#حكم_العائلة
الحلقة 2
للكاتبة : بشرى هدية
________________________
قيس : يعلي في صوته...جديييي، وينك انت؟؟
كريم : تعالى وراء الجنان قاعد
قيس : مشاله ومعاه ختام تبكي
كريم : خيرك شن في تعيط من غادي؟
قيس : تفضل شوف يا حاكم يا كبير العيلة، بنت ولدك بيجيها عريس الليلة وبيخطبها وانت راقد وماتندري على شيء
كريم : شنو تقول؟
قيس : زي ماسمعت
كريم : شاف في سالمة...تندري انتِ ولا؟
سالمة : لا ماقالولي
كريم : وقف من ع الكرسي...حقا انتِ يا بنت؟
ختام ؛ تحاول انها تمشي لكن قيس شاد يدها بالقوة
جهاد : جاهم...خيركم اصواتكم طالعه انتم؟
كريم : نكلم فيك انتِ جاوبي؟؟
ختام : اي صح وبابا هوا يلي يعرفهم الناس
كريم : طلع نقاله...اتصلي بي محمد بسرعه
قيس ؛ اتصله وعطاه النقال
جهاد : اطلق البنت انت خيرك معاها؟
قيس : انت بالذات ماتتكلمش معاي عارف روحك شن مداير
جهاد ؛ فك يد قيس من ختام وجابها وراه
كريم ؛ اشرلهم بيده بمعنى اسكتوا
ختام ؛ شادة في بدلة جهاد وتبكي
كريم : الو، وين انت؟
محمد : في الشغل عندي إجتماع ضروري في شيء؟
كريم : روح بسرعه نبيك
محمد : شن صاير؟
كريم : روح قلت وتو تعرف...وسكر
محمد : ياربي استر، واستئذن من اللي معاه وطلع وهوا باله مشغول
________________________
للكاتبة : بشرى هدية
في حوش كريم :
كانو ملتمين ختام وشهد وامها، وجهاد وقيس لعندما وصل محمد وخش عليهم
محمد : السلام عليكم
كلهم : وعليكم السلام
كريم : تعال جاي انت
محمد : شن في راهو جيت من إجتماع مهم اليوم
كريم : هكي ادير بتعطي بنتك لناس برانية؟
وفوقها مش مقايلي؟
وبعدين من امتى نحنا عندنا بنات نعطوهم هكي وخلاص؟
شوف خواتك كلهم عطيتهم لولاد عماهم مافيش وحده مشت لبراني
تجي انت عقاب الوقت وتكسر قانونا؟
محمد : غير بالشوية يابوي شغلتني مانحسابكش جايبني على خاطر الموضوع هذا !
كريم : عندك بنتك ماتهمكش انت ولا شنو؟
كان ماتبيهاش ماديرش هكي، نحنا وين مشينا باش نخلوك تتصرف زي ماتبي؟
محمد : تي شنو يابوي مانبيهاش؟
انا ماصدقت حصلت هالبنتين يلي عطاهملي ربي، عندي هما الدنيا كلها نخدم ع خاطرهم ليل نهار ويلي يبوه حاضر، تجي تقولي مانبيهاش؟
وانا بنتي مش غاصبها عليهم الناس، غير صاحبي قالي بناسبك قلتله تفضل لكن الرآي رآي البنت شن بنرفضه؟
قيس : باهي شاورنا ياعمي مش تعطي وتقابل ناس بروحك؟
محمد : انتم غير كان صبرتوا كنت مروح وبنقوللكم مش معقولة بندير حاجه من وراكم غير انتم ربي يهديكم
كريم : اسمعني، الناس قوللهم ماتجوش وتم الموضوع
محمد : لكن الراجل صاحبي مان...
كريم : يلي عندي قلته، بدير يلي في راسك بعدين معاش تتسمى ولدي لانعرفك لاتعرفني
محمد ؛ تنهد وسكت
ختام ؛ طلعت وهي تبكي
جهاد ؛ شاف ختام وطلع لحقها
جهاد : استني
ختام : وقفت...مشعارفة خيره جدي يعامل في بابا هكي
جهاد : مادوريشي جدك وعارفتيه من يومه هكي مع الكل
ختام : كله من قيس الواطي نكرهه
جهاد : ختام
ختام ؛ شافت فيه والدموع في عيونها
جهاد : كنتي حتوافقي عليه يلي بيجيك؟
ختام : سكتت
جهاد : لو ماتبيش تجاوبي براحتك اهم شيء مانكونش ضايقتك
ختام ؛ شافت فيه وطلعت
جهاد : ابتسم...كله حيفوت صدقيني...وتذكر كلام جده وطلع وهوا مستعجل
