من الدوار لافيل قصة ربيعة "باللهجة الجزائرية"

21

#صفحة_هنا_نحكي_حكايتي
#ربيعة
#الحلقة_21
رحت درت كوب تاع اميرات و لبست لبسة مكنتش نحلم باه نلبسها  ورجعت انا وحسنة لدار ..بعدا كي وصلنا صبنا طومبيل المتريكيل تاع الولاية تاعي وخويا الكبير قاعد معبز وليدو و قاعد مع عمي ...عينيا تعمرو بالدمعة كيفاه حتى جاو...كي هبطت حذاهم مهدروش معايا باسكو و الله ماعرفوني قربت لخويا وديت عليه وليدو ..نخلع باسكو تبدلت 100 درجة وديج جامي شافوني في هذيك الحالة ...المهم عبزت وليدو وبديت نبكي وبديت نشم في كسوتو توحشت ولاد خويا ...وحسنة تقلي بزاف  ا ربيعة ضروك تخسري المكياج ...وقلت لخويا كي راك ...مردهاليش قاع منيش عارف حشم ولا مزال زعفان ...دخلنا لدار...تلقيت بسليمة هي لولة فالباب قتلها شكون جا من دارنا ..قاتلي روحي روحي لشومبرة الفوقانية راهم ثم يستناو فيك ...رحت نجري كي دخلت صبت مرت خويا و يما و بهية ..رحت نجري سلمت على يما حتى هي بدات تبكي وبدات تقولي شربتيني المر قاسيت من موراك و انا نشهق ونقلها ها سمحيلي امااا مكانش عندي حل ...رجعت لبهية و الله ما عرفتها ..مسكينة كلوها كملوها تحسب خرجت من القبر غاضتني غاضتني قسمتلي قلبي ...مسكينة لا للبسة مسقمة لا شعر كيما تاع لبنات ...زدت سلمت على كنتنا وقعدنا مجمعين ...غير انا نهدر و هوما مخلوعين غير يشوفو فيا برك ...قتلهم كيفاه حتى جيتو ...قاتلي يما انتي تحسبي جينا حب فيك ..بعثونا غير في جال ...راكي عارفة ...قتلها معليش امااا المهم شفتكم و حضرتولي ...رحت ديت بهية ختي ستيكيتها مسكينة ..تخيلو من قوة الخوف انا ندلها فالمكياج  انا وحسنة وهي تقولنا  لالا كون يشوفوني لالا (قهرتني عقعدوها )....معليناش قعدنا شوية حتى جاو الخطابة جاو غير زوج طومبيلات منيش رايحة نحكيلكم واش جابو و شا جاو لابسين ..حاجة و لا في الاحلام ....استقبلناهم ودخلت انا عليهم المهم عجبتهم وصح قاع في هذاك الشي ...قعدنا نشطحو و نسفقو حتى قلك العريس راه باغي يجي يدير الخاتم تاعو ...كي دخل و دلي الخاتم وبقينا نقسمو في لاطارت ..جات مرت خوه وهدرتلو هدرة في وذنو ...هو شاف فيا حط هذاك الموس من يدو و خرج يجري ...خلاص انا مت و بردت في بلاصتي ..احوجينا شا كاين هذ المرة ثاني ....#يتبع 😮🤑😬....