#العشق_المتمرد "عندما يزهر الليمون"
#جمان_فريد
الجزء 138 القسم الأخير..
⏳..
💕ويافرحة جواد ومجد بالفرد الجديد اللي انضم للعيله...
كان جميل جدا لكن ملامحه ع الاسود واللي يشوفه يموت عليه برغم انه مولود حديث لكن ينحب ويذوب في القلب من اول نظره..
وحتى هو اسمه اختاره بوه من لما عرف ان مرته حامل بولد
"عبد الوهاب"
🍀وطبعا سمعوا بيها العيله فالبلاد وجابهم الهادي بمرته..
وكانوا ناويين يقعدوا للسبوع..
وبعد يوم تجمعوا فيه افراد العيله المقربين ع الجغوم والعصيده...
☘في الليل...
مقعمزين كلهم في دار المعيشه حدا نعيمه والبيبي اللي كانوا البنيات الصغار متجمعين حواليه ويشوفوله..
غاليه:اليوم جو معانا لطرابلس..
زينب:ياودي حكايه امها فيها إن ..
فاطمه:الكتيبه للي لقوها ورا الحوش سحر باينها..
زينب:ايه باهي يمي ليش امها ديما بس اللي تعبانه..
فاطمه:باك دايرينه لامها بس..
سكتوا وهما يفكروا بعدين قالت فضيله.
فضيله:الله يجيرنا وخلاص..
كلهم قالوا بأصوات متقطعه:يارب..امين..
▪▪▪▪▪▪
في دار دلال..
حميده وهي تشوف بتات دلال فشناطيه:ماشاء الله ماشاء الله كله حاجات سمحه..
دلال بإبتسامه:باهي زعمه مافي شي ناقص!
حميده:وين اللي ناقص !؟ماشاء الله ماناقصاته حتى يبرا..
رانيا بإبتسامه:حتى اني خديت شويه حاجات..
حميده شبحتلها وقالت بإبتسامه:ايه ابدي من تو راهو رمزي ناوي ان شاء الله..
ابتسمت رانيا بخجل..
دلال:باهي ماقالش امتى؟
نعيمه شبحتلها وقالت:ع كلام امه فأربعه..مش بيولي اخر الاسبوع لأمريكا وبيروح تاني اخر تلاته بيدير العرس ويسافر برانيا تاني..
دلال؛لالا مادخليش بنقول لعمار يأجل السفر لبعد 4..
حميده بإبتسامه:قوليله ياحنه..انتي بعد ريت اللي خديتيهله وكان تحكمي عليه تقعدوا في ليبيا العمر كله يقولك سمع وطاعه..
دلال بخجل:خااالتي..!
رانيا وحميده:ههههههه..
🍁🍁🍁🍁
طول مالشيخ يقرا عليها وهي ترجع..
لمياء ببكي:من دار فيها هكي من دار في امي هكي!..
مصباح بألم:حسبنا الله ونعم الوكيل..
عامر مرر نظره ع خواته وقال:قال الشيخ سحر مأكول..
شبحوله وهما مصدومات..
سناء بصدمه:مأكول!!
عامر:ايه..
شبحت لمياء لخواتها وهي مضيقه عيونها وتفكر..
دنيا بصدمه:وين كلاته..من مني؟!امي ماتخلي وين تمشي مافيش مكان محدد كيف بنعرفوا من دار هكي؟!
عامر:كيف يعني اللي تعرفهم كلهم حاقدين عليها!
سناء بشي من الغضب قالت:ماتجيش الا من اللي يدير روحه يحبك وامي محاوطه بهلبه ناس منافقه من برا يحبوها ومن داخل حاسدينها وقلوبهم كلها غل عليها..
مصباح:باهي من؟!
سكتوا وهما يفكروا..
عامر شبح للمياء وقال:لميا..
شبحتله..
عامر:في شن تفكري؟
لمياء:نفكر فمن يكون دايرها زي ماقالت سناء حساد امي هلبه..هزت راسها وهي تقول..لكن سيرونا نعرفوا مني..
مصباح:باهي تنوض وحده فيكم تشوف امها..
ناضت سناء ومشتلها...
وهما كملوا حديثهم ولمياء تتكلم وتفكر وفي عقلها تلاته اسماء شاكه فصحابهم..
"ام ليلى...بنت عم بوها..ووحده من عماتها"
🍃🍃🍃🍃
وتعدي الأيام..
ووضع نادرة رجع طبيعي زي قبل ومش مذكرة اي شي من اللي صار معاها..
بناتها اللي فطرابلس قعدوا يتناوبوا عليها..
اما لمياء قعدت عندها...
وهالوضع مش عاجب عمر لكن كان مضطر يتقبله...
🍁🍁🍁🍁
16\12\2017..
الساعه 5:00عصرا
واقف عليها يساويلها فالبالطوا متاعها ويسكرلها فأزراره لفوق..
رفقه بضحكه:قمطتني..
ياسين وهو يلفلها فالشال ع رقبتها:صقع يابنتي صقع يخش العظم..
هي كانت تتأمل فيه بإبتسامه..
وهو شبح لعيونها ابتسم برفعة حواجب..
🌹ومن ورا روشن الحوش امه واخته واقفين يشبحولهم..
ابتهاج:نجيه وخيي الحنين
خديجه بضحكه:راد باله عليها زي عيونه..
ابتهاج:حبه ياخدوجه راهي..
خديجه قرصتها من ذراعها وقالت:راك تقولي نتحشم شويه قدام امي.
ابتهاج قعدت تتحسس في مكان القرصه وتضحك..
شويه دار ياسين كلاكس شبحولهم لقوهم ركبوا..
ابتهاج بإستعجال:خلاص يام بنمشي باي توا..
ومشت طلعت تجري..
اما خديجه ولت داخل وهي تنادي:يزونه قطاع الورد بعرجونه..وينك..
🍁🍁🍁🍁
مقعمزة في دار المعيشه تتفرج ع فيديو نازل فالفيس تحديدا في صفحة خطيبها...
كان الفيديو ليه وهو فالسيارة بس ماكانش باين..مرش السيارة القدامي بس هو الباين والمطر تصب والمساحات تمسح وفاتح اغنية محمد حسن..
"قد الشوق"..ويغني معاها
وهي حاطه السماعات وتسمع وع وجهها ابتسامه حلوة مرسومه والعيون ذبلانه من العشق.💓
عاودت الفيديو اكثر من مرة..بعد اخر مرة ناضت بتليفونها ومشت لدار اسيا بش تسمعهولها
وين وصلت فالدار فتحتها وخشت لقت اسيا مقعمزة والأيباد بين ايديها ومبتسمه..
وتسمع في صوته يغني...
طيري طيري..ياعصفورة..انا متلك حلوة صغيروه..
تفاجئت دلال هلبه...ومشت قعمزت ع الكرسي وهي تسمعله وقلبها يدق بسرعه 💓
اسيا:طيري طيري ياعصفورة انا متلك حلوة صغيروه..
عمار بإبتسامه:
بركض فوق حفاف الزهر...بحجر ع ميات النهر
وبخبي شعري بشورة...
اسيا:طيري طيري...
وكمل معاها عمار:طيري طيري ياعصفورة
عمار:بيتك ياعصفورة وين مابشوفك غير بطيري..
دلال خدت شنطة بنتها متاع المدرسه وحضنتها بقوة وتنهدت بهويام..
وهو مكمل لعب ع اوتار قلبها الحساسه اتجاه اي شي منه..
عمار: ماعندك غير جناحين..حاكينا كلمة صغيره...
ولو سألونا بنقلن ماحاكتنا العصفورة...
غنت معاه اسيا:
طيري طيري..طيري طيري...ياعصفورة..
بعدين ضحك عمار ..
اسيا بإبتسامه:تحفظهالي كلها بعدين باهي؟
عمار:حااااضر ع راسي ياسكر قلبي..
ضحكت اسيا بعدين شبحت لامها وقالت:ماما خلعتيني!
ضحك عمار وقلبه قعد ينبض بقوة💓
دلال بضحكه:كنتي هايمه وتغني.
اسيا:حلوة ماما الأغنيه ولا؟
دلال بإبتسامه:اممم حلوة هلبه..بس مش عارفه باباتك امتى ولى يحب هالاغاني؟!
عمار بصوت عالي شوي:كيف ماحبينا غيرهن زمان..وغنى
يادلوله عليك نموت..
قعدت تضحك بصمت...
وهو يغني:يااحلى من طعم التوت..
اسيا:ايه هادي اغنية متاع ماما..
ضحكوا عمار ودلال...بعدين دلال قالت..
دلال:تفرجت ع الفيديو متاعك..
عمار:اها..سمعتي بمحمد حسن..
ارتسمت ع وجه دلال ملامح الحزن:ايه مريض ياناري تعرف لما شفت صورته قلبي وجعني وقعدت نبكي..
عمار بحزن:والله حتى نا وجعني واجد وقهرني الوضع اللي وصله..ريتي يادلال شفتي كيف مقدرينه وعاطينه قيمته!
قال الجمله الاخيره متهكما..
دلال تنهدت بحزن وقعدت ساكته..
عمار تنهد وقال:قيمة كبيرة هدى ورمز كبير للبلاد..ربي يشفيه ويعافيه..
دلال:اللهم آمين...
عمار:باهي توا نا عندي مشوار ضروري بنعديله بنصكر بابا..
اسيا شبحتله واشرتله بيدها تحي فيه:السلام عليكم..
عمار ابتسم وردلها التحيه بالإشارة ورد:وعليكم السلام..بالسلامه ياأمها..
دلال بإبتسامه:في أمان الله ياباتها..
ضحك وهو يأشرلها بيده ع خدوده..
اسيا شبحت لأمها وهي تضحك وتأشرله بيدها وهو كذلك بعدين صكروا الزوز..
دلال شبحتلها بشك وهي مبتسمه وقالت:هي نوضي معاي نمشوا لماما وبودي..
اسيا بحماس:بودي.
ومشت طلعت تجري وامها طلعت وراها وهي تضحك..
🍁🍁🍁🍁
يتمشوا في محل كبير ويشوفوا في اكسسورات لتسريحة شعر..
ابتهاج:حلو هدا روفي يمشي مع التسريحه اللي بديريها..
رفقه قعدت تشبح للهيدبيس وقالت:امم حلو صح..خلاص بناخده هو..
وخداته ابتهاج وحطاته في الكيس..
رفقه:خلاص كملنا..
ابتهاج:تمام خل نمشوا للكاصه هي..
رفقه ابتسمت..
ومشوا مع بعض للكاصه..
حطت ابتهاج الحاجات وهي تكلم فالبايع..
ورفقه تشبحلها بحب..
كانت ليها اخت مش حمي تعامل فيها بكل ود...
اكثر شي حباته رفقه في ابتهاج هي حبها لخوها ياسين من حبها ليه ادلل في مرته وتعامل فيها احلا معامله...
🍃وفي من تكره مرت خوها في عيشتها وتندمها ع النهار اللي خدت فيه خوها وفي من يعطوها عذر ويقولوا تحب خوها وتغير عليه طبيعي!!لا والله ماهو طبيعي هدا مرض نفسي وخفة عقل لاغير🍃
غيرت عيونها عنها وشبحت لواجهة المحل شبحت من ورا المرش لقت راجلها واقف مع صاحبه ويهدرزوا..
رجعت شافت رفقه لإبتهاج بإبتسامه..
البايع:250..
رفقه سمعاته وطلعت من شنطتها الفلوس وقعدت تعد فيهم وابتهاج تشوفلها...
خدت رفقه الفلوس اللي يبيهم ومدتهمله..
خداهم...
وابتهاج خدت الكيسه وقالت:هي..
شدت رفقه ذراع ابتهاج واشرتلها بحواجبها القدام..
شبحت ابتهاج القدام وشافت مجدي..
ابتسمت بخجل وعضت ع شاربها ورفقه تضحك..
لما وصلوا في الباب دارو ارواحهم عاديات..
فتحت ابتهاج الباب وطلعوا..
جو عيون ابتهاج فعيون مجدي...
نزلت عيونها لوطا خجلا..
وهو غير عيونه ولف وجهه ايمينه وهو مبتسم ابتسامة خفيفه..
فهاللحظه التفتلهم ياسين وقال:خلاص؟
رفقه هزت راسها بإيجاب..
وفتحت باب السيارة وركبت..
وابتهاج ركبت من الخلف..
ياسين:هي ميقو..نتلاقوا غدوة ان شاء الله
مجدي ابتسم وقال:ان شاء الله..
ياسين مشي للباب وهو يقول:هوينا..
مجدي رفع يده وحياه وهويقول:في امان الله..
ركب ياسين وتحرك..
وفاتت السيارة قدام مجدي وهو يشوفلها..
جو عيونه ع ابتهاج تشبحله ولما شبحلها غيرت عيونها وع وجهها ابتسامه خفيفه..
مجدي مسح بيده ع لحيته وقال وهو مبتسم بتعجب ممزوج بالفرح:والله مانتخايل البنت فيها حاجه..
نزل يده ومشي لسيارته وهو يفكر...
وركبها وشغل اغنية تامر حسني "مالي عينيا" وهو مبتسم وتحرك..
🍁🍁🍁🍁
الساعه 7:45 مساءا..
خشوا للحوش..
هي شاده ولدها في غمرها..وهو شاد اكياس قضيه واخدها للحوش..
نور وهي تصكر في الباب:والله غير مش رزان محلفتنا راني قلت..
مالك:خلاص عاد انهي..ومشي للكوجينه..
هي مشت وراه وقالت:حكم ضميرك يامالك اللي دير فيه خالتي هدا يرضيك؟
مالك خش الكوجينه وهو يقول:اكيد لا...لكن هادي اامي يانور راك تنسي..
نور مطت شواربها لداخل بغضب بعدين مشت بولدها للدار وهي تقول:كان أم يحقلها تكون ظالمه!
وصلت في دار النوم خشت بولدها وصكرت الباب..
اما مالك طلع من الكوجينه وقف في الباب وقعد يذكر فكلام امه..
⚡فلاش باك..
كفايه بغضب:وصل لخوك الكبير قوله قالتلك امك معاش تجيني..
مالك:تي غير شن تقولي يام بس!
كفايه:معقوله فالسبوع مانشوفاش كان يوم واحد!يجي يقعد ساعه ويروح!
مالك:تو مش كل يوم يكلم فيك يام!
كفايه:اني نبي نشوفه كل يوم..امه اني وهدا حقي عليه..لكن هو خلاص لاعاد يعرف حق امه ولا امه نفسها في جرة هديكا السنيورة بنت سعيده..
غمض مالك عيونه وفتحهم بملل..
كفايه دمعوا عيونها وهي تقول:حسبي الله فيها..
مالك بضيق:خلاص يام تربحي تو نقوله تو نوصله خلاص...
ونور واقفه بولدها فالسقيفه وتسمع فيهم وهي مضايقه ع الآخر..
⚡الوقت الحاضر..
حرك راسه يمين ويسار بأسف ومشي بطريقه للدار..
🍁🍁🍁🍁
في الصاله...
التلفزيون كان مفتوح ع قناه جايبه مسلسل "الحب الأعمى"..
قدام الشاشه بمسافه كان مقعمز ميلاد وسط كومة العاب ويلعب بيهم..
وراه امه وبوه مقعمزين ع مندار مقابل التلفزيون...
امه كان حاطه راسها ع صدر بوه وهي تتفرج..
وبوه يشبح للتلفزيون بإمتعاض..وفيده صونيه مكسرات مرة مرة تاخد منها مرته وتاكل..
حلقة المسلسل كانت حلقة عرس البطل والبطله..
ويطل بوراك اوزجفيت بالبدله البيضا..
رزان لما راته ضحكت وقالت:واخيرا يانيهان صبرتي ونلتي..
عماد نزل عيونه وشبحلها..
وهي تاكل وتتفرج بإنسجام..
غير عيونه عنها ونار الغيرة تاكل في قلبه..
شبح لولده شويه بعدين ابتسم بمكر وبدي يغني:
قال الأرنب لإمو تسمحلي روح العب..
رزان رفعت عيونها وقالت؛عماد!
ميلاد شبح لبوه بعدين جاهم يمرد بسرعه..
بعدت رزان عن عماد وقالت:علاش هكي عماد!
عماد شبحلها وقال بإستعباط:خيرك!!
وصل فيه ميلاد وقعد يخبط بإيديه الصغيرونات ع رجل بوه ويقول:بب..بب..وبدي يبكي.
عماد خبط بيده ع جبهته وقال:نسيته بكل...خداه قامه وحطه ع رجله وخدي الريموت وحط طول ع طيور الجنه وهويقول...الأغنيه عالقه فدماغي حبي قعدت نغني فيها تلقائي..
ورزان تشبحله ع جنب وهي رافعه حاجبها..
عماد ماباش يشبحلها لما حط ع طيور الجنه علا الصوت وقعد يغني مع الأغنيه الموجوده ويرقص في ميلاد..
هي ضحكت وحركت راسها يمين ويسار...
بعدين اتكت ع مسند المندار وهي تتفرج عليهم بإبتسامه حب..
هو شويه وشبحلها..
ابتسمتله..
هو ابتسمت وحط ميلاد لوطا..
بعدين قربلها وباسها بهويام وهو مغمض عيونه..
وهي غمضت عيونها وبادلاته...
لحظات وبعد وحط يده ع خدها وهو يشوف لعيونها وقال:الله غالب نحبك زي المهبول..
هي ضحكت وقالت:حتى اني ومانشوف في حد احلا منك..
ضحك وحط جبهته ع جبهتها وهي مبتسمه..
بعدين بعد وخداها فحضنه..وهو وياها برغم شعور الحب اللي ماليهم ومحاوطهم مش قادرين يفوتوا لحظه بدون مايحسوا بالخوف وألم الإنتظار...
🌴🌴🌴🌴
الساعه 12:00ليلا..
الزوز راقدات ففراشاتهم وهما يشوفوا لتليفوناتهم..
حميده:الطلبيات بنوقفوهن تو ع العرس
غاليه:ايه..
حميده؛واجد يكلمن فيا ع الخاص يبن حجز شهر واحد..
غاليه:نصه..
حميده:باهي تو نزل منشور وخلاص..
وبدت حميده تكتب في المنشور ع الصفحه متاع معملهم..
غاليه:تس تس تس..
حميده نزلت المنشور وقالت:خيرك..
ورت غاليه شاشة هاتفها لحميده وقالت:شوفي محمد حسن كيف ولى..
حميده شبحت للشاشه وقالت:لاحول ولاقوة الا بالله!!
غاليه:ريتي بالله..وكانهو فنان عند بلاد تانيه راهو ماخلوا مادارو ع خاطره..
حميده بأسف:الله غالب هدى اللي مقدره عليه ربي..ان شاء الله ربي يشفيه وخلاص..
غاليه رجعت شافت لصورته وعيونها دمعوا..
وحميده حطت تليفونها جنبها وهي مستاءة ع الآخر..
🍃هديكا اخرصورة اكانت لأسطورة الفن الليبي اللي ياما طلعوا من تحت ايديه فنانين وفنانات ليهم شهره كبيرة في العالم العربي..
زي ذكرى...ولطيفه التونسيات...
موسيقار لايقل فنا وعظمة عن الإخوة الرحباني..بل وانه يكاد يساوي محمد عبد الوهاب بما قدم واعطى للموسيقى والغناء في بلادنا..محمد حسن قيمة كبيرة..محمد حسن ثراث..
محمد حسن رمز للفن الليبي الاصيل...
وهالرمز...
رحل بهدوء...رحل بدون ضجه ولاصخب..
🍁17\12\2017..
الساعه 8:00مساءا..
مقعمزة فدار المعيشه حدا امها وخوها والصغار حواليهم..
كانت تصفح فالفيس..
وهي تتصفح جي قدامها الخبر..
دلال بصدمه ممزوجه بالألم:حيي!
شبحتلها امها بخوف وقالت:خيرك!
دلال دموعها طاحوا وهي تقول:محمد حسن توفى ياماما..
نعيمه ارتسمت ع وجهها ملامح الألم وهي تقول:لا اله الاالله الله يغفرله ويرحمه..
ودلال تشوف للخبر والصور المرافقه ليه ودموعها ينزلوا منها سيل...
▪▪▪▪▪▪
خشت عليها الكوجينه وهي تقول:محمد حسن توفى ياغاليه..
غاليه غطت الطنجرة وقالت بألم:لاحول ولاقوة الا بالله..
حميده ودموعها ينزلوا:مات من القهره..
غاليه بدموع:والله حق بانت فيه..الله يرحمه ويغفرله..
ع خشة محمد وهو يقول:امتى عشاكن..
شبحتله حميده وقالت:سمعت بمحمد حسن..
شبحلها وقال:توفى !
حميده هزت راسها بإيجاب..
محمد بأسف:تس تس تس..الله يرحمه مسكين.
▪▪▪▪▪
مقعمزة تبكي وترشف..
وحداها بناتها
وحده تبكي بصمت والتانيه تشوفلهم وهي مش فاهمه..
روان:من هو محمد حسن؟
رانيا رشفت وقالت:فنان كبير يغني..روان ريتي اغنية سمحه والخاطر غاويها اللي ديما يولع فيها سند فالسيارة اغنيته..
روان:اهااا..
زينب رشفت وقالت:الله يرحمه..
🍁🍁🍁🍁
🌟🌟🌟🌟
ذكرتك وجنبي شمعه...
داريتها ع الريح...داريتها ع الريح..
تقطر ونقطر دمعه..
والدموع ع رحيلك تقطر يارفيق العود ياأسطورة ياموسيقار ليبيا الأول...
ووالله لوفي فالعالم انصاف لكنت انت ضمن اهم الموسيقين المعاصرين..
محمد حسن قامه كبيره مايسعنيش وقت البرنامج اني نحكي عنها..بس ع قد مانقدروا اليوم نتكلموا عن نقطة من بحره الكبير..
محمد حسن رحلت ورحل معاك ابداع لايتكرر..رحمك الله..
اكرم..سمعنا..
وحط اكرم اخر اغنيه غناها محمد حسن...
🍃الأغنيه..
اللي يلقي في كلماتها فهالوقت عمار لدلال وهو يكلم فيها بالهاتف..
🍃ان مات وطنا وين ندفنوه..
ومن اللي يفصل اكفانا
وفي وطنا من اللي نعزوه
ووين ننصبوا خيمة عزانا..
تراب وطنا وين مانبيعوه..
ويش ناخدوا في ميكانه..
تراب وطنا بيش نشروه..
ان بعنا قبورة ظنانا...
وان كان وطنا مات ياهوه..
يموت كل شي قبل اوانا..
ايموتن ضمايرنا وننسوه..
وايموت كل شي في حشانا..
ويموت الاخ من يد خوه..
ويموت الحشم في نسانا..
ويموت الولد قبل بوه..
القي بوه بايع زمانا..
ويموت كل شي نزرعوه..
في وطنا ياشقانا..
احنا وطنا ليش نهدموه..
بعد مابنينا اركانه..
احنا وطنا ليش نجفوه..
بعد ماافرح بينا وجانا..
احنا وطنا ليش نبخسوه..
بعد مادفعنا اثمانا..
احنا وطنا ليش نقتلوه..
بعد ماروي من دمانا..
احنا وطنا مانهونوه
والوطن راهو امانه..
دلال بدموع:راجل وطني مش بس فنان..
عمار:وطني بمعنى الكلمه غير في من ناس محدود تفكيرها مش فاهمين ان الوطنيه مش حكر ع اصحاب توجه ما يقولوا هدى ياما غنى للقدافي ودار ومادار زلم..طبال وغيره وغيره من الصفات السيئة..اجحفوه وهضموا حقه..
دلال رشفت وقالت:حرام يتجاهلوا فنان بحجم وطن ع خاطر توجهه فالنهايه انتمائه لبلاده وبس..
عمار تنهد بألم وقعد ساكت..
ابتسمت دلال من بين دموعها وقالت:حبيته بسببك..
ابتسم..
دلال:اول حاجه حركت قلبي جيهتك هي اغنيه ليه...
متاع لأنك حبيبي..
عمار بإبتسامه:اها..لأنك حبيبي..لأنك حبيبي..لأنك حبيبي عودت عيني بيك...مذكر كويس هداك اليوم..
دلال بإبتسامه من بين دموعها:اكثر اغنية كنت تحبها انت سمحه والخاطر غاويها..ياما غانيتهالي..
عمار بإبتسامه عشق:وانتي كنتي تحبي اغنيه حبيبي الوفي وتغنيلي فيها واجد..
دلال تنهدت بعدين قعدت تبكي مرة تانيه..
وهو تلاشت ابتسامته وحلت محلها ملامح الحزن...
🍃🍃🍃🍃🍃🍃🍃🍃🍃🍃🍃🍃🍃🍃🍃🍃🍃
20\12\2017..
الساعه 12:00قبل الظهر..
في حوش ميلاد تحديدا الصاله..
اللي كانت معبيه بنساوين العيله...
وفي نصهم العرايس الزوز...
ويشتوا...ويصفقوا وصوت تصفيقهم كان موحد يصدح فالقطعه كلها..
💓احني وادينا وادي لوز حتى عرايسنا...
..........
زوز عرايس ياسعدودي..والحنه حنة عبودي..
......
زوز عرايس ماشاء الله..والعقبة لحجة بيت الله..
......
زوز عرايس في مرة...والحاسد يكفينا شره..
.....
ياوين عرفها***** حط الألف وزاد الميه...
....
احني شجرتنا شجرة حنه اللي ياخد منا يتهنى..
....
يافايح ياوريق الحنه...ياسعد اللي جنس منه...
🌹وسعيده ادور بالمبخره عليهم وتبخر وتغني معاهم..
وفضيله تهيج فيهم وتشطح ولاكإنها حامل..
ورباب ترقص هي وخالتها كفايه...
والباقي يغنوا بحماس ويصفقوا ..
والعرايس يتفرجوا عليهم وقلوبهم طايرة من الفرح...💕
💕💕💕💕💕
ومش غير عرب القطعه رابخين..
حتى السراته مش مقصرين...
في حوشهم اللي فالبلاد..
في وسطه تحديدا نساوين العيله كذلك كانوا يشتوا والرجاله يسمعوا فيهم فالمربوعه..
💓مبروكين عليه اللمه..فرحانات خواته وامه...
.....
يامبروك عليه امباته...النشاد علي عماته..
.....
مبروك العرس والخيمه..ياجايي لحوشي ديمه..
....
امينه..
يامبروك ع ولد امي..ان شاء الله قبل الحول يسمي...
كلهم ضحكوا وهي معاهم تغمز بعينها وكامله ضربتها ع ذراعها وقالت وهي تضحك..عطك الخير..
.....
اصاله..
ياربي كبر همتهم النشادين علي عمتهم..
.......
انشد يلي تريد نباه..شيخ فالجامع تلقاه...
.....
عيت اجواد وعيت عصاره...هلنا فالتاريخ منارة
......
وياسرتاوي ياسمح يارشوا عليه الملح...
....
افرح ياحوش ولا تهتز..بدينا عرس ولاد العز...
💕بالزغاريد اصواتهم كانت مسموعه في الشارع اللي هما فيه...
وبدي اسبوع كامل من الفرح...
ابطاله يعدوا في ايامه ويراجو بفارغ الصبر امتى يجي اخر يوم....ويصير وصال...لافراق بعده....
~~~~~~~~~~
