အမွေဥစ္စာ/အေမြဥစၥာ(ဘာသာပြန်)

အပိုင်း၁၃.၂(သူ့အနံ့တွေလွှမ်းခြုံ)/(သူ႕အနံ႕ေတြလႊမ္းၿခဳံ)

Unicode:

ဦးလေးရုန်က

"သူ စိတ်ရင်းအမှန်နဲ့မဟုတ်ဘူးဆိုရင်တောင် ကိစ္စမရှိပါဘူး။ သခင်လေးလည်း သူ့ရဲ့ရိုးသားဖြောင့်မှန်မှုကို လိုချင်တာမှ မဟုတ်တာ။ သခင်လေးလည်း ဒီနေ့ဖြစ်ပျက်သွားတာတွေကို မြင်တာပဲလေ။ သူက popular ဖြစ်တဲ့လူတစ်ယောက်။ ဒီအခွင့်အရေးကိုသာ အမိအရ မဖမ်းဆုပ်ထားဘူးဆိုရင်......"

"ကျနော် သိပါတယ်"

ယန်ယွီချွမ်းက အသက်ပြင်းပြင်းရှူထုတ်လိုက်ကာ

"ကျနော် နောက်တစ်ကြိမ် ကြိုးစားပါမယ်"

သူပြောသာပြောလိုက်ပေမယ့် ​မကြိုးစားကြည့်ချင်ပါ။ နေ့စဥ်နေ့တိုင်းဇေးဗီးယားရဲ့အပြုံးကြီးကို မြင်တွေ့နေရရင် သူအတော်လေးစိတ်ရှုပ်ပါသည်။ သူက စိတ်ထဲမှာတော့ အတော်လေးရှက်ရွံ့နေပေမယ့် အကြိမ်တိုင်း လောကဝတ်တွေ၊ ယဥ်ကျေးမှုတွေကို ထိန်းသိမ်းနေရတာဖြစ်သည်။ သူ့အပေါ်မှာ အမြင်မကြည်နေကြောင်းကိုလည်း ဇေးဗီးယားတစ်ယောက် သိနေပုံရသည်။ ရှေ့နှစ်ရက်လောက်က သူ့နားသိပ်မကပ်ပေ။ သူက အပျော်ခရီးထွက်လာသလိုပင် တစ်အိမ်လုံးကို လျှောက်ပတ်သွားနေတတ်သည်။

ယန်ယွီချွမ်း တစ်ဖက်လူသူ့နားကပ်လာတိုင်းမှာလည်း စိတ်ရှုပ်ရမြဲ ဖြစ်သည်။ ထိုလူ့အကြည့်တွေက သိက္ခာမရှိပေ။ ထိုလူပြောတဲ့စကားတွေကလည်း တည့်တိုးဆန်လှသည်။ ဒါပေမယ့် တစ်ဖက်လူက သူ့ကိုလုံးဝစိတ်ဝင်စားပုံမပြပြန်ရင်လည်း ယန်ယွီချွမ်းတစ်ယောက် မပျော်မရွှင်ဖြစ်မိသေးသည်။ အထူးသဖြင့် ဦးလေးရုန် သူ့ကို ပိုပြီးတိုက်တွန်းလေ ၊ သူပိုပြီးစိတ်မပါလေဖြစ်လာသည်။

ရပ်ကွက်ထဲက အစီရင်ခံစာကို အတွင်းရေးမှုးနဲ့အတူဆွေးနွေးပြီးနောက် ယန်ယွီချွမ်းက နောက်ရပ်ကွက်တစ်ခုအတွက် လုပ်ဆောင်ရမည့် လုပ်ငန်းများကို ရှင်းပြလိုက်သည်။ ထို့နောက် အခန်းတံခါးက တွန့်ဖွင့်ခြင်းခံလိုက်ရပြီး အရပ်ရှည်ရှည်ထိုလူက လှမ်းဝင်လာသည်။ ယန်ယွီချွမ်းကမျက်မှောင်ကြုတ်လိုက်ပြီး တံခါးမခေါက်ဘဲ အခန်းထဲကို မယဥ်မကျေးဝင်လာတာကြောင့် တစ်ဖက်လူကို စွပ်စွဲပြောဆိုလိုက်ချင်သော်လည်း ထိုစကားလုံးများကို ပြန်လည်မြိုချလိုက်ကာ အေးဆေးတည်ငြိမ်စွာပင် ပြောလိုက်ရသည်။