How I Met You (MM Translation) Completed

အခန်း ( ၂ )

ကျွန်မစိတ်က သူပြုံးနေမယ်လို့ မျှော်လင့်မထားခဲ့မိဘူး။ ယောကျာ်းတယောက်ရဲ့ အပြုံးက လှပပြီး စိတ်သက်သာရာရစေမယ်လို့ ကျွန်မ မသိခဲ့ပါလား။ ကျွန်မရဲ့ နှလုံးသားက အဲ့အခိုက်အတန့်လေးမှာ သူ့ကို ချစ်မိသွားခဲ့တာ ထင်ပါတယ်။ နောက်ပိုင်း အချိန်အတော်ကြာတဲ့အထိ အဲ့အကြောင်းကို ဝန်မခံပေမယ်လို့ပေါ့။

ကျွန်မ ကျားဟန်နဲ့ ‌နောက်တကြိမ်ပြန်ဆုံတာက နောက်နှစ်လအကြာမှာ။ ကျွန်မငယ်သူငယ်ချင်းနဲ့ ကျွန်မ ဘေကျင်းမှာ အလုပ်လုပ်ဖို့ရောက်လာခဲ့ကြတာ။ ဒါပေမယ့် ဆောင်းဦးကုန်ခါနီးညတညမှာ သူ ကျွန်မဆီကို နောက်ဆုံးအကြိမ် ဖုန်းခေါ်ပြီးတော့ သူ့ကိုယ်သူ သတ်သေသွားခဲ့တယ်။ သူ့အထက်အရာရှိက ခဏတိုင်း သူ့ကို ထိကိုင်နေတဲ့အကြောင်း ကျွန်မကို သူဆက်တိုက်ပြောပြနေခဲ့တာ။

သူ အဲ့အကြောင်းတွေ ပြောပြနေတုန်းက တချို့အချိန်တွေမှာ ကူကယ်ရာမဲ့နေပြီး တချို့အချိန်တွေမှာ ဝမ်းနည်းနေခဲ့တာ။ ကျွန်မက သူ့ကို နှစိသိမ့်ပြီး သူ ဆက်သည်းမခံနိုင်တော့ရင် အလုပ်ပြောင်းပါလားလို့ ပြောခဲ့တာ။ သူကျွန်မရဲ့စကားတွေကို လက်တွေ့ဖြစ်အောင် မလုပ်ခဲ့ဘဲ ထွက်သွားလိမ့်မယ်လို့ ဘယ်သူကများ သိခဲ့မှာလဲ။

ကျွန်မ ကိုယ့်ကိုယ်ကို အပြစ်တင်ပြီး အမှန်တရားကို ရအောင်ဖော်ထုတ်မယ်လို့ ဆုံးဖြတ်ခဲ့တယ်။ တယောက်ယောက်များ သိလေမလား မျက်မြင်သက်သေများ ရှာတွေ့နိုင်မလား ကြိုးစားရင်း သူ့ကုမ္ပဏီကို ဝင်ချည်ထွက်ချည်လုပ်နေခဲ့တယ်။ ကျွန်မရဲ့ မဆုံးနိုင်တဲ့ ဝင်ထွက်သွားလာမှုရဲ့ ရလဒ်ကတော့ ကျွန်မအလုပ်လုပ်နေတဲ့ကုမ္ပဏီကနေ အလုပ်ဖြုတ်ခံခဲ့ရတာပါပဲ။ ပြီးတော့ ကျွန်မရဲ့ နယ်ပယ်မှာ ကျွန်မကို အလုပ်ငှားရဲတဲ့ ကုမ္ပဏီဆိုတာလည်း မရှိတော့ဘူး။ ကျွန်မရဲ့ သတင်းတွေက ဆိုးရွားနေခဲ့တာကိုး။

ကျွန်မ သတင်းစာထဲမှာဖတ်လိုက်ရပါသေးတယ်။ ကောင်မလေးတယောက်က သူ့ကို အလုပ်ခန့်တဲ့ ကုမ္ပဏီနဲ့ စာချုပ်မှာ လိင်ပိုင်းဆိုင်ရာနှောင့်ယှက်မှု ခွင့်မပြုကြောင်းထည့်ရေးတဲ့အကြောင်း။ နောက်တော့ ဒီမိန်းကလေးကို ကုမ္ပဏီက လှောင်ပြောင်ပြီး သူ့ကို ‌နောက်သုံးလအတွင်း ဘယ်ကုမ္ပဏီမှ လူတွေ့မစစ်ဆေးရဲတော့တဲ့အကြောင်း။ ကျွန်မ ဒီအကြောင်းကိုသာ အရင်ကဖတ်မိခဲ့ရင် သဘောမတူဘဲ လှောင်ပြောင်ရယ်မိမှာ။ ဒါပေမယ့် အခုတော့ ဒီယောကျ်ားကြီးစိုးတဲ့ လူ့အသိုင်းအဝိုင်းမှာ အမျိုးသမီးတယောက်အတွက် အကူအညီရဖို့ ဘယ်လောက်ခက်ခဲလဲဆိုတာကို နင့်နင့်နဲနဲသဘောပေါက်လာမိတယ်။ အဲ့လိုဆိုရင်တောင်မှ ကျွန်မရဲ့ထွက်သွားနှင့်ပြီဖြစ်တဲ့ သူငယ်ချင်းကောင်းအတွက် တရားမျှတမှုကို ရအောင် တိုက်ယူဖို့ ဆန္ဓရှိနေတုန်းပါပဲ။