السلام عليكم
" هواي اشياء بحياتنه مرت ..تجارب خضناها وتعديناها
اشياء حلوه ومو حلوه ..اكو بيها الي تعبتنه واكو الي فرحتنه .. بيها الي رسمت بسمه ع شفافنه
وبيها الي تركت دمعه بعينه
بالنهايه هاي الاشياء كولها "تصير سوالف" "
هذا الشي الي تتحدث عنه قصتي اليوم بعنوان .. #صارت_سوالف ❤
الحارس چان الوحيد الي يبقى للصبح گاعد .... و اني مرات ميجيني نوم اگوم من فراشي و اروح اگعد يمه ...
مخلي تنكات مال دهن مگلوبة و شاعل نار و ع النار قوري مال چاي ... وكل ما اروح يمه يگلي الچاي ع الفحم يختلف من الچاي ع الطباخ و يصبلي چاي ...
فد يوم گلتله عمي انته شنو قصتك و انته وين اهلك اشو من وعيت ع الدنيا و اسمع الحارس ابو شاكر و الحارس ابو شاكر ... و كل المنطقة و اهل المحلات يعرفوك ... بس ما فد يوم شفنه شاكر لو شفنه زوجتك گال اني ممتزوج اصلا ...
گلتله لعد منو شاكر؟... گال اسمي محمود يصيحولي ابو شكريه لو ابو شاكر ... گلتله زين اهلك وين؟ گال اهلي موجودين بس ما احچي وياهم..
گلتله انته عمرك چبير يعني اكيد والدك و والدتك متوفين بس اقصد اخوتك او اخواتك ... گال اي همه اخوتي و خواتي موجودين بس مثل مگلتلك ما احچي وياهم گلتله زين شنو السبب ...
گال راح احچيلك لان اني اعرفك من چان ابوك يجيبك للسوك و لازم ايدك يخاف لا تضيع منه ... و چنت هنا بالسوگ مرات تنزع نعالك (مكرم القارئ) و متقبل تلبسه و بلاخير ابوك گام يلبسك نعال بي لاستيكه حتى ينربط برجلك و دائما ابوك من يشوفني واگف يعلمك تسلم عليه.. گلتله اي اي اتذكر ...
گال اني انولدت بنص عائلة صغيرة ... اب و ام و خوات ثنين و اخ واحد ... بيتنا چان الضحك ميوگف بي متوفر دائما و ابد مينگطع الضحك ... اني و اخوتي گلب على گلب .... نحب واحد الثاني و اذا واحد بچى بينا كلنا نبچي على دموعه و وجعه ...
چِنه نحس روحنه (قطعه وحده) و دائما اكلنا سوه... لعبنه سوه... عركاتنه سوه ... ركضنا سوه ... المنطقة كلها تحبنا ابوية چان كاسب يعني يوم يشتغل و يوم ميشتغل مرة عمالة مرة تنظيف بيت ...مرة فلاح مرة صباغ مرة يوگف بعربانه مال شامية و من كبرنا اني و اخوية گام ياخذنا وياه...
ابوية چان اكو نظرة بعينه تقهرني بس مچنت اخلي ينتبه عليه من اباوع بعيونه چنت احس هالنظرة معناها لو بيدي اسوي لجهالي الي ممسوي احد قبل بس شسوي هذا حالي و چان عنده نظره ثانية من اشوفها تلزمني العبره و اريد ابچي من صدگ..
هالنظره من چان ابو الشغل يسمعه كلام مو حلو او يصيح عليه چنت اتخبل ولو بيدي اضربه لأبو الشغل شلون يصيح هيچ على ابوية بس من وره هالخبزة هواي انهانينه و هواي انلعب بكرامتنه و حاول ابونه على گد المستطاع يوفر النا كل شي و يعلمنه على صنعه بس چانت الصنعة مو ثابته و كبرنا و المنطقة كلها تعرف بيت ابو محمود و حامد ولدهم يشتغلون كل شي ...
YOU ARE READING
『قٌصص ﺑٱرۅد』
Short Storyلم أرَا نظرات الحُب الحقيقية إلا على عتبات المقابر ، والمستشفيات ، نحن أُناسٌ لا نتذكر من نحبهم إلا في النهاية.
