#ورد_العمر
الحلقة الاخيرة :: 35 ::
زياد: خيرك نوسة مضايقة ؟؟
نسرين: نبي نتلاقى
زياد: ههههههه توا !!
نسرين: بجديات انا نتكلم .. نبي نتلاقى معاك
زياد: ههههه عاد عندك بي ام وين مانقولك المكان اطيري طيارة .. ريحيني في هالليل يابنتي :)
نسرين: زيااااد .. انا مضايقة بجديات ولازم مانتلاقى معاك حتي لو تبيني توا عادي :(
زياد: توا ليل .. غدوا الصبح نتلاقو وين ماتبي انتي اوكي .. بس فكينا من كافي وهالكلام اوكي !!
نسرين: اوكي .. نفكر في مكان ونقولك اوكي !!
زياد: اوكي .. شن في مضايقك باه !!
نسرين: غدوا غدوا .. هي تصبح ع خير
زياد: اوكي .. وانتي من اهله :\
,,,,,,,,,,,,,,,,,,,,,,,,,,,,
ميار روح بيها معاذ لحوشها .. خشت للحوش وحطت ولدها في سريره .. ومابتش تشبح لوجدي بكل ..
وجدي: شن روحتي ؟؟.. خيرك مابتي ؟؟
ميار: علاش بنبات وعندي حوش نروحله -_-
وجدي: هههههه هدا حوشي ياحلوة
ميار: -_-
,,,,,,,,,,,,,,,,,,,,,,,,
الصبح ::
محمد جي وقف ع صالح وهوا ماشي للعمل
محمد: السلام عليكم
صالح: وعليكم السلام
محمد: خيرك ياعمي ماتبيش حتي تشبحلي؟؟
صالح: والله يامحمد متحشم معاك الحق :(
محمد: ههههههههه علاش ؟؟
صالح: رديتك لما خطبت بنتي .. انت مالاحظت المناسبات كلها نتهرب منك :(
محمد: ايه لاحظتك بس ماتوقعتش هدا السبب .. المهم حصل خير .. ولو تبي تعوضني توافق عليا توا !!
صالح: قصدك جاي بتخطبها من جديد ؟؟
محمد: ههههه لا جاي بناخد منك موعد بتجي امي تخطبها رسمي :)
صالح: هههههههه من غير موعد ولا شي .. تفضلو في اي وقت .. الحوش حوشكم :)
محمد: ههههه بارك الله فيك .. نفهم انك موافق !!
صالح: اكيييد :)
محمد: ربي يحفظك ان شا الله (( باش ع راسه ومشي ركب سيارته وطلع ))
صالح قعد يضحك .. فرح ركب سيارته وطلع لشغله :)
,,,,,,,,,,,,,,,,,,,,,
مع الساعة 10:00 الصبح ::
زياد قعمز في جردينة ميناء الشعاب يراجي في نسرين .. بعده بربع ساعة وصلت
شافها ضحك من عيونه .. وقدم .. طفت السيارة ونزلتله ..
نسرين: مالقيتش غير هالمكان -_-
زياد: اريح .. قدام الله وخلقه مانحبش الكافيات والدوة الفاضية
نسرين: تفكيرك غريب هلباااا تقول مش نفس الموديل انا وياك
زياد: موديل !! .. تي شن تحسابيني سيارة ؟؟
نسرين: خلينا في المهم توا .. طلبت نتلاقى معاك لموضوع
زياد: آها تفضلي !!
نسرين: ..............
بدت تحكيله ع عيلتها وكيف هيا عايشة وكيف حياتها .. وحكتله شن قالتلها خالتها
,,,,,,,,,,,,,,,,,,,,,,,,,,,,,,,,,,,,,,,,,,
غيداء امبارح في الليل راجاته راجاته لين خداها النوم رقدت .. فاقت لقاته مغطيها وراقد جنبها في الصالون
غيداء: ءء منذر ؟؟
منذر: آه حياتي فقتي ؟؟
غيداء: خيرك مانوضتنيش وين وصلت؟
منذر: قلت خليها ترتاح بالك تاعبة ؟؟
غيداء: انت امتى روحت ؟؟
منذر: متأخر شويا
غيداء: متأخر شويا .. تي انا راجيتك ل2؟؟
منذر: آمممم ممكن بعدها بشوي .. حي رودي محلاااك وانتي فريش .. تستاهلي احلى بوسة (( باسها ع خدها .. ابتسمتله .. وقف ))
منذر: توا خليني ندوش ونطلعو ندهورو اوكي !!
غيداء: آها نتغدو برا ؟؟
منذر: آممممم امي تراجي فينا اليوم :(
غيداء: عادي قوللها بنطلعو مش ح تقول لا لان عرسان نحنا ولاه !!
منذر: يصير خير .. غير نوضي بدلي ودوشي توا
غيداء: باهي باه :(
مشي وخلاها .. بينها وبين نفسها مش مرتاحة لسهرته امس بكل .. قاعدين عرسان ويتهرب يقعد معاها .. شي ماينفهمش بكل ؟؟
,,,,,,,,,,,,,,,,,,,,,,,,,,,,,,,,,,,,,,
زياد: لا حول ولا قوة الا بالله .. معقولة في أم هكي ؟؟
نسرين: وفي أب هكي .. المهم توا زياد انا نحبك انت وراضية بعيشتك ومانبيش حد يفرقنا حتي لو كانو أهلي .. لان عمرهم ماكانو أهلي .. زيااد انا تعلقت بيك وحبيتك لان لقيت فيك كل شي ندور عليه بالله عليك ماتخليني بروحي .. اوقف معاي حتي لو مازلت ماحبيتني :(
زياد: خلاااص نسرين ماتبكيش بالله عليك.. تو نشوف حل .. امسحي دموعك باذن الله مايصير الا يللي في بالك :)
نسرين: ان شا الله :(
زياد تلفت لقدام واذكر انه قالها لميار وقت اماليها جبروها ع وجدي .. بس مادارش حل لين تزوجاته :(
وعد نفسه الغلط الاول مش ح يتكرر وح يوقف معاها ولو اطر يهرب بيها :\
,,,,,,,,,,,,,,,,,,,,,,,,,,,,,,
في العشية محمد جاب امه وخواته لحوش صالح بيخطبو جيداء وبيشوفوها ..
ام محمد: وينها البنية امالا ؟؟
ريهام: هي شويا ادير في القهوة بس
خشت جيداء مدتلهم القهوة وقعمزت وكان لابسة بلوزة قصيرة حمرا وسروال بيج وشادة شعرها الاسود ذيل حصان .. وتوزع في ابتساماتها :)
,,,,,,,,,,,,,,,,,,,,,,,,
زياد اتصل بغيداء وحكالها ع حبه لنسرين وقصة تعرفه عليها
غيداء: آمممم اهم شي راحتك ياعمي :)
زياد: حاس روحي مرتاحلها .. انا نبيك تحكيلي البنت شن رايك فيها بجد يارودي ؟؟
غيداء: والله مافي منها .. ههههههه بس طلعت فالحة وئعاتك في شباكها
زياد: بلا هبال ودوة فاضية -_-
غيداء: هههههههه المهم نحييك ع اختيارك .. صاحبتي بنت اصول وتعجبك :)
زياد: واماليها زعما مايرفضوش ؟؟
غيداء: آممممم هيا حكتلي موضوع ولد خالتها الصامط .. بنقولك شي ياعمي راهو اماليها ماديين هلباااا وسطحيين :(
زياد: اييييح
غيداء: هدا عيبهم بس :)
زياد: انا عندي نسرين اهم شي .. وبنتحداهم زي ماهيا تحدتهم :)
غيداء: ربي يوفقك ان شا الله :)
زياد: وانتي شن جوك مع منذر؟؟
غيداء: خليها في سرك -_-
زياد: ههههههههه ربي يخليكم لبعض :)
غيداء: ان شا الله خير .. هي نتلاقو
زياد: اوكي سلامات :)
,,,,,,,,,,,,,,,,,,,,,,,,,,,,,,
مها: ههههههههههه امالا شعرها تسريحة السبعينات مدايرة
محمد: ضمي فمك خيرلك -_-
منال: لا خيركم عليها والله قنينة :)
ميس: ضمي ضمي .. ذوقك بيئة سامحني فيها -_-
محمد: انا بنتزوجها شن دخلكم انتم فيها ؟؟
ام محمد: آآآخ القهرة .. والنبي هادي فاش احلى من بنت لمية جارتنا في الامارات ؟؟
محمد: نبي ناخد بنت ليبية مية في المية .. مانبيش ناخد وحدة متجنسة فهمتي عليا ؟؟
ميس: والله ماحلوة الله .. خساااارك فيها وخلااااص
محمد: ياسر انتم حلواااات شن نبي فيها انا حلوة ولا اسلوب ولا منطق عندها -_-
مها: بدي يلحق الطرف هدا .. عموما انا خاشة بنرقد .. تعبت روحي ع الفاضي
ميس: ههههههه حتي انا نحسابها حاجة مقومة
منال: تصبحو ع خير :)
محمد تلفت لامه يللي شدت الريموت ومش مهتمة للموضوع بكل
محمد: نبيها يمة تسمعي فيا ولاه !!.. بناخدها وبنطير بيها
ام محمد: تي باهي
محمد: تسايري فيا ؟؟
ام محمد: رايي من راي خواتك .. بناخدهالك تصطفل منك ليها تمام !!
محمد: تمام :)
,,,,,,,,,,,,,,,,,,,,,,,,,,,,,,,,,,
مـــر اسبــــوع ::
جت غيداء زااير لماليها ولبست الجلوة معاها كالعادة حماتها وعزوزتها وبعض من عويلتهم
ميار كانت سارحة وتشبح لغيداء كانت تتمنى تجي ايدها في ايد حبيبها لحوش اماليها .. بس كله أحلااااام :(
غيداء: مياااار تعالي شوي :)
ميار: نعم :)
غيداء: خليك بنوريك خطيبة عمي
ميار انضربت في كلمة غيداء واستغربت في اسلوبها
غيداء: نوووسة حبيبتي تعالي :)
نسرين: نعم !
غيداء: شوفي ميورة شن رايك في خطيبة عمي زياد ؟؟
ميار: آممم ربي يخليها ان شا الله ويهنيكم ببعض
نسرين تحشمت: بارك الله فيك :)
مشت ميار .. ونسرين تلفتت لغيداء
نسرين: والله ماتتحشمي حرام عليك البنية وجعتها :(
غيداء: والله لما نسحنلها كبدها خللي اذووق ماذاقت العباد
نسرين: مش ذنبها البنت .. هدا النصيب
غيداء: لاش حالة فمها معاه ماداما مخليتها ع النصيب -_-
نسرين: ماعندي مانقولك غير ربي يهديك -_-
غيداء: ههههههه تعالي احكيلي ياكلبة شن درتي لزياد باش داااب في حبك ؟؟
نسرين: انا وين وانتي وين ؟؟.. رودي انا والله مضايقة امي لتوا مسكرة راسها ع ناصر .. بيناتهم مشروووع شغل وبيربطوني بيه :(
غيداء: آآخ ربي يهديهم ان شا الله ويعينك :(
نسرين: ان شا الله .. وانتي شن جوك مع منذر؟
غيداء: لا جو لا واحد .. يطلع من الصبح يروح يتغدا ويولي لصحابه لليل وهكدا تمضي الايام .. وانا نقعد ملوحة عند امه لوطة :(
نسرين: مافيش واحد مرتاح :(
غيداء: هادي الدنيا يوووم فوووق يوم لوطة ربي يعين عباده :(
نسرين: آمين
,,,,,,,,,,,,,,,,,,,,,,,,,,,,,,,,,,,
روحت طبعا سوسن من العمرة .. في يوم من الايام كانت مقعمزة ع اللاب توب وشادة مق نسكافي .. طق عليها الباب .. تحسابه محمود مشت تجري للباب شافت من العين لقتها علا بروحها :\
فتحتلها .. سوسن: اهلا علا .. خشي تفضلي :\
علا: مانيش متفضلة انا جاية بنقولك كلمتين اسمعيهم وبعدين ياخوديهم يالوحيهم ورا ظهرك وكأن شيئا لم يكن اوكي !!
سوسن: باهي غير خشي .. عيب وقفتك في الشارع
علا: خالد يراجي فيا البرا .. انتي مرتاحة توا ؟؟.. بعد مافرقتي بين الخوت ؟؟.. وفرقتي بين الولد وامه ؟؟.. قوليلي مرتاحة ؟.. جبتي صغار توا ؟؟
سوسن: ضروري ماتلقحي ؟؟
علا: انا جاية بنردك 10 سنين التالي .. تتفكري وين كنتي علاقة مع محمود .. كان عندي علم بكل كبيرة وصغيرة بينكم .. كان محمود يحكيلي في كل شي .. لما تصير مشكلة انا نشد ع ايده ونحلها ويكلمك .. وبعدها عطاك رقمي وبدينا تواصل مع بعض .. تتفكري وين بوي كان بيزوجه بنت عمتي ؟؟.. تعرفي من غيرله رايه ؟؟.. مش محمود ولا انا .. أمي هيا يللي غيرتله رايه وخلاته يوافق يتزوجك .. أمي يللي مافيش اطيب من قلبها عليك .. بعد ماتزوجتي محمود كان يجي يشكي لامي ع مووضوع الصغار تهدي فيه وتسمعله .. وتوسعله صدره ويروحلك فرحان .. خوتي لما يجو يشكو من محمود ومعاملته بعد مافرقتي بينهم .. أمي كانت تسكت فيهم وادافع عليكم .. لما محمود يفكر مجرد التفكير يتزوج غيرك امي تمنع فيه .. وتعرضله وتقوله لو تزوجت عليها قلبي وربي مش راضيين عليك .. سوسن انتي زي وخيتي وكل نساوين خوتي زي وخياتي .. ونعزكم وحق ربي .. وامي تحبكم زي بعض وانتي بداااات .. لان محمود كان انسان حساس وصعب يتفاهم معاه وقدرتي انتي تتحملي كل عيوبه .. بس تمنيتك لو غيرتيه ع كل الناس الا امه وخوته !!.. علاش درتي هكي سوسن علاااش ؟؟.. فاش غلطت معاك امي باش تخليه يعلي صوته عليها ويطلب ورثها ويخليها هيا وخوتي في يوم وليلة يدورو ويدورو ع دار يسكنو فيها .. علاش بعدتيه عليهم .. جيتي وحكيتيلي شن يللي وجعك مني والا من سلفاتك كنا صلحناه وديا .. صفيتي نيتك جيهتها ربي يفتحها عليك وتحملي وتجيبي .. ليش قسيتي قلبه علينا .. معقولة ليه قريب سنة ماشفناشي ؟؟.. معقولة اول فرح لخوه مايحضراش ؟؟.. معقولة ياسوسن ؟؟.. ترضيها انتي لخوتك مايجوش لامك بالسنة كااااملة ؟؟.. تصدقي سبب جيتي هنا هيا امي .. امس بايتة عندهم كنت نسمع فيها في الليل تقول (( يارب سخر محمود يجي ونشوفه حتي لو يكشخ المهم نطمن عليه )).. جابت تليفونها لزياد باش يضلحه وتقوله (( بالك محمود يتصل بيا ويلقاه خارج التغطية والا حاجة )) .. وجعتلي قلبي هالكلمات .. النوم معاش جاني والله حرام يللي درتيه فينا .. ظلمتي ارق واحن واطيب قلب في هالدنيا كلها .. امي كانت احسن حتي من امك بتصرفاتها وكلامها واسلوبها معاك مااترضاش فيك العيبة ولا الزلة .. هدا اخر كلامي .. ربي يهديك ويهديه يللي خش في معمة النساوين :(
ومشت علا للسيارة .. بس عيون سوسن لحقوها .. كان خاطرها تبرر موقفها بس كان كل شي واااضح ومافيش اي تبرير .. فعلا سوسن غااالطة :(
,,,,,,,,,,,,,,,,,,,,,,,,,,,,,,,,,,,,,,,,,,,,
مريم: ان شا الله .. ايه في اي وقت تفضلو :) .. هي بالسلامة
عبير وقفت ع امها : من كنتي تكلمي يمة ؟؟
مريم: ام يوسف .. رجع خطبك من جديد
عبير: يمة انا مانبيش
مريم: يابنتي قلبك يقول غير هالكلام
عبير: كيف !!
مريم: مادسيش عليا انا امك
عبير: بس يمة ....
مريم: قوليلي الحق يابنتي .. انتي تبيه والا لا يوسف ؟؟
عبير: انا !!.. مش عارفة ؟؟
مريم: مادامك ترددتي ووجهك ولا احمر معناها تحشمتي وتبيه .. ربي يهنيك يابنتي
عبير: :)
مريم: الليلة صلي استخارة لو ارتحتي تزوجي يابنتي وديري عويلة وصغاار مع الانسان يللي مرتاحتيله .. آآآآخ زمان لما خطبني بوووك من الرؤية الشرعية خش خاطري بالله
عبير: ههههههههه
زياد: اضرب ياحويجة حب من اول نظرة هههههههه
مريم: يعطك قصة انت وين كنت ؟؟
زياد: كيف روحت نسمع فيك تحكي قصة روميو وجولييت بالليبي ههههههه
مريم: تكلمت انا عبير ؟؟
عبير: ابداااا ههههههههههههه
زياد: غير اسمعي يااام .. حتي انا نبي ننخطب ره
مريم: تنخطب هههههههههههه .. ومن جت خطباتك ؟؟
زياد: من الرؤية الشرعية ارتحتلها وانا موافق ههههههههههه
مريم: يعطك الهني دمك مخفه
عبير: عاااد زيزو حبيب القلب ههههه
زياد: باهي نوضي ديري قهوة
عبير: قول نوضي نبي امي في موضوع شخصي -_-
زياد: تفهمي عالطاير انتي ههههههههههه
مريم: آهو قعدنا بروحنا احكي هي
زياد: نبيها .. بنية عيلة وكويسة وعاجبتني .. نعرف كل شي عليها وسأل عليها ومافي حد ذمها .. هيا صاحبة بنت ولدك غيداء :)
مريم: باهي توكلنا ع الله مادامها عاجباتك ماعندي كلمة بعد هكي :)
زياد: لا ياااام .. كان ماعجباتكش فوتيها اوكي !!
مريم: واثقة في ذوقه وليدي ربي يحفظهولي يااارب (( وشدتله راسه وباستله خدوده .. ))
زياد: ربي يخليك لينا ان شا الله وتقعدي تاج فوق روسنا <3
,,,,,,,,,,,,,,,,,,,,,,,,,,,,,,,,,,
محمود روح للحوش ويسمع في صوت بكي في دار النوم .. خش لقاها سوسن
محمود: خيرك شن في؟؟
سوسن: ارفعي لحوش امك توا
محمود: تي خيرك .. شن قالولك تاني ؟.. وين ريتيهم اصلا ؟؟
سوسن: انا غلطت في حقها يامحمود ان شا الله تسامحني امك :(
محمود: فهميني بالشويا :(
سوسن:.................
,,,,,,,,,,,,,,,,,,,,,,,,,,,,,,,,,,,,,,,,,,,,,,,
تاني يوم العشية ::
رفع زياد امه وخواته .. بيشوفو نسرين وبيخطبوها
نسرين تزينت وتعطرت وماحطت طبعا ع وجهها اي نوعا من المستحضرات التجميل
دخلتهم الشغالة للصالون .. لقو امها مقعمزة وحاطة رجل ع رجل وتبرد في ظوافرها .. وبما ان مرت خو نسرين كووويسة .. استقبلتهم كووويس .. وجابتلهم عصير
علا وعبير يشبحولها ويشبحو لامها يللي مسكينة طيبة مبتسمة وخلاااص
ام نسرين: آآه سامحوني انشغلت عليكم
مريم: لا عادي يابنيتي .. انا طبعا ام العريس وهدينا خواته :)
ام نسرين: اهلين .. يانهى تعالي قعمزي ماتعبيش روحك مش معطلين هما (( نهى مرت خو نسرين ))
علا: موقحها الزفت .. (( في سرها ))
نزلت نسرين وكانت لابسة قونة للركبة استريت لونها زيتي وبلوزة وردية هااادية كم .. وحاطة العقد ع الفضي والزيتي ولابستله اكسسوار شعر فضي ع الجبين وشعرها ع الجنب .. وكانت لابسة خلخال فضي وكندرة كعب خفيف لونها وردية ومانكير ترابي ..
علا وعبير حاليين فومهم فيها .. زي القمر وع أخر طرحة
نسرين سلمت عليهم ورحبت وقعمزت جنب امها
مريم: ماشا الله تبارك الرحمان عليك يابنتي :)
نسرين ابتسمت خجل
ام نسرين: ع الجمال هدا بطيح سعدها بروحها
نسرين نخصت امها مع تفنيصة .. لاحظوها البنات ..
ام نسرين: شوفي ياحاجة انا بنتي نبيلها حوش بروحها .. ومانبيش حتي حاجة تنقصها .. كسوتها كااااملة ومهرها نبيه ( ***** ) وماتنسوووش سيارتها بتقعد عندنا لمرت خوها تبيها وبتشرولها سيارة جديدة .. غير هكي مستحيل اناقشكم في شي -_-
نسرين: لا ياماما انتي غالطة .. انا يللي بنتزوج .. وانا متأكدة ان زياد مستحيل ينقص عليا شي .. لو انتي شايفتيها بالماديات انا عندي قلب الراجل نملكه ولا نملك فلوسه قد مايسووو يسوو .. خالتي مريم وعبير وعلا مافيش زيهم وانا موافق ع كل شروطهم .. وعارفتهم ناس تعرف الاصول .. قولي لزياد ياخالتي نسرين موافقة
ام نسرين: تبي اطيحيلي كلمتي ؟؟
نسرين: لا حشاك .. بس ردي بالك تفكري انك بتحرميني من زياد باش نتزوج ولد اختك .. هادي مستحيل تصير .. خالتي مريم يشهد بالله اني نحبكم ومافي بالي حاجة سو ليكم
عبير: عارفينك وغيداء ديما تحكي عليك :)
ام نسرين: لو انتي وافقتي انا مستحيل نوافق >_<
علا: :o
نسرين: انا يللي بنتزوج والكلمة ليا وانا موافقة .. ومافي حد يدخل بيا حتي لو كنتي انتي ياماما والا بابا .. تبي تفهميني ان مصلحتي هاماتك ؟؟
ام نسرين: اكيد مش بنتي انتي !!
نسرين: مصلحتي مع زياد .. مش تهمك مصلحتي ؟؟.. خلاص انا نبي نتزوج زياد :)
مريم: ربي يخليك يابنتي وماكسرتيله خاطره وليدي .. وانا واثقة ان زياد مستحيل ينقص عليك حاجة :)
ام نسرين: اسمعي انتي الموضوع بيني وبين بنتي لو سمحتي ماتتدخليش
عبير: هيييي كأنك تماديتي ولاه !!
نسرين: لحظة عبير .. (( وقفت نسرين في وجه امها )) تعرفي ياماما لو تاخدي مني كل شي السيارة النقال والدار والحوايج وكل شي كل شي .. والله مانبدله زياد والله والله لما نتزوجه ومعاد هامني واحد
وركبت لدارها تجري .. أما ام نسرين نهد حيلها ع الصالون وقعدت تبكي .. وماعلى نهي الا انها تسقد اماليه بكل ود وابتسامة ..
,,,,,,,,,,,,,,,,,,,,,,,,,,,,,,
في الليل ::
ميار كانت ترقد في ولدها .. حطاته في سريره ومشت للحمام .. لقت ضي الصالون والع .. والباب مردود .. ومشت بالشويا سمعت وجدي يتكلم بالفون
وجدي: ايه والله انتي حبيبتي .. تي هاديكا غير منظر خوتها مايبوهاش لوحوها .. تي انتي الاصل والغلا كله ياروحي .. ربي يخليك ليا يااارب
انصعقت ميار من اللي سمعاته .. وكانت حاسة بيه من البداية بس ماتوقعتش يديرها بعينها ويكلمها وهوا في الحوش .. ويدوي عليها بالغلط .. حطت ايدها ع فمها وحبست دمعتها وخشت للدار سكرتها عليها ورقدت :(
,,,,,,,,,,,,,,,,,,,,,,,
زياد: بجديات هدا يللي صار ؟؟
عبير: ايه اقسم بالله مسحت ع قلبي امها الكلبة كيف نطت في امي والله ماتتحشم
علا: والله صحة ليها .. بنت مقومة ماشا الله
مريم: ربي يخليها .. انا والله مانبي ندويلك غير هالملسنات مايدسو حاجة
عبير: ههههههههههههه
زياد: اوكي انا خاش بنرقد تبي حاجة يمة ؟؟
مريم: سلامتك وليدي :)
,,,,,,,,,,,,,,,,,,,,,
نسرين كانت تمشط في شعرها وتغني (( لاموني بحبك لاموني ياعيوني لما بعيونك شافوني حسدوني وحياتك جكرة بهالناس لشيلك ع العين والراس لو أهلي وناسي ورفاقي عادوني لو أهلي وناسي ورفاقي حسدوووني )) ع رنة نقالها بنفس الاغنية مدايرتهاله
زياد <3 <3
زياد: بجديات بجديات يابنت الناس ربي يخليك والله عجبتيني :)
نسرين: ههههه وصلاتك الدوة ؟؟
زياد: ايه ربي يحفظك وان شا الله مانحرمك من حاجة
نسرين: ماتحرمنيش من طلتك عليا ولا تحرمني من حبك ليا هدا يللي نبيه بس :)
زياد: آآآه انا هدا وين ارتحت .. مازال بوك بس
نسرين: بوي مستحيل يرفضك لان مستحيل يرفضلي طلب .. والباقي فوته ههههه
زياد: هههههه صدقت فيك غيداء وين قالت بنت جدعة .. بمية راجل ههههه
نسرين: نعجبك يامااان هههههههه
زياد: نحبك <3
نسرين: ءءء شني ؟؟
زياد: والله نحبك وزدت حبيتك توا
نسرين: انا نموووت فيك وربي يخليك يااارب :)
زياد: يخليك ليا <3
,,,,,,,,,,,,,,,,,,,,,,,,,,,,,,
فــــاتت الايــــام ::
#جيداء خطبها محمد وعايشة هيا وياه في قمة السعادة والحب :)
#ميار في وجعها القديم كل يوم تذكر وتبكي
#غيداء تغير شوي منذر ورجع يحبها اكتر من قبل بعد ماعرف انها حااامل <3
#زياد بعد شهر عرسه مع نسرين وفرحان بيها وغير شن تبي بس :)
#عبير خطبها يوسف من جديد وامه تغيرت شويا مع عبير وبدت تعامل فيها كويس بس !!
في يوم مقعمزة عبير وتتصفح في النت .. اتصلت بيها روايدا اخت اسعد الله يرحمه
عبير: اهلا رورو
رويدا: خززززي والله ماتوقعتها منك .. معقولة نسيتي خوي بهالسهولة ؟؟
عبير: سهولة شني ؟؟.. خوك توفى الله يرحمه والله مانسيته بس خوك ليه فوق من السنة
رويدا: واااضح .. سمعت ان يوسف خطبك وعرسكم في الصيف ؟؟
عبير: ايه ان شا الله
رويدا: ماتفكريش تكلميني ولا تقوليلي صاحبتي فاهمة ولاه !!
عبير: انتي خيرك ؟؟.. هادي سنة الحياة .. حطي روحك في مكاني .. تقعدي ع ذكراه لين تموتي ؟؟
رويدا: لا طبعا نتزوج ونعيش حياتي .. امشي اقسم بالله ياناري ع وخيي وخلاااص وين قعد لعمر 33 سنة يراجي فيك ف الاخير اول ماغمض عينه تزوجتي
عبير: انتي وين لما انا مرته وقاعد ارملة حتي تليفون مارفعتيه وسألتي عليا ؟؟.. توا تفكرتيني مرت خوك ؟؟
رويدا: بري ان شا الله ماتربحي تمام !!
سكرت عليها عبير وقعدت تبكي .. هالدعوات ماكانتش تحبهم .. ع خشة امها عليها
تغمرتها واستمرت تبكي : خيرك يابنتي شن فيك؟؟
عبير: كلمتني رويدا وقالتلي كلام ع خوها والله حراااام عليها الله
مريم: خلاااص يابنتي معاش تبكي هادي من حرقتها ع خوها بس .. امسحي دموعك وامشي صلي ركعتين واتصلي بوسيفة وهدرزي عليه شويا باهي يابنتي !!
عبير قعمزت ومسحت دموعها : حاااضر :)
مريم: ربي يهنيك يابنيتي ويحفظك .. ويحققلك يللي تبيه ياااارب انت عاااالم بحالتها هالبنية من خبطة لخبطة يااارب ارزقها فرحة لين يدمعو عيونها <3
,,,,,,,,,,,,,,,,,,,,,,,,,,,,,
منذر: قصدك معطلة هلبا ؟؟
غيداء: ههههه وووه يامنذر شن تبيه يطلع من توا ؟؟.. تي قاعدين في الشهر التاني عااد
منذر: التاني !!.. آآمممم معنااها 3.4.5 ايييييح مطووول 7 شهور
غيداء: ان شا الله .. خلي ننزل لامك شويا
منذر: لا اقعدي ارتااااحي ياغلاتي تو نقوللها تركبلك هيا هي :)
مشي يجري بينادي امه
غيداء: يالطيف مافيش هروب يانا ننزل ياهيا تركب آووووف -_-
,,,,,,,,,,,,,,,,,,,,,,,,,
نسرين نازلة من دارها فرحانة وشادة مفتاح السيارة بتمشي تخطم ع نهى بترفعها معاها للسوق .. وقفتها امها
ام نسرين: ع وين ياحلوة ؟؟
نسرين: بنمشي مع نهى للسوق :)
ام نسرين: هاتي مفتاح السيارة
نسرين: علاش ؟؟
ام نسرين: خللي زياد يشريلك -_-
نسرين: اوكي تفضلي ...
طلعت تليفونها واتصلت بنهى ..
نهى: وصلتي قصدك ؟؟
نسرين: لا كلمي حازم يعطيك السيارة وتعاليلي :)
نهى: اوكي اصلا بنخليله الصغار ههههه
نسرين: ههههه احسن حاجة
طبعا ماتغير في مزاج نسرين شي ولا تقلب .. اما امها قعدت تسحن واتمتم ع قد حبها الكبير لزياد كانت راضية بجفاف امها ومعاملتها القاسية :(
,,,,,,,,,,,,,,,,,,,,,,,,,,,,,
في يوم الجمعــــة ::
كانت العيلة كلها ملتمة (( صالح .علي .غيداء.منذر. جيداء. زياد. عبير. مريم. علا. اياد والياس . وخالد . ريهام.نهلة. علاء . رنيم ونسيم ومريم الصغيرة . ))
ضحك وهدرزة والجو حلو ..
طق عليهم الباب نااض علي فتح
علي: عمي محمود؟؟
محمود خش وشاد معاه باكو صغير لونه احمر وخشت سوسن وشادة سفرة بكلاوة .. الكل مستغرب خيرهم جو هادم ؟؟
نهلة: آووووف جي النكد بزاتو -_-
ريهام: اسسسس خاش بهدية اكيد جاي بيراضي ههههه
نهلة: مالتش عليك وعليا ههههه
محمود: يمي سامحيني بالله عليك :(
مريم: ع طووول تغمراته وقعدت تبكي : مسامحاتك ياوليدي مسامحاتك :(
سوسن: وحتي انا ياللآي غلطت فيك هلبا والله :(
مريم: ولا يهمك يابنتي .. ربي يحفظكم ان شا الله
سلم محمود ع خوته وتغمرهم وتأسفلهم .. وسون سلمت ع نساوين وكل وحدة فرغت حقدها وكرهها للتانية من قلبها ..ورجعت القلوب صااافية .. وسوسن وشوشت لعلا
سوسن: انا حامل ياعلا توا في الرابع :)
علا: والله هههههه امتى عرفتي؟؟
سوسن: كنت في المصحة توا وقالولي ماكنتش ندري هههههه
علا: ربي ينوضك بالسلامة يااارب
عبير: شن تحبو تشربو ؟؟
سوسن: قهوة :)
وشوشتلها علا: لا ياقردة القهوة مش باهية ههههه
سوسن: هههه فوتيها املا احني مصدقنا تبت هههههه
,,,,,,,,,,,,,,,,,,,,,,,,,,,,
بعدهـــا بفترة تزوجـــت عبيـــر <3 يوســف
يوسف: هدا احلا يوم في حياتي وقداش ليا كنت نراجي فيه
عبير: ربي يخليك ليا ان شا الله :)
يوسف: آممممم شن رايك نصلو ركعتين باش ربي يرزقنا حياة حلوة مع بعض <3
عبير: حتي انا هكي بنقولك :)
,,,,,,,,,,,,,,,,,,,,,,,,,,,,,,
ميار سمعاته يتكلم مرة تانية في وضح النهار .. وقدامها عااادي
ميار: ع الاقل احترمني ؟؟
وجدي: المحترمة هديكا نحترمها مش انتي -_-
ميار: علاش انا فاش غلطت معاك؟
وجدي: شن تحسابيني نسيتها حركاتك مع زياد ؟؟
ميار: بس تقريبا هداكا موضوع قديم
وجدي: هههههه زي ماانتي موضوعك القديم كل ليلة تتفكريله وتبكي عليه .. انا درت موضوع جديد وانتي القديمة ياحبي
ميار: عمري ماريت احقر منك
وجدي: آآآخ ولا انا اصلا هههههههههههه
ميار: طلقني :(
وجدي: دا حلم ابليس في الجنة
ميار: باهي علاش تبي تخليني باش تزيد اذلني ؟؟
وجدي: آمممم لا لا باش تخدمي حبيبتي :)
ميار: نخدم حبيبتك ؟؟..
وجدي: لا مرتي قصدي
ميار: :\
وجدي: باذن الله الليلة جايبهالك اهني ههههه
ميار: رخيصة هيا للدرجة هادي؟؟
وجدي: لا عفوا انتي الرخيصة ره هههههههههههه
بعد ماقال هالكلمات طلع وخلاها تتوجع بروحها وتبكي :(
,,,,,,,,,,,,,,,,,,,,,,,,,,,,,,,,,
فــــات شهـــر ::
يوم حفلة نسرين <3 زياد في الصالة <3
خش يدرج فيها وكان كل الحضور عيونهم عليهم كيف طالعين لبعض وحلوين :)
الا ميار كانت تشبح ومتألمة .. وتتمنى لو كانت مكانها :(
ركب ع الكوشة وقعدت المصورة تصور فيهم .. جت غيداء وقفت جنبه
غيداء: مبرووووك ياعمي <3
زياد: الله يبارك فيك :)
غيداء: سيلفي سيلفي ياعمي ههههههههه نوووسة خليك معاي هنا
صورت سيلفي ونزلت جنب حماتها وعزوزتها
غيداء: شوفي يمي محلاهم ولاه !!
ابتهال: ايه -_-
غيداء: شوفي ميورة :)
ميار ماكانتش معاها .. عيونها ع زياد وبس قداااش ليها ماشافته :(
زياد باس ع جبين نسرين .. وين تلفت لقي ميار واقفة تشبحله ومش قادرة تحول عيونها من عليه .. كانت ضعيفة وواضح عليها الهم :(
زياد في خاطره (( آآخ ياميار لو درتي زي مادارت نسرين وتحديتيهم ع خاطري راك توا في مكانها . ربي يهنيك ويوفقك في حياتك بس لازم نشوف حياتي ونفرح أمي والبنية يللي حبتني رغم انها عارفة انك مازلتي واخدة من قلبي حصة :( .. آآآآخ وبس ))
نسرين: حبيبي وين سارح ؟؟
زياد: آه لا شي حبيبي .. هي نروحو ؟؟
نسرين: هههههه مستعجل ؟؟
زياد: حاجة زي هكي ههههه
ميار كانت تشوف للغمازة يللي تحبها في زياد لما يضحك .. ابتسمت وقعمزت ع الكرسي ورجعت لواقعها الأليم .. وجدي متزوج عليها التانية :(
انتهت الحفلة بقلبين .. الواحد سكر قلبه الموجوع بألم كبير .. والتاني سكر قلبه بكل فرح وحب <3
,,,,,,,,,,,,,,,,,,,,,,,,,,
روحت ميار لقت وجدي مقعمز ع الصالون يبكي ؟؟؟
ميار: خيرك شن في؟؟
وجدي: ميار سامحيني بالله عليك :(
ميار: شن في؟
وجدي: شوفي هآآ
ميار خدت منه الورقة مكتوب فيها (( مرض الايدز ))
تفاجأت :o
ميار: شني هدا ؟؟
وجدي: هادي الكلبة يللي خديتها عليك .. طلعت مريضة بالايدز وانا ماعنديش علم لين ريتها الورقة هادي بين وراقيها ..
ميار: كيف تأكدت باهي ؟؟
وجدي: رفعتها للمصحة وطلعت فعلا مريضة بالايدز :(
ميار: لا حول ولا قوة الا بالله .. باهي وانت درت تحليل ؟؟
وجدي: الحمد لله ربي نقذني وطلعت النتيجة ايجابية
ابتسمت ميار وضحكتله : الحمد لله
وجدي تغمرها طووول : سامحيني بالله سامحيني .. نوعدك معاد نغلط فيك ولما نعوضك ع كل شي :)
ميار: ههههههه باهي بتقتلني مسامحاااتك خلاااص :)
وجدي: بجد!!
ميار: ايه بجد <3
,,,,,,,,,,,,,,,,,,,,,,,,,,,,,,,,,
فاتت سنـــــة <3 <3
عند غيداء
غيداء: منذررررررررررررر تي جيبلها الجراااي بنتك تعبتني في المطبخ ره
منذر: خيرها بنتي الحلوة تعالي هي .. نجيها طالعة لامها طرف
غيداء: ههههههه .. ماتصدقيشي لولي طالعة لبوك ره
منذر: ربي يخليكم ليا انتم الزوووز يااارب <3
,,,,,,,,,,,,,,,,,,,,,,,,
عند عبير
يوسف: حبيبتي انتي وين ؟؟
عبير: انا في البلكونة نكنس فيها مخليها حالة انت ره :)
يوسف: تفضلي <3
عبير: هآآآ ورد ياحليلي منك .. شن مناسبة باه !!
يوسف: عيد زواجنا الاول ياهبلة ههههههه
عبير: ربي يخليك ليا يااارب <3
,,,,,,,,,,,,,,,,,,,,,,
عند جيداء
ريهام: شن مازالك ماخديتي ؟؟
جيداء: آممممم مازال كندرة الفيلو بس .. اايه نسيت المنظومة
علي: منظومة عينك مافيش اغاني -_-
جيداء: ياماما كلميه :(
ريهام: عندها الحق مش ناقصين حرام احني -_-
جيداء: غير ع هادي توا -_-
علي: هاك شدي فونك محمد يتصل -_-
جيداء: هاته جاي :(
علي: قوليله العرس قريب مافيش داعي دورة دورة يتصل
جيداء: استغفر الله يارب تو نشوفوك انت شن بدير -_-
,,,,,,,,,,,,,,,,,,,,,,,
عند ميار
ميار: وجدي حبيبي قسومي معاك ؟؟
وجدي: ايه بنطلعه لصحابي شويا
ميار: اوكي رد بالك عليه :)
وجدي: وبوه ؟؟
ميار: هههههه يرد باله عليك هههههههههه
وجدي: نجيلي الضحكة ياربي :)
ميار: حي فوني يرن هدا مصعب .. آلو
مصعب: آخ وخيتي .. انتي وين ؟
ميار: في الحوش ؟
مصعب: بنطلعو بنشرو حاجات لعيد ميلاد قسومي
ميار: حي نسيته بكل ههههه باهي يللي فكرتني .. سكر سكر خللي نفكر في عشي :)
,,,,,,,,,,,,,,,,,,,,,,,,,,
عند زياد
نسرين: زيزووو
زياد: نعم ياروحي
نسرين: شوووف :)
زياد: شني بنشوف ؟؟
نسرين: يللي قدامك -_-
زياد: قمر متسمي هههههه وشن تاني
نسرين: ياغبو شوف للورقة هادي
كانت حاطة ورقة ع بطنها ومكتوب فيها (( هنا يوجد طفل <3 ))
زياد: هههههههههههه منين تعلمتي هالحركات ؟؟... اكيد من المسلسلات التركية قلتلك معاش اتابعيهم ههههههه
نسرين: مشناااااك ..
زياد: تعالي جااااي
قامها فوووق وقعد يدوووور بيها
زياد: واخيراااااااااااا بنولي بابا ونوسة بتولي ماما ههههههههههههه
نسرين: يامهبوووول خلاااص دوختني
,,,,,,,,,,,,,,,,,,,,,,,,,,,,,,,,
#وانتهت روايتنا بخيــر وحبــ وسعادة للجميـــع
نتمنى تعجبكــم النهاية ..
مش كل حبيبن لازم مايتلاقو في القفص الذهبي .. هناك #حب يولد بعد جرح عميق ,,
نبيكم تعطوني رايكم في كل حبيبن تعرفتو عليهم في الرواية <3
واعطوني رايكم في الحاجة مريم وصغارها <3
وكل شي غلط ماعجبكمش قولوله نتقبل نقد بناااء باسلووب راقي ومحترم ..
,,,,,,,,,,,,,,,,,,,,,,,,,
تحياااتي ادمونتكم الكاتبة #Dudu
وان شا الله ح تشوفوني في عروض تانية وروايات احسن <3 <3
