حبيباتي..
بالله معاش تسألوني ع الروايات اللي مسحتهم شرحت السبب مئات المرات وهالمرة اخر مرة نشرحه..
رواياتي اللي فاتوا برغم قوتهم الا ان فيهم هلبه مآخذ شرعيه تركبني ذنوب اني وياكم..الواحد يالله يتحمل ذنوبه ونرجوا ونتوسلوا الله يغفرها..يابال يحمل اوزاره واوزار غيره يوم القيامه..
لما ننحط في هداكا الميترو ونص والله مانافعني واحد غير العمل الصالح..
في منكم بيقول امسحي اللي تشوفي انه غلط..
راهم هادم 9 روايات وطوال وفي هلبه مقاطع لما بنمسح لازم نصلح ونضيف ونعدل في النص وهدا كله يبي جهد ووقت والواحد مش ضامن عمره والله لو جتني ساعتي مش حنقدر نوخرها ولو جزء من الثانيه..
لهدا اخترت نمسحهم كلهم..
صح جهد وتعب وروايات جميله لكن من ترك شيئا الله عوضه خيرا منه مازال اجمل..
وتوا بعون الله ومشيئته بنبدا بأسلوب جديد ونخلي حروفي تشهدلي ماتشهدش عليا بإذن الله..
ارجوكم معاش تسألوا عنهم مش حيرجعوا مش حيرجعوا وتم..واعاده كتابتهم صعبه جدا الوقت الحالي..
واخيرا..
روايه البطل المغمور راهي روايه ثقيله وقويه وطويله شوي وتبي مني جهد هلبه واني صحتي مش تمام..لذلك موقفتها حاليا لين ربي يتمم عليا بالشفاء بعدين نكملها إن شاء الله تعالى..
توا بنكتفي بالروايات القصيره فقط واللي احداثها ماتعتمدش على خيالي بشكل كبير بش مانتعبش..
وهادي اخر مرة نوضح اخر مرة...
🍀🍀🍀🍀🍀🍀🍀🍀🍀🍀🍀🍀🍀🍀🍀🍀🍀
انتم الآن مع نهاية رواية "في المنفى"
🍀..
مقعمزين ع رشادات كبار ويتفرجوا عليهم من بعيد شوي..
مياده بإبتسامه:ماما متحشمه هلبه اول مرة نشوفها هكي.
احمد شبحلها وقال:على فكرة طبعها هدا انتي واخديته خجوله هلبه زيها
ميادة ابتسمت بخجل..
احمد ابتسم وقال:هاه..مش قتلك..
مياده شبحتله..وهو قعد يشبحلها بإبتسامه..
شويه قال:ندعي ربي يصير اللي في بالي بش تصير الحاجه التانيه اللي في بالي حتي هي..
ضحكت مياده وغيرت عيونها عنه وهو يضحك..
.......
وراهم بمسافه كانوا واقفين مهرة ودود..
ودود:شفتيه كيف تغير حاله لما جت؟
مهره:حتى الدم جري فوجهه تقول كان مييت وحييته..
ودود شبحلها وقال:تتوقعي يردها؟
مهره وهي تشوفلهم بإبتسامه:متأكدة...
🌷🌷🌷🌷
تحت الشجرة..
مقعمزة ع كرسي حداه وهي توزع فنظرها ع المنظر اللي قدامهم..
بعدين شبحتله جت بتكلمه تفاجئت وين لقاته يشبحلها بنظرات عمرها ماشافتهم منه..
نظرات اخجلوها وخلوا وجهها احمر..
قالت بشي من الخجل:خيرك تشبح هكي؟!
مصطفى ابتسم وقال:كان نلقى مانرشمش..
راحيل غيرت عيونها عنه وقالت بصدمه وخجل:لا مش هكي عاد..
مصطفى:ههههههه..
شبحتله طول..وقعدت تتأمل فيه وقلبها يدق بقوة هي هي نفس الضحكه الحلوة وبالعكس زادت حلاوة مع ملامح وجهه المجعده..
هدا ضحك وهو يشوفلها بعدين تنهد وقال:قداش كنت غبي..غبي بإمتياز..
راحيل بأبتسامه:علاش!؟.
مصطفى:اللي خليتك تبعدي عني وعشت من غيرك..
راحيل نزلت عيونها وهي مبتسمة..
مصطفى:ديما يقولوا ماتحسش بقيمة الحاجه الا لما تفقدها..
وهدا اني ماحسيتش بقيمتك في قلبي الا لما فقدتك وضيعتك من بين ايديا..
راحيل شبحتله وقالت:نبي نسألك سؤال؟
هو بإبتسامه:اسألي
راحيل:علاش قعدت هارب السنين هادي كلها؟ علاش ماعطيتش علم اقلها صغارك عرفوا وضعك وماعاشوش وهما يحسابوا بوهم متخلي عنهم وناسيهم..
تنهد مصطفى وقال:تحشمت..
راحيل:تحشمت؟!
مصطفى:ايه..تحشمت منك ومنهم..
لما كنت بصحتي وكأني مالك الدنيا باللي فيها خليتكم وراي وعطيتكم ظهري ومشيت...كنت نسأل عنكم ونعرف اخباركم هداكا الوقت من معارف غادي بس اتصال مباشر بيكم مااتصلتش..وبعد وليت عاجز تبيني نبلغكم ولانجيكم واني عارف ومتأكد انكم مش حتخلوني بروحي وحديروا معاي واجبكم والزايد..الواجب اللي اني اهملته لما كنت بصحتي اتجاهكم!..
راحيل تنهدت تنهيده الم مكتومه..
مصطفى:كنت حنطلع فوق نذالتي وقح..واني لو سمحت لنفسي فالسابق اني نكون ندل مش حنسمحلها تخليني وقح..
راحيل:هادوا صغارك فرض عليهم خدمتك..
مصطفى:وحتى اني كان فرض عليا رعايتهم وسيبتهم قبل مايشتد عودهم..
راحيل شبحت القدام بحزن وقالت:طلقت صفاء لأن هي طلبت؟
مصطفى:طلقتها قبل لتطلب..غلطة عمري ارتباطي بيها خسرني اغلى مانملك وخسرني صديق زي معروف الله يذكره بالخير..وخسرني..حط ايديه على رجليه
هي شبحتلهم وقعدت ساكته..
مصطفى:تصدقي بسبب انانيتها خربت حوش صاحبتها واطلقت في جرتها حتى هي..
ارتسمت على وجه راحيل ملامح الإستياء..
تنهد مصطفى وقال:خلاص هي مشت في حالها مانبيش نزيد نتكلم عنها اكثر من هكي..
راحيل:ايه احسن..باهي انت كيف درت بعد قعدت بروحك غادي..
مصطفى:كان ليا معارف غادي عرب وكنديين ساعدوني هلبه..اني خشيت حالة اكتئاب ماطلعتش منها الا بفضل الله ثم انتي..
راحيل وهي مستغربه:اني؟!
مصطفى ابتسم وقال:طول الوقت كنت نفكر فيك ونذكر في ايامنا مع بعض نذكر اصرارك وتشجيعك ليا ع القرايه بش نوصل للي نبيه..راحيل اني كملت قراية غادي على خاطرك..
وراحيل تسمعله وهي مندهشه وقلبها يدق بسرعه..
مصطفى:ضحيتي بأغلى ماعندك بش يولي مصطفى دكتور..ومصطفى ماباش يخلي تضحياتك تريح ع الفاضي..والله ع خاطرك كملت ياراحيل..
عيونها تعبوا دموع وهي تشبحله كيف يتكلم..
تعابير وجهه نظرات عيونه..كل شي فيه متغير ولى يعبر عن كل شي في خاطره بكل حريه بدون مكابرة او غرور..
مصطفى ابتسم وقال:باهي انتي شن خلاك تكملي قرايتك؟
راحيل ابتسمت وقالت:اللي حواليا اصروا عليا قلت في نفسي كلهم شايفين انك تقدري تتفوقي فقرايتك ياراحيل بالذات انت لما كنت تقول لو تهتمي بقرايتك شويه يصير منك..علاش ماتكمليش؟!
ابتسم على جنب ونزل راسه لوطا..
راحيل:لكن قعدت نقول لنفسي اني وين نحب ندير حاجه نعطيها كل ماعندي ونبدع ونتقن فيها..فليش مانحاولش نحب القرايه؟!
قام راسه وشبحلها..
راحيل بضحكه:قعدت نمثل اني نحبها لين حبيتها حق ونجحت فيها.. وكان مازال خاطري نكمل وكملت وتخصصت زراعه المجال اللي نفهم فيه ونحبه وتخرجت منها بتقدير ممتاز..جيت بنكمل لكن ظروف وفاة بوي الله يرحمه والصغار اللي بدوا يكبروا خلاني نوقف وقلت كان ربي عطاني عمر حنكمل بعد مالصغار يكبروا ويوصلوا لسن الرشد وهدا اللي صار..
مصطفى ابتسم بتنهيده وقعد ساكت وهي تحشمت وغيرت عيونها عنه..
مصطفى:نطلب منك طلب..
راحيل شبحتله..
مصطفى:حاولي تغيري موقف عياد..
راحيل:غيره بروحك اني ماليش علاقه..
مصطفى بضيق:كيف بنغيره بروحي؟!
راحيل:شغل دماغك شويه وتوتعرف كيف!..
مصطفى ابتسم وهو يحرك فراسه يمين ويسار..
راحيل:نحكي جد..
تلاشت ابتسامته..
راحيل:انت اللي خليته ياخد منك موقف وانت بس اللي تخليه يغيره...
مصطفى:صعب هلبه ياراحيل..
راحيل:علاش؟
مصطفى:لو نبي نغير موقفه اتجاهي لازم نكون معاه ديما بش نحاول نقرب منه..
راحيل؛واهو طلع ماشاء الله دماغك قاعد يشتغل.
مصطفى رفع حواجبه وهو متفاجئ..
راحيل:ولي لبلادك يامصطفى وخليك حدا صغارك واحفادك مستقبلا خيرلك من العيشه هني بروحك بعيد عنهم..
مصطفى ابتسم ع جنب ورفع حاجبه وقال:لكن اني مانروحش عزابي..
راحيل قلبها طار من مكانه..
مصطفى:كان عطوني بنية من البلاد هكي في عز شبابها عمرها هكي في الاربعينات..عيونها خضر فيروزيات وشعرها طويل واسود..عقد حواجبه وقال..شعرك قاعد طويل واسود ولا؟
راحيل رفعت حواجبها وقالت:تبيها برا اطلبها من اهلها..
وناضت ومشت عنه وخلاته وهي ترعش...
ومصطفى قعد يضحك وقلبه طارب من الفرح...
🍀🍀🍀🍀
الساعه التاسعه ليلا..
"علاش مستعجله!؟"
احمد:اول شي عمتي ماتقدرش تغيب اكثر من يوم واحد عن الخدمه غادي..وتاني شي وهو الأهم عياد ماسمحلهاش بأكثر من يوم واحد..
مصطفى بضحكه:كيف!؟
ضحك احمد وقال؛هو راجل حوشهم غادي في امور مخلياته فيهم عمتي يحكم ويطلق حتى عليها هي..
ابتسم مصطفى وهو عاقد حواجبه..
احمد:يخطر عليا فجدي الله يرحمه وين نشوفه فيه منه هلبه بالذات الوعارة وقسوة القلب..
تنهد مصطفى:اني اللي نعرفه..الله يرحمه..
🌿🌿🌿🌿
وتاني يوم من الصبح روحوا بدون ماتسلم راحيل على مصطفى وهو فاهم قصدها...
وانتهي اول لقاء بيناتهم بعد غياب سنين..وكانت نتيجته غير متوقعه لمصطفى فرحاته هلبه..
اما راحيل فكانت طول الوقت تفكر في كل شي من زمان وتوا وحتى بعدين..
🌾🌾🌾🌾
الساعه التاسعه ليلا..
في حوش اهل راحيل..
فدار المعيشه..
وريده؛يعني خلاص قررتي توليله..
راحيل هزت راسها بإيجاب وقالت:ايه..هو بأمس الحاجه لينا..
وريده:ليك..
راحيل:حتى لو ماقالهاش اني قريتها فعيونه..اني نحبه ياوريده برغم كل شي مازلت نحبه هلبه وحبي ليه هو اللي خلاني نقرر نوليله..مادمت نحبه لازم نوقف معاه ونسنده لين يرجع يوقف على رجليه..
وريده:قصدك هو مازال يقدر يوقف على رجليه؟!
راحيل:ايه..الشاب اللي يخدم معاه فالمستوصف قال مع العلاج الطبيعي يقدر يرجع يمشي تاني ولو ان فترة العلاج طويله بس النتيجه مضمونه..
وريده بإبتسامه:انتي بنت اصل ياراحيل مافيش منك.
ابتسمت وقالت:لافي هلبه ياوريده هلبه مالقوش من يقدر..
وريده:ماتخافيش مصطفى يرجع يدير زي مادار قبل؟
راحيل بإبتسامه:تس تس..مصطفى فيه هلبه عيوب صح وغلط هلبه لكن معدنه طيب ياوريده..
وريده:مرات يكون هكي حق...المهم توا خديتي راي ولدك؟
راحيل ارتسمت على وجهها ملامح الضيق وهي تقول:ايه فتحت معاه الموضوع قالي اللي يريحك ديريه لكن لو غلط فيك مرة تانيه اني بنتفاهم معاه...
وريده:مازال مش متقبله..
راحيل بضيق:للأسف..ومانيش عارفه شن بندير معاه..
وريده:خليها للوقت وخلاص..
تنهدت راحيل وهزت راسها بالموافقه...
🌿🌿🌿🌿
ومرت الأيام..
ومصطفى بدي يستعد للعودة للبلاد..
كان عارف روحه انه حيواجه هلبه صعوبات واولها نظرة الناس ليه بعد اللي داره لراحيل..
لهذا بينه وبين نفسه قرر انه يثبت ويتحمل ويحاول يصلح اللي فسده بكل اللي يقدر عليه..
في يوم السفر..
مصطفى:مهرة بنتي مانيش مسيبكم بنزوركم مرة مرة وحتى انتم تعالوا غادي..
مهرة ببكي:ان شاء الله..
ودود بضحكه:جيبلها عريس من غادي..
ضرباته ع ذراعه..
ضحكوا مصطفى وودود...
🌿وودع مصطفى المدينه اللي احتضناته في غربته
واللي عاش فيها منفي..عقابا ع خيانته في حق شريكة عمره وكفاحه..
وفهالمنفى عشقها بكل معنى كلمه..
عرف انه من غيرها لاشيء..
وعرف انه بيها هي يلقى نفسه ومن دونها يضيع..
في المنفى
عرف مصطفى قيمة راحيل الحقيقيه وعرف ان سومها غالي مش اي حد يوصله زي ماقال بوها
وبعد ماسنحتله معاها فرصة تانيه حلف انه مش حيفرط فيها..وحيشريها بما قعد من سنين عمره..
🌷🌷🌷🌷
قبل لحظات من وصول مصطفى للبلاد..
في حوش احمد..
كانت مياده هي وامها فالحوش..
مياده تجهز في دار بوها..
وراحيل اطيبلهم فالغدي..
كانت مدايرة الآكلات اللي يحبها مصطفى...
رشدة كسكاس..ومصارين محشيه..ومبطن..وكفتة طرابلسيه..
وجابتلهم حتى حلويات هي دايرتها..
كعك حلقوم..ومقروض وغريبة القصب اللي يفضلها مصطفى..
بعد ماكملت تجهيز كل شي..
طلعت من الكوجينه وخدت عبايتها ووشاحها من ع الشماعه وقعدت تلبس فيهم وهي تنادي:مياده..يامياده..
جتها ميادة تمشي بسرعه وهي تقول:نعم ماما..
راحيل وهي تلف فالوشاح على راسها:كل شي..واتي..انتي سقي بس..وبعد يتغدوا..قعدت تساوي فعبايتها وهي تقول..طول حطي شاهي اخضر ع النار..
مياده؛حاضر ماما..
راحيل:بعد تكملي الحوسه طول روحي بنتي..
مياده:حاضر ماما..
مشت راحيل للباب ولبست كندرتها وطلعت من الحوش..
ومياده ولت تكمل في شغلها..
🌾فهالوقت..
وصل مصطفى فاالبلاد بعد ماجابه احمد بالسيارة..
استقبله في مطار معتيقه فطرابلس..
لما خشت السيارة للبلاد مصطفى قعد يتفرج عليها من الروشن..
حس بإرتياح..بأمان..والأهم من هدا كله انه حس بالانتماء..
ابتسم براحه وقعد يراجي بفارغ الصبر امتى يوصل للحوش اللي كان جنب حوش عياد بمسافه بسيطه يعني في سانيه وحده وقريبه ع "رحيله"..
خطموا من قدام السانيه..
شبح مصطفى جيهتها وخطرت عليه ايام زمان كلها ابتسم ابتسامه خفيفه وحلوة..
شويه وخش احمد من البوابه التانيه اللي قدام حوشه..
درس..
ونزل..
فتح الباب الخلفي بينزل الكرسي ع طلعة مياده من الحوش..
لما شافها ابتسم بحب..
وهي بس تشوف لبوها وبطير من فرحتها..
نزل احمد الكرسي ومشي بيه للجهة اللي راكب منها مصطفى..فتح الباب..
وفتحله الكرسي وساعد مصطفى انه يقعمز..
قعمز مصطفى..
مصطفي:بارك الله فيك..
احمد:فيك بارك الله عمي..
وبدي مصطفى يتحرك بالكرسي وهو يشوف لمياده جاياته
وقف..
وصلت فيه خدت يده كبت عليها وكبت على راسه وقالت:الحمد لله ع سلامتك بابا..
مصطفى:الله يسلمك بنتي..
احمد:هي تفضل عمي..
مصطفى:يزيد فضلك..
وبدي يمشي بالكرسي لين خش وخشوا بعده مياده واحمد وصكر الباب..
🌾🌾🌾🌾
في شقة عياد..
بعد ماتغدا دارتله مرته شاهي اخضر..
عطاته يشرب وقعمزت حداه..
بثينه:الجو حلو اليوم..
ابتسم عياد وقال:خاطرك تطلعي؟
بثينه:امم..وين بطلعني..
عياد:وين ماتبي..
ابتسمت بثينه وقالت:باهي خلينا توا من الطلوع بنحكي معاك في حاجه اهم..
عقد حواجبه بآستغراب وقال؛إن شاء الله خير!
بثينه تنهدت وقالت:ماتبيش تشوف بوك بعدين؟
غير عيونه عنها وشبح للبلاكونه وهو عاقد حواجبه..
بثينه:عياد..مهما دار يقعد بوك ياعياد..ربي قال وان جاهداك على ان تشرك بي ماطيعهمش بس..اما في باقي الحياة مهما يكونوا مش كويسين قال صاحبهما فالدنيا معروفا..
عياد:ايه صح..لكن الكلام هدا مش ساهل يندار يابثينه بالذات لما مايخلفش الاب فقلب صغاره ليه غير الوجع والحرمان..
بثينه:لكن توا بوك في حالة ضعف وندم ويبي يصلح عطيه هالفرصه ياعياد ع خاطر ربك والله تشوف الخيرات اللي تنزل عليك من كل تركينه بعدين هدا غير المدسوس في الآخره..
شبحلها..
بثينه؛عارفاته صعب بس وين ادير الطاعه وانت تجاهد نفسك اجرك يضاعف يابال بر الوالدين ياعياد.
نزل عيونه لطاسة الشاهي وقعد يشوفلها وهو ساكت.
بثينه:شوف عمتي كيف رحمت ضعفه وسامحاته كبر قلبها هدا هو اللي خلاها توصل للي هي فيه توا ع قيس نيتها ربي عاطيها..قصدي تعلم من امك شويه..
شبحلها شويه بعدين قال:للأسف مانقدرش نكون زي امي..
ممكن بنتعامل معاه بما يرضي الله لكن اني نسامحه فهادي تبي وقت..لهذا خليها للوقت..
ابتسمت بثينه وقالت:حتى هكي كويس
عياد ابتسم وقال:باهي وين تمشي؟
بثينه بضحكه؛للبحر..
عياد بإبتسامه:تمام..
🍀🍀🍀🍀
اما في حوش احمد..
تغدوا مع بعض..
وكان مصطفى يراقب في احمد ومياده وحس في شي بيناتهم..
لماتجي عيونهم في بعض كان يتنحنح ..
وهما هني يستاقظوا ويغيروا عيونهم عن بعض..
عموما الغدا كله مشي فالتنحيح..
المهم..
بعد الغدي..
غسلت ميادة الماعين..ومدتلهم الشاهي بعدين طلعت روحت طول..
......
هي تفضل خش عمي هادي دارك هني مؤقتا..
شبحله مصطفى وضحك نص ضحكه..
احمد بضحكه:تبي نساعدك في حاجه..
مصطفى:لالا صحيت برا استريح..
احمد هز راسه وهو مبتسم ولف وطلع وصكر الباب..
مصطفى:مؤقتا! ضحك...بعدين حرك راسه يمين ويسار وتحرك بكرسيه للسرير..
🍀🍀🍀🍀
ايه تغدا لكن لما قعدت نراقب فيه لاحظته ياكل شويه شويه وفيسع شبع..
راحيل:زعمه ماعجباش!؟
مياده بضحكه؛تي وين ماعجباش قال فيه قصائد واشعار وهو يشكر..
ضربت راحيل يد بنتها وهي تضحك..
مياده ضحكت بعدين قالت:المهم ياحنه اني سألته..
راحيل:وشن رد عليك ياحنه؟!
مياده:ياحنه قالي اني عندي القولون العصبي
راحيل بخوف:حي!!
مياده؛ياخد في دوا ماما وياكل واموره تمام..
راحيل بضيق:قداش انحرم من حاجه يحبها واولهم الشكشوكه..
مياده ؛بابا يحب الشكشوكه؟
راحيل خطر عليها اول شكشوكه دارتها بعد تزوجوا..ضحكت..
مياده بضحكه استغراب:خيرك تضحكي ماما؟!
راحيل شبحت لبنتها وقعدت تحكيلها ع اللي ضحكها ومياده قعدت تضحك وفي نفس الوقت حبت سرد الذكريات الحلوة بين امها وبوها..لاحظت ان الزوز بدوا يذكروا لبعض في المواقف الحلوة وبس..
🌿🌿🌿🌿
تاني يوم..
مع الساعه العاشره صباحا
طلع مصطفى مع احمد يدهور فيه فالبلاد بدون سيارة..
قعد يشوف في هلبه تغييرات طرأت عليها بس مازالت محتفظه برونقها الخاص...
كان اللي يخطم من حداهم من الكبار يزبطه يوقف ويسلم عليه..
بس نظراتهم ليه مادرقتش اللي فقلوبهم عنه..
لكن هو حاول يتجاهل ..
لعند ماقابل مجدي طالع معاه واحد من ولاده من الحوش..
جو عيونهم في بعض..
مجدي شبحله بإحتقار بعدين ركب السياره مع ولده..
ابتسم مصطفى ابتسامه متهكمه وشبح القدام ..
احمد:اني جيت عشت هني وعمري 11 سنه سيبت اهلي وبريطانيا لان نبي نعيش فيها مع حوش جدي..
مصطفى:شن حبيت فيها..
احمد:حسيت روحي ننتميلها هي..
مصطفى ابتسم وقعد ساكت..
احمد:ربتني عمتي راحيل مع جدي..تعذبوا معاي هلبه على ماتعلمت نحكي عربي بطلاقه بالذات وين جيت نقرا فالمدرسه كنت نكتة المدرسه كلهم يجوا يهدرزوا عليا بش يضحكوا..
ضحك مصطفى وقال:ماتعقدتش؟
احمد :لااني انسان بارد ماندورش فيها الحاجات هادي..وبعدين كنت نحرق في دمهم لما نجيب ترتيب الاول وهما اللي راسب واللي ناجح بالدف..يعني من يضحك اخيرا يضحك كثيرا..
ضحك مصطفى بعدين قال:شن تخصصت في الطب حقه ولامرة سألتك على الحاجه هادي؟
احمد ضحك وقال:جراحة مخ واعصاب..
مصطفى وهو متفاجئ:نفس التخصص..
احمد:عارف هدا علاش تصاحبنا اصلا اني خشيت االتخصص هدا بسببك..
مصطفى ضحك وقال:ماشاء الله من لما كان عمرك 16 سنه اول مرة عرفتك فيها وانت شاب حيوي وناشط وايجابي..
احمد ابتسم وقال؛مشكور والله..تو بينحمروا خدودي زي عمتي وبنتها..
مصطفى رفع راسه وشبحله برفعة حاجب..
واحمد مستمر في الآستعباط ولاكأنه قال حاجه..
🍀وكملوا جولتهم لين وصلوا في الأرض اللي كان لمصطفى فيها ذكريات لاتنسى..
احلى ذكريات العمر..
شاف راحيل واقفه توجه فالخدام فيها..
رجعت بيه الذاكرة لقبل عشرين سنه واذكر اول مرة خدمت فيها راحيل في الارض..
كانت متقززة وتخدم بالسيف حتى لو كان ماعبرتش بلسانها بس تعابير وجهها تبين..
بنت البي الدلوعه مع السنين ولت بية زي بوها مراة بألف راجل مسؤوله عن هكتارات واسعه وكلها مزروعه..
مسؤوله عن محلات وهلبه املاك متوزعات في ليبيا بكبرها..
ومع هذا في عيون مصطفى راحيل جميله في كل حالاتها البريئة والغشيمه..والذكيه القويه...
مصطفى:هي خل نولوا..
احمد:تمام..
ولف مصطفى بالكرسي ومشي واحمد وراه فاللحظه اللي التفتت فيها راحيل وشافتهم..قعدت تشبحلهم لين ادرقوا بعدين ابتسمت ابتسامه خفيفه..
🌿🌿🌿🌿
بعد اسبوع..
الساعه العاشرة ليلا..
في جنان حوش اهل راحيل..
واقفين يهدرزوا مع بعض..
احمد:موضوع ضروري اللي نزلتك على خاطره اكيد.
عياد بإمتعاض:اللي هو؟
احمد تنهد بإبتسامه وقال:بوك..
عياد:امم..
احمد:يبي يجي غدوة..يخطب منك امك..
عياد ضحك بسخريه وقال:شر البلية مايضحك..
احمد بضحكه:خير مش بليه هدا ياراس اللحم..
عياد رفع حاجبه وقال:باهي قوله يجي غدوة العصر..
احمد شبحله شويه بعدين قال:باهي..تصبح على خير..
عياد:قدامك كل خير..
ولف احمد ومشي طلع من الحوش..
وعياد ضيق عيونه شويه وهو يفكر بعدين لف ومشي ولى لشقته..
.....
وين خش احمد للحوش..لقي مصطفى يراجي فيه..
مصطفى ضيق عيونه وقال:هاه شن صار؟
احمد :قالك تعالى غدوة العصر بس هاه بنبهك مرات يدير اي تصرف يضايقك تحمل.
مصطفى تنهد وهز راسه وقال:تمام تصبح على خير..
احمد؛قدامك كل خير..
ولف مصطفى ومشي لداره..
واحمد وهو يشوفله كيف خشلها تنهد وقال:يارب يتم هالموضوع على خير بش موضوعي اني يتم..
........
مياده وهي تتكلم بالتليفون قالت بضحكه فرح:باهي باهي تمام....وانتي من اهله بوسي..وصكرت..ومشت تجري لدار امها..
طقت الباب...
راحيل اللي كانت اضم في دولابها قالت:خش.
انفتح الباب وخشت مياده وهي تضحك..جت لأمها وباستها ظن خدها بعدين قالت:غدوة بيجوا يخطبوك ياحلوة.
راحيل قريب ماتت من الخجل والصدمه:شن تقولي!!؟
مياده بضحكه:مصطفى بيجي يخطبك من ولدكم غدوة..
راحيل وهي بتتبخر من الخجل:ترا بري اطلعي امشي..
ضحكت مياده ومشت للباب وقالت؛تصبحي على خير ياعروسه..وطلعت وصكرت الباب..
راحيل وهي مفنصة عيونها:اشي القردة!!؟
🌿🌿🌿🌿
عصر اليوم التالي...
في المربوعه..
احمد مقعمز مع عياد..
مقابلهم مصطفى جايب معاه مصباح..
كانوا يهدرزوا في البدايه على مواضيع مختلفه..
عياد كان يتجاهل في بوه ومصطفى مش مدور طول الوقت يسمع في هدرزة ولده ويراقب في تصرفاته وهو متعجب في الشبه الكبير بينه وبين ولده وكأنه نسخه مش فالشكل بس حتى الحركات والاسلوب..
🌷اما فالصالون..
فكانت جايه ام الخير مع كنتها الكبيره وهي من طرف مصطفى..
مقعمزة مع الجازيه ومياده وبثينه وراحيل والهدرزة والضحك شغالين..
وبعد طول هدرزة وبعد ماقدمولهم الضيافه
جي وقت يخشوا في الجد.
في المربوعه..
مصباح:حني اليوم جايين نردوا المية لمجاريها ونردوا ايام زمان الحلوة اللي ماتتعوضش..وانتم عارفين ان مصطفى كان راجل راحيل يوم من الايام وصار بينهم ماصار وكل حد مشي على حاله..لكن سبحانه ربي مازال كاتبهم لبعض..هدا ليش اليوم جينا نبوا نردوا راحيل لذمة مصطفى..
عياد:اممم..بس عندي شروط..
مصطفى بإبتسامه:اللي هما..
عياد:المقدم متاعها اضعاف مقدمها الاول بتلات مرات مع مراعاة تغير سعر صرف العمله من هداك الوقت للوقت..ومؤخرها 35 ليرة ذهب..وتجيبلها طاكم ذهب من قدرها..
احمد ومصباح كانوا يشبحوا لعياد بصدمه..
مصطفى وهو محتفظ بإبتسامته؛واني قلت باهي..
.........
عندي شرط واحد نبي نقولهوله وجه لوجه..
ام الخير:باهي تو نتصل بمصباح ونقوله..
وناضت ام الخير ومشت على تركينه واتصلت بمصباح.
مياده كانت تشبح لامها بحب..
وراحيل كانت تشوف لأم الخير وهي تتكلم بتوتر..
الجازيه:وشن هو هالشرط ماقتيناش عليه!؟
راحيل:تو تعرفوه بعدين..
ع جية ام الخير:بري بنيتي..
تنهدت راحيل وناضت..
مشت لدارها لبست شاربه..
بعدين مشت متوجهه للمربوعه..
وصلت فيها طقت الباب وقالت:السلام عليكم.
لما شافها مصطفى ابتسم من قلبه وقال؛وعليكم السلام.
ومشت قعمزت جنب ولدها..
ماكانش موجود وقتها اخطاهم التلاته..
مصطفى:كيف حالك راحيل.
راحيل بجديه:الحمد لله..قالولك اني جايه بنقول شرطي..
مصطفى بإبتسامه:واني نسمع
راحيل:نبيك تتعالج..
عياد شبحله لاحظ انه اتفاجئ هلبه..
راحيل:عندي خلفيه ع وضعك الصحي وعرفت انك تقدر ترجع تمشي مع العلاج الطبيعي لكن انت كنت رافض تتعالج
مصطفى:خفت من اليأس لان حالتي اهم شي ينفعها هو العامل النفسي والعلاج المدة متاعه طويله..
راحيل:اعتبرهم سبعه سنين الطب..
ابتسم مصطفى..
راحيل:هدا شرطي الوحيد شن قلت؟
مصطفى:ماعندي مانقول غير علم وينفذ..
هي شدت ضحكتها بقوة وناضت بسرعه مشت طلعت من حداهم وهو معاها بعيونه..
عياد قعد يشبحله شويه بعدين قال:عمي مصباح احمد تفضلوا..
انخلع مصطفى من الصوت العالي وشبحله..
ع خشة احمد ومصباح..
🌿🌿🌿🌿
وبعد يومين..
تنقرا فاتحة راحيل ومصطفى..
فهداكا اليوم ماشافوش بعض..
هي كانت تجهز في نفسها للسفر لطرابلس وهو كذلك.
لان مصطفى حيبدا علاجه في احد المراكز الكبيرة غادي..
🌿اليوم اللي بعده..
الساعه 10:00الصبح..
حدا سيارة احمد..
راحيل واقفه على مياده وتوصي فيه:ردي بالك ع حناك دواها يامياده في وقته..مرت خوك ماتخليهاش تركب وتنزل هلبه اركبيلها انتي خير المراة حامل مش باهي ليها ركوب الدروج..باهي..
مياده:باهي ماما باهي كوني هانيه كلهم فعيوني..
قرصتها راحيل من خدها وقالت:ردي بالك ع روحك..
وحضنوا بعض..
مياده:وحتى انتي ديري بالك على روحك وعلى بابا..
بعد عن بعض وراحيل بإبتسامه قالت:حاضر... بالسلامه..
مياده:في امان الله..
مشت راحيل ركبت السيارة وكان جنبها مصطفى شبحتله مياده وهو شبحلها حيوا بعض بحركة اليد..
بعدين خشت مياده واحمد بعد خشت تحرك طول..
في السيارة..
راحيل:بتخطم على عياد ولا..
احمد:ايه بناخده من المدرسه..
راحيل:باهي..
مصطفى:اختار يكون استاذ رياضيات.
راحيل شبحتله وقالت:صدفه..
مصطفى ابتسم وشبحلها..
وهي قعدت تشبحله...
♦️فلاش باك..
قبل 13سنه..
صالح:ايه مالا شنو هي اللي مشت للمدير وكلماته وكلمت بهاء عليك وكانت صاحبه الفكره..
مصطفى بصدمه:معقوله!
صالح ابتسم:خسارتك ماعرفت رحيله كويس يامصطفى...
♦️الوقت الحاضر..
مصطفى في نفسه"لاكنت نعرفها كويس هدا علاش كنت نحس اني مانستاهل كل شي داراته على خاطري"..
راحيل غيرت عيونها عنه وهي متحشمه وقلبها يدق بسرعه..
وهو ابتسم لخجلها وقعدوا عيونه عليها..
درست السيارة حدا المدرسه..
جي عياد ركب..وتحركوا لطرابلس..
طول الطريق كانوا يهدرزوا وعياد مرة مرة يرد على بوه وهالشي فرح مصطفى هلبه..
..وفي النهايه وصلوا لطرابلس..
جو للعماره اللي فيها الشقة اللي أجرهالهم احمد..
بعد ماركبوهم عن طريق المصعد وركبوا شناطيهم..
قعدوا معاهم ساعه ونص وتوكلوا للبلاد..
🍀🍀🍀🍀
راحيل وهي فدار النوم تحط فالحوايج فالدولاب ومعاها مصطفى يرتب حاجاته ع طاولة المكتب..
راحيل:الشقه مشرحة وقنينه وحتى العماره نظيفه..
مصطفى:ايه حتى اني عجبتني..
راحيل صكرت الدولاب وقالت:شن تبي ندير عشي..
مصطفى:اني ناكل في حاجه خفيفه وبعد الساعه 8 معاش ناكل شي للصبح..
راحيل:من امتى عندك القولون؟
مصطفى:من مدة طويلة هلبه..سنين..
راحيل تنهدت وقالت:يعني نديرلك زبادي وتفاحه بس..
مصطفى ابتسم وقال:امم..
راحيل هزت راسها ومشت طلعت...
بعد لحظات جاته بصفره فيه زوز طروف زبادي وتفاحتين..
حطتهم ع الطاوله وقعمزت مقابلاته..
مصطفى عقد حواجبه وقال:لاطرف بس..
راحيل:من قالك ليك كله ليا اني ..
مصطفى:راحيل!..لالا انتي ماتغدتيش كويس بري ديري حاجه تشبعك..
راحيل بعصبيه مصطنعه:ياودي تعشى وخليني نتعشى حتى اني.. اصلا نبي نروجم..وقرشت من التفاحه.
مصطفى غصب عنه قعد يضحك..
راحيل وهي مبتسمه؛تي كل قريب اطق الثمانيه..
ومصطفى خدي طرف الزبادي والكاشيك وهو مازال يضحك..
وراحيل تاكل وهي شادة ضحكتها..
🌿واستمرت حياتهم مع بعض ماشيه على هالنحو وكأنهم اصدقاء
وكأنهم بدوا يتعرفوا على بعض من اول وجديد
اما بالنسبه لصحته فكانوا يوميا يمشوا لجلسات العلاج
في الاول كانت صعبه جدا ومتعبه لمصطفى لكن مع تشجيع راحيل ليه تحمل وقعد يقاوم وتزداد رغبته في أنه يتعالج اكثر واكثر..
🌿🌿🌿🌿
بعد مرور 7 أشهر..
في البلاد..
تحديدا الأرض..
راحيل:لاعينك ماتحلمش بيه..
مصطفى وهو يمشي بالقيلا الحديد المتصله ببعضها وتنشد بالإيدين الزوز قال:والله اسم حلو وفريد..
راحيل:لافريد لارشيد..بنسميه اوس يعني اوس خير من شريح هدا ..
مصطفى بضحكه:ديري مافي راسك في الاخير كلامك هو اللي ماشي..
راحيل ابتسمت بغرور مصطنع بعدين شبحتله:هاه شن تحس توا..
مصطفى:نحس فروحي عن قريب نسيب هادي ونستعمل القيلا العاديه..
راحيل بإبتسامه؛باهي باهي..كويس ماشاء الله عليك..
مصطفى شبحلها برفعة حواجب وهو يضحك..
وراحيل شبحتله وضحكت..
من بعيد شويه..
وريده وام الخير واقفات يتفرجوا عليهم..
ام الخير:فرق كبير بين زمان وتوا ماكانوش مع بعض متوالفين قبل زي توا..
وريده:ايه..بالذات مصطفى متغير هلبه هلبه..
ام الخير:ربي يدوم عليهم..
وريده:آمين..
🌷اما راحيل ومصطفى قعدوا يمشوا مع بعض ويهدرزوا وهما متوجهين للسانيه..
فالطريق قابلوهم ناس من المنطقه وسلموا عليهم..
اغلبهم كانوا يشوفوا لراحيل بنظرة احترام لأنها اثبتت انها بنت اصل..
وفي منهم شاف انها هدرت كرامتها لما ولتله بعد كل اللي داره فيها..
وكل حد من الناس يشوف للوضع من منظوره هو وعقليته كيف تفكر..
المهم ان راحيل كانت مقتنعه بأن اللي داراته مانقصش منها ابدا..
اما مصطفى فكان بس يبي يكمل عمره معاها لأنه مايقدرش يعيش من غيرها
💓وصلوا للسانيه وخشوا..
لقوهم كيف يحطوا فالغدي ع الطاوله اللي فالجنان..
راحيل:احسن حاجه درتوها الجو قنين..
وسعت لمصطفى اللي وخر الكرسي وقعمز وهو يقول يعطيكم الصحه..
بثينه ومياده:الله يسلمك عمي..تسلم بابا..
ع طلعة الجازيه وقالت:وين شربتنا اني ونسيبي..
ضحكوا..
مياده بضحكه:هاني خاشه بنطلعها..
قعمزت الجازيه وقالت:هاه شن حالك اليوم..
مصطفى:الحمد لله ياعمتي كل يوم في تحسن..
وراحيل تاكل في قطعه خيار وتشبحلهم بإبتسامه..
قعمزت بثينه اللي كانت حامل في شهرها الاخير..
وطلعت مياده بطنجرة الشربه البيضا..
على خشة عياد واحمد للحوش..
الزوز قالوا:السلام عليكم..
كلهم ردوا:وعليكم السلام..
مشي عياد قعمز جنب مرته وقال:ماشاء الله ماشاء الله..
مصطفى خدي قطعه خياره وكلاها وهو يشوف لولده بابتسامه..
مياده مدتله فنجال الشربه وقالت:تفضل بابا..
مصطفى:امم..صحيتي..
وخدي كاشيك وبدي ياكل..
احمد:حماتي بتحبني اللي جيت توا ولا..ولا عمتي تحبيني ولا..
مياده خشت بعضها مسكينه..
وعياد ومصطفى يشبحوا لاحمد بإمتعاض..
والجازيه وبثينه شدوا ضحكتهم..
اما راحيل قالت وهي تاكل في طرف بوريك:اممم..لا..
هو فنص عيونه..
وكلهم ضحكوا عليه..
احمد رخي عيونه وقال:مش مشكله تو نخليك تحبيني.
التفتت وفنصت فيه..
احمد بربكه:مولي للمستوصف توا عندي حالات بالطابور..ولف بيمشي..
وكلهم يضحكوا..
احمد وهو ماشي؛خلولي حصتي..
الجازيه:هههههه..يعطيه الهني..غير امتى بتموله موضوعه مع مياده ساده ماراجى..
راحيل:الكلمة كلمة بوها..
مصطفى:واني ماعنديش مانع نعرفه من هو وصغير مافيش خير منه نأمنه على بنتي.
عياد:حتى اني ولد خالي ومتربي معاي ونعرفه كويس مافيش خير منه لأختي..
مياده ناضت من حداهم وهي متحشمه ع الآخر...
بوها وامها شبحوا لبعض وابتسموا..
🌿🌿🌿🌿
وتأجل موضوع خطبة مياده واحمد بعد ولادة مرت عياد اللي جابت وليد سماته راحيل"محمد" وحبت تفاجئ مصطفى بيه..
مصطفى اللي زاد حبها ومات فيها اكثر واكثر...
وولوا بعد مادارو السبوع لطرابلس بش يكمل مصطفى علاجه..
وخلال شهر بدي يستعمل في القيلا..
تطور علاج مصطفى السريع كان سببه الاكبر العامل النفسي اللي راحيل عززاته فيه الثقه بالنفس التفائل الطاقه الإيجابيه والاهم من هذا كله...الحب الحقيقي الصادق...
🌷🌷🌷🌷
نهاية العام..
جوا مفيد ومرته وصغاره زيارة سببها الأساسي خطبة احمد ومياده..
اللقاء بين مفيد ومصطفى كان رسمي جدا وعادي...
الزوز مش متقبلين بعض بس يجاملوا في بعض..
🌿اما منيرة مرت مفيد..
منيرة:بجديات انتي فريده من نوعك وديما تفاجئي فيا..
راحيل بإبتسامه:تمدحي ولاذمي!؟
منيره بضحكه؛لا والله نعبر عن اعجابي..وبنصارحك اني زعلانه منك الحق لما ردتينا وين جينا كلمناك في موضوع احمد ولدي وبنتك..
راحيل:خل حتى اني نصارحك..الحق كنت ديما نشوف فيه شاد تليفونه ويهدرز في الاول شكيت انه يكلم في بنتي لين تأكدت بروحي ان مافيش بينه وبين بنتي علاقه بعدين قلت في عقلي شكله من الشباب هادوا اللي يديروا كش بنات وعلاقات ولما جي بيتزوج اختار بنت عمته لانه يعرفها ويعرف ربايتها كويس..ياخدها ويقعد يدور على حل شعره..
منيره:معقوله يارحيله ماتعرفيش رباية ولد خوك..المشكله انك انتي اللي ربتيه!!
راحيل:ايه بس اني نربي والشارع يربي ومرات تلقيهم صغار بطن وحده واحد صالح وواحد طالح..بس بعدين عرفت شن في وراه وتأكدت ان ربايتي ثمرت فيه وليدي..
ابتسمت منيرة وقالت؛والله حتى اني فرحانه اللي اختار مياده الخلوقه والذكيه والجميله واحلى شي فيها هدوئها..
راحيل بإبتسامه:تسلمي..وتنهدت وكملت تقول..ربي يتمم على خير..
منيرة:آمين
🌷🌷🌷🌷
واخيرا تحقق حلم احمد وخطب مياده..
وحددوا موعد الفرح متاعهم في عطلة نص السنه..
يعني مازال اقل من شهرين..
قعدوا يجروا فيهم جري بش يوتوا ارواحهم..
ومياده اللي وقفت قيدها الفصل هدا كانت متوترة وصايره فيها حالة تبي تكمل كل شي قبل يجي اسبوع الفرح..
🍀🍀🍀
اخر يوم في الأسبوع ماقبل اسبوع الفرح..
في الليل..
مصطفى خش للدار وهو يمشي بالقيلا وفيده التانيه مق..
جي لراحيل ومدهولها وقال:اشربيه يهديك ويروقك..
وقعمز حداها ع السرير..
خداته وقالت:تسلم..والله درتوها فينا بهالموعد اللي حددتوه..
مصطفى:عاد ساده تشحيط الولد ليه سنين يراجي..
راحيل:وشن بيصيرله كان استنى لين كملت السمستر هدا؟
وشربت من البابونج..
مصطفى:خلاص توا المهم كملتوا كل شي..
راحيل :بعد ماانهدينا وطابوا رجلينا..
ضحك مصطفى وقال:سريبكم سريب انتم النساوين تجيبوا فيه لرواحكم التعب..
شبحتله ع جنب وهي تشرب وهو يشوفلها ويضحك..
🍀🍀🍀🍀
وبدي اسبوع العرس..
وكان كبير حتى هو سبع ايام وسبع ليالي..
الاحد والاثنين سهريات في خيمه نصبوها فالسانيه..
ونهار التلات الحمام..وقراية الفاتحه..
والأربعاء الكسوة اللي كانت فالصاله بالزمزامات..
وكانت احلى ايام مرت عليهم كلهم..
وماكانش في اسعد من....احمد طبعا..
اللي يوم قراية فاتحته رقص وهيج مع النوبه قريب يطير من فرحته..
ومصطفى وعياد ماغير يضحكوا عليه ويحركوا فروسهم يمين ويسار..
🌷🌷🌷🌷
يوم الحفله..
فالصاله...
دار العروسه..
نشوى وهي شاده يد مياده:محلاك ميمي طالعه تهبلي تبارك الرحمن قداش تغيرتي..
بثينه:ايه هي ماتحطش في مكياج الا فالمناسبات هدا علاش طلعت متغيرة هلبه توا وزايده جمال..
مياده وهي تمرر فنظرها عليهم :عيونكم الحلوات
نشوى:بيدخلك عياد!؟
بثينه بضحكه:صكر راسه وحلف ماهو خاشها صاله..
ضحكوا..
نشوى بضحكه:باهي بتخشي بروحك..
مياده بإبتسامه:تس تس..
🌷🌷🌷🌷🌷
واقفه في الممر لابسه فستان فيروزي غامق مناسب لعمرها ضابط على جسمها وطويل ومستور..
ورافعه شعرها فوق ومنزله خصلتين ع وجهها ومكياجها حلو بالمرة وناعم ابرز جمال عيونها..
اللي كان هو يتأمل فيهم بعشق..
كانت واقفه عليه تساويله فربطة عنقه..
وهي تشبحلها قالت:خلاص مساويه هكي..
وقامت عيونها جو فعيونه..
كانت نظراتهم ياما تحكي من كلام وتقول..
نظرات تسحر..
فلحظه جمد الدم فعروقها لما قال ولأول مرة من لما عرفها..
"نحبك"..
هي نزلت ايديها وقالت بربكه:مش وقته بكل..
مصطفى:ههههه..لا وقته ونص..عاهدت نفسي ان كل شي حلو نحسه اتجاهك نقوله معاش بندس شي..
ابتسمت وقالت:باهي تعالى بنتك تراجي فيك..
ضحك ومش وراها وهو يعكز ع رجله..
لين وصلوا في الدار...
طقت وخشت لقت مياده بروحها..
راحيل:خش مصطفى..
شويه وخش مصطفى وجو عيونه على بنته الوحيده وي لابسه فيلو ابيض تلجي مستور..
وشعرها مطلوق بطريقه حلوة وعليه طرحة طويله..
كانت جدا جميله زي الحوريه..
ابتسم وقدملها وهو يقول:اللهم بارك اللهم بارك..رقيتوها ياراحيل..
راحيل بإبتسامه:ايه..وشربناها مية رقيه..
مصطفى:كويس..وقرب منها وكب على راسها وقال..مبروك بابا..
مياده بإبتسامه وعيونها مليانات دموع:الله يبارك فيك حبيبي..
ابتسم وجي وقف جنبها ومد ذراعه.
تعنقاته..
راحيل وعيونها مليانات دموع:راجو شويه..
رفعت هاتفها وحطت ع الكاميرا وصورتهم وهما يضحكوا.
بعدين مسحت دمعتها من قبل ماتنزل من عينها وقالت:شويه بس..وطلعت من حداهم..
ولحظات..
وخشوا مياده وبوها على زفة لحسين الجسمي..
كانوا كلهم متفاجئين في التحسن السريع لمصطفى..
وكذلك معجبات جدا بوسامته اللي زادها الشيب..
وراحيل اللي كانت ماشيه وراهم العيون كانوا عليها وكلهم يتهامسوا ويحكوا عن قصتهم وعن جمال ماآلت اليه هالقصه..
وصلت مياده للكوشة..
باس بوها راسها..ومشي طول طلع وراحيل معاه..
ونشوى وبثينه يساعدوا في مياده تقعمز..
💓💓💓💓
وكانت ليلة حفلة مياده من ليالي الف ليله وليله..
في الاخير طلعوها بش تخش مع احمد..
اللي وين شافها كيف طالعه قريب هبل عليها..
خشت هي وياه...
غيروا الدبل وقصوا الطورطه..
وجبرتهم الفرقه اللي جايبينها يرقصوا مع بعض
رقصوا شويه بعدين طلعوا بيروحوا للفندق اللي ناوين منه يمشوا طول لطرابلس اليوم اللي بعده بش يسافروا شهر عسل..
🍀🍀🍀🍀
هديكا الليله بكت راحيل هلبه ومصطفى هداها بصعوبه وفالأخير رقدها...
وهو قعد سهران يفكر في اللي صار معاه كله خلال هالسنه..
كيف انقلبت حياته اللي كانت زي الصحراء القاحله
لجنة كل شي فيها حلو...
ناض من السرير وتوجه للحمام...
توضى..وطلع للدار..
فرش الصلايه وصلى لله ركعتين شكر اللي عطاه فرصه يصلح ماأفسدت يداه..ويعيش سعيد في جنب صغاره و حب حياته الحقيقي
🌿🌿🌿🌿
بعد مرور شهر
الساعة الحادية عشر صباحا
في قاعة المناقشات في كلية الزراعه..
كانت معبيه بالحضور..
في الصف التاني في الطرف..
احمد:تحسي فروحك تعبانه؟..
ميادة بتذمر:اياه علينا احمد عاد..ياريتك ماعرفت اني حامل..
احمد بضحكه:خايف عليك ياجحشة..
هي ضحكت بعصبيه..
فجنبهم..
كانوا مقعمزين ام الخير ووريده..
وريده:لالا البنت كيف خشت الثانوي..
ام الخير:يعني نقوللها تنسى الموضوع؟
وريده:ايه بنتي مازال قاعده بيبي..
ضحكت ام الخير..
في جنبهم الجازيه تهدرز هي وبثينه وعياد..
الجازيه؛خلاص كان هدا بعد نروحوا تصلحها..
عياد بضحكه:حاضر ياحناي..
الجازيه؛محمد عند ماليك يابثينه؟
عياد فنص:وطي صوتك ياحناي..
بثينه بضحكه:ايه ياحناي ايه..
الجازيه هزت راسها وقالت:آااه..باهي باهي.
وعياد يحرك فراسه يمين ويسار..
وفي جنبه كان مقعمز بوه اللي قاعد يتمعن في اسم راحيل المكتوب اعلى الحائط..
"مناقشة رساله الماجستير للطالبه..
راحيل عياد خليفه"
كان مبتسم بفخر وعيونه مليانات دموع..
خطر على باله حديث قديم جدا دار بيناتهم..
<< مصطفى:الحق اني مانحبش الناس اللي ربي عاطيهم كل شي وماناقصين شي ومع هدا فاشلين ومايعرفوا يديروا شي في حياتهم..
قامت راسها وشبحتله بتفنيصه..
ضحك وقال:ماتزعليش مني اني صريح مانحبش نجامل..انتي مش بس ماتعرفي اديري شي انتي ضعيفه هلبه وحتى ع نفسك ماتعتمديش واضح هدا من التربيه متاعك يعني مدلعه ماتتعبي ع شي وكل شي يجيك لعندك وشكله حتى النجاح..
نزلت راسها وهي محرجه تقول:ايه باهي صح..بس راهو اني نحاول نقرا نحاول هلبه بس الله غالب هدا حد استيعابي..شبحتله وقالت..اني عندي خوي يقرا برا وشاطر هلبه وبرا اسأل عليه صح عايش مبسوط لكن دماغه في القرايه زيك..
ابتسم..
نزلت عيونها بخجل..
مصطفى:اسمعي..مافي حد دماغه مايخدمش راهو وانتي كان حطتي في دماغك القرايه تو يصير منك》》》
استاقظ على خشت اعضاء هيئة التدريس..وخشة راحيل معاهم..
وقفت في مكانها..
وهما قعمزوا في مكاناتهم..
شبحت للحضور ادور في اهلها شافتهم كلهم..
وكلهم حيوها بحركة اليد..هي اكتفت بالإبتسامه لين جت عينها في عين مصطفى
غمزلها بعينه..هي ضحكت بكتمان..وهو ضحك
وعياد يمرر فنظره عليهم وابتسامة جانبيه على وجهه.
شويه وبدي واحد من اعضاء هيئة التدريس يتكلم معلنا بداية المناقشه..
وبدت المناقشه..
كانت راحيل تناقش وتشرح بكل اريحيه وثقة بالنفس لما يسألوها تجاوب اجابات نموذجيه تعجب الأساتذة اللي يناقشوا فيها..
وفي من يزيد اعجابه بيها..ويزيد يطيح في حبها اكثر واكثر..
مصطفى اللي مش شايف قدامه توا حد غيرها..
🌷وتمت المناقشه..
وعطوا راحيل درجة 94% وحييوها ع الموضوع اللي اختاراته...
والكل يصفقولها بحرارة..
وفي من فرحتهم بيها كانت بالدموع زي بنتها ووريده..
ومصطفى كان كل مايمسحهم ينزلوا..وهو يشوف فيها ببدلة التخرج..
سلموا عليها اعضاء هيئة التدريس..
بعدين نزلت سلمت ع زملائها وبعدهم جوها بنتها وولدها ضموها الزوز مع بعض وهي اضم فيه وتبكي بفرح..
بعدهم جتها وريده وحضنوا بعض بقوة ودموع وريده سيل..
بعدها مشت سلمت ع امها وكبت على راسها وامها حلفت حتى هي تبوسها على راسها..وباستها على راسها..
وكان جدا موقف مؤثر..
بعد امها سلمت ع ام الخير وبثينه بالأحضان..
واخيرا جي دور مصطفى..
جت وقفت قدامه تشوف لعيونه وادور على حاجه ملهوفه تشوفها..
شافتها وكانت واضحه هلبه..
نظرات فخر ممزوجه بالحب..
مصطفى شد راسها بإيديه وكب عليه..
وكلهم يشوفلولهم بنظرات حب..
بعدين بعدها وقال..
" من كثر فرحتي تقول اني اللي نجحت مش انتي"
هالجمله هادي كانت عند راحيل بكل جمل الحب اللي انقالت فالدنيا وبكل اللغات..
شدت يده وباستها...وهو كذلك باس يدها..قبلة يد من باب التقدير والإحترام...
والناس يتفرجوا وهما متأثرين هلبه وعجبتهم شكل العلاقة الزوجيه اللي يربط راحيل بمصطفى توا...
🌷🌷🌷🌷🌷
بعد طلعوا من الجامعه..
طلبوا من الكل يروحوا ويخلوهم مع بعض برواحهم..
كانوا يبوا يكملوا الطريق مشي مع بعض للبحر...
🍀🍀🍀🍀🍀
أمريكا..
ولاية بوسطن..
في وحدة من الصيدليات..
كانت واقفه ترتب فالأدويه..
وراجل كبير واقف يتفرج عليها..
بعد كملت التفتت وقالت:كملت..
الراجل:صفاء بنتي..خيرك الفترة الاخيره ملاحظك تعبانه..
صفاء بدموع:اني ويوسف بننفصلوا ياعمي شجاع..
شجاع:لاحول ولاقوة الا بالله..
صفاء ودموعها ينزلوا:عنده حق يبي الصغار واني معاش فيا أمل..
شجاع تنهد وقال:خلاص ارضي بنصيبك وتقبلي تكملي عمرك بروحك..تزوجتي 5مرات ياصفاء وفي كل تجربه زواج كنتي تفشلي فشل ذريع..وقعدتي تهلكي فروحك لانك ماتبيش الصغار لين انحرمتي من نعمة الإنجاب مرة وحده...
صفاء كانت تشبح للفراغ ودموعها تنزل..
شجاع:كانت تبي تروحي لليبيا نبعتك لاهلك..
صفاء:لالا عمي نبي نقعد هني ارحملي من غادي والحياة غادي والناس غادي وكلامهم ونظراتهم اللي ماترحمش..
شجاع جاها..وحط يدها على كتفها قال:اللي يريحك..لكن بالله عليك يابنتي ماتزيديش تهلكي روحك بالحزن..خلاص اللي صار صار..
مسحت صفاء دموعها وابتسمت ابتسامة ألم...
🍀🍀🍀🍀
قدام شط البحر.
كان واقف بالقيلا متاعه..
وهي جنبه لابسه الشال الاحمر..
مصطفى:رحيله..
شبحتله وقالت :نعم..
مصطفى وهو يشوفلها :بنسألك سؤال ونبيك تجاوبيني عليه بكل صدق..
راحيل ابتسمت وقالت:أسأل..
مصطفى وهو يشوف لعيونها؛سامحتيني حق يارحيله..نسيتي كل شي اسود صار بيني وبينك؟!
راحيل بإبتسامه؛والله العظيم نسيته من اول يوم شفتك فيه فغدامس وانت بعدين مسحت كل شي مسح من ذاكرتي معاش قادره نذكر ولاحاجه مش كويسه صارت بيني وبينك.
تنهد بإرتياح بعدين قال:تحبيني؟.
راحيل بضحكه:لا انت قلت سؤال واحد..
مصطفي :يانصابه اني قلت هكي!؟
وراحيل تضحك..
مصطفى بزعل مصطنع ؛الحق مش فيك الحق في اللي قال بيكمل النهار كله معاك اليوم ماهو مشيت للعياده وخليت احمد ينفخلي راسي ارجلي..
راحيل:ههههههههه..
مصطفى:زيدي اضحكي زيدي..
وراحيل تضحك وخلاص..
بعدين سكتوا وقعدوا يتأملوا في البحر..
شويه وشافت راحيل لمصطفى حساته صقعان..
ابتسمت وقربت منه وغطاته بالشال معاها وقالت..
"نحبك"..
هو ابتسم من قلبه💓
وهي حطت راسها ع كتفه اللي قعدت منسنده عليه لأخر ايام عمرها...
ويقال بعد كم سنه توفت راحيل...
ومصطفى من حزنه الشديد عليها لحقها بعد شهرين...
واصبحت قصتهم قصة حب حلوة بفصولها الاربعه..
ربيعها وشتاها وصيفها وخريفها...
قصة..حتتوارثها الاجيال....
.....النهايه.....
🍀🍀🍀🍀🍀🍀🍀🍀🍀🍀🍀🍀🍀🍀🍀🍀🍀
القصة مقتبسه عن مسلسل ايراني اسمه"المنسي"
حبيت القصه من قلبي وحبيت النهايه اللي كانت تختلف عن نهايات هلبه قصص من نفس النوع تنتهي بالأنتقام وماالى ذلك من النهايات اللي تترك في اثر نفسي سيء في قلوب المتلقين...
طيبة اصل وقلب شخصية البطل خلتها تغلب شخصية البطل بدون انتقام..بل وخلاته يعشقها اكثر ماهي تعشقه..
وكانت نهاية قصتهم زي الآية اللي قالها الله تعالى..
"وجعل بينكم مودة ورحمه"...
🌷طبعا ضفت فالقصه من عندي هلبه تفاصيل بش تكون قريبه من واقعنا اكثر وتنسجموا معاها..
بارك الله فيكم على تفاعلكم..
واسأل الله ان يجعل كل حرف فيها شاهدا لي لاعلي..
ونتمنى نكون قدمت شي يفيدكم ويرتقي لذائقتكم...
واخيرا...احبكم....
ونلتقي في أعمال قادمه ان شاء الله تعالى....
........Goman Fared.....
