#المراهقه_و_الأربعيني

الحلقه7

المراهقة_و_الأربعيني
،،،،،،،،،،، بقلمي زينب ماجد ،،،،،،،،،،،،
الحلقة_7

ودعتهم وطلعت.. فتحلي باب السياره وحط ايدو على ضهري وكال صعدي... السياره كانت عاليه كوه كدرت اشله واعبر..
استقريت.. شال العبايه دخلها جوه.. وصفك الباب.. ادحق ع بيتنا وابكي.. يمكن اخر مره اشوفه.. يمكن راح اموت او ما اعرف شنو ينتظرني بالمستقبل..
ماما وباجي يبجون ويحيى واقف متخصر.. تحركت السياره.. كان كاعد يمي شاب ضعيف .. والرجال اللي اتزوجني هو يسوق.. وحجي كاعد بالصدر..
مشت السياره. و واني ادحق بيت ساره فرعنا المنطقه مالتنا واتذكر لما اروح واجي للمدرسه منم.
بس الدموع تجري وتعبر عن حالتي بهذا الموقف.. لا اكدر احجي ولا اكدر اوقف دموعي..
نائل:- كافي اختي كولي يا الله .. شال كلنكس وحطو بأيدي..
الحجي:- يابه تراج ما رايحه بعيد احنه هم اهلج بويه..
-ادحق وهم يحجون.. كلهم غربه شلون اتعود عليهم.. مابيهم وجه اعرفو.. بلحظه تتهجر من بيتك وتنغصب تعاشر الغرب موقف حيل صعب كان..
ادحق بعيون الرجال اللي يسوق.. عاقد.حاجبو وابد ما نظرلي او حجه.. جان ساكت وينفخ..
وصلنا ازدحام بالسيطره.. كام يضرب بالستيرن ويسب بالدوله وبالوضع وخربطه ومحد منظم...
وهيج منكم وهيج من اهلكم ويصرخ مشيها.. والحجي يكله اي دصبر يا ابني مو كل السيارات واكفه..
-اي واكفه تجدي.. غير تمشي .. شوف ابو السيطره كاعد.. يتمضحك ابن ال......... غير يمشي..
-اي دصبر يا يابه شبيك اعصابك نار.. ضغطك لا يصعد..
نائل:- اجي اسوق بمكانك ابو حرب
ليليان:- انوب اسمو ابو حرب .. هذا بس اسمو معركه شحال العيشه وياه.. ما جاوب الولد بقى يتذمر وفعلا الازدحام كان يخنق..
ساعه الا ربع يله تحركت السياره وطلعت.. دخلنا الانبار.. انقبض قلبي من الخوف كأنو دخلوني سجن مو محافظه ثانيه
بقينا نمشي لحد ما وصلنا فرعهم كان عريض حيل.. ومشمس.. صف اباب بيت وكال نائل انزل افتح الباب..
دخل بالسياره بالكراج.. وادحق البيت كبير وبناءه مو حديث قديم.. وحديق وكراجه حيل طويل اختنكت العبره ابلعومي وانفاسي كوه كمت اخذها
صاح الحجي نزلي.. فتحت الباب واريد انزل.. ضهري ذابحني من الالم من دفرات يحيى.. كوه نزلت على مهل..
الحجي:- فوتي بويه منا وطبي للحريم.. مشيت اريد افتح الباب اخاف.. مو هذا مكاني ولا هذا بيتي بأي حق جابوني اله وليش مجبوره اتعايش بيه..
طبيت.. كان بداية كيليدور وبيه مرايه مزخرفه جبيره.. وكدامي بابين.. الباب الكدامي كان مسدود بس يطلع من وراه صوت رياجيل..
والباب الثاني يطب ع البيت.. طبيت ع البيت .. الرياجيل الكانو ويانه فاتو للاستقبال واني بقيت واكفه اباب الكيليدور..
كدامي درج يصعد.. وهول جبير على يمين الدرج ممر ما بيه باب بس مقوس مو شكل باب مستطيل..
الممر يمكن مترتين وياخذك ع المطبخ.. وغرفه بصف الممر.. مسدود بابها.. وهم ممر يطلع ما اعرف وين و حمام بابو المنيوم ..
وغرفتين ع اليسار.. طلعت مره من ممر المطبخ.. وصاحت جابوها.. انقبض كلبي من حجت وخفت حيل..
مدن راسهن وهن كاعدات واني واكفه بمكاني.. العبايه كانت نازله على اديه.. صاحت مره عجوز حدري يمه حدري كعدي هنا..
مشيت يمهم ودخلت كانو نسوان كاعدات وجوهم متفسر خير.. كلهن يباوعلي.. كامت مره .. وانطتني كرسي كعدت..
وهنه كاعدات بالكاع.. موقف استحي ابجي بيه.. اختنكت.. رغم الجو جان بارد بس احس ضهري هيج تنزل منه قطرات العرك وتصب على اسفل ضهري.. كد الخجل والموقف الحرج وهم يدحكون عليه
بقيت بس اجر النفس وامسح بكصتي.. وحده منهم عجوز كالت عساج لا طبيتي ولا شفناج الفكر .. ما كفاكم اخذتم ابني جايه شتردين..
-مو اني اجيت والله هم جابوني..
ضلت تحجي وتغلط وتسب.. نزلو دموعي.. جاوبتها الحجيه الصاحتني.. يا ام سعد.دكافي شجاج انهديتي..
كالت لا والله ما يبرد كلبي الا اذبح هلارهابيه اخت الارهابي.. كاعد يكومن.. طب الرجال اللي تزوجني بعصبيه فات ووراه الحجي و اثنين ولد..
رجعن كعدن من شافنه.. هو بعصبيه يمشي وكف ع السنك غسل وجهه.. والحجي يكله هسه يا بويه بس اهدئ متكلي شجاك..
دار وجهه من السنك وتفل بالزباله وحجه:- اييي هو انتو شمروها براس عالم واطلع منها سالم.. شعليكم انه البتلشت بشرها.. ما اعرف اصلها من فصلها وملفيها ابيتي..
دحق بيه وصرخ خلي العبايه على راسج لا افجره والله.. اخت الارهابي صاير شريف ويحجي بالدين واخته مفصخه حجاب ما على راسها وشامريها على كلبي..
لميت العبايه وخليتها على راسي.. وميته خوف وادحك بالوجوه.. حجت وياه حجيه وكالتو
-دكول يا الله يا ابني شبيك هذا قدر الله مكتوب على اخوك يموت ومكتوب عليك تتزوجها..
-وانه بس قدري الله مطيح حظه.. وكلهم ما اعرفها منين ما منين كح... شريفه شعرفني بيها واجيبها ابيتي..
اني الدموع كامو ينزلون من عيوني مطر.. ولامه نفسي.. وادحك بوجهو من الخوف..
دحك.بيه واتقرب.. كمت على حيلي وتراجعت.. واتعثر بالكرسي..
صرخ اكفييييي... مد ايدو عبالي راح يضربني مسك قلادتي وزكح هاي شنو..
فتحت واني خايفه جاوبتو.. قلادة الصليب.. راد يقطعها.. مسكت قلادتي وطويت نفسي..
-الصليب شيسوي بصدرررج احجي..
-بس الدموع تنزل .. وادحك عليهم كلهم يدحكون .. محد يحجي يس مره منهم كامت كالتله شجاك يا خويه دعوفها..
صرخ شنوووووو هذا احجي.. هيام وخري منهاااا..
-قولتولك صليب ..
-مصلااااااوي لا تحجييييين اكص السانج بس تنطقين كلمه مصلاويه اتذكر عارج من اخذتج منهم..
-دنكت راسي.. واني ابجي..
-دحكي دا اشوف شتسوين بالصليب انتي شنو اصلج..
-مسيحيه
صراع:-شلوووووون شلووووووون.. كمت ادحك عليهم جاي تسمعون لو انه اسمع غلط ..
الحجي :- لحظه اكف بويه.. يعني انتي مو مسلمه..
-لا ..
صرخ الرجال.. الحجي رده دكف يا يابه نفهم شبيك .. بويه شلون مو مسلمه وهمه عقدو عليج بالاسلام واهلج اسلام..
-بابا مسلم بس ماما مسيحيه..
-وانتي على دين امج لو ابوج
-ولكم من اكلكم نغله محد يصدك ولكم بت امها وابوها ما معروف منو ولزكوها بيناااااااا..
-حطيت اديه على اذاناتي من الخوف وهو يصرخ.. اخذتني مره وحظنتني.. وصرخت الله و اكبر عليكم ولكم جاهله كلساع مطلعين عليها سالفه
يا نغله يا ارهابيه يا كح... دخافو الله وخرو منها.. ما تشوفوها هلكدها..
كعدت ع الكرسي وجرت راسي وخلتو على بطنها واني حاظنتها وتمسكت بيها من الخوف..
صرخ الرجال ام علي عوفي يرحم والديج اطلعي منها
-لا والله ما اطلع كافي دحك عليها بكد جهالنا .. والخوف ماكلها باجر ادور ادنيا وحلا بتك تصير بموقفها ما تريد اليرحمها متكلي شجاك..
ام سعد:- هو شنو الشجاه لاعبين ع الرجال وعاقديله على وحده كافره ما نعرفها منين يمكن مفخخه ونروح بيها دوخري خل افحصها
ام علي:- ما اوخر ولا اتركها.. ما تردوها عساكم لا ردتوها اخذها ابيتي والله حالها حال جهالي تاكل وتشرب وعود خل تفخخني...
-خاله والله اني ما مفخخه.
-كومي يا امي كومي.. انه اخذج..
صراع:- ام علي كتلج اطلعي منها وعيفيها ..
-ما اعوفها ابو حرب وتريد اضربني انه وياها حرام عليك هاي انته الحاج بيت الله هيج تسوي عجل شنكول ع الباقين..
الحجي:- ولكم هرجتونا الله واكبر عليكم خل نفهم كلها تهوس.. هيام جيبي البت وتعاي..
كومتني المره.. واخذتني وياها.. طببني بغرفه. وكعد وكال كعدي بويه خل ندحك مصيبتج شنو..
كعدت.. طب الرجال اللي اسمو ابو حرب.. كاله الحجي.. صراع ما تحجي.. كال حل عني يابه البيه كافيني ..
كعد كبالي.. طبت الحجيه .. وصاح بيها الحجي قفلي الباب نوريه.. واندارلي..
فهمينه سالفتج يابه شنو خل نفتهم..
-يعني اشنو اللي تغيدو تعرفو...
صراع:- اخ يلقهر هم حجت مصلاوي انه شكلت.. انتي تتعمدييييين تغثيني لو شلووون..
الحجي:- صراع بويه ابوس راسك بس اهدئ شوي شبيك فرفحت روحك.. ما تريدها اشمرها ما بلازم ازوجها لواحد من ولد عمك. وما تشوفها بلبيت.
فرك وجهو .. وكاله كمل دنشوف اصلها..
-احجي بويه اشلون ابوج مسلم وانتي مسيحيه..
-ابويا كان مسيحي ومتزوج هو وماما بس ما صار عدهم اطفال والمسيح ما عندم زواج ثاني والطلاق صعب ف اسلم حتى يتزوج
-هااا من هيج انتم ما الكم عمام ولا احد طلع وراكم..
-اي اهل بابا تبرو منو لما اسلم.. واعتبرو كفر..
-زين انتي ليش ما اسلمتي.. اذا ابوج اسلم..
صراع:- ما هيج السؤال دكلها ابوج منين جابج اذا ابوج ما يخلف..
-بابا ما بينو شي.. كان السبب من امي.. وما.طلقها بقت على ذمتو.. حتى لما اسلم واتزوج .. بس ماما ما اسلمت.. بقت على دينها..
بعد فتره صار عند.ماما حمل وجابتني
-ساعة السوده ان شاءالله غير حظي طلعج حتى يصخم وجهي عجل شلون يصير الصخام بعد ابيض احمر..
الحجي:- وامج خلتج تصيرين مسيحيه موو
-اي..
-زين بهلحاله العقد باطل لا.. ؟
-حجي انته هم ما ادري شلونك.. هو ارهابي وتصدك بعقده.. هسه اجيب شيخ ويجدد.
-عجل كوم جيبو يابه قبل لا ينزل الليل..
راد يكوم واندار حجه.. هيام تفرشيلها بالمخزن تختلط وي جهالي ممنوع..
-اذا هيج خلني اخذها
ما رد عليها و كام.. فتح الباب دخلت المره اللي رادت تفحصني وبعدها جرن وحده وره اللخ يطبن.
كاعده مصدومه حتى ما بيه ابجي الخوف ذابحني وكلها تتلامز وتباوعلي صفح وبودهم ياكلوني..
اندارتلي الحجيه الفقيره.. كالتلي يمه انتي عربيه ؟
-كتلها لا..
-عجل شنو
-ماما اصلها كردي وبابا تركماني..
-مبين على وجهج مو مال عرب صفره والوجه حمراوي..
-ما فهمت اشنو تقصد.. بس اللي اسمها هيام.. جاوبتها اي فدوه حليوه الله يحفظها..
جاوبتها مره :- ما تشوفين الاجانب كلهم شكران لان كلهم نغوله ..
الحجيه:-خافي ربج لميعه الطعن باعراض العالم ما زين.. هم المسيح حلوين والبنيه دمها مخلوط كردي وتركماني..
-انتن شنو نسيتن دم ابني واكاعدات اداعلها والله اكوم اخرب الدنيا واذبحها..
الحجيه:- ان جان اخوها صدك متورط بدم ابنج فمشي ذبحي اخوها مو تذبحينها الها عجل انتي ما تكدرين على ذاك الارهابي كدرتج على هالجاهله
-هاي هم ارهابيه..
هيام:- اكلج خاله متكليلي شبيج .. شو دكلج مسيحيه تكليلها ارهابيه.. عجل هم المسيح بيهم ارهاب.. ؟
كفي حقدج عنها حرام عليج جاهله ووكعت بيناتنا شلون الله يرحمنا اذا ما رحمناها..
-هاي بذرة حرام.. دمها نجس.. لا تضلين ادافعيلها هويمه انه كلبي محروك على ابني وانتي بحيل صدر ادافعين لاخت الارهابي
-اسكت عنج احسنلي .. انتي يا خاله الحجي وياج ضايع..
-يا هيج صارت تتجاوزين علي.. اكوم واشوف ابوج شلون ما يردج.. ابو صرراااع وينك يا ابو صراااع..
الحجي:- يابه شهرتنه شنو السالفه شبيجن..
-تعال ادحك بعينك وانه المكسوره على ابني تجي هيام وتهيني.. ترضاها انه ما الي كدر بهلبيت .. صراع يرزلني و هيام ترزل وانته تخاف تحجي شوف شسوت بيه وشتحجي
تحجي وتشهد ابنات جانن كاعدات يمها وهيام تكلهم والله ما حجيت شي.. الحجي كام يرزل بهيام خطيه انفهرت عليها من وراي ترزلت..
جاي يحجي الحجي وهيام تبجي ..وطب اللي اسمو صراع.. راد يحجي دحك بعيون هيام وصاح شبيج..
كامت الحجيه الفقيره وهي تكله هي وابوها يمه يمون عليها يمون..
-غير افهم ام علي شصاير..
-خويه والله ما حجيت شي.. هدت عليه شلون اكلهة اتركي الجاهله بحالها .. وتمسح بدموعها
-شوفي ام سعد الحرمه بذمتي كفي شرج عنها وما عليج بيها وجوزي من هيام لا بالقران الدنيا اكلبها فوكاكم..
وزكح بيه.. حدرررري انتي.. فزيت على صرختو بوجهي جنت مندمجه ادحك على مشاكلهم..
كمت اخذتني الحجي.. ومشينه.. دخلنا بغرفه ثانيه.. دخل الشيخ.. و عقد علينا مره لخ.. وبموافقتي..
وطلع.. وكال ام علي فرشيلها بالمخزن..
-ابو حرب حرام نشمرها بالمخزن خلها يم امي تنام حالها حال الجهال..
-هيااااام تسمعين شجاي احجي لو لا.. نومه وي جهالي ممنوع .. ما اخليها تختلط بيهم ولا تناقشين لا بالقران اطلع عن طوري..
اخذتني ومشتني للمخزن.. يصير بالممر مال المطبخ.. بيه مواد غذائيه وبيه مجال متر فرشتلي بيه وباست راسي وكعدت يمي..
دموعي تجري وهي تكلي لا تبجين حبيبه والله هو كلبه طيب لا ادحكينه عصبي هاي بس بوكت اعصابها هيج يتصرف الا والله من طيبته تاخذين الثوب العليه
هزيت راسي .. مسحت على زندي وكالت صيري سباعيه..
كعدت ابجي على حظي .. ليش هيج رب شنو سويت اني.. شنو ذنبي وهيج اتزوج.. مو بنيه مو من حقي افرح واختار بدلتي وجهاز عرسي
صديقاتي اهلي يشاركوني ولو على الاقل اخذ رجال احبو مو بكد ابويه..
ادحك ع المخزن بابو خشب ثخين عريض.. والمخزن حيطانو نثر و الكاع صبابه.. وبيه كواني طحين و شكر وتمن وهواي مواد غذائيه حتى تنكات دهن..
وعليهم مشمور حصران مصفطيهم.. بقيت كاعده بمكاني واسمه هوستهم وحجيهم بره.. لشوي اجت بنيه كالت تعاي تعشي
كلتلها شكرا ما اشتهي.. عافتني وراحت.. كالتلهم جان يصرخ الرجال اللي اتزوج عليه .. حفظت صوتو على كد ما صيح بأذني..
زكخ وهو يكول صيحيهااا غضبا عليها تجي ما احد يشتغل عد الخلفوها ويودولها الاكل لحظنها من تنمد السفره غصب على الكل يكعد.. وخل تفهم هلكلام زين..
اني بمجرد ما سمعتو.. كمت على رجليه.. اجت البنيه رادت تحجي هزيتلها راسي بمعنى سمعت..
رحت كلم ملتمين .. ادحك اثاثهم معرض خشب كبير بوسطو تلفزيون والباقي تحفيات ومواعين وكلاصات مرتبيها وبابهم زجاج
الكاع ماكو قنفات كله زوالي ومدات ومخاد مرتبه.. مادين سفره يمكن 3 امتار وممكفيتهم الرب يحميهم عددهم كلش جبير..
والكل مجتمع رجاجيل ونسوان واطفال ما عدهم عازل.. وكفت ادحك وين اكعد.. اللي اسمو صراع مكعد طفل يمه ومنطيني ضهرو وما دحك بيه ولا كأنو اجيت..
بس هم كلهم انتبهو لوجودي.. صاحت الحجيه الفقيره حدري بنيتي كعدي يمي..
مشيت يمها.. شال راسو .. وفتح عيونو وهو يخوزرني.. انه شكلت مو حجابج ما ينزل من راسج..
زكح بيا كبال الكل.. خنكتني العبره من الفشله.. كتلو والله نسيتو ... ردت اكوم.. حجت هيام ولزمتني ..
-البنيه ما متعوده هلله هلله شوي شوي .. كعدي حبيبه انه اكوم اجيبو...
-جابتو واجت. لبستو.. وادحك عليه قلبي يرجف منو صرختو تفزز الميت.. صوتو مرعب.. وما متعوده ابيتنا على صوت رجال
بابا كان فقير وما يصيح.. ويحيى صوتو ناعم عادي ما بيه خشونه.. ندستني الحجيه ..
-اكلي يمه ما تنفعج غير روحج مالج شغل بالناس شبعي وكومي ولا تهتمين الله انطاج اثنين اذانات وحده سمعي منها والثانيه طلعي منها ولا تخلين بكلبج وتنقهرين هو العمر يومين وماكو حال يبقى نفسه بس يحتاج وكت تتعودين
-هزيت راسي.. ادحك ع السفره مالتهم.. صابين بصواني وسط تمن وفوكو حشو ولحم مشوي
وبمناسف ثريد و ومواعين تمن وفاصوليه وزلايط وطرشي وخبز و قواطي بيبسي موزعه.
يمكن بعمري ما شايفه هيج سفر.. خوالي كراد وعوائل صغيره ما يصبون هيج.. و عمام ما عندي ولا اطلع لبيت غريب .. ف جوهم كلش غريب عليه..
بقيت صافنه اشنو اكل .. اشتهيت اللحم المشوي الفوك التمن بس استحيت امد ايدي هسه شيكلون ما شايفه هدت ع اللحم..
وحتى خاشوكه استحيت اطلب لان مخليها بسله صغيره كومه خواشيك. لازم تطلب.. ف صعبت عليه
بقيت اخذ طرشي واكل.. انتبهت عليه الحجيه.. صاحت سعد من يمك خاشوكه..
شمرلها.. وخلتها بماعوني.. وحطتلي الخبز يمي.. ما الي نفس اكل واكو بيهم يطلعون صوت من ياكلون ويشفطون لعبت نفسي..
هيام:- ليش حلكج فاهي دكلي..
-ما اشتهي..
-عاد غمسي بالفاصوليه طيبه دسمه ضوكيها لا تستحين حبيبه..
ام سعد:- هيام بالله ما تهفيلها بريشه خاف احترت الخاتون .. شلون عين صلفه اداري باخت جتال اخوها ولا مهتمه لاخوها توه دافنينو
تكول دافنين دجاجه مو شاب يترس عين الشمس.
-هيام ما حجت.. بس صراع.. شمر الخاشوكه وطلع صوت وضل يدحك بيها هي فهمت نظرتو وندكت.
يربي شلون راح اعيش وياهم. مينجرعون كلامهم وعيشتهم واكلهم مال عرب .. عدنا بالموصل نسميهم بابة عرب..
شفت وحده كامت.. كلت يا الله اكدر اكوم.. هم كمت. رحت وراها تغسل وكفت.. كالت شسمج.. ابتسمت.. اسمي ليليان.
يمكن الكل نسى يسألني عن اسمي.. سألو عن كلشي بس اسمي ولا ذكره ما اعرف يمكن يعرفوه..
-هلا بيج .. اسمي نوال اصير مرت سعد اخو رجلج صراع
-هاا هلو بيج..
-تركتني وكفت اغسل.. اجه رجال يغسل محمح عود يريد يفوت.. مشيت بسرعه.. دا اريد ادخل للمخزن.
جان تلزمني المره الاسمها ام سعد.. وتكلي تتسممين ويغسلولج مواعينج.. كل المواعين عليج بساع يلاااا
هزيت راسي.. ودخلت للمطبخ .. ضاحتلي الاسمها نوال.. انطتني طاسه وخلتلي بيها زاهي وسفنجه..
وكالت راح انكل مواعين وانتي غسلي.. راحت.. واجت وحده شايله مواعين كومه بأيدها.. وصلت يمي وطريهم بالكاع وصرخت
اخلاص :- ياااا عمى بعينج ان شاءالله.. ولج ليش عيج يهجامت البيوت ما كافي ابن ابن عمي كسرتو بيه وكتلتو انوب حتى المواعين تخبثين وتكسريهم
-ااا اني مو انتي كسرت...........
-هجم اليهجمج ان شاءالله والله انج ما جايه على خير ولج بس لا ابالج تكتلينه لابو حرب واخوج دازج..
دخلو ها هاا.. شكو
-دحكو انطيتها المواعين تجرهم من ايدي من وره خشمها واطرهم بالكاع وتكول ما ادري
ام سعد :- ولج يلخايسه تعرفين هلمواعين من شوكت عندي.. و لزمتني من شعري.. ولج انتي جايه تهجمين بيتييييي
وتلف بيه المطبخ من شعري وتصرخ وتضرب على ضهري.. كمت ابجي. واني حاطه ايدي فوك راسي
اجت هيام تركض وتريد تفاككني من ايدها تجر بشعري تريد وهاي تفر بيه احس شعري تكطع من جذوره.. ورجليه تجي ع الكزاز البلكاع كامو يجرون دم..
وهيام تصرخ.. وشمرتني بالكاع حيل.. تكومت.. وصار وجهي بالكاع وشحاطة اجت يمي.. كمت ورفعت راسي واني ابجي..
شفتو الحجي صاح وصراع دخل.....يتبع

☆☆☆☆☆
#زينب_ماجد