شرار الفجر

بارت (٢٠) القرار القاسي

🍀QABAS ADAM🍀للكاتبه
لان عشيره حجي نعمان جده لشرار رفضت انه ياخذون ديه بدل دم ابنهم باعتبار انه حادث مو قتل عمد ورفضو يقدموه للقضاء ويشتكون عليه نظرا لحالته الصحيه التعبانه اضطر شيخ عشيرة النقيب وضاح انه يقدم هالحل اللي يرضي جميع الاطراف بس مجرد ما سمع شرار هالحل صار اسم على مسمى برغم هدوئه ورزانته اللي معروف بيهه وكامت عيونه تجدح نار حس عليه جده وهو يعرفه ومربي على ايديه ودنك وكال لخاطري اقبل بهالحل واللي تريده بعدين سوي اذا عندي مكانه بقلبك ولخاطر اخوك بقبره سد هالسالفه ترة ما تنسد وانت من بعد الله وحيدي ولو شنسوي ماكو غير هالحل واذا ما قبلت بيه راح نضطر نفصل بكم مليون يعني نبيع دم علاء يهون عليك فعلا الجد كان خايف على شرار تنفس بسرعه وبقه يهدي بنفسه ويتعوذ من الشيطان وكطع نوبه غيضه الشيخ صاحب المضيف من كال توكلو على الله واقبلو وكولو يالله وخلي الوجوه الطيبه تتصافى ونكوم على غدانه وغداكم جاهز الجد كال بصوت سمع كل الديوان احنه موافقين ناخذ بنت استاذ حسن فصليه لابني شرار والله يجيب الخير الانظار توجهت على استاذ حسن اللي بسرعه جاوب اني موافق توكلو بالله الشيخ ابو المضيف كام على حيله وكال ((اللهم صلى على محمد وال محمد)) ورد كل اللي بالمضيف الصلاه كال كومو سالمو بعض وتقدم الجد احتراما لوضع ابو فجر وراح كال ان شاء الله هالصله رحم اللي راح تربطنا تبيض الوجوه وتبرد القلوب وتسالمو العشيرتين والشيخ امر بان يصبون الغداء شرار لحد الان منصدم من موافقه ابو فجر وكان يتمنى وبداخله متاكد مراح يقبل بهالحل لان اولا وحيدته وخاصه بهذا وضعه وثانيا صغيرة كلش على الزواج وانطاهه اليه وميعرف عني اي شيء لا عمري لا شغلي لا اخلاقي ودراستهه ومستقبلهه اللي هدمه بموافقته وفوق هذا تروح للبصرة هالطريق البعيد بس اكيد يوافق لان عرف اخلاق بنته ولعبهه وي علاء الله يرحمه فيريد يخلص منهه واكبر دليل انه متعب نفسه يفكر خمس دقايق وابو فجر بقه يفكر بس كال اولا اريد استر عليهه هذا وهي عمرهه (١٦) هلكد مشاكل جابتلي من تكبر شلون واني كنت بقوتي وحيلي وهي سوت كل هالفعايل هسه من تكرمت شلون اكدر عليهه وفوق كل هذا هي على عيبهه مجبور يتقبلهه اخو الميت مستحيل احد ثاني يقبل بيهه

ببيت فجر صاحت ام فجر على فجر وهاي فرصه الهه حتى تحاجي بنتهه وابوهه راح للفصل لان متريد تتصادم وياه ونزلت فجر اللي من يوم ما وصلو من المستشفى ما شافت امهه وجه بوجه امهه تباوع عليهه بالسر والبنت تطمن على امهه وابوهه هم بالختلات و شافت شكد تعبانه وعيونهه حمر من البجي ووجهه احمر نزلت وبسرعه ركضت على حضن امهه مثل السجين من ينطوه افراج كان صوت امهه طوق نجاه ينقذهه من سكوتهه ودموعهه وقهرهه والام حضنتهه والاثنين بدوا ينحبون وكلبو بيتهم فاتحه بدون ميت وبعد شويه هدئن من بجيهن وفرغن اللي بقلبهن وسالتهه لفجر ماما احجيلي الصار وشنو هذا اللي شفناه الرسائل والتلفون والمسجات وبدت تحجي لامهه دمعه وكلمه والام تجري دموعهه وتحاول تفكر بدليل يثبت برائت بنتهه فجر بقت تقسم وتبجي وتحجي صح ارتاحت لان حجت لامهه بس امهه تلوم بيهه ليش من اول مرة حاجاك ما كلتيلنه وليش من اجه يخطب ما فهمتينه وشلون تاخذين منه الرسائل وبقت تبرر والام قلبهه نار لحد ورا الظهر كالت لبنتهه توجهي للصلاه والدعاء واكيد الله ميعوفك وكامت هي وياهه وطلعت برياني طابخته قبل يوم وسوت زلاطه وروبه وبدوا ياكلون وكان اخر غده الهم سويه يوم موتت علاء وبدن ياكلن بس بدون نفس والروح غركانه هموم والبال مزعوج ومكدر والقلب مليان قهر كملن وبدن ينظفن المطبخ سويه وسمعو دكت الباب يعني ابوهه جاء هو وابو امجد يساعده اكيد الام لبست حجابهه وطلعت وللاسف فجر ركضت صعدت لغرفتهه ابوهه اللي كان مجرد ميدخل تركض على حضنه هسه للاسف مضطرة تنهزم منه
🍀QABAS ADAM🍀للكاتبه