لحماية الطفل من الاستغلال الجنسيّ (للأطفال بعد السنتين):
▫️علّموا أطفالكم ما يگعدون بحضن أحد مهما كان السبب.
▫️ممنوع تبدلون ملابسكم گدّام الطفل.
▫️لا تقبلون أحد يگول لطفلكم "زوجي/زوجتي".
▫️إذا راحوا أطفالكم يلعبون ويّة غير أطفال لازم تتابعوهم، وتعرفون شنو الألعاب اللي لعبوها والتفاصيل؛ لأن ممكن الطفل يتعرّض للاستغلال الجنسيّ من طفل آخر.
▫️لا تفرضون علىٰ أطفالكم أنّه يزورون شخص بالغ ميريدون يزوروه أو ميرتاحون بوجوده، إذا شفتوا الطفل يتفادىٰ هذه الزيارة؛ فلازم تخلّون بالكم، ومتعوفون الطفل ويّة هذا الشخص وحدهم أبدًا.
▫️إذا شفتوا أطفالكم يعوفون نشاطات وفعاليّات كانوا يرحولها ويحبّوها، لا تضغطون عليهم، واسألوهم عن السبب.
▫️الثقافة الجنسيّة لازم إنتو تعلّموها إلهم بصورة علميّة تتناسب مع القيم والأخلاق المجتمعيّة، وإلّا رح يبحث الطفل عن مصدر آخر، وهالمصدر قد يعلمه مفاهيم خاطئة؛ كونوا إنتو المصدر الآمن لأبنائكم.
▫️لازم تفحصون الأشياء اللي يشوفها بالتلفزيون والموبايل قبل ما يشوفها؛ حتّىٰ تشوفون إذا المحتوى يوالم عمرهم لو لا، وتبعدوهم عنّه إذا كانت بي شغلات خادشة للحياء.
▫️استخدموا برامج تحجب الأشياء اللي ما تناسب عمر الطفل.
▫️اسمعوا لأطفالكم من يجون يشتكون من شخص أو أشخاص معيّنين، ولا تهملون شكواهم، واتحرّوا عن الموضوع.
▫️علّموا أطفالكم إنّه إنتو موجودين دائما حتّىٰ يرجعولكم إذا شافوا تصرّف أو تعامل مريب من أيّ شخص، وفهموهم إنّه إنتو تصدگون بيهم، ورح تدافعون عنهم، وإنكم موجودين دائمًا حتّىٰ تحموهم.
