العيله هدا جوها💗

الجزء السادس💗

سلمى برم هي والمكنسه الكهربائية وتتفجاء بيلي كان متكي علي الباب ويبرق فيها😳😨.......
.........Soma Alsideek
عند خوله و منار وهديل يضموا في الحوش منار وهديل وخوله في المطبخ قريب تكمل علي خشت رتال عليهن
رتال: سلام علي من إتبعا الهدى😁
هديل: وعليكم السلام ورحمة الله تعالي وبركاته أختي المسلمه🙂
منار: كيف صار مزال بعد المغرب ينزل برنامج رمضان مش من توه 😄
رتال: نعود في روحي من توه 😅
هديل: أمتي جيتو
رتال: ماليناش واجد حنين عدت مع ماما حني اول ما خشينه لقينها في دارها تساوي في دبشها هنا خشن معها وانا جيتكن هنا😁
خوله طلعت من المطبخ: وأخير كملت 😑
رتال: يعطيك الصحه 😊
خوله: أمتي جيتي
هديل: توه كيف جت
رتال: إماله وين سمسم 🤔
منار:إضم في المربوعه الخارجيه من مبكري🙄
رتال:اااااه باه
هديل: وين نزار وسيف
رتال:نزار ونحن جيين شاف رواد وأصيل بيطلعو قال منعدي معهم وسيف تقريبا حتي هو بيمشي معهم🤔
المهم توه شن بديرو نسعدكن☺
هديل: مزال شويه ونمشوا لي حوشنا غير تكمل منار التلميع وانا نكنس الصاله
رتال: تمام
......................Soma Alsideek
عند سلمى حولت السمعات وطفت المكنسه: من امتي قاعد هني😨
قدم منها وصبه قدامها وكمل الاغنيه: روحي معه مالي سوه كنه مكلبشني بقيود أجري وره ودري هوه في واقعي ماله وجود ليه أحتوه قلبي وعطه كل المحبه والورد يعني عشن صار الحياه اوصار سري في الوجود ليه أعشقو وأشتقلو🎶كان يغني وبحت في عيون سلمى
سلمى مصدومه وما قلتش ولا كلمه وهو يغني ولا قطعاته تبحت فيه وخلاص😶😳لم كمل
سلمى دروحها تضحك: طلعت عندك موهبا يابوخشيم😄
سيف تنهد: ايه مش غير😓هاتي من يفهمها بس🙂😓
سلمى:اي باهي هي اطلع خليني نكمل علي حالي توه 🙂💔
سيف : باهي لكن معاش إديرهيهم حركاتك هدين وكان خش حد تاني وانتي بي هالمنضر🙄😒
سلمى تحشمت: باهي هي اطلع بره منكمل😣
سيف طلع وسيبها وسلمى عدت سكرت الباب بمفتح وقعدت تخبط علي وجها سلمى: انا الحماره انا غبيه من قالي منسكرش الباب لا ومجت إلا فوجه سيف لا ونترقص زي دره الكبد 😩😫 عليش قعد يغني معايه 🤔يا ربي منهبل 😵ضرور نكلم فاطمه توه وطلت تلفونها ورنت عليها (هدي صاحبت سلمى الروح بروح اي حاجه عندها وفاطمه نفس الشي صحبتهن قويه لدرجه كبيره ومايتحملن في بعضهن شي وكل وحد تخد في شور الثانيه قبل ما إدير اي شي ❤_❤)
فاطمه اول ما ردت تهزب: وينك يا كلبه أسبوع ما ترني عليه يا مسخه تفووو علي وجهك كان مش بكره رمضان عابيه منجيك يا قرده نحساب فيك شي وخواتك شي نكلم مايردن عليا اليهوديات😡😂هي انتي وينك😑
سلمى: خلاص كملتي قلتي يلي في خاطرك ولا مزال حابه تزيدي شي بالك نسيتي شي🙂😂🤣
فاطمه: ايه كملت تكلمي 🙄
سلمى: اول حاجه ياحبي فوني كان في الصيانه ليه سبوع وامس كيف جابه رواد وثاني حاجه تسلمي يا عيوني عرفتك خايفه عليا يا قردوشتي ربي يخليك ليه😍😂
فاطمه: يا عمري انا كم عندي سوما باهي شن أخبارك شن مدايره كيف حال العيله
سلمى: ماشيه علي الحاشيه😁
فاطمه: هههه ردبالك إطيحي منها الحاشيه😂 عارفه اليوم مشيت للكليه نكمل في الأوراق شفت حواء تسلم عليك يابنتي تجوزت لعقبالك نفتك منك حتي انتي🙂
سلمى ضحكت: 😂سلمك وسلمه يا حنه وربي يهنيها ولعقبالك انتي تامتيمو😘
فاطمه: باهي شن تخبري معاش صار شي جديد😉
سلمى: تامي منقولك حاجه🙈🙂
فاطمه:😂😂عرفتك من صوتك أحكي أحكي في من هالمره هدي أنشاءالله خير بس🙂
سلمى : توه كنت نكنس في المربوعه وحط السمعات ونغني علي خشت سيف لقيته واقف في الباب يشبحلي ولما بطلت غني قعد هو يغني 😟
فاطمه: يا عمري😍باهي شن درتي إنتي
سلمى: قتله ببصاره طلع عندك موهبه😅
فاطمه دروحها تبكي😩: وووه علي الغباء أنتي بتجيبيلي سكر والضغط والجلطه توه يا حماره هدي عمله 🤦‍♀️ااااه
سلمى:شن درت اني 😞
فاطمه: توه تقولي نحبه ومش عارف شني ليك خمس سنين تقوليلي نحبه ونموت فيه وما نبي حد ياخد مني وتبكي وتبكبكيلي وتقولي هو ما يحبنيش ولما قعد يتقرب منك إنتي إديري في حركات غبيه ما بعده ولد عمك المسكين 😩انتي غبيه ولا تتغابي يا سلمى ااه😤
سلمى: زعمه يحبني صاح 😍تي لالا أكيد هو يعتبر فيا زي هديل انتي مشعارفه شي😓وبعدين أنا ويه ديمه عرايك شن بحبب فيا بزبط😭
فاطمه: ما هو انتي كان تسمعي الكلامي وتبطلي حركات الغباء متاعك توه تشبحي باهي وشن صار أخره زيدي إجلطيني😓
سلمى: بس بعدها قالي معاش إدريهم حركاتك هدينا كان شافك حد أخر
فاطمه: يا روحي 😍تصدقي أنتي غبيه وما تفهميش بعد هدا كله ياحماره شكله يحبك العطيب😅😂
سلمى: مش عارفه مش عارفه شي اني راسي مستك 😫باب المربوعه يدق فطومه توه بعدين نرد عليك يا قلبي سلام توه
فاطمه: باهي يا عمري ولا يهمك لكن مش تنسي كلميني خبريني كان صار شي هي بسليمه توه😘
سلمى: تمام يا نصي ولا يهمك هي سلمي علي العيله وسكرت فتحت باب المربوعه شافت احمد خوها بين حامق (مسكين مش منه من صبح ربي وهو غير أرفع للمحل الفلاني وتعالي لهدك شيل زود حط راسه دايخ ياروحي🤕)
احمد: في من كنتي تكلمي حسك ياانيسه ومسكر عليك الباب 😤
سلمى: صاحبتي يا احمد فكني منهم حركاتك هدينا😑
أحمد:وريني تره 😤صاحبتك يلي مسكر علي روحك بيش تكلميها
سلمى: شني من امتي تشك فيا يا أحمد😡
احمد خداء منها لقها مسجله الرقم يلي كان تكلم فيه (عشق موت❤طبعا كاينه مسميتها هكي لانها غاليا عليها الاغنيه😂 )
احمد بعياط: مشاء الله مشاء الله عشق موت مره وحده 😡
سلمى: والله إلا صاحبتي يا أحمد😥
احمد مسكها من يدها ويعيط:من الصايع يلي تكلمي فيه من ورنا😡
سيف كان جي لسيارته بيطلع وراء رواد وأصيل ونزار ولم سمع احمد يعيط جاء للمربوعه
احمد مسك سلمى من درعها: من الحيوان هدا يلي تكلمي فيه تكلمي😡
سلمى مصدومه مش فهم شي: والله صاحبتي وربي بنت 😨
سيف لم سمع كلمت من الحيوان يلي تكلمي فيه جته صدمه ثلاثيه الابعاد مش متوقعها من سلمى بكل 😱😠
أحمد : والله يطلع فرخ يا سلمى نهاراتك السود 😡توه نشوف صاحبتك هدي
سيف مش متحمل كلم زايده جبد التلفون من أحمد ورن علي الرقم وهو يطبخ😡
أحمد: إنت شن دخلك هات الخراء جاي
سيف: احمد سكر فمك مش ناقصك وأنتي والله يطلع ولد إلما نقتلك ونقتله 😠 وشويه وردت فاطمه
سلمى تبكي وخلاص وخاصتا بعد كلام سيف 😭
سيف إبحت في سلمى وحامق للمليون
فاطمه: ايوه سوسو خيرك شن صار تاني توه😁
سيف:😳مصدوم وفرحان في نفس الوقت
احمد خده منه فتح الميك
فاطمه: سلمى خيرك ساكته الووو الووو يابنت وينك🤨
احمد😳😥🤦‍♂️سكر عليها
سلمى: شفت حبيبي ولا الفرخ يلي نكلم فيه يا خوي وانت سمعت خلاص إطمنتوا هكي مش حتقتلوا حد😭شفتو تهنيتوا ستريحتوا خلاص خليه عندك التلفون معاش نبيه حسبي الله ونعم الوكيل فيكم ياكلاب😭
أحمد و سيف😨😨
وطلعت تجري تبكي لكن ما عدتش لدرها ركبت لسطاح متاع الحوش الكبير قمعزت تبكي نين دهشت ودارت البخاخه وردت تبكي وضمه رجليها لصدرها 😭وجعتها من خوها أحمد اول مره يدير هكي وسيف زاد همها همين😭
.......Soma Alsideek
كملن البنات وعدا لي حوش حسام مع المغرب
خوله : هديل عدي شوفي سلمى وين
هديل: مش فاضيه ما تحقيش فيه مشعبطه نمسح 😑
رتال: توه نشوفها اني
منار: وهي في المربوعه من القايله و توه المغرب بيدا ووووك منها السلحفاء هدي😑
حنين: مشفتهاش لتوه
رتال: حتي اني هي خلاص نمشيلها نجيبها ونجي😊وعدت من حوش خالها حسام للمربوعه الكبيره مالقت حد ولقتها مزال مش مضمومه بالكامل
رتال: نهارك مزال ما كملتها وين راحت هدي طلعت لقت أحمد وسيف في الجنان عدتلهم
رتال: سلام 😊
أحمد و سيف: سلامين☺☺
رتال: شديرو هني
أحمد: شيء كساد
سيف : نخش نغير ونجيك
أحمد: تمام بيش نطلعوا مع بعض
سيف : باهي وعدا
رتال: البنات غادي يا سيف ره طق الباب قبل تندعب عليهم زي البخت🙂
سيف شيرلها معنها باهي
أحمد: شن جوك أنتي☺
رتال: ميه في الميه وأنت 😁
أحمد: دوم إنشاء الله💗 والله شن منقولك مش ميه في الميه يعني تقدري تقولي خمسين في الميه عندي موضوع كان تم نقعد ميه في الميه
رتال: قصدك الشغل عادي ره حتي بابا ديمه مش فاضي ويخمم مادورش واجد ربي إنشاءالله يحلها😊
أحمد: لا مش شور شغل بكل قلبي متعبني نبي بنت مش عارف هي تبيني او لا 🙂
رتال شويه وتبكي: باه إنشاء الله تطلع تبيك😞 اني منمشي وبرمت بتعدي أحمد مسكها من يدها
أحمد:راجي مزلت ما سألتك😊
رتال: هاء شن بتسأل تفضل 😞
أحمد متوتر: أنتي متوقعتيها تحبني يعني قصدي اني شخص ننحب في رايك😄
رتال دمعن عيونها : ايه أنت مفيش زيك والبنت يلي تحبها محظوظه فيك ربي يهنيك معها 😢
أحمد: يعني نفهم من كلامك تحبيني كيف منحبك😍
رتال:ااااه😳
أحمد: أنا نحبك يا رتال ومش من توه من زمان ماكنتش عندي الشجاعه نحكيلك و ما نبيش نخسرك اني نحبك والله
رتال تبكي وقعدت ساكته شويه وبعدها قلت : اني نحلم صاح 😭
أحمد: خيرك 😳
رتال:شن قلت تكذب صاح شن الكلام يلي سمعته هدا😭
احمد يحسبها ماتحباش: اسف كان ضيفتك رتال اعتبريني ما قلت شي مش حنجبرك عليا معاش تبكي بس دموعك غليات يا رتال 😔
رتال حضنت أحمد : حتي اني نحبك والله نحبك يابارد ليش مش قيل من قبل والله نحبك 😭
أحمد: ااااه 😳😍وعلاش تبكي باهي اماله😳
رتال: مش مصدقه 😭
أحمد:لا صدقي خلاص معاش حد يقدر يخدك مني
رتال بعدت من عليه: ما تكذبش عليا يعني😢
أحمد: كان نكذب عليك ما دويتلكش والله نحبك يا رتال😍
رتال إبتسامة وهي تبكي
وقعدوا هم الاثنين مع بعضهم في الجنان يهدرزا ويعترفوا لبعض ❤
.............Soma Alsideek
أما سيف طق علي باب الحوش وخش
سيف: يالله يالله😅
منار: فوت فوت ابن عمي😄😂🤣
سيف: سلام
الكل:وعليكم السلام
سيف يدور بعيونه علي سلمى ما شفهاش: شن إديروا
هديل تلمع في التحف: شوفت عينك 😑
سيف: باهي ربي يعون وين عقابكن إماله😅
حنين: من عقابنه🤨
خوله: يقصد رتال وسلمى يا غبو😊
حنين: اااه😅
سيف: سلم الذكيه😂
منار: سلمى من مبكرييييي منكته المربوعه الخارجيه ومعاش شفت وجها ورتال دزينها بتجيبها معاش جت😒
سيف : ااااه باه أنا طالع توه نجي وطلع من حوشهم وعدا لي حوش عمي صديق
دق الباب فتحتله نجوى
نجوى:هلا وليدي☺
سيف: مرحبتين خالتي
نجوى: خيرك تبي حاجه وليدي
سيف: اااه ايه صح منخد من رواد فلاش نبيه ضروري
نجوى: باهي تفظل خش دوره بروحك ما في حد يعطيهولك وانا مانعلمش عليه وينه
سيف : كلمي وحده من البنات يجبوهولي مستعجل والله😅(كذاب يبي يعرف سلمى جوه او لا)
نجوى: والله ما في حد هني كلهن عندكم غادي يضمن وانا حايسه نكمل في عقاب الضمان خش وليدي خوده بروحك الحوش حوشك☺
سيف: خلاص إماله توه بعد يجي رواد هو يعطيهالي مانيش خاش إنتي مش لاهيه يا خالتي 😁
نحوى:باهي علي راحتك، خلاص تبي شي وليدي ☺
سيف : لا تسلمي يا غاليه هي سلام ☺وعده🚶‍♂️
سيف: زعم وينهي لا في حوشنه ولا في حوشهم وحوش العيله كنت فيه مبكري شويه مش قاعده 🤨وين راحت هالهبله
ويفكر .....والله ماتطلع إلا علي السطوح عويدها من زمان😌
عدا ركب لسطوح وفتح الباب شاف سلمى متكيه علي الساس وراقده
قرب منها ما بش ينوضها قمعز جنبها وقعد يتفرج عليها ومبتسم ويحكي بروحه: محلاك وأنتي راقده وهاديه هكي☺يا مهبولتي لو تعرفي شن درتي فيا يا سلمى ااااه عارفك ما تحبينيش وحتمال تكرهيني حتي لكن أنا نحبك وربي يشهد عليه من يوم ما وعيت علي الدنيا وأنا نحبك أنتي وهبالك ودموعك وضحكتك وكل شي فيك 😔اااااه منك وخلاص
سلمى في سبع نومه هي أصلا نومها تقيل 😌الاعتراف يلي تراجي فيه سنين قال وهي راقده😂عليك بخت😓
سيف هزها من كتفها: سلمى سلمى نوضي
سلمى فتحت عيونها وتشوف سيف قعدت مفنصه وقالت: مزلت نحلم أكيد😳
سيف ضحك : تحلمي بيا من سمحلك يا خانوم😅
سلمى صبت وهي مزلت حامقه: ايه كنت نحلم بيك انت وأحمد وانا مسكه سوط لحصان ونضرب فيكم نين شبعت فيكم وجلودكم رحن سيور سيور😡لكن مزال خاطري نزيدكم من قالك نوضني😡
سيف صبه معها: كان مزال خاطرك تفظلي ولا يهمك يا بنت العم🙂
سلمى: خطا جدي تره وعدت لكن ردت خدت بخاختها الطايحه
سيف:دهشتي مبكري😟
سلمى: ما ليكش دخل بيه 😤إنشاء الله حتي نموت علي قولتك 😡وعدت نزات
سيف: دخلني فيك لانه بعد تموتي إنتي أنا نموت 😔قعد شويه فوق سطاح مكان سلمى ونزل عدا هو واحمد للمحل يلي بيشرو منه دبش وهو يفكر فيها وفي مرضها
وسلمى عدت كملت المربوعه علي السريع وما بتش تمشي للبنات عدت لي حوشهم خشت لدارها وسكرت الباب رقدت علي سريرها لقت تلفونها جنب السرير علي الادراج خداته لقت رساله من أحمد خوها وعرم مكالمات من فاطمه
(أحمد: سامحيني سلمى والله عارفك ووثق فيك لكن والله اليوم كنت مضغوط وحامق طلعت الحمق عليك سامحيني😔❤ )
سلمى: بعد شنو يا حسره مش مسامحتك😢 رنت علي فاطمه
فاطمه: ايوه يا سلمى تسمعي فيه الوو
سلمى تبكي: نسمع فيك 😢
فاطمه: سوما شن فيك ليش تبكي يا قلبي فيك حاجه
سلمى حكتلها يلي صار بتفصيل وهي تبكي:😢معقوله أحمد هكي لا وقدام سيف وكان تشوفي كيف كان يبحت فيه كأني اني فعلا نكلم في حد اللحظه هدكهي حسيت روحي مننفجر😭
فاطمه: خلاص يا روحي معاش تبكي وخوك هدي شويه ونعدي نعطيه طريحه😤
سلمى:وبعد رقدت إنوض علي وجه سيف في وجهي علي السطاح يعني بالله انا نقصه 😭
فاطمه:خلاص يا عمري معاش تبكي إنتي ما درتي شي هم الغلطانين معاش تعدلي عليهم خليك طبيعيه ومعاش تبكي وسيف علي قولتك كان حامق هكي مفروض تفرحي توه
سلمى: عليش نفرح علي خيبتي علي كلامه ولا علي نضرته ليا مبكري😭
فاطمه: يا غبو أكيد غار عليك ماله عليش حامق وعليش جاك علي السطوح لعند أمتي تقعدي غبيه هكي😑
سلمى: مانعرفش😢
فاطمه: إماله شنو 😊هي يا قلبي عدي إغسلي وجهك وخوديلك غفوه لعند السحور توه نكلمك بعدين ماما إضبحلي تبيني توه باهي يا عمري ☺
سلمى: باهي 😢ربي ما يحرمني منك فطومه💞
فاطمه: ولا منك يا قلبي هي سلام توه ردي بالك من روحك وعاش تتعصبي واجد
سلمى: باهي مع السلامه حبي وسكرت ورقدت وهي تفكر في كلام فاطمه مع الساعه 2:00 جت منار تنوض فيها
منار: سلمى يا سمسم نوضي إسحري
سلمى ناضت مفجوعه: وينه وينه😨
منار: منو🤨
سلمى تحك في عيونها: هو أنتي شن فيه😑
منار: بابا يسأل عليك قعدين نسحرو تعالي قالك
سلمى: باهي تمام عدي توه نلحقك نبدل ونجي
منار: باهي ماتعطليش وعدت وسلمى ناضت غيرت دبشها ولبست توته أديداس شبابيه شويه لونها رصاصي عباره عن سروال واسع وفيه كبسه من لوطه ودجاكه عليها أديداس وفيها جيوب وبرنوص خطاته علي رأسها وعدت للحوش الكبير
سلمى: سلام عليكم
الكل: وعليكم السلام
عدت لي جدتها حبت رأسها: رمضانك مبروك حنينه إنشاءالله كل عام معانه ☺ ويحفظك ربي لينا ياغاليه
سليمه: ويحفظك بنيتي ونفرح بيكم في يوم واحد وكل رمضان ملمومين عليا😊
رواد: قويه هدي يوم واحد عرس جماعي إماله😂
أصيل: ايه كل حد بعروسه وهنا كل وحد بعريسها نطلعوا تحفه إنشاء الله غير فيه ثلاجات وكوش بالبلاش في العرس الجماعي 😂😂😂
.........يتبع😊
.............Soma Alsideek
الجزء السابع تم
راجوا مفاجأة الثامن واعطوني رأيكم في الجزء هدي مش تنسوا (نجمه+تعليق)
بليز ياجماعه😢 وما تنسوش ديروا الحوله كان فيه أخطأ إملائية 😁هي توه نخليكم قراءه ممتعه للجميع 😊
📝Soma Alsideek

المره هدي منقول وداعا بتركي تجديد يعني بدال تشاو😅
Hoşçakal 👋💗