Sa gitna ng gabi, tayo'y nagkausap,
Naging magkaibigan kahit di magkaharap,
Habang ang iba'y tulog ng mahimbing,
Ang mga diwa nati'y gising na gising
Kaibigan, 'yan ang turing ko sa'yo
Nagkaroon ka ng puwang sa puso ko
Lahat ng sinabi mo, naniwala ako
Kaibigan, akala ko ika'y totoo
Kaibigan, nasaan ka na?
Ikaw ba ngayon ay masaya?
O tulad ko, ika'y hindi rin mapakali
Dahil alam mo ang 'yong pagkakamali
Kaibigan, ikaw daw ay huwad
Buhay mo raw ay isang aklat
Isang imahinasyon, isang ilusyon
Isip ko ngayon ay gulo, puno ng tanong
Kaibigan, sana'y iyong masagot
Mga tanong na sa puso ko'y nakabaon
Sana malaman ang katotohanan
Pagkat masakit ang mapaglaruan
Kaibigan, kami ngayo'y nasasaktan
Pagkatao mo pala'y isang palaisipan
Katauhang balot ng kasinungalingan
Pagmamahal namin sayo'y nasayang
Subalit sa kabila ng mga nangyari
Heto ngayon, umaasa pa rin kami
Na kahit sa huling sandali
Ang katotohanan ay iyong masabi
Kaibigan, buhay mo man ay palaisipan
Pagmamahal namin sa'yo ay makatotohanan
Kaibigan, buhay mo man ay huwad
Tandaan mo, ika'y aming pinapatawad
