#المراهقه_و_الأربعيني

الحلقه13

المراهقة_و_الأربعيني
،،،،،،،، بقلم زينب ماجد ،،،،،،،،
الحلقه_13

شمر عليه الثوب.. وطلع.. گمت نزعت الثوب اللي انشك عليه.. وبدلت.. وكعدت ابجي.. رب تعبت تعبت تسمع لو لا..
الى متى اضل اعاني.. شنو ذنبي موتني خلصني اريد ارتاح.. سمعت صوت بره.. كمت مسحت عيوني وطلعت رحت غسلت وجهي..
ووگفت بالمطبخ.. جاي ماي تجر.. رجليه صارت خيوط والناس بعدها لا واحد يحس ولا ابد ساعه 11 والدنيا شتا ميكولون ناس تعبت تريد تنام..
ل11 ونص يلا فضت.. انوبه جلسه جديده لاركان البيت يتناقشون.. كلت بكلبي دروحو متت من الصبح على فرد وكفه.. وانتو ما عليكم بس اللغوه
عفتهم ودخلت المخزن.. صاح صراع.. ليلياااان..
-ماتت ليليان وما سمعت صوتك.. كمت.. هاا..
-صعدي حظريلي الملابس وشغلي التدفئه حيل تعبانه..
-تمام... صعدت.. طلعتلو تراك ولملمت غرفتو وحظرتله الحمام.. الله خالقو فرس النهر ليل نهار يسبح ولا يكول شتا..
اني بين يوم ويوم ومرات اغلس على السبحه.. وامددها من البرد.. وهذا ابد ولا يحس بالبرد..
شغلت الهيتر بالحمام وعلكت الخاولي الو.. دا اطلع.. صار كبالي.. دنكت وردت افوت..
-يولي
-هاا
-اخذي فراشج بغرفة الحجيه لا تنامين بالمخزن.
-ممتضايقه
-مو احجي وياج..
-نزلت مهتميتله.. فتحت المخزن و تمددت.. من التعب بساع نمت.. شويه وحسيتو فتح الباب بقوه..
اني مغمضه واحس عليه.. نفخ.. وسد الباب.. ما عفتهم عليه خايف عليه لو بس يأمر ما اعرف
من الصبح كعدتني السعلوه ام سعد..
كمت ونفس منوال كل يوم من تنضيف.. للضحى واجه نائل جايب وياه تخم قنفات للهول يكول فشله اليطب يكعد ع الكاع..
فساعدتو اني ونوال بالشيل.. رتبناهم.. دخل صراع من بره.. دحك ع التخم وما علق بس كعد.. واحنه بعدنا نعدل..
كال نائل شلونهم حلوات مو احسن من الكاع.. كتلو والله يخبلون عاشت ايدك والوانك تجنن .. امتزاج بنفسجي فاتح وي بنفسجي مسود.. اعشق هلون..
دنحجي صاح صراع.. يولي .. كتلو ها
-تحركي جيبي ماي..
-تمام.. رحت دا اجيب.. طلعت هو ماكو.. كتلو نائل وينو عمو .. كال صعد.. يا الله والله مهدود حيلي ما بيه اصعد..
امري لالله اصعد اشنو اسوي.. صعدت.. دكيت الباب ما رد.. دخلت.. متمدد بملابسو ووايدو على وجهو..
مديت دا احط المي.. شال ايدو.. دحكني وكعد..
فتح دكم القميص وكال ناوشيني دشداشه خفيفه.. جبتلو.. كان نازع حتى البنطرون.. ولبس الدشداشه بسرعه.
وكال غسليهم بساع والحذاء نضفيها .. شلت ملابسو وطلعت..ترست الغساله مي وتايد و شمرت القميص .. ودا ادور بجيوبو...
صاحت الحجيه.. عاد شلت وشمرت وحركت الغساله وطلعت.. الحجيه تريد اطلعلها رقم تخابر ما تقرأ اسماء..
طلعتلها.. ونضفت غرفتها.. رنت الغساله. رحت وعساني لا رحت .. الفلوس عشرات خضر مطفحات ع المي..
يمه عزا العزاني شيخلصني منو والله ليذبحني..اريد ابلع ريكي.. حلكي نشف من الخوف وهذا عصبي شيفهمو والله يقضي عليه..
كمت اشيل واشر بالفلوس على حافة السله وما تخلص كلها عشرات وحمر 25 الف
اخر شي فرغت المي والكه بعد فلوس.. جيت افيع والدمعه صارت بعيوني بالله ربي هذا المجنون شگلو..
دا اشيل البنطرون.. احس شي ثكيل.. مديت ايدي بجيبو .. والكه محفظتو .. وهوية الاحوال المدنيه هنا سودت الدنيا بعيني..
ادحك ع الهويه.. خربانه ولمي فايت جوه الكبس والكتابه كن ساحت مثل وحده امكيجه ومطرت عليها الدنيا.
متحملت.. لزمتها وكعدت بالكاع ابجي.. لا ربي لا والله بعد ما بيه انضرب شسوي هسه والله ما يرحمني.
ابجي وادحك ع الهويه وتتحطم احوالي من اشوفها سايحه.. اخليها على وجهي واضل ابجي اني شجابني لهنا.
والله جنت اتعاجز اغسل ملابس مدرستي هسه بيت وعيال ورجال شريد اتحمل دور مو اي رجال عقده يربي ما يتفاهم..
لو خزرني بعيونو اني اموت بمكاني من الخوف .. هسه شسوي...... اخر شي كلت شيريد يسوي خل يسوي هي الكتله بيها وبلاياها بقت على هاي..
نشفت الملابس وشريتهم واخذت الفلوس وكويتهم.. يبسو مشو حالهم... من ال150 الف طلعن ب90 سلامات والباقي راحن ثريد صارو ما ينلزمون..
جبت الهويه.. خليت عليها جفيه.. وكلت خل اكويها بكلت تنشف .. شو كويتها انلاصت بالزايد ..
كل هذا الحجي وهو نايم.. يربي اكعدو واكلو.. لو خلي يكعد ويعرف شسوي..
نزلت كملنا هوسة الغدا والتنضيف.. نزل هو عيونو وارمه من النوم والغضب.. عاقد حاجبو .. الحجيه كاعده..
كاللها يمه اريد حب وجع راس.. راسي راح ينفجر من الصداع.. عمتي تكول مهيدي المكبسل حبوبها بجيبها 24 ساعه .
كالتلو اي يمه هاك.. واندارتلي جيبي لرجلج ماي خل يشرب .. اني ما انتبهتلها باقيه ادحك بوجهو على هلعصبيه شراح اكلو
الحجيه:- يولي مو احجي وياج زين بالج
-هاا اي هسه. ركضت جبتلو وجيت.. اخذو من ايدي وكال :- اريد جاي ثكيل حيل ع السريع يحجي وهو يفرك بكصتو من الالم..
سويتلو جاي.. وجيت.. نائل جايب طبلات للقنفات.. خليتلو طبله كدامو وحطيتلو الجاي.. وهو ينافخ كن ما طايق احد..
بعدو يريد ايمد ايدو للاستكان.. جان ابن سعد الصغير اشمر الطوبه البلاستك وبالجاي .. انسفح الجاي بساع..
صاح دنعل ابوك لابو لخلفك.. ولج هييييين يلفاهييييييه.. نواااال ..
نوال جانت بغرفة ام عبد عتحف شواربها.. جت تركض هاا ها .. وشالت ابنها وهو تولاها رزاله مديحه جهالج وما كاضبتهم ومن نضرب تتزعلين
ووووووو رزاله غسل ولبس لو اني منها وهيج اترزل من حماي بعد ما اطلع وجهي كدامو.
هي ما ردت عليه بساع سحبت ابنها.. ومشت.. زكح بيه.. انتي هييين مسرحيه كبالج ما تمسحين الجاي وتجددي..
-هاا .. اأ .. اي .. انثولت. من صرخ بوجهي.. عثرت اباب المطبخ واصبعي الزغير انلوه.. فرفحت روحي من الوجع بس كمت بساع.لا يبقى يصيح
. انثولت كد ما دخت شراح يسوي بيا ..لو عرف اني هيج مسويه بمحفظتو..
رجعت مسحت الجاي.. وخليتو جديد.. شو كام وما شرب وتركني بالله هذا صاحي لو شبي..
بس شنو احسو نار وتمشي اللي يمسكو يحترك.. دا يصعد.. كالتلو امو وين.. صرخ علمغتسل يجفنوني ويدفنوني طالبتني بطلااااااابه..
كالتو اسم الرحمن عليك يمه لا تقهر نفسك وليدي والله اخاف على صحتك.. ما رد عليها صاح عليه انتي هييين.. طلعي حظريلي سلاباتي..
هو صعد واني صعدت وراه والله من الخوف نعالاتي وكعو ع الدرايج وكملت حفيانه وما ادري بيهم..
خايفه اغلط وينكلب عليه.. بس هو قمة غلطي بخوفي انعمي ما اكوم ادحك زين انثول..
حظرتلو كلشي وهو فات سبح.. اني نزلت.. شوي وصاح من فوك هييين هييين يولي..
كتلو جيت جيت.. وركضت بساع..
-من اتشوفيني مولي عساني لا رديت وشفتج غير تهيريني دطلع وين القزرقرط هدوووومي
-حظرتهم والله هيانهم ع التخت كلهم.. شلتهم ودا انطيهميا .. ضرب ايدي وشمرهم وكال طلعيلي الدشداشه لا اكسرو الراسج والله..
-رحت اطلعهم هو دك موبايلو.. غلط وسب بالموبايل وضربو على تخت وكع بالكاع.. سالفة السياره والناس حيل تعبتو والضاهر مو خوش ناس ..
بقيت واكفه وهو يبدل.. لف اليشمغ على راسو وكمل ورش عطر.. واندار وهو يلبس ساعتو .. محفظتي والمفاتيح وينهم..
طلعتلو الهويه العسكريه والسويج من الجراره وانطيتو
كضب الميز وصرخ.. يولي لا تكفريني الهويه المدنيه الفلوس المحفظه وييييييينهم..
-بلعت ريكي احس راح يغمن عليه من الخوف كلبي يدك بسرعه.. اركض واوكع من الهوسه البراسي..
نزلت جبتلو الفلوس والمحفظه والهويه... هو واكف ايد مخوصرها وايد منتكي علميز ومدنك راسو..
كتلو هاك عمو.. انطيتو اول بدايه الفلوس.. تلمسهم بسرعه يابسات مجرجفات..
دحك بعيوني بسرعه ..:- شنو هاي.. انطيتو الهويه خزرني بعيونو .. هاي شنووووووو يولي شمفينه انتي
-عمو والله ما علقصد.. همه انغسلو وحدهم والله عمو .. حجيت هيج زت الهويه والفلوس بوجهي ولزمني راشديات..
كل غضبو طلعو بيا... كان يضرب ما يطلع مني الصوت رافعه يدي واشكف عن نفسي وابجي بخنيك..
اخر شي وكعت يم رجليه لزمت دشداشتو ودنكت وخليت ايدي فوك راسي وابجي..
واخاف اطلع صوت.. وهو يصرخ ويغلط ويصيح.. نكثني من دشداشتو وكعد على حافة السرير .. يفرك بوجهو
ابتعدت منو .. كعدت بين الميز والتخت ادحك عليه ابجي والم بشعري كفشو اجيب واخلي وره اذني.. واخاف حتى صوت الشهكه تطلع مني وتستفزو..
نزل ايدو ودحك عليه.. حجيت واني لامه رجليه لجسمي واديه على حلكي وكتلو عمو والله ما علقصد ما اعرف والله ما اعرف..
كام مني.. ووكف يم الميز يفرك بوجهو.. ويستغفر.. اني بساع جريت الحجاب وكمت اركض بسرعه طلعت..
كان كل ما يعصب.. يطلع اعصابو بيا صياح وغلط واذا اني مذنبه هذا اللي الله كاتبه عليه.. مرات اهرب منو وقت اعصابو ...بس وقت اللي ينجن اسم ليليان من ينزل فمو
ف اضطر اواجه غضبو بكل صبر.. واحاول ما اطلع صوت حتى ما تثير اعصابو اكثر...
نزلت يومها للغرفه مال الحجيه.. محد بيها .. بجيت لحد.ما كال الله بس.. دا اريد.اشوف شوكت ينصفوني..
ما اعرف اشتغل شسوي .. ما تعلمت على عيال ورجال كل عمري امي تغسل عني ومتحاسبني .. انام واكعد.بكيفي ..
وكل هذا اني الاصيح وما عاجبني عيشتهم.. صرت اتوسل اعيش حتى لو تحت غضب يحيى وتجرجرني امي وباجي من ايدو ويحموني ويهونون عليه
ولا ابقى تحت ايد هلظالم.. المحد يحميني من غضبو.. اني ما كد مسؤليتو هو صعب والله ما اتحمل.. تعبت..
بقيت ابجي لوحدي لحد ما هديت مني ومن نفسي.. مديت راسي من الباب عمتي كاعده.. كتلها عمه صراع وينو
-راح يلخايبه شكو شصاير صوتو واصل ليجوا..
-متسألي لابنج اني شكو.. اذا هو يكاون ذبان وجهو واني الاكع بيها..
-دارت وجها ما رضت بالحجي..
-دخلت للغرفه طلعت جبه لبستها والحجاب وطلعت يم الحجيه.. صاحت
-يا عزا العزاج وين موليه ولج ستري علينه
. رايده تشردين
-يا اشرد حجيه يا اشرد.. هو ابنج ينشرد منه تكول عزرائيل كامش الاوادم من خوانيكهم..
-فالج لا كبلنا ان شاءالله بيش طالبه وليدي وتدعين عليه
-بالله هاي شحاجيها.. عمه والله ما دعيت كلت عزائيل يسلب ارواح العالم هو كلشي ما يصير عليه
-ولج انتي شو ما تستحين.. طالبه ابني بطلابه ومفاولتو بعمرو.. صمي هلحلك الما وراه بس الرذاذ شعمى عليج غيرو.. عميتي على روحج بالسانج
-عمه هسه اريد اطلع اختنكت والله اختنكت بس ملطشه لابنج اني صايره دكومي طلعيني فدوه..
-وين نولي ما تشوفين الدنيا صايره لخه والوادم مسطوره وحظرت جنابج تردين تتفسحين..
-والله ما يصير هيج ارحميني اختنكت.. حكمكم بس عليه .. كلكم اطلعون وتفرون الا اني
-يولي منو طالع مو منچبين وياج وكاعدين بهلمهجوم..
-والله كلكم اطلعون خو حلا مسويه البيت مزار يومين هنا وعشره تفرفر وام سعد ما تكعدلها ساعه حتى انتي يوميه تفرفرين ع الدكاتره وما كاعده..
-انهجم راسج يا طايحة الحظ وصلت بيج تحسديني ع الدكاتره لو ما من ضيم كلبي رايحتلهم.. رايحه اتونس انه يلخايبه..
-كعدت والدمعه بعيني حيل اختنكت واحس البيت ديضيق نفسي اريد انفجر.. اندارت شافتني حيل متضايقه. كالت
-دكومي يولي حقج سجن هوه خوما سجن.. يريد يحجي اطبه العافيه تاليتو يسكت .. كومي عينيني وجيبيلي عباتي وجواريبي
-اني كيفت كمت بسرعه جبتلها و لبست الحجاب مدري شلون ما اعرفلو وحطيت ثوب بجنطه جنت ناويه ابات عند هيام واخلص من هلجو المتكهرب ولو يوم واحد
طلعت للحجيه.. حجت
- يولي خل اخبر نايل بلكن ياخذنه بسيارتو تره انه حيل ما بيه امشي..
-خبرته.. نزل ع الدرج ويكول ها حجيه جاي تخابرين
-اي يبعد امك هاي حيل متضايكه واريد اطلعها.. ما تودينه بدربك لبيت هيام..
-اي حجيه بعيني يلا..
-طلعنا.. كالتلو يمه لو اتعبك ما تطبكلنه يم مختبر نحلل. انه اريد اقيس ضغطي واحلل لهاي وجهه كركم ما عاجبني..
حجه هو.. :- اي يا حجيه اذا حلكها فاهي لا تاكل ولا تشرب شلون يصير بيها دم وتحمر..
-هو من ضيم اخوك تلحك تاكللها لكمه هالمسكينه..
-نزلنا للمختبر.. سوينه التحليل وكاللها ساعه.. كالتلو خليه عندك انه اجي بعدين..
طلعنا ورحنا لبيت هيام.. طبينا عليها لو عبالك نزلنا من السما تبوس بينا وفرحانه وشعجب خاف تردون تموتون..
ردتها الحجيه...فالج لا گبلنا بيش طالبتنه يولي..
عاد.شبكتها وكالتلها شعندي غيرج يلحبيبه الجنه اليوم ابيتي مصدكه انه الغاليه ومرت الغالي عدي اليوم..
دخلتنا جوه.. وهي تكول شعجب شعتب مريت على بالكم واجيتو..
الحجيه:- هاي متضايكه وكلت اطلعها هم حكها .. مدري شبي صريع عليها.. ماهو بعقله كايم كاعد داك عليها
-شبي هليام متكليلي شبي ادري نحسدو..
-شدراني عنه غير من يوم الحادث وهو متخبل وانوبه اجته هاي المصيبه صفح مال السياره ومو خوش اوادم ومكاومين وعمام وفوك سيارتو وسيارة الرجال ..صاحب السياره بالمستشفى
-ياااا هلكد.معقده..
-دايخ بزمانو سوده عليه يكاون ذبان وجهو وما واكعه بيها غير هلمسكينه..
-اندارتلي وكالت شجاه للان ما هدئ..
- اني جن واحد وكالي بز.. العيون كامت تتجاره عشره عشره.
-يولي لا تبجين ارتاحي.. هم ذول الرياجيل ما وراهم بس الدموع اكوم اجيبلج ماي ..
راحت جابتلي مي.. واجت كعدت تحجي وتهدي بيا.. وتسألني ع شنو عصب وشسوالي ما نطيت اي كلمه..
خفت منو يسمع ويكول شاكيه عني ف اكتفيت بالبجي.. بقت الحجيه تحجيلها صياحو وسولفتلها على ثيابي
عاد هيوم نزلت وشبيها ثيابها وابنج يريد يدفنها بالحياة وما يخاف الله.. عمتي ما تقبل واحد.يحجي على صراع.. هي ترزلو اي بس واحد يحجي عليه كدامها تتخبل
فعاد كامت ادافعلو واشتد النقاش بين هيوم وعمتي.. فسكتت لا ادور تكبر وهم اكع بيها.. ندست هيوم وكلتلها عوفي..
كالت اكوم اسوي جاي.. راحت وصاحت ابنها دزت على كعك ابو الدهن.. وهي وكفت تسوي جاي رحت وراها..
-ام علي
-عيوني امريني حبيبه
-اريد ابات يمج قنعي الحجيه
-يولي عين غطا وعين افراش ان ما شالتج الكاع تشيلج عيني صدك جذب مرة الغالي ابيتي وتريد تضل عدي يوم السعد..
-عاد ارتبكت اني من واحد هيج يمدحني انثول بعد انسى شلون اجاوبو
الحجيه شربت جايها وكامت تحوس تريد ترجع للبيت هي ما تعرف تكعد.بمكان اخر غير بيتها تحس نفسها نايمه بالشارع..
فكالتلي يلا هيوم خبريلي نايل يجي ياخذنا لا يخيم الليل وتروح عليه صلاة المغرب....
هيام:-اي هسه اخبرو .. بس يمه ليليان اليوم تبات يمي بروح ابوج..
-تردينو يهوس على راسي انه تعبانه ما بيه حيل صراع وصراخو..
-معليج كليلو منك لاختك.. اختك ما قبلت تجي وهو يتفاهم وياي..
-هاي بعد تبقى يمجن انه اودعكم ... كامت وكفت بالباب جنها مطروده تحوس ما تحملت تكعد ساعه الا بيتها لحد ما اجه نائل واخذها..
-من سدينا الباب ورجعنا خلت ايدها هيام على جتافي وكالت اي شمشتهيه روحج هسه اسوي..
جان تنط بتها ساره تكولها ماما بيتزا الله عليج بيتزا والله مشتهيتها.. كالتلها يولي منو طالب رأيج انضبي
-كتلها براحتج.
-بقت ساره تلح.. اندارتلي كالت تاكلين البيتزا..
-اي
-اوي مدري شلون تجرعوها خبزه يابسه وعليها جبن وهوسه.. اذا مو مركه وخبزه هم تكضب كلبج.
-المهم دزت مواد بيتزا واني وساره سوينا العجينه.. ومن العجينه نفسها سوت فطاير جبن وكرفس وسوتلي كيكه بالفرن هم.. وجابت بيبسي وكلبتو للعشا گلاب ماكو شي ما جابت وحطت..
احس اعصابي ارتخت شويه ضحك وسوالف حلوه وهيام ما خلتني البس حجاب كالت يولي ارتاحي هو بس علاوي تستحين منو مثل اخوج واصغر منج..
فنطلقت ابيتها جن واحد وطالع من سجن وبناتها حبابات يوكفن يمي شطلب وشريد.. لليل خلصنا مواعين العشا..
وكعدنا اني وياها دك سوالف هي كسرت المخده وتمددت وكالت تمددي ارتاحي وبتها ترسم وابنها يدحك ع التلفزيون.. وضلينا نكرز حب وناكل حلويات وتسولفلي على ايامها گبل وشلون جابت جهالها..
لهناك ومنحس الا الباب تفلش.. فزينا ثنينا وعلي طلع كبالنا.. هي جرت حجابها واني وكفت بالباب واسمع علي يكول فوت خالو فوت ماما خالو صراع اجه..
اسمع صوتو يكح گبل لا يفوت ويكول يااا الله..
استقبلتو هيام بلهلا وركضت تباوسو.. اني ما ردت ادحكو.. دخلت جوه.. سمعتو كعد.. صاحت هيام.. ساره جاي لخالج بسرعه..
جاوبها.. لا دايمه ان شاءالله الوقت متأخر اريد اروح.. ليليان وين..
- ليلياااان حدري خيه رجلج يريدج
-اجيت.. ادحكلو بخوف.. هو تحسو مثل الاسد التعبان بس تسويلو بز يهجم وياكلك..
صراع:- يلا بويه تحظري اوصلج عدي شغل
-جاوبتو.. اي ..بدون ما اناقش واحس اختنكت والدمعه بعيني.. ودحكت لهيوم هي افتهمت .. فحجت
-ابو حرب خلها الليله يمي تبات انه اريدها
-يلا بويه روحي بدلي ما عدي وكت.. ما رد على حجي هيام.. بمعنى ما اريد.نقاش هي فهمتو اجت ورايا للغرفه..
-كالت انتو متكاونين ضاربج .. شبي ؟
-اني ما حجيت بس ضليت ابجي.. يا الله كلت ارتاحيت اجه على راسي بهليل لاكشر لا تنام يمي ولا رايدني خليني انام براحه..
-عاد بقت تمسح على راسي...وراحتلو كالت الجهالها فوتو جوه ..سألتو.. ابو حرب صاير شي
-شاكيتلج ؟؟
-لا بالقران خو انه جايه استفسر منك ..من احجيها ما تجاوب بس الدموع تتجاره..
-هز راسو.. وكاللها تهون ساعة شيطان..
-ان شاءالله .. الله يهدي سركم بس خويه انت هم على كيفك وياها.. البنيه حيل متضايكه وصدرها مكتض ..
تتحمل منك وما تحجي وهمه بكلبها.. على كيفك وياها بداعة امي
-هز راسو .. ان شاءالله
-اني جهزت وطلعت. دحكلي.. جاهزه. كام وكاللها ام علي محتاجه شي..
-عساك سالم خويه يحفظك الرحمن..
-شال الها 10 حط بيدها وكاللها مصرف للجهال..يلا اودعناكم.
-هي باوستني وكالت صيري سباعيه واعرفي شلون تكسبي.. اني ما احجي لان من الخنكه بس احجي ابجي.. فبقيت بس اهز براسي..
صعدت السياره.. طلع.. بس ما طلع ع البيت بقى يفتر والجو هوى عالي حيل وبااااااااارده.. مشغل التدفئه ويسوق..
واني كاعده يمو بالصدر ودايره وجهي منو ومتجيه راسي ع الجام وادحك ع الشارع.. صف يم مرطبات.. كال شمشتهيه اجيبلج..
-استغربت من سؤالو بس كتلو ما مشتهيه شي رجعني لگبري خل انطمر.. طفى السياره ورجع ضهرو للكرسي..
-احجي ليليان
-ليش طفيت.. وشحجي..
-رجع راسو للكشن وكال دام مو بالبيت وما احد يسمع..فرغي البصدرج كلو شتردين احجي... اسمعج..
-اذا حجيت ف الكلام ما يسرك.. اطلع للبيت احسن لان ما بيه احجي وانضرب بعدين..
-يولي والله تعبان لا تزيديها علي بالقران ما مرتاح.. براسي الف حساب......قاطعتو
-اي وتصفي احساباتك بيه.. ملطشه بايدك شوكت ما عجبك تضرب وتغلط وتصيح ولا كأني بشر والي احساس وتكول ايدك توجع على جسمي شلون اضربها..
كل هذا متحس بيه انته..
-انه اسف بس........
-كلمة اسف ما اطيبلي جرح ولا تشفي البكلبي.. تعبت منك تعبت .. ماكو وحده تتحملك انت ما اعرف شلون ينعاش وياك صعب صعب .. اتركني بحالي الله يخليك اعتقني..
-ادري والله ادري صعب .. بس يا ليليان انتي هم ما قاصره.. الصار ما هو شوي
-شصار.. هاا شصار.. بكتك فلوس.. مو انت مسلم ودينك يطلب ع السارق 4 شهداء حتى تثبت تهمتو
انت تهمتني بدون دليل لأنك ظالم
-اتهمتج بدون دليل..!!!!.. زين واللي دحكتو بجنطتج..
-اقسملك بالرب انا ما الي دخل بيه.. انت بنفسك خبرت يحيى وتبرى مني وطارد امي على شنو اخابرو بعد..
وانت شعندك بالبيت واتجسس عليك.. التهم التهمتونياها باطله وقاسيه ما تنحمل.
اليكتلني بيكم تكعدون من الفجر تصلون بس ما تعرفون اللي تصلولو شيكول وبشنو يقبل..
ما قاري بقرانك ال24 ساعه ماسكو (فاصفح الصفح الجميل) ما قريت (فأما اليتيم فلا تقهر )
تدعون الدين وتصلون وانتو الله ما تعرفو .. محد راحمني منكم ولا هو راح يرحمكم لانكم ظالمين..
وحوبتي بيك واكولها كدامك واستشفى كل اللي يصير وياك هو حوبتي تضربني وتظلمني واني ما الي ذنب.
-لج يولي والله ما ضاربج كره.. بالقران غلاتج من غلاة حلا بتي بس انتي ما جاي تصفين وياي..
-شسويت ها شسويت واستحق الضرب والاهاين يوميه .. ابجي
جر راسي وباسني.. بعدتو ..
-ولج بويه والله دموعج يهدن حيلي لا تتصورين ما اهتم.. وكفتي بعيني وكلتلي لا تضرب تعبت موتني..
چن ضربتيني على راسي ما عرف دربي منين .. بس طلعت فتت بسيارة غيري بلا وعي كل فكري يمج وبدموعج والله ..
لا تتصورين استلذ بتعذيبج بالقران جاي اتعذب روحي اكثر منج واليكتلني اصيح واغلط واضرب وما تردين
تخلين بس دموعج تاكلني اكل بالقران .. محترك من يوم السالفه الصارت ولليوم ما مرتاح بالله العظيم..
شسوي ينكسر خاطري عليج وانزل واريد اعتذر تالي يفتر راسي وبدل ما اعتذر اعصب واغلط واضرب ما ادري ليش بس اني من هاي تصرفاتي جاي اتعذب اكثر منج بالقران..
-اني اكلك ليش.. لان تشوفني مستفردتلك ماعندي اليحميني منك.. لو عندي اب جان ما قبل يتركني ساعه عندك..
لو عندي اخ مثلك لما توكف لهيام جان كسر عينك وما خلاك تأذيني بس اني وحيده ما الي احد وستقويت عليه..
جرني لحظنو ويبوس براسي.. لج لا تكولين هيج والله ساعة عصبيه يولي يا هيام.. بالقران معزتج بكلبي ما تقل منهم
-وخر لخاطر الله وخر.. اي معزه هاي وانته ملطش فوك راسي..
-لج يا بويه ما دزيتج على حاجه وشفيتيلي گلبي.. اكلج غسلي دشداشتي.. اطكعيها .. اكويها تحركيها..
الاكل عسى ما تجيبي يلعب النفس اكول صغيره واتحمل الا يرضيج تغسلين هويتي اكو مره ما تفتش جيوب رجلها.. اروح لدوامي بلا هويه يصير ...
-اطمن بعد.ما اخدمك ولا بحاجه.. مو عندك بنيه خليها تخدمك المن مخلفها بس للموبايل
-عجل هي لو طخو لو افلع مخو.. لو تشتغلين وتخربين لو ما تشتغلين..
-ما اعرف شسوي ايدي ما ماخذه على شغل ثوله فاهيه ما بيه خير شسوي هاي طبيعتي
- تتعلمين شويه شويه
-وشلون اتعلم بالمكافخ على راسي.. ارحمني الله يخليك عمو تعبت والله..
جرني لحضنو .. تنكسر ايدي ان شاءالله الله لا يوفقني لج يولي والله دموعج خناجر بگلبي..
بعدتو عني وكعدت ابجي وعادة اليبجي الخشم مدري شيصير بي ياخذو الواهس وهم يضل يبجي ويجري..
ف اني بأيدي وارفع واجر بخشمي وابجي واشهك.. عاد انتبهلي زكح بضحكه .. يولي دكااااافي ترستينا خنن من خرب بيومج كااافي.. اتجرين وما ملحكه..
ضحكت لا اراديا وكمت امسح بدموعي هو يجر الكلينس بنتر ويكلي ينعل اهلج على هسالفه لعبتي نفسييييي..
بعدت الضحكه من سب اهلي.. هو انتبه.. وردها اهلي والله اهلي.. وخاف تكولين يكش مني..
كضب راسي وخلى الكلنكس على خشمي وكام يمسح حيل .. اااااااااااها حتى خننج امسحهم بعد.. هم كولي
حجاها وشمر الكلينكس هيييع لعبة نفسي ومحمد راح اهوع ..
بدموعي وكمت اضحك عليه لان هو مهووس كلش بهسالفه يتقرف من هيج شغلات اهم شي النضافه
شافني اضحك.. جرني لحظنو لج ومحمد احبج والقران غلاتج من غلاة بنيتي حلا وغلطت وانه اعترف بغلطي .. صيري اعگل مني وعديها الي بروح ابوج..
هزيت راسي..باسني وكال انتضري هين شوي واجي.. نزل.. اني بقيت ادحك السياره ما ينشاف منها شي كد ما حجينا وبارده الجام بس دخان ابد ممبين شي..
مسحت الجامه اليمي.. ودحكتو دخل على محل مرطبات .. بقيت سانده راسي للجامه.. وافكر..
شسوي ما عندي غير حل.. الين وياه.. لو عاندت اكثر يعند ويركب راسو وارجع اكع بيها خل اشوف مصلحتي واسايرو شبيدي..
شويه وطلع من المحل وعلاكه جبيره بأيدو.. فتح باب السياره انطانياها.. واندار صعد..
فتحتها.. ضحكت.. قالب كيك احمر قلب الحب ومكتوب عليه Sorry ليليان ..
كرص خدي وحجه.. هاا عجبج.. ابتسمت وهزيت راسي.. تحركت.. جان يزكح .. بالقران لو مديتي ايدج الكلها خنن علكيكه الا انعل اهلج واهلي فوكج..
صدك ضحكت عليه باقيه ابالو.. كتلو اريد اسدها اصلا ممشتهيه..
-نرجع للبيت سبحي واكلي..
-هي مال سبح اليوم سبحت.. بس اغسل
-خب هيييع ادري قحط ماي.. لو تتفطرين ..
-بارده..
-براحتج بويه عساج لا سبحتي المهم لا تاكلين واديج وصخه تره تتمرضين.
-هزيت راسي.. حرك السياره ورحنا للبيت.. نزل فتح باب الكراج ودخل وهو يدحك للبيت ويكول يا ستار شو مظلم اليوم البيت
-ما اعرف .. نزلنا فتح لايت وخلا ايدو على ضهري ويمشيني من باب المطبخ.. دخلنا..
صاح سعددددد.. لك ياااا سعد..
طلعلو بالفانيله البيضه الداخليه والشورت ويكول ها ابو حرب هااا..
-كهرب ليش ماكو
-وطني وفرعنه طاكه الوطنيه
-عجل ليش ما مشغل المولد السحب
-مو بس فرعنا ما بي.. ترجع ع المولد وتحترك اذا الناس عدها كهرب
-والمولد مال البيت ؟!
-بانزين ما بيها هسه دنام ساعه 12 وفوك.. قابل صيف وتحير بالحر...لف راسك وابوك الله يرحمه..
-ما رد عليه.. اجه للمطبخ اني واكفه بمكاني.. اخذ الكيكه مني.. تاكليها هسه لو تضميها ليباجر
-لا ضمها ما مشتهيه سوت ام علي كيك خطيه..
-عجل لو كايلتلي جان انطيتها مصرف زياده شعدها هيه خطيه.. حجه وهو يضم الكيكه بالمجمده
-ما ادري..
-ديلا غسلي ونامي تره كهرب ماكو..
-بس انطيني اللايت اروح للحمام..
-هاج..
-اخذت ورحت لغرفة الحجيه.. اخذت بجامه وثوب ورحت للحمام غسلت اديه ووجهي ومشطت شعري وبدلت بجامه وثوب جانت حيل بارده وصوبات مطفيها والكهرب ماكو تدفئات
طلعت لكيتو بالغرفه مال الحجيه.. نازع دشداشتو بالداخليات.. كتلو بارده ليش هيج ونزلت راسي منو.
-هو الا جرشت يااااابه دنيا ثلج.
طلعت الفراش.. ولكيت بجامه الو ويه الفراش.. كتلو هاي بجامه تريدها.. كال زتيها.. شمرتها الو ومديت فراشي..
كال بروح ابوج ما تصعدين تجيبلي قميص.. جثير تعبان وما بيه انام فوك.. حجاها وتمدد على فراشي..
صفنت.. شو ينام يمي.. كتلو اخاف وحدي.. كال حرب كاعد اخذي وياج.. ضحك حرب عباله ديمثل على ابو عود هو نايم بس صراع كاشفو..
عاد كام حرب ويايه رحنا جبنا قميص من فوك و3 بطانيات زياده.. جيت.. لكيتو نايم بفراش حرب وتارك الحرب مكان يم اختو..
ومكاني فارغ بس ماخذ منو شويه لان هو شوي ضخم ياخذ مساحه.. كتلو عمو هذا قميصك.. غاط بنومه من التعب..
تركت القميص وتمددت يمو.. طفيت الموبايل و ردت انام.. متت رعب ظلمممممممممه يوميه من الشباك يجينا ضوه الكراج من الباب ضوه الهول
اليوم كلش ظلمه كمت اتخيل اشباح بوجهي.. عاد.. كمت اتلمس وينو الموبايل.. اتلهى بيه.. تلمست.. صارت ايدي على وجه صراع.. فز ها..
-اخاف اريد الموبايل
-تلمس هو كضبو وشغلو وانطانياه.. ورجع لنومتو.. بقيت العب لحد ما غوشن عيوني ووكع الموبايل وحدو.. ونمت..
ما احس الا انسطرت على وجهي.. عبالي الشبح ضربني كعدت بصرخا عاااااااا كعد هو ها ها يولي شبييييج.
-الشبح ضربني
-خرب يومج لج مو شبح انه نايم واندرت لصفحتج واجت ايدي بدون ما ادري على وجهج..
-عجل انته حتى بنومك تضرب بيه..
-هههههههه دنامي بويه نامي..
-بقيت كاعده ما غفت عيني لحد ما كعدت الحجيه وتكعد بصراع ... كوم يمه كوم اذكر الله اذن الفجر..
هو اندار ويكللها اي يمه اي هسه.. بقى شويه وكام صلا ورجع لمكانو بستا يغفى ابد ما يبقى يصفن مثلي لو تتعسر نومتو..
الحجيه بقت تصلي وتقره قران على ضوه اللايت.. شويه واجت جرت بطانيات. وحده شمرتها على حلا وحرب ووحده علينا اني وصراع
وراحت نامت.. اني صارت روحي جوه الباب لان خلو لايت بالهول وادحك رجلين تمشي كل ضني شبح..
والنوم ما شاف عيني بس احوس وادحك.. عاد شال راسو صراع كال بويه ليش ما تنامين شو بس تحوسين..
-اخاف
-شو حدري يابه منين تخافين..
-جرني لحظنو مد ايدو جوه راسي وحط رجليه بين رجليه وايدو على خصري وكال نامي يابه انه يمج دا اشوف هلشبح هذا شلون يجيج ويخوفج لنعل والديه..
-انصدمت من موقفو.. لاول مره انام بقرب رجال وهيج ملتصق بيا.. احس جسمي كزبر منو
شعور ما اعرف اوصفو هو بساع نام ثكل راسو فوك راسي بس اني بقيت مخشبه جسمي بايدو كد ما مستغربه الوضع
شلون هيج يسمح لنفسو يحظني.. احس بانفاسو بشعري.. ووجهي بصدرو.. وشعر صدرو كلو بوجهي
عادة اضوج يعني اكش من هيج موقف.. بس ما ضجت. بالعكس كان حظنو دافي وعطرو حييييل طيب
ردت ابتعد.. حس هو مد.ايدو يفرك براسي و كال لا تعقديها بويه ونامي لخاطر الله شكد تحوسين.. ف بقيت متصنمه بحظنو..
ما انكر حبيت وجودي بين اديه صح ارتباك وخجل وموقف صعب بس ارتحت بيه.. عاد طلعت اديه خليتها على صدرو حتى ارخي نفسي ونمت..
عصر راسي حيل وباسني بشعري ..وهو مغمض ويهمس تنكسر ايدي ان شاءالله التنمد عليج والله يا بويه شكد اعزج..
-ارتحت لكلامو اكثر وغمضت نمت براحه.. لشويه اجت الحجيه.. كعدتو ..ابو حرب يمه اكعد ما تروح لدوامك..
هو تحرك نام على ضهرو واني على ايدو وكاللها يمه سبت اليوم ماكو دوام عوفيني نايم رحمه لهلج
-عجل ما تنام بغرفتك فوك شعندك نايم هين
-هسه نايم على كلبج يايمه دروحي لخاطر الله ..
-اني مغمضه بس احس.. اندارت عليه.. ولج انتي يفاينه حاظنه الرجال ونايمه بنص جهالو دكومي لا يكعدون ويدحكون ابوهم كعدي..
-ما رديت جان النوم مثكل الساني بس درت وجهي وانطيتو ضهري وبعدني على ايدو..
ايست من عدنا وكامت.. وهي تكول من عزا العزاكم كون ما تستحون..
عاد هو اندار وسحبني ليمو ولف ايدو على خصري واني منطيتو ضهري والحجيه تدرم فوكانا
-يا يا يا من فلك طركم .. انه العجوز استحيت..
-هو تضايق من كلامها جر البطانيه وخلاها فوك روسنا وبقينا نايمين.. ليووووين ما حسيت ع الدنيا شلونها
لحد ما ندكت الباب وطبت اخلاص تكلها عمه عجل حلا بعدها نايمه .. ودحكت صراع نايم بساع اندار سؤالها يا ابو حرب هينا نايم..
كالتلها اي كلهم نايمين اكعد وارد ليوره تكول نومة اهل الكهف ..
-عجل هاي منو النايمه يمو
-ياهي .. غير مرتو عجل منو تنام بحظنو غيرها.
-شنو صالحها مو على اساس يطلكها
-فالج لا گبلنا ان شاءالله.. مره ورجال يتكاونون ويتصالحون وحدهم الطلاك شجابو بينهم..
-عاد طلعت.. صاحت الحجيه ولج لوينه غير تكومين ساعه صارت ب11 وانتي نايمه ام سعد تفتر ع الغرفه تريد تكضبج.. موكفتها نومة ابو حرب يمج لا جان اكلتج.
-مطيت نفسي بحظنو وكلتو اووووو من الصبح طاري السعلوووه.. هو رد نام على ضهره من انمطيت..
-ولج لا تسمعج وتكوم عليج.. دكومي اليوم متخبله تكول العروس نايمه للضهاري وياهو الطاب شاكيتج.
-ربي وينك ما تموتها ونخلص على الاقل ناكل تمن ولحم بعزاها هسه شمستفادين منها..
حجيت وبس احس جسم صراع يهتز.. دحكتو يضحك وهو مغمض.. اندار ويفتح تك عين..
-ترديها تموت لو مشتهيه لحم.
-والله لاثنين بس الا هاي شيموتها السعلوه.
-عجل حكريها اليوم ولا تكومين.. جرني رجعني لحظنو.. خرب والله استحيت.. كدام عمتي هيج يسوي .. ابتعدت وكعدت على صفحه
الحجيه:- دكوم انته يلطالعه عينك كوووم.. اخذها لغرفتك وحظن براحتك مو بنص جهالك ادور محاظن..
صراع:- متكليلي شسويت يا يمه شو بس منطمرين.. اووووف شدعي عليج يمه عساج برجل اعور
-انوبه اعور.. خلف الله عليك
-هسه اعور اعرج يا يمه المهم بي حيل
-عمى بعينك ان شاءالله على هسوالف الفاگسه..
-هو ضحك بصوت عالي وكام باس راسها وطلع..
-ادحك الساعه 11 ونص.. من هاي الساعه عرفت راحتي بيد صراع لو هو رضى عليه اكبر واحد.مايكدر يحجي وياي. لو صار ضدي شماتي تاكلني..
كمت عدلت شعري ولبست حجابي.. طلعت.. جان تكضبني ام سعد من ايدي يل ما تستحين ما دحكتي الساعه بيش وانتي نايمه للضهر..
رادت تكفخني رفعت ايدي احامي.. صاح صراع شكوووووو.. تركتني بساع كللتلو ما تعرف تكوم مرتك وتكلها عدج واجبات تكومين من الصبح..
-بس انه واجبها ودام انه نايم يمعا محد اله حك عليها يكعدها لو يكلها كومي..
يحجي وهو يتقرب.. وصل يمي.. وكال يلا باباتي سويلنه ريوك انه وياج ..
-هزيت راسي ورحت للمطبخ اخلاص بودها تذبحني الشر يطلع من عيونها..
-وكفت ع الطباخ.. دخل هو .. ويكول ليون البيض عين سويه ولا مستوي.. نص ستاو.. واندار على اخلاص
-ها بت عمي هينا اليوم..شلونج..
-هلا بيك يا بعد كل هلي شلونك انته..
-دنك راسو وكاللها تحت رحمتو..
-شكد.ما تستحي.. شلون هيج تحجي وياه ..
سويت الريوك هم منضفين كلشي وام عبد وكفت تسوي الغدا وتدرم.. اني رحت اكل وياه اجت حلا وحرب اكلو ويانا..
اني اكلي فاهي اللكمه اضل الوك بيها ساعه وهو صلاوات رمشت عين كرصتين يخلص.. عاد كص نص خبزه وخلا بيها كيمر وعسل
وكال اكلي يابه والله وجهج صاير اصفر ليمتى تضلين فاهيه.. اخذت منو.. ام سعد.حجت ..
-ما تعرف تاكل توكلها انته والله يا ابو حرب سالفتك تضحك..
صراع:-خفي حمولج عنا وديري وجهج .. انه وحرمتي اكلها تاكلني بكيفنا شعندي غيرها..
يحجي ويفرك بمتني.. شكد.خجلت كدامهم احس العرك كام يصب.. هي كامت ادير بوجها وادحك صفح بحقد..
بقى يحجي وي ام اخلاص كاعده اني كمت لشغلي بس سممني اخلاص وام سعد بالحجي.. ما هتميت اللي مريحني ان ما تكدر تأذيني تخاف منو..
فخليها تحجي براحتها.. هو للعصر طلع ورجع قبل المغرب طب يصيح ليلياااااااان.......يتبع

☆☆☆☆☆☆☆☆
حتسألون.. معرفنا منو سوالها المكيده.. جوابي القصه حقيقيه وبمرور الايام والاحداث راح يبين الحق ..
الاجمل العفو بدون ما يعرف الحقيقه..
لكن لو بقى غاضب عليها لحد.ميعرف الحق..
هنا المصيبه الأكبر والصعب تقبلها..
رأيكم.....؟؟؟
#زينب_ماجد