناسبات المراة هادي..
ضحك مجدي وقال:عارفها..💓
ولت طلعت مرة تانيه..وصلت فيهم وقالت:هيا هيا..
مدلها خوها الباكوات خدتهم وهي ماشيه عيونها جو فعيون مجدي..
النظرة كانت عابرة..بس للحظه...
ولأول مرة ابتهاج تلاحظ شي غريب فنظرات مجدي ليها..
في شي فداخلها تحرك..
رمشت عيونها بسرعه ولفت ومشت وهي مستغربه فروحها واللي حساته...
بلعت ريقها وخشت للحوش...ومجدي اللي كان ديما يخلي في قلبه معاها وين تختفي عن انظاره وهي ماتعلم بشي..
هالمرة هي خلت منها شي معاه...وهو مايعلم بشي..
🍁🍁🍁🍁
الساعه 8:30مساءا..
في الدار اللي يتجهزوا فيها البنات..
رزان دارت الروج بعدين قالت:قصدي اني مش عارفه المراة هدي شن تبي بالزبط..
نور:وحده مريضه علاجها الإستكراد..
رانيا وهي تبخ فالعطر:ربي يكفينا شرها وخلاص..
دلال وهي تساوي فشعرها:مكبرين موضوعها هلبه راهو والله ماتقدر ادير حاجه بعد اللي داراته لانها ولت مكشوفه وواضحه للكل..
رانيا وهي ترقص فحواجبها:انت ياعسل اللي وليت مكشوف وواضح للكل..
ارتبكت دلال وقالت:شن قصدك..
رزان قدمتلها وقالت:قصدها حرام عليك تحرمي هداك الراجل من الحلويات والفواكه سكره هابط ياناري..
دلال شقلبت عيونها ومطت شواربها القدام..
رانيا بضحكه:كان يشوفها هكي ماظال الا خاطفها مرة تانيه وطاير بيها لتنزانيا المرة هادي..
ضحكوا البنات..
دلال وهي شاده ابتسامتها:باهي كان كملتوا خفة دم اطلعوا السهريه بتبدا..
ومشت للباب فتحاته وطلعت وصكراته وراها..
رانيا:وجعني اليوم بيموت عليها يلحق فيها وين ماتمشي..
رزان بضحكه:عاجبها الجو راهي..
نور بإبتسامه:صح عاجبها لكن في نفس الوقت تبي تشعفه..
رانيا بحزن:صح عندها الحق لكن راهو حتى هي تتعذب..
رزان:معليش كله يعدي المهم يعرفوا قيمة بعضهم..
رانيا ابتسمت وقالت:صح..
اما نور فكانت تسمع فيهم وهي ادس في مكياجها فالشنطه وشاده دموعها بالسيف..
🌴🌴🌴🌴
خشت الدار وهي تقول:هوينا سيدك فالمربوعه بريله..
ناضت بلقيس ومشت طلعت من حداهم..
قعمزت نجاة جنب عزوزتها وهي تقول:الله لا
يوجهلك الخير يالميا الله لاينكد عليك عيشتي كيف مانكدتي ع بنتي..عايشه حياتها وماشيه تبرطع فالعراس وبنتي هنى شاده تركينه ودموعها ماجفوا..
مني:حسيبها الله يابنتي اللي دارته يولي عليها يولي..ربك ماهو ناسيها ولاناسي بنتك..
تنهدت نجاة بحزن وقعدت ساكته
▪▪▪▪
مراد وهو متفاجئ:تولي لقرايتك؟
بلقيس:ايه..
جمعه:ليش لا..
بلقيس:يعني ماعندكش مانع سيدي..
جمعه؛وليش بنمانع يابنتي حقك تكمليها..
هي ابتسمت وشبحت لمراد..
مراد:دام سيدي مافيش مشكله..
بلقيس بإبتسامه؛مادام هكي قولوا لباقي خوتي انت سيدي بلغهم..
جمعه:ماعليك في حد غيري اني واني قلت باهي مافي حد يقدر يقول كلام فوق كلامي..
مراد بضحكه:حتى هي بنت بوها..
بلقيس ناضت وقالت:موت بقهرتك..
ولفت وطلعت جري من المربوعه..
بوها قعد يضحك..ومراد قال بضحكه: بلقيس هدي تقعد متلفه مهما يصير فيها..
🍁🍁🍁🍁
راقد ع السرير بالعرض..
كان يهتري بالكلام وهو راقد..
وملامح وجهه بين الغضب وبين الخوف..
فجأه..
فتح عيونه وشهق....
حط يده ت صدره وهو يتفحص بنظره فالمكان حواليه..
شويه شويه استوعب انه كان يحلم..
غمض عيونه بشده بعدين فتحهم وناض قعمز..
مسح وجهه بإيديه..
بعدين رجع يمرر فنظره ع الدار..
تنهد بضيق وقال:ننزل نرقد فالمربوعه احسلي..
ناض وقف...
وقعد يمشي بإتجاه الباب طلع من الدار..
ومنها من الشقه مرة وحده..
نزل لوطا...وخش للمربوعه الدخلانيه وصكرها عليه..
الحوش كان فاضي مافي حد غيره هو..
من لما روح من الخدمه وهو حاس بالوحده والوحشه ماكانش يبي يطلع ولايشوف حد..
وفي نفس الوقت قعاده في الحوش بروحه زاد ضيقله صدره..
قعاده بروحه نوض عليه مواجعه اللي هارب منهم..
اللي مش قادر يبوح بيهم ولايشاركهم مع حد مخافه يقولوا من بعدها مش قادر يعيش..ونادم ع اللي داره فيها..
كله ولايبان هو الحلقة الأضعف..
هدا محمد...
🍁🍁🍁🍁
وهي راضيه ع خاطرها ولا خاطركم انتم؟
مؤنس؛لا والله ياخال حني ماضغطنا عليها حني قلنالها وهي فكرت وقررت..
اصيل:والله ياخال باتي تغير واجد..
عمار شبح لمؤنس..
مؤنس:خال نا نضمنهلك..
عمار تنهد وقال:خلاص كلامكم الضمانه..لاقدر الله لو صارت حاجه بعدين..اشر عليهم بسبابته وقال..نتفاهم معاكم انتم..
مؤنس:تم..
اصيل:وبإذن الله مايصير شي..
عمار رفع حواجبه ونزلهم وهو يقول:ان شاء الله..
فجأة انفتح باب الشقه..
هما قعدوا يشبحوله بإستغراب..
شويه شافوا الحاجه كامله خاشه ووراها الحاج مختار..
عقد عمار حواجبه بإستغراب وهو مبتسم:كيف صار!
ناضولهم مؤنس واصيل..
مختار بضحكه:بدال مانجو غدوة الصبح جينا تو هدى اللي صار..
اصيل؛مرحبتين مرحبا..وضم حناه..
كامله بضحكه؛مرحبتين بحبيبي..
مؤنس باس راس جده بعدين قال:كان قلتوا..
مختار:ماهيش مشكله..البنات وين..
عمار:فالعرس..
كامله؛قتلك بدري..
مختار هز راسه وهو يقول:ايه ايه..
عمار:هندا قعدت عند هلها..
كامله هزت راسها وجاته وهي تقول؛ايه..
هو ناضلها ضمها وباس ع راسها..
🍁🍁🍁🍁
ياسعد اللي عنده عمه...ترقص لين العرس اتمه..
كانوا يغنوا ع حميده اللي نايضه ترقص..
وحميده زادت شاشت بغناهم عليها..
سناء:صحه ليها حماتك هادي مهتمه بروحها اكثر مني رغم انها مطلقه..
لمياء:اصلا المراة ماتهتم بروحها كان بعد تطلق..
ضحكت سناء وقالت:يافرحانه اللي افتكت يانادمه..
لمياء:وحميده هادم الزوز..
ابتسمت سناء بتهكم بعدين شبحت لغاليه وقالت؛وهادي ياكبدي ماتعرف كان تصغر..
لمياء؛لا حملت لاجابت..
ضحكت بعدين غيرت عيونها لدلال وقالت:عطيها نقطه الفرخه هادي عليك جمال فيها..
لمياء:هبله ناويه تولي لراجلها الاول بعد اللي صارله..
سناء؛عندها منه صغار..
لمياء:عادي تخليهم عند ماليها وتمشي تتزوج والله لو اني زيها نمشي ناخد راجل تاني صغير وقنين وعزري زياده نعوض بيه سنين عمري اللي راحو ع الفاضي..
سناء:الحق خسارتها ماسد راح شيباني ماسد العاهات اللي ولت فيه..
لمياء سكتت وهي تشوف لدلال..
اما سناء غيرت عيونها عنها جو ع رزان رفعت حاجبها وقالت؛ماربحها كان هديكا المنسرفه..
لمياء:ماواكله ع كبدي وشاربه هي وامها..شبحت لسعيده وقالت..خاطري نديرلها كاينه تهدها هد..
سناء شبحتلها بريبه وقالت:يامامي خفت..
شبحتلها لمياء وضحكت..
من بعيد شويه..
قعمزت حميده جنب غاليه وقالت فوذنها:يقرمن فينا بنات مصباح..
غاليه وهي تصفق:عارفتهن..
سكتوا وقعدوا بعيونهم مع فضيله اللي مشت نوضت رزان ترقص ورزان تقول تراجي فيها..
حزمت بالوشاح وبدت ترقص.
وفضيله تغني عليها وتصفق..
انا في حوش مرتاحه
والناس عليا نباحه..
لمياء وسناء شبحوا لفضيله برفعة حاجب.
اما الباقي اللي ضحكت واللي شاده ضحكتها واللي تردد بحماس..
ورزان ترقص بغنج وتغيظ..
اريج..
اني في حوشي زايطه..
والناس عليا شايطه..
ناضت رباب وهي ترقص وتغني:هيييييي...اني في حوشي زايطه والناس عليا شايطه..
زغردت عزوزتها امينه..
فضيله..
اني في حوش باهيه.
والناس بيا لاهيه..
ورزان ورباب يرقصوا ويتفننوا فالرقيص..
واللي حواليهم بين اللي يغني ويصفق ويزغرد..
هدا كله تتفرج عليه رفقه وهي تضحك وفي قمة الفرح..
💓وعدت هالليله وكانت من اجمل الليالي اللي مرت ع رفقه...
🍁ومن اصعب الليالي اللي تمر ع مروان..
كان يتعمد يفوت من حدا حوش خاله ويشوف ويسمع مظاهر الفرح ويزيد يقنع نفسه بحكاية النصيب اللي قلبه رافض يتقبلها..
ويروح من غادي والقلب زادت جراحه اضعاف...
🍁🍁🍁🍁
الساعه 1:00 ليلا..
طالع من داره متوجه للكوجينه بيجيب ميه..
لما قرب يوصل لوسط وقف لما سمع هدرزة امه وخواته..
اصاله؛كان تشوفيها يمي اليوم وهي لابسه هداك القفطان الاحمر القصير مع طولها وقدها وشعرها المفرود ع كتافها يمي غزاله مصورة..
امينه؛وهديكا الصبغه الصفرا اللي صبغت بيها شعرها..وين تخش الدنيا تحل فمها..
كامله:ماشاء الله ماشاء الله..هدى كله من فرحتها راهو..
امينه بإبتسامه؛ايه حتى خالاتها ورباب قالن هكي..
اصاله تنهدت وقالت:غير كان ربي يهديها وتولي لعمار..
كامله:توليله بإذن الله توليله..تقدر تعيش من غيره هي!..تموت ع الوطا اللي يمشي عليها راهي..
امينه:عارفين يمي..لكن نبوا بال خونا يرتاح..
كامله:يرتاح بالها هي الأول..
اصاله وامينه شبحولها بإستغراب..
كامله:ايه لازم تضمن انه اللي داره معاد يعاوده لو شنو يصير فيه بعدين توليله...
اصاله:اهااا..من هالناحيه عندها حق..
امينه؛ايه..حتى نا معاها فهدي..
🍁هو تنهد بكتمان..
بعدين لف وولى مرة تانيه للدار...
وباله مشغول..وقلبه محروق بنار الشوق...
🍁عدى عليه باقي الليل وهو يفكر لين اذن عليه الفجر
صلى..وبعد الصلاه رجع يفكر...
وهكي لين خداه النوم...
🍁🍁🍁🍁
تاني يوم...
يوم الفاتحه والكسوة...
هانيبال روح بمرته من ترهونه بعد ماكانت عند اهل مرت خوها اللي اجهضت وهي في شهرها الخامس وتعبت هلبه..
قعدت عندهم نهارين بعدين روحت مع راجلها للبلاد..
وتت دبشها ودبش الصغار..وتسقدوا لطرابلس...
☘هانيبال وهو يتكلم بالتليفون؛باهي وينه المزين هدى؟.........ايه........ايه........اها تمام تمام......لقيته......باهي...
صكر وقال..اهو هدى هو...
مرام شبحت للمزين..
درس هانيبال قدامه وقال:تكملي رني..
مرام:باهي..
فتحت الباب وخدت حاجتها ونزلت بعدين صكراته..
راجاها هانيبال لين خشت للمزين بعدين تحرك بإتجاه حوش خوه حميد بيحط صغاره اللي كانوا راقدين فالسيارة غادي..
🍁🍁🍁🍁
هاه نور ......باهي تو نخطم على ماما ونجيكم...باهي سلام..
حطت دلال تليفونها ع الزيانه وكملت مكياج...
وفي دار تانيه من نفس الحوش...
كانت بنتها آسيا مقعمزة فدارها تكلم في بوها مكالمه ماسنجر فيديو بالآيباد..
اسيا:شن رايك بابا حلو شعري؟
عمار بضحكه:حلو غير شعرك انتي كلك على بعضك عسل فعسل..
ضحكت اسيا..
ابتسم عمار بعدين قال:ايه وماما شن دير؟.
اسيا:تمكيج..
عمار:هههههههههههههه..
اسيا:علاش تضحك بابا؟!
عمار بضحكه:المتياج امك هدي..
اسيا:امممم..بابا..
عمار:عويناته..
اسيا:راجي ماتسكرش باهي..
عمار ابتسم وقال:حاااضر..
مشت اسيا للباب فتحاته وطلعت من دارها ومشت لدار امها..
طقت الباب..
"اسو"..
اسيا:ايه..
"خشي"..
فتحت الباب وخشت وصكرت الباب شافت لأمها بذهول وقالت:ياواااااااااو..
ضحكت دلال..
اسيا:بابا شوف..
وجههت واجهة الآيباد لأمها ....
دلال جمدت فمكانها وفنصت عيونها فشاشة الآيباد وهي تشوف لعمار كيف ضايع فيها وهو يشوفلها..
اسيا:شن رايك بابا..
دلال استاقضت وجت لبنتها خدت الآيباد..
وحطاته ع وجهه فوق الزيانه وهي تقول بعياط؛اسووو ياحمارة كيف ديري هكي!!!
اسيا بزعل؛شن درت اني؟!
دلال شبحتلها بغضب وقالت:اطلعي امشي لدارك تحركي..
لفت اسيا للباب وفتحاته وطلعت وهي زعلانه ودموعها يطيحوا...
دلال مشت بعصبيه للباب وصكراته..
فهاللحظه رن تليفونها..
تأففت ومشتله...
خداته من ع الزيانه لقاته هو يتصل..
رداته لمكانه وجهها ولى احمر وهي تقول..ويتصل فوقها!!
قعدت تشبحله لين فصل..
شويه وجتها رساله...
خدت التليفون وفتحتها..
(تزعلي بنتي ولاتبكيها ماتلومي الا نفسك)
دلال استفزتها الرساله هلبه..
طول اتصلت بيه..
وهو طول فتح الخط..
الزوز مع بعض قالوا...
(والله!..ضربتيها)
دلال:مانضربش فيها بنتي..بنتييي مش بنتك بروحك..
عمار بإبتسامه:اها بنتنا حني الزوز..
دلال قلبها بيفر..ووجهها ولى سخون من الخجل...
طول صكرت في وجهه وقالت:الله يسامحك ياآسو يابنتي..
جتها رساله تانيه..
قلبت عيونها بملل وقالت:معاش تحز..
فتحتها وقرتها..
(قولي لآسيا قالك باتك الله يسامحك يابنتي )
غصب عنها ارتسمت ع وجهها ..
حطت التليفون ع الزيانه وقالت وهي متبسمه بغضب:تبي القرص والمرس اسيا هادي..
💓هو بعد بعت الرساله..
حط التليفون ع الطاوله..
بعدين حطت ايديه ع وجهها وقال:استغفر الله واتوب اليه..
قام ايديه وحطهم ع راسه وقال..شن يطلعها من عقلي تو بس؟!..نا من قبل مش سالك...غمض عينه بشده..بعدين بدي يضحك وهو يقول..بطلعي باتك من طوره يابنتي الله يسامحك..💓
🍁🍁🍁🍁
مع الساعه 6:00مساءا
روح عماد برزان للحوش من المزين بعد مامكيجت وصدرت بش تلبس ذهبها...
هو قعد مقعمز في وسط الحوش يراجي فيها...
شويه..
وطلعتله..
سمع صوت طقطقه الكعب..قام راسه طول...
هو لما شافها قلبه طار من مكانه 💓
ابتسم من وسط قلبه ابتسامه حلوة بالمرة..
اما هي فكانت تشبحله بربع عين..مازال زعلانه..
هو بضحكه :توقعتك تمكري فيا يالفعه وماتخلنيش نشوفك فيه..
رزان :الله غالب ماهنتش ع قلبي المشرشح..
عماد:قلبك انتي المشرشح صار؟!!
شقلبت عيونها ..بعدين شبحت للحديده فيدها..
عماد بإبتسامه ماكرة:ع العموم اني ماقتلكش تعالي وريني..
شبحتله وقالت:عقلي قالي بري وريه واني درت مايبي عقلي..
عماد:معناها مش ع خاطري؟!!
نزلت عيونها وقالت:يابارد بلاش براده عارف انه ع خاطرك..
عماد:ههههههههه..
هي تشوفله وهو يضحك قعدت تتأمل فيه..
هدا ضحك وشبحلها برفعة حاجب وقال:كيف يصير فبعدين ولا نقول لأمي دورلي وحده في العرس..
رزان بتفنيصه:عمااااااااد!!!
عماد هو رافع حاجبه اليسار:شن قلتي..
قعدت تشوفله بطرف عينها بعدين ابتسمت وهي تغني..
اخاصمك اه..اسيبك لا..
وجوا الروح حتفضل حبيبي اللي انا بهواه..
وبدت ترقص وهي تغني..
عماد:هههههههههه....ريت الملعقه حتى وهي لابسه مدرعه ترقص!!
رزان :انت حبيبي ومنايا اللي ذوبتي وانت اللي بعدوا عن هوايا بيتعبني..
وقعدت تهز فكتافها وادير فحركات ...وهو ميت عليها بالضحك...
ناضت وجاها وهو يقول بضحكه؛بطلي هبله..كان في بنت داخل اطيح ياختشه..
وقفت وحطت يدها ع بطنها وقالت:ووك عليا بعيد السو..
ضحك وقال:باهي البسي هيا خير مانلخبطلك خريطه وجهك..
ضحكت وقالت:مدلي الكاب ترا..
ابتسم وخداه من ع يد الكرسي وجاها وقعد يلبسلها فيه وهو يتأمل فجمال عيونه الخضر..
عماد بإبتسامه عشق:ربي يحفظك ليا ياقلبي ومايوريني فيك سو..
ابتسمت بإستغراب لدعائه وقالت:حتى انت..
ضحك..بعدين غطا وجهها..وجي جنبها وضمها وقال:هي..ديدش حب الرمان..ديدش خبزة دهان.
وهي تمشي بإتجاه الباب معاه وتضحك..
🍁🍁🍁🍁
فالصاله...
كانوا الزمزمات قالبينها قلب..
وشبه مافي وحده مقعمزه فطاولتها كلهم يرقصوا ويشطحوا..
وع راسهم لمياء اللي قشرت وجه عزوزتها..
لكن امها كانت تصفقلها وفرحانه بيها..
🍀من جهة تانيه..
كانت كامله بعيونها مع دلال وآسيا اللي كانوا يرقصوا مع بعض شويه وقالت؛ترا اصاله بنتي صبي ناديلي دلال واسيا..
اصاله:حاضر..وناضت مشتلهم..
وامينه تشوف لأمها بعدين شبحتلهم...
شويه وجوها التلاته مع بعض..
قعمزوا ع نفس الطاوله..
كامله:تعالي حبيبة جديده..
جتها اسيا...قامتها كامله وقعمزتها في حجرها وشبحت لدلال وقالت؛رقيتي روحك..
اسيا:اني رقيتها جديده..
ضحكوا...
كامله قرصت خدها وقالت:يانجي حبيبة جديده..
ابتسمت دلال..
بعدين شبحتلها كامله وقالت؛ياخد ويوصي راهو..قولوها ترقي روحها..
ابتسمت بخجل ونزلت راسها لوطا..
اسيا:وريتها لبابا..
قامت دلال راسها وهي تفنص فيها..
هما شبحوا لآسيا بإستغراب..
كامله؛شن ورتيه؟
اسيا:وريته ماما وماما خدت مني الآيباد وكشخت عليا..
دلال حطت يدها ع فمها وهي تقول بصوت مكتوم:اسو!!
كامله شبحت لبناتها..وهما شبحولها..
بعدين شبحوا لدلال..
دلال نزلت يدها وعيونها لوطا..
البنات ضحكوا..
وامهم حطت يدها ع فمها وشبحت لآسيا هي تضحك بعدين قالت:عطك الخير ياآسيا..هههههه..وغطت عيونها بيدها..
والبنات يضحكوا وهما يشوفوا للبنت وامها كيف منزلات روسهم ومتحشمات..
🍁🍁🍁🍁
دكتور مروان..مروان..
مسح مروان دموعه بعدين التفت وقال؛نعم دكتور..
الدكتور المدرب:تعبان فيك حاجه؟
مروان؛لا عادي برده خفيفه..
رفع دكتور حواجبه وقال:اليوم الفاتحه صح؟
غير عيونه عن الدكتور وهو ياخد في نفس بعدين زفر وهز راسه بإيجاب..
الدكتور:ادعيلها ربي يهنيها ويعوضك بالاحسن..
شبحله مروان وابتسم وهو يقول:اسف دكتور شغلتك بمواضيعي الخاصه..
الدكتور ابتسم وقال؛ولايهمك..هي تعالى معاي..
مشي الدكتور ومروان مشي معاه..
الدكتور؛ اخدم اخدم..اغرق فالخدمه..تو تنسى..
مروان ابتسم ع جنب وقال؛هدا اللي بيصير..
🍁🍁🍁🍁🍁
بعد انقرت الفاتحه..
انطلقوا سيارات اهل العريس رافعين الكسوة...
لفوا بيها اغلب شوارع طرابلس...
لعند ماوصلوا فالصاله...
وكانت لطيفه وحمواتها وخواتها في استقبالهم..
وبدوا يخشوا اهل ياسين بكسوتهم وهما يزغردوا...
كانت كسوة تليق بنت حميد رمضان..
كسوة قامت من قدر اهل ياسين قبل ماتقيم من قدر رفقه..
💓التموا حواليها وقعدوا يشتوا عليها...
وكان شوط الشتاوة ناشط وحلو هلبه..
بعد كملوه قعمزوا اهل ياسين ع طاولاتهم...
ودخلوا الكسوة للدار الدخلانيه متاع الصاله وصكروا عليها..
شويه..
وطلعوا رفقه وهي مغمومه بالفرشايه..
ع يمينها عمتها زينب كانت شادتها وع ايسارها وحده من خالاتها والزوز يلالوا عليها..
قدامهم رزان ونور الزوز كانوا مصدرات وشادات المرايه..
وقدامهم سهى بصونية فيها الحنه...
وين وصلوا وين مافي كرسي احمر كبير..
قعدوا يدوروا بيها والبنات انضمولهم..
ويغنوا..
دوروا بيها دوروا بيها وان شاء الله السعد يواتيها..
رزان :دوروا بيها دوروا بيها وان شاء....سكتت فجأة..
لما حست بدوخه والصورة بدت ادغدش فعيونها..
وهما يدوروا وهي كملت دوران معاهم...
كل مالها شعورها بالدوخه يزيد يقوى..
كانت تحاول تتماسك بالسيف لين يكملوا اللفات..
عدت الأولى..والتانيه..والتالته..والرابع...
وين وصلت في الخامسه حست روحها خلاص رجليها معاش حامليها..
ووين تشوف للحواليها ماتشوفش فيهم واضحين..
لما خشوا ع اللفه السادسه..
هي وقفت..
شبحتلها نور..
واللي فالدايرة كلهم وقفوا وهما يشوفولها..
نور:رزان!!!
رزان كان تشبح لرفقه وخلاص..
غاليه بخوف:رزان!!
سعيده ناضت من مكانها وهي تشوفلها..
وكفايه قدمتلهم وهي مستغربه..
زينب:رزان بنتي!
رفقه قلبها طاح فرجليها قال بصوت يرجف...
"خيرها رزان"
رزان فهاللحظه عيونها تصكروا..
وطاحت من طولها....
...يتبع....
