_
چنت اتوقع أمي تزيد بالحچي ... و تريد تطلع نفسها مغلطانة ... بس من كبرت عرفت حچي امي صدگ... الاشياء الي چنت ما اتذكرها هو حچي أمي على تعامل ابوية الها ...
تگول چان يضربني و من الضرب اركض يم امه لو ابوه اختل وراهم مثل الطفل حتى بس يعوفني و امه و ابوه ميسووله شي غير بس الكلام .. استهدي بالرحمن ابني .. عوفها يمعود صوتها گبال الجوارين ... شكو شبيك كافي ...
هاي الجمل الي چانو يگولوها بيبيتي و جدي لأبوية من چان يضرب أمي .. و طبعاً هالحچي كله اني مشفته بعيوني و ما سمعته بأذني ...
بس چان منقول من أمي ...
من كبرت و سألتها ليش اطلگتي من ابوية حچتلي هالحچي ... و خالي الوحيد چان ينقلي نفس الكلام و من سألته انته شفت هالشي لو صار مقابيلك يگلي لا ... بس امك جتي للبيت هنا زعلانة ٣ مرات ... اول مرة مشيناها و قناعناها ترجع ... ثاني مرة جتي مضروبة و گال بالغلط ضربتها و عصبية و فقدت اعصابي وطلب يحچي وياها وحدهم و هي وره ما گعدت وياه گالت خلص ارجع وياه...
بس اخر مرة جتنا ايدها مفصوخه و عينها حمرة دم و داير مدايرها ازرگ و رجليها طگع طگع زرگ .. و انته چنت صغير مواعي على شي و بيدها شايلتك ..
و وره هالحالة اطلگت ...
وهم مثل ما گلت چنت اصدگ و ما اصدك و كل هذا ليش؟؟؟؟
لان أبوية چان كل فترة ياخذني يمهم ابقى يومين و مرات ٣ ايام ... بكل مرة ياخذني اشوفه حنين عليه و يحير شيسوي حتى يرضيني ... حتى حنيته عليه غير عن خواتي .. لان هو عنده من زوجته الثانية بنات ثنين ...
چنت دائما اگول ماكو احد بحنيته و ما اعرف ليش امي تطلگت منه ...
حتى وره كلام خالي هم چان عندي شك .. و سألت ابوية على سبب الانفصال گالي مشاكل حبيبي و اذا حچولك شي عني ترى مو صح ... طبعا اني حاليا عمري ٣٧ سنة متزوج و عندي ٤ اطفال و هالحچي كله قديم بس قبل يومين قريت عن قانون الحضانه الجديد و تذكرت كل هالتفاصيل...
و هسه نجي للحچي الصح ... اني ابوية هو و اهله من النوع الي (يركب زوجته و امه ليوره بالبيك أب) و اني يگعدني بالصدر لان شنو اني ((رجال)) .. اكو مسائل مو مال شقى و ضحك و مو مال اگعد اجامل بيها على حساب اسمي و لقبي و اني منين جاي ...
لان بهل الدفاع راح اضر كومة ناس ... اني اعترف بهل الشي ابوية من هالنوع و طبعاً ابوية متوفي حالياً... من چنت اروح يمه مثل ما گلت چنت اشوف حنيته عليه مو طبيعية و بعكس تعاملة وي خواتي و چنت اتوقع هالشي يسوي لان مشتاقلي بس هو چان يسوي وياي لان اني رجال او الولد الوحيد عنده ...
و چنت ما اشوفه قاسي مثل متگول امي و يگول خالي لان من اروح يمه يلتهي بيه... و يطلعني وياه و يوديني لشغله و يصرف عليه و شريد ينطيني و من ارجع ابات هاليومين او التلاثه ما اشوف منه أي تصرف مو زين ... لحد وفاته يله عرفت هو هم چان يضرب زوجته الثانية الي تزوجها وره طلاگ امي ...
YOU ARE READING
『قٌصص ﺑٱرۅد』
Short Storyلم أرَا نظرات الحُب الحقيقية إلا على عتبات المقابر ، والمستشفيات ، نحن أُناسٌ لا نتذكر من نحبهم إلا في النهاية.
