كرونيك: مهمتي_دمرت_حياتي

05

✍مهمتي دمرت حياتي✍

الجزء 5:
راكبة مع الشيفور حاطة راسها على الزجاج وتخمم ،تحس بشوي خوف شوي ارتباك ومش عارفة هالناس رح يتقبلوها وتنجح في مهمتها ولالا. بعد ساعات من الطريق لي ماحستش بيها خلاص سمعت صوت الشيفور وهو يقلها وصلنا مادموزيل، نزلت وقفت قدام فيلا كبيرة دايرة بيها جردة واسعة و وراها بحيرة، منظر ساحر.تقدمت للباب ودقت شوي وفتحت الخدامة: تفضلي مدموزال.
ميرنا: صباح الخير. هنا دار لافامي المرجاني!!
الخدامة: وي مدموزال شكون تحتاجي؟
ميرنا: اذا مدام زهرة هنا قلها تسنيم الطهراوي بغات تشوفك.
الخدامة: اوك استناي شوي.
تفضلي مدموزال تسنيم مدام زهرة تستنا فيك فالصالة.

كانت زهرة قاعدة فالصالة حاطة نظارات العمر وتتفرج في مجلة كي جاتها الخدامة: لالة زهرة كاينة شابة قالت اسمها تسنيم الطهراوي بغات تشوفك.
تعجبت زهرة ولي زاد ادهشها لقب الطفلة وبدا سؤال يدور في بالها "يعني تكون قريبة سي ابراهيم ولا يمكن بنتو!!! "
قالت للخدامة دخلها عندها. شوي ودخلت طفلة عشرينية جمالها طبيعي وبريء تقول ملاك. اما زهرة فهي مراة كبيرة فالعمر لكن مزالت شادة روحها جمال واناقة . تبسمو لبعضاهم ووقفت زهرة سلمت على تسنيم.
تسنيم: صباح الخير مدام سامحيني جيت من غير موعد هذا وين وصلت من السفر. انا تسنيم الطهراوي حفيدة سي ابراهيم الطهراوي نشالله تكوني تفكرتيه!!؛
زهرة: مرحبا بيك بنتي. اكيد تفكرتو سي ابراهيم صديق العايلة تفضلي اقعدي بنتي.
تسنيم: (بتبسيمة) شكرا مدام. صراحة بعثني جدي ومعايا ظرف قالي مديه لمدام زهرة كي توصلي.
خرجاتو من صاكها ومدتهولها فتحاتو زهرة وقرات الاتي "السلام عليكم زهرة،
نشالله تكوني بخير وصحتك مليحة، تسنيم بنت ولدي احمد حفيدتي الوحيدة بعد ماتوفى خوها هي لي بقاتلنا. اضطرت تكمل قرايتها بعيد علينا في مدينتكم وكيما تعرفيني مانقدرش نوقف في طريق مستقبلها سمحتلها تجي تكمل تقرى ثما بصح منيش رح نكون مطمن من ناحيتها اذا سكنت وحدها ولا في السكن الجامعي، خطرتيلي نتي في بالي نتمنى ماتردينيش، رح نطلب منك تخليها معاك وتحت عينيك وتهلاي فيها راهي عينيا حتى تكمل قرايتها هاذ العام. نعرف بلي ماكيش رح ترديني خاطر واثق انك مانسيتيش ايامنا كيما انا مانسيتهمش،اتهلاي في روحك😘"
حطت الرسالة وبدات تتذكر لما كانت شابة فالعشرينات تماما كيما تسنيم و تتخبى على دارهم بش تخرج تتلاقى سي ابراهيم في الجهة الخلفية من النهر لي فالقرية وتذكرت الابيات الشعرية لي كان يديرهملها على جالها وكي يعيطلها زهرتي اسم كان يدلعها بيه، الاسم لي من سنوات عدييييدة ماسمعاتوش حتى راجلها المرحوم مكانتش تخليه يدلعها بيه بالنسبة ليها هو ذكرى من الرجل الوحيد لي دخل قلبها وسكنو وهو الوحيد لي عندو حق يدلعها بيه. ولو مش الظروف لي بعدتهم واضطرت تتزوج من المرحوم راجلها راهي ذرك مرت ابراهيم و تسنيم حفيدتها حتى هي.
فيقها من سهوتها صوت ميرنا ولا خلي نقولو تسنيم لي تعجبت من شرود زهرة والفضول كلاها وندمت كي مافتحتش الرسالة وقراتها قبل ما تمدها ل زهرة.
تسنيم: مدام زهرة راكي مليحة؟
زهرة تبسمت: مليحة بنتي مرحبا بيك معانا من اليوم نتي وحدة من احفادي وعتابري الدار دارك وخوذي راحتك. وبلا رسميات لالة ومدام، عيطيلي جدة😊
تسنيم ردتلها الابتسامة: شكرا بزاف الله يخليك.
زهرة: رح نعيط للخدامة توجدلك غرفة تكون مريحة ترتاحي فيها باينة تعبتي من السفر. بين ما يجيو احفادي ونعرفك عليهم اكيد رح تلقاي راحتك معاهم.
تسنيم: شكرا نشالله.
كملو يهدرو على امور عامة وزهرة مرة على مرة تسقسي تسنيم على قرايتها ولا عمرها وساعات على سي ابراهيم، وهي كل مرة تحاول تجاوب باقصر جواب بش ماتضطرش تكذب اكثر لانو اعدى حاجة عندها هي الكذب.