Sa mundong makabago na puno ng matitingkad na kolorete, sulat, at paksa o mga konteksto, may lugar ba ang minsang pagiging BLANKO katulad ko?
Ito ay maaring tukuyin bilang isang kompilasyon na naglalaman ng aking mga likha; mga maikling kwento o da...
Oops! This image does not follow our content guidelines. To continue publishing, please remove it or upload a different image.
Blanko: H I N U H A: XIX
I
Sa kaniyang naging paglalakbay, siya ay nabalinguyngoy na rin sa lalim ng inintinding mgabulong ng iba
Siya ay nabinat na rin sa bigat nang naging dala-dala
Sumadsad sa lupa at ang makatayo ay palaisipan pa
Nalunod at nagpadala sa maling agos na sumira sa kaniyang sinasakyang balsa
At nalason at pinuluputan sa leeg ng kaniyang tinuring na kasangga
II
Sa katagalan, siya ay naging takot din mapagod dahil hindi niya na alam kung paano magpahinga
'Di niya alam kung anong uri ng pahinga ang tatalab at makapapawi sa kaniyang iniinda
Kung ito ba'y isang malubhang sakit o karamdaman
O marahil bunga lamang ng kaniyang ka-artehan na ayon na rin sa isa niyang naging KAIBIGAN
III
Siya'y walang ibang tinatago kung hindi ang kaniyang tunay na anyo
Lulong sa isang bisyo na kaniya nang nakabisado—pagbabalat-kayo
May busal at nagapos sa sariling mga tanikala
Hindi makaharap at pilit na nakatutok sa nakaraang mga pagkakamali na kaniyang nagawa
IV
Sa kabila ng lahat, kaniyang pananaghoy ay hindi man lang maka-alingawngaw
Tagong-tago ang iniindang bangungot na gabi-gabi sa kaniya'y dumadalaw
Takot at hinagpis na kailanma'y hindi siya nilubayan
At sa tunay na kasiyahan, siya'y pinagkaitan
V
Marahil hindi na rin mabilang ang kaniyang naging mga hinuha bago pa man siya tumungtong sa ganitong edad
Ngunit ito raw ay hindi pa sapat kung nanaisin niyang ganap na maka-usad
Ilang dangkal na rin siguro ng ekspektasyon mula sa kaniyang paligid ang kaniyang nilunok
Gramo-gramo na rin ng kaniyang ilang mga pangarap ang naliyaban at tuluyang natupok
VI
Ngunit kahit saang banda tignan, siya ay nasa unang pagbuklat pa lamang ng kaniyang libro
Siya ay nasa unang bahagi pa lamang ng pagkatuto
Dahil ang lahat ng ito ay hindi pa maituturing bilang bahagi ng tunggalian ng kaniyang kwento
Ipagpatuloy mo ang iyong paglalayag, Yazar, dahil hindi pa ito ang inaasam mong dulo
- - -
Oops! This image does not follow our content guidelines. To continue publishing, please remove it or upload a different image.
Isang tula na aking kinatha bilang aking munting regalo sa aking sarili naging kaarawan. Ang bawat saknong ay aking siniksik ng mga bagay-bagay, paniniwala, at mga ideolohiya na aking napagtanto at natutuhan mula kamusmusan. 'ika ko nga, ako ay nasa unang pagbuklat pa lamang at marami pa akong dapat na matutuhan sa mundo, mga karanasan na hindi ko pa nasusubukan at nanatiling misteryo na patuloy pa ring naglalaro at laman ng aking mga palaisipan.
Sa ganitong edad, tunay na ang bilang ng mga naging hinuha na laman ngayon ng aking isipan ay hindi kailanman mapapantayan ng aking mga daliri sa kamay maging isama pa ang aking mga daliri sa paa kung susumahin, hindi rin ito magkakasya sa aking mga palad sa dami kung pagbubugkusin. Gayundin ang aking mga pagkakamali, pagkabigo, tagumpay, at mga pagkatalo sa buhay.