من الدوار لافيل قصة ربيعة "باللهجة الجزائرية"

24

#صفحة_هنا_نحكي_حكايتي
#ربيعة
#الحلقة_24
عطاتتي عمتي درس فالحياة وخلاتني كل يوم نتأثر بيها عمتي جمعت بين الذكاء و الحنان و الاخلاق كلش دات منو شوية ...معليناش لحق لثنين جا براهيم يديني باه نعقدو قاتلو عمتي ستنى ضروك يجي عمها و نروحو كامل في رحبا ...متوال الزوج تاع العشية باه جا عمي  ..هو كي جا عمبالو قضية تاع كوارط تاع لرض ..بصح عمتي صدماتو قاتلو لازم تروح معانا تحضر العقد تاع ربيعة ..قلها او لالا منحضرش باغي تخسري بيني و بين خويا وديجا حضرت فالخطبة بزاف  منقعدش غير معاكم ...قاتلو تاع تخسري بيني وبين خويا قولها لوحدوخرة متعرفكمش كون جيتو متحابين قاع متلحقونيش من بلاصة لختها على جال لرض جهنامة ...قاتلو وقيل راكم حاسبين منقدرش نعقدلها بلا بيكم ..انا نحوسكم تحضرو باه ميحقروهاش ناسها من للقدام برك اما وجوهكم راني مستغنيا عنها من بكري ...عاود قلها لالا ..قاتلو ملا بغيت نعطيك لاكارط تاعي باه تديها و توجدو الورق كي راكم ديرو هاك والله ما تدوها و الله ما نسنيي و ها تلعبوها تبيعوها بلا بيا اقسم بالله نرشيكم في لحباس قاتلو احنا متفهمناش هاك .....مصابش قاع كي يدير يشوف يشوف ومن بعد قلها نروح بصح متجبديش اسمي ...سكتت و قاتلو لحقني ..رحنا للبلدية عقدنا و الحمد لله ....قلي براهيم تهلاي في روحك وزربي وجدي روحك باه تلحقيني ....رجعنا لدار عطات عمتي وحد الكوارط لعمي وقاتلو الخميس صباح نصبح عليكم ثم ...هذوك ليام عمتي كانت تمشي وتسقسي على لرض شعال راهي دير باه ميحشوهلهاش كانت مشغولة غير لروحها  ..وانا مبديتش قاع نقعد ...بديت مع الجهاز و الكوارط ..فلحق الجهاز ماشريت والو غير لبسة برك ...بديت نروح مع مرت خوه وندخل للحوانيت لي كنت نشوفهم غير فالتيلي ..وخوه بدا يصنعلي فالكوارط تاوعي ..بدات عمتي تقلي خرجي روحك بدلتلي قاع ستيل تاع الكسوة تاعي و بدات تعلم فيا دخلات والخرجات ...وبدات تسميلي الصوالح بالفرونسي ...المهم الحمد لله ريقلت قاع اوموراتي و بدا براهيم يعيطلي خطرة على خطرة ..قلي ني موجدلك كلش ايلا كملتي انتي قوليلي باه نفيكسو لادات لي تجي فيها ....قتلو هدر مع عمتي هي تقلك ..كي سقسا عمتي قاتلو راهي واجدة ..وكان تاريخ 23 جوان 2002 تاريخ السفر تاعي ...لحد الان منيش مامنة روحي ...هذاك نهار رحت شريت طايور وستيكت الشعر و نواضر وطالو فيه ميترا  و فليزتي وكوارطي وطريق المطار ..رايحة مع عمتي و حمايا و سلفتي ...انا رايحة و نشوف من مورايا و شعري دايو ريح ..(.ايييه يا ربيعة هذي انتي لي كنتي من الكوري متخرجيش هذي انتي لي كنتي دايرة نوبة على العجين هذي انتي لي كنتي تربطي الحمار و تروحي تاكي نيشان ...)....وصلت لمطار حمايا يجر في ذيك الفليزة قدامنا و انا بين عمتي و سلفتي نمشي و نشوف غير الفوق ...جا تورك يا لا ربيعة طلقي عروقك و خرجي من هذيك القوقعة لي كنتي فيها ...ركبوني وقلولي تصيبه براهيم  يستنى فيك ثم .......ركبت و حد الشعور منحكيلكمش شعور قاع اخر ...كي وصلت الله يحفظ و يستر  شميت هوا مهوش حتى كيما الهو تاعنا السما تاعهم وماشي كيما تاعنا ..ناس قاع وحدوخرين ..اشكال مختلفة تماما ...سلمت على راجلي و من بعد داني لداري .. ..كي وصلت وطبطلنا قتلو كيفاه معندكش المفتاح حتى راك طبطب ...سكت مجاوبنيش و مخزرش فيا ..ونا نقلو هدر ..حتى نفتح الباب ...#صح_سحوركم.....